लूकाल 3-ын алдартай Библийн эшлэлүүд

Хуваалцах

योर्दन बेरेटे योहान वेल्‍लेन लोकुल्‍कुंक बापतिस्मा हीसेक मत्‍तोर. अस्‍के येसुगुडा अगा वासि योहानुना कय्‍दे बापतिस्मा एततोर. बापतिस्मा एततंका येसु पारतना कियनेंके मब्बु अंता बैय्यरा आता. अस्‍के पवित्र आत्मा पावरेम पिट्‍टे रूपमते वासि ओनपोर्रो रेयतस्के, स्वर्गमताल उंदि अल्किर इल्‍हा केंजावाता. “निमे नावा पावरमगल्‍ला मर्रिन आंदिन, नना नीकुन वेल्‍लेन जीवा कींतन, नीवा लोप्पो नना वेल्‍लेन आनंदमते मंतन.”

अस्‍के योहान ओरा मनसुना विचारमतुन एरपाट कीसि ओर अंटोर्कुन, “नना अय्ते मीकु बापतिस्मा एततोने हींतन. गानि बोर अय्ते वायानोर मंतोर, ओर नाकन्‍ना एक्‍को ताकततोर मंतोर. ओर केरसि मत्‍ता हेरपुह्कुन इट्‍टना विलुवागुडा नाकु हिल्‍ले. ओर मीकु पवित्र आत्मा आनि तळमितोनि बापतिस्मा हींतोर.

अय्ते मरि, निजमे मीवा मनसु मार्सुकुत्‍तिर इंचि रुजुव कीसि हुप्‍सट. वट्‍टिदे, मोमोट अब्राहामुना वंसमतोरम आंदुम, इंचि बस्‍केने इनकुनमट. नना मीकु निजम वेहांतन, पेन अब्राहामनाहाटीं ई बंडानालगुडा पिलाल्क पुट्‍टिचि हिया परंता.

इंदके मराकुना हिह्‍कुनगा मर्सु इरसि मंता. बव मराकुंक अय्ते बेसता पंडिं हादोंगों, अवुन नर्किसि तडमिते वाटमळ जर्गंता,” इंचि इत्‍तोर.

इल्‍हा यसायाह इनना पेनदा कबुरतोर वेल्‍लेन वर्सां मुन्‍ने रासतद इंदके निजम आता. अद पोल्‍ले इल्‍हा मत्‍ता: “बय्‍लि जेगाते केयानद उंदि अल्किर केंजा वांता, सामि मीवा मनसुने वायनाहाटीं हर्रि तयार कीम्‍ट, इंका ओना हर्कुन सवरगा कीम्‍ट. इत्‍ते, अन्‍नि लोद्‍दिं-लोंका निंडमळ गावाले, अन्‍नि गुट्‍टां-गट्‍टुक समानम आयमळ गावाले. वंकर-डिंकर मत्‍ता हर्कु अन्‍नि, सवरगा आयमळ गावाले. उतार-बोगडा मत्‍ता हर्कुगुडा, समानम आयमळ गावाले. अस्‍के अंटोर लोकुल्‍क पेन मुक्‍ति हियानदुन हूळंतुर.”