མ་ཏི། 5-ын алдартай Библийн эшлэлүүд

Хуваалцах

སོ་ངོ་གི་ ལ་ཝང་ཐོག་ཐཱན་ ཤོ་མ་གི་ བུག་ཐ་ལུ་མཱན༌ཅ། དག་པ་ཀབ་ཉི་ ཕའི་ནང་ཀ་ཆོ་ཁཱན་ ཐམས་ཅན་རང་ དབང་པེ་དེན་གེ་ ག་ཙ་ཐུང་ཀ་ཀེ་ཉི་ཐཱན༌ཅ། ཨུ་ཉུ་པུརུས་ཀིན་ཨ་ཉི་ ན་ཧ་འོད་ཟེར་ སོ་ངོ་བ་ཀ་གུབ་ཀ་ཤར༌ཤོ། ན་ཤི་ཨ་ཁཱན་ལའི་ལེག་པུ་ཁེ་པ་ རོག་ཏེ་བ་ཀི་ཐོང་ཉི་ ཞིང་ཁམས་ག་བཞུགས་ཁཱན་ ན་ཧ་ཡབ་ག་ བསྟོད་པ་ཕུལ་ཆེན༎

ན་ཧ་བ་ཤོ་ འཛམ་གླིང་ག་ འོད་ཟེར་གི༌ལ། ཕུ་ཐུང་ཀ་ཆག་ཁཱན་ ཁྲོམ་ཆེན་ཁེ་པ་ གུམ་ཐ་ལེ་མར་བ།

སེམས་ཙང་མ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་མཇལ་བེ་རེ༌བེ།

དཀོན་མཆོག་ག་སྤྱན་ག་ དྲང་པུ་རི་ལེ་དེན་གེ་ བི་ནང་ཁུ་ཉི་ རི་ནང་སོབ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ ཚིམ་པ་རི༌ལེ།

དག་པ་ཀབ་ཉི་ ཇི་གི་ ན་ཧ་ཡེག་པེ་ ན་ཧ་དགྲ་བྱང་ཕིཤི་བ་ཕང་ཅོ། ཉི་ན་ཧ་ ཀ་ལུ་ཏཱད་ཁཱན་བ་ཀ་དེན་གེ་ སྨོན་ལམ་ཏབ་ཅོ།

ཐུགས་ཉིད་ག་དུག་པུ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ཤོ་ རོག་ཏེ་བ་ཀ་གི༌ལ།

སྐྱིད་པུ་ཅོད་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ དཀོན་མཆོག་ག་ སྲས་སྲས་མོ་ཨ་ཉི་ཆིན༌མེ།

གེབ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ སེམས་གསོ་ཨ་ཉི་གནང་མེ༌ཅ།

དཀོན་མཆོག་ག་སྤྱན་ག་ དྲང་པུ་རི་ལེ་གོད་པ་ཀབ་ཉི་ ཀ་ལུ་ཏཱད་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ཤོ་ རོག་ཏེ་བ་ཀ་གི༌ལ།

སྙིང་རྗེ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ཀ་བུ་ སྙིང་རྗེ་ཀེ་ཉི་གནང༌མེ།

ཇ་ག་ཡོར་ཀེ་ སོ་ངོ་བ་ཀི་ ན་ཧ་མེམ་ཅོར་ཉི་ ཀ་ལུ་ཅོད་ཉི་ ཉི་ན་ཧ་ཀོར་གེ་ སོ་ད་ཕི་ཉི་ ཨ་ལ་ཀབ་ཉི་ ན་ཧ་བ་ཤོ་ བྱིན་རླབས་ཅན་གི༌ལ། ཨུ་ཉུ་གང་ཀ་ ཤོ་ནང་ཕེ་ཉི་ ངལ་རངས་ཉི་ཆོའི། ཧང་ཡ་དག་ནེ་ལ་ ན་ཧ་དེན་གེ་ ཞིང་ཁམས་ག་ སེ་རབ་ཆི་ལུ་ཐ་ཝ༌ཅ། ན་ཧ་བ་ཀེ་གོ་མ་ཆོ་ཁཱན་ ལུང་བསྟན་པ་བ་ཀ་བུ་ རོག་ཏེ་བ་ཀི་ ཨོ་ཉེན་རང་ མ་ལེག་པ་ཨ་ཝ་ཆོ་ཝ༎

ཉམ་ཆུང་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ འཛམ་གླིང་ རོག་ཏེ་བ་ཀི་ཉོང༌པེ།

ན་ཧ་བ་ཤོ་ འཛམ་གླིང་ག་ཨིན་ཆ་གི༌ལ། དག་པ་ཀབ་ཉི་ ཨིན་ཆ་ག་བོརོ་མ་ཝ་རི་ནེ་ལ་ ཧང་ཏེན་ཨ་ཉི་ལོག་ཉི་རང་ བོརོ་ཆོ་ཝ་ཅོད་པེ་རེ་བེ་ཡ། ཨོ་ཉ་ཨིན་ཆ་ཁེ་པ་ ལའི་ཧང་རང་མ་ན་ཝ་རི་ཉི་ གེམ་ཀུན་ཏི་ལེ་ཁེན༌ཅ། ཉི་སོ་ངོ་བ་ཀི་ ཨོ་ཉ་ཨིན་ཆ་ཐུང་ཐུང་ བི་ཏབ་ཉི་རང་བུ༌ལེ།

ན་ཧ་བ་ཤོ་ ཅོན་ད་སུ་རང་མ་ཝ་ཨོ་ཕེ་ཁེ༌ལེ། ཧང་ཡ་དག་ནེ་ལ་ ཞིང་ཁམས་ག་བཞུགས་ཁཱན་ ན་ཧ་ཡབ་བུ་ ཅོན་ད་སུ་རང་མ་ཝ༌ཅ༎

དག་པ་ཀབ་ཉི་ ན་ཧ་ལན་ཤོ་ གི་ནེ་ལ་གི་ལ་ ཉི་མང་གི་ནེ་ལ་མང་གི་ཨ་ཉི་ ཨོ་ཕེ་ཁེ༌ལེ། ཉི་ཨོ་ཐ་གེ་ལག་ཉི་ཆོ་ནེ་ལ་ ངན་པ་གེ་གི༌ལ༎

ཨི་བི་གི་ ན་ག་མིང་ཕོག་པ་ཐུར་ རོ་ཀ་མིང་བུ་ཕོག་ཅོ། ཉི་ཨི་བི་གི་ ན་ག་ཤ་ཕོད་པ་ཐུར་ རོ་ཀ་བུ་ ཤ་ཕོད་ཉི་གེམ་ཤོ་དག་ཉི་ མོ་ས་ག་བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། དག་པ་ཀབ་ཉི་ ཇི་གི་ ན་ག་ཡེག་ཅ་ ངན་པ་སོ་ངོ་མ་ཁག་ཅོ། ལག་ཏང་ རོ་ཀི་ ན་ག་ལ་ཉོང་ལོ་ཀ་ ནེ་ཟ་ག་དེན་ཇ་ཀི་ཕིན་ག་ནེ་ལ་ མི་ཉོང་ལོ་ཀ་ནེ་ཟ་བུ་གིར་ཉི་ དོག་ཅོ་ཨ༌ཉི།

ན་ཧ་མིང་ལོག་ཐུར་གི་ སྡིག་པ་ཨ་ལེ་རིག་ནེ་ལ་ ཨོ་ཉ་མིང་ཁེ་པ་ ཇེག་ཐཱན་གེམ་ཀུན་ཏི། ན་ཧ་ལུས་པུ་ ཐམས་ཅན་རང་ དམྱལ་བ་ག་དི་ཝ་གེ་ཏ་ མིང་ལོག་ཐུར་མ་ཝ་ཨ་ཉི་ཆོ་ཝ་དྲག༌པེ། ཉི་ན་ཧ་ག་དང་ལ་ཉོང་གི་ སྡིག་པ་ཨ་ལེ་རིག་ནེ་ལ་ ཨོ་ཉ་ག་དང་ལ་ཉོང་ཁེ་པ་ ཅཱད་གེམ་ཀུན་ཏི། ན་ཧ་ལུས་པུ་ ཐམས་ཅན་རང་ དམྱལ་བ་ག་དི་ཝ་གེ་ཏ་ ག་དང་ལོག་ཐུར་མ་ཝ་ཨ་ཉི་ཆོ་ཝ་དྲག༌པེ༎