Mpiin 2
2
1Kina le Uwumbɔr nan naan kitaapaak, ni kitiŋ, ni tiwan mɔmɔk doo. 2Winlole daal, le Uwumbɔr nan tun lituln mɔmɔk doo, ki kal fuur. 3Uwumbɔr nan ŋa tinyoor ŋa winlole daal pu ki ŋa mu chain, ba pu? waah nan naan dulnyaa aawan mɔmɔk doo na, liyaadaal ngbaan le u kal ki fuur. 4Uwumbɔr nan naan dulnyaa aawan mɔmɔk kina la.
Edenn Aasaak aabɔr
Buyoonn Tidindaan Uwumbɔr nan naan dulnyaa aawan mɔmɔk na, 5tiwanpunnkaan ni nwanbim aa nan kee punni, ba pu? Uwumbɔr aa nan kee cha utaal nu, uja mu aa nan bi ki ga ko kisaak; 6limaln le nan lir kitiŋ pu le ki soon.
7Uwumbɔr nan di titan ki di naan uja#2.7: Baaliin ni, “titan” ni “uja” naan la. Titan ye “adama” le “uja” ye “adam.”, le ki fuur libuln ŋa umɔfal ni, le u kpaln unibɔn.#2.7: Lik 1 Korint Yaab 15.45.
8Uwumbɔr nan ŋa isui i lu ŋisubil na aasaak, liwipuul wɔb, Edenn aatiŋ ni, le ki di waah naan uja u na ŋa ki ponn ni. 9Uwumbɔr nan cha isui i lu ŋisubil nyaan na aabɔŋ punn kisaak ngbaan ni, ŋisubil ngbaan ŋan linimbil chee, ki mɔ lijil. Kisaak ngbaan aakaasisik ni, busub bubaa nan bi, ki ye limɔfal aasub, buken mu nan bi ki ye mbeem aasub, unii yaa jin bu kan, u ga bee ni ŋan na, ni ni kaa ŋan na.#2.9: “ni ŋan na, ni ni kaa ŋan na” bee “tiwan mɔmɔk”.
10Limɔɔl libaa nan bi Edenn aatiŋ ngbaan ni, ki puu lir kisaak ngbaan ni. Limɔɔl ngbaan aah nyan kitiŋ ngbaan ni na, le li yakr ki ŋa ŋimɔɔ ŋinaa. 11Bi yin njan aapaln ke Pisonn, li nan puu dii Hafila aatiŋ ni la. 12Salmaa nyaan, ni tulalee, ni ŋitakpanyaan le nan bi nima. 13Bi yin lelee aapaln ke Gihonn, li nan puu dii Kus aatiŋ ni la. 14Bi yin taataa aapaln ke Tigris, li nan puu dii Asiria aawipuul wɔb la; le bi yin linanar ke Yufrates.
15Uwumbɔr nan di uja ngbaan ŋa kisaak ngbaan ni, ke u li ko, ki li lik kisaak ngbaan. 16Uwumbɔr nan bui u ke, “Aa ga ŋmaa ji ŋisubil ŋi mɔmɔk bi kisaak kee ponn ni na, 17see busub bu aasubil cha unii beer ni ŋan na, ni ni kaa ŋan na. Aa taa ji busub ngbaan aasubil. Aa yaa jin kan, see aa kpo.”#2.17: “ni ŋan na, ni ni kaa ŋan na” bee “tiwan mɔmɔk”.
18Tidindaan Uwumbɔr nan ki bui ke, “Naa ŋan ke uja li bi ubaa. M ga naan uŋeer u ga li ter u na ki tii u.” 19Uwumbɔr nan di titan le ki di naan tiwakor, ni ipeel, ni inyoon, ni tiwan nimɔk fu na. Le u di ni mɔmɔk dan uja ngbaan chee, le uja ngbaan tii ni ŋiyimbil. Waah yin ni mɔmɔk pu na, naayimbil le na. 20Le uja ngbaan nan yin tiwakor, ni ipeel, ni inyoon, ni tiwan nimɔk fu na aayimbil; tɔ, tiwan ngbaan mɔmɔk ponn ni nibaa aa nan ye uŋeer, ki ga ŋmaa ter u.
21Uwumbɔr nan cha uja ngbaan doon geen, ke linikpol na. Waah geen kina na, le u chuu nyan uja ngbaan aasikaakpab mubaa#2.21: “uja ngbaan aasikaakpab mubaa”—baaliin ni, bi ŋmee ke, “uja ngbaan aasikakl siib”., ki ki giin ŋeeb. 22Uwumbɔr nan di nsikaakpab#2.22: “nsikaakpab” bee “waasikakl siib”. na, ki di naan upii. Uja ngbaan aah finn na, le Uwumbɔr di upii ngbaan dan u chee. 23Le uja ngbaan bui ke,
“Aa ye unii le ke maah ye pu na,
likpabl li nyan ni maakpab ni na,
ni tiwon ti ye maawon na.
M ga yin si ke upii, ba pu?
aa nyan ni mi uja ni la.”#2.23: Baaliin ni, “uja” ni “upii” naan la.
24Nima pu le ni ŋan ke uja ni upuu nya cha bitetiib ni binatiib, ki kpaan tɔb chee, ki ŋa unibaan.#2.24: Lik Matiu 19.5; Mak 10.7-8; 1 Korint Yaab 6.16; Efesus Yaab 5.31.
25Le uja ni upii nan chuun biŋmeen, kaa san inimɔɔn.
Одоогоор Сонгогдсон:
Mpiin 2: xonB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©1998, 2014 Wycliffe Bible Translators, Inc. All rights reserved.
