Yohanes 1-ын алдартай Библийн эшлэлүүд

Хуваалцах

Pei re’e tau to masanang mangantima Ia pasi to mangaya mangkonong Ia, wali samparia tau to etu Ia mangawaika kuasa damawali ana i mPue Allah.

Wali ri pomulanya, tempo lino si’i tawa rapapowali, tempo etu re’emo Ia to rato’oka i Tuntu i mPue Allah. I Tuntu etu, Ia re’e siwaka pei i Pue Allah pasi Ia Allah seja.

Apa tempo to lino tawa mangansani songka i mPue Allah, tempo etu sira raporapaka ewa tau to malinja ri raya mburi. Pei ojo kama’i i nTuntu to raporapaka ewa pansona, Ia mangkeni reme to mampakareme ri raya mburi etu. Pasi wuri etu taa nakoto manganangi reme to Ia mangkeni.

Wali Ia to rato’oka i Tuntu, Ia nawali seja to lino pasi Ia re’e maroo ri oyo ngkita. Tempo Ia maroo ri oyo ngkita etu Ia bae kojo kanotoNya resi tau pasi samparia to to’oNya paka monso pu’u. Pasi tempo Ia maroo ri oyo ngkita etu, kita re’e mangkita Ia bae kojo kuasaNya. Wali bae kojo kuasaNya etu apa Ia Ana i mPue Allah to samba’aja, to ma’i napokau mPa’aNya etu.

Pasi tempo i Pue Allah nampapowali samparia, tempo etu Ia mangampake i Tuntu semo mangika palaong to etu. Wali tare anu to napapowali i mPue Allah to si’a i Tuntu to mangika. Wali Ia to rato’oka i Tuntu, Ia semo mangawai katuwu to monso. Wali Ia maya raporapaka ewa pansona to mampakaremeka to lino jaya, apa Ia semo to mampakanasaka resi to lino songka i mPue Allah see sira maya mangarata katuwu to monso etu.

Wali yako etu, ojo kaeonya wo’u rao i Yohanes mangkita i Yesu ma’i mangampago ia. Wali ia mangansani i Yesu semo to damawali pampue nu dosa ewa ana nu domba to napampueka ntau resi i Pue Allah ane sira mangika dosa. Wali see naka ia manganto’oka tau boros, “Lo’aja tau etu! Ia semo Ana nu Domba to nawai i mPue Allah, Ia ma’i damangansompo dosa nto lino!

Wali Ia to rato’oka i Reme etu, Ia semo to nampapowali lino si’i. Pei nempo ewa wetu, tempo Ia rata ri lino, to lino bo’onya mampongakung i sema kamonsonya Ia. Pasi tempo Ia ma’i ri tana nu bansa to si Ia, tempo etu kaborosinya yunuNya ri tana etu taa mangantima Ia.

Wali i Reme to napakarebaka i Yohanes etu, Ia Reme to monso to ma’i ri lino si’i. I Reme etu ma’i damampaponsanika samparia tau mangkonong jaya i mPue Allah ewa naika mpansona mampakaremeka tau jaya ri raya mburi.

Apa bae batuanginya porenta i mPue Allah to naporataka i Musa bue-bue ngkita tempo owi. Pei nempo bae batuanginya porenta etu, bae wo’u batuanginya kanoto i mPue Allah to napaponsanika i Yesu Kerisitu kita ri tempo si’i. Pasi bae wo’u batuanginya samparia anu to to’oNya mangkonong i Pue Allah, pasi samparia to to’oNya etu paka monso pu’u.