Yakkha 2023 WBT/NEBS  (NT) Drama

इलेन येसु लाम्‍साङ् खेॽमास्‍यानिङ् वायानिङ् नाहाङ्‌तोना एको मिक्‍सुरुम्‍बा याॽमि निसु॥ उका चेलाचिङा उङ् न्‍छिम्‍दु, “चिन्‍खुबा, इसाङा पाप चोगुहोङ् ना याॽमि वायानिङ् खाॽला मिक्‍सुरुम्‍बा वायाना, नाङायेम नागा उप्‍पा-उमाङायेम?”
येसुङा लुचि, “उङा पाप चोगुहोङ् चा मेन, उका उप्‍पा-उमाङा पाप चोगाचुहोङ् चा मेन्‍ना, ङ्‌खाॽनिङ्‌गो ना याॽमिगा हिङ्‌लुङ्‌बे निङ्‌वाफुमागा काम ओॽनिभोङ्‌माङ् खाॽला लेक्‍साहा ओम॥ का पाङ्‌खुबागा काम कानिङ् ओम वानुङ् चोक्‍माहा॥ कुइम लेङ्‌मेहोङ् इसाङा चा काम चोक्‍सा ङ्‌यास्‍वानिन्‍हा॥ कायुङ्‌लेनबे वाङानुङ् कामाङ् कायुङ्‌लेनगा ओम्‍नाङान॥”
खा चेॽया लुइचिहोङ् येसुङा खामबे थोक्‍तु, न्‍हाङा ओथोक्‍माङा खाम पोतुहोङ् न्‍ना मिक्‍सुरुम्‍बागा उमिकचिबे नेक्‍तुबि॥ न्‍हाङ् येसुङा लु, “ख्‍या, सिलोआमगा (सिलोआमगा तुम्‍बिला ओम पाक्‍साना) पोखारिबे ख्‍याघोङ् न्‍नाचिक वासि॥” न्‍ना याॽमिङा ख्‍याहोङ् उनाचिक वासि, न्‍हाङ् निखुबा लेक्‍साराया॥
न्‍नागा पाङ्‌निवाकचि नुङ् उङ् नाक्‍ताचायाना निखुबाचिङा ङ्‌गाया, “मेन्‍ना ना गो न्‍ना नाङ्‌चाखुबा याॽमि मेन्‍नायि?” इखिङ्‌ङा ङ्‌गाया, “ओम्‍बा, ना न्‍ना नाङ्‌चाखुबा माङ् ओम॥” न्‍हाङा इखिङ्‌ङा च्‍हेन ङ्‌गाया, “ङ्‌खाॽलाना च्‍हेन ओम, न्‍ना गो मेन्‍ना॥”
ङ्‌खाॽनिङ्‌गो उङ् आफाइङा लुचि, “का न्‍ना याॽमिङान॥”
न्‍हाङा ङ्‌खाचिङा न्‍छिम्‍दु, “ङ्‌खाॽलाभोङ् इमिन म्‍मिकङा निखुबा लेक्‍सागाना?”
उङा लुचि, “येसु बाङ्‌ना एको याॽमिङा खाम पोतुहोङ् आमिकपे नेक्‍ताब्‍याङ् न्‍हाङा सिलोआमगा पोखारिबे ख्‍याघोङ् न्‍नाचिक वासि लुयाङ्, न्‍हाङा का न्‍नाबे ख्‍याङ्‌होङ् आनाचिक वासिङ्‌होङ् सोलोक निखुबा लेक्‍साङ्‌ना॥”
उङ्‌चिङा न्‍छिम्‍दु, “न्‍ना याॽमि च्‍हेन हेॽने ख्‍याना?”
न्‍नाङा लुचि, “इस्‍साङ् का था मान्‍ना॥”
न्‍हाङा ओन्‍दाङ् मिक्‍सुरुम्‍बा सायाना न्‍ना याॽमि ङ्‌खाचिङा फारिसिचिगाबे ङ्‌खेतु॥ येसुङा खाम पोतुहोङ् न्‍ना याॽमि नुमेतुना लेन आराम चोक्‍माना लेन साया॥ ङ्‌खिङ्‌बेला ङ्‌खा फारिसिचिङा न्‍छिम्‍दु, “न्‍दा इमिन म्‍मिकङा निखुबा लेक्‍सागाना?”
न्‍नाङा लुचि, “येसु बाङ्‌ना याॽमिङा खाम पोतुहोङ् आमिकपे नेक्‍ताब्‍याङ्, न्‍हाङा का वासिङ्‌होङ् निखुबा लेक्‍साङ्‌ना॥”
कोइ-कोइ फारिसिचिङा ङ्‌गाया, “न्‍ना नुमेखुबा याॽमि निङ्‌वाफुमाभाङ् तायाना मेन्‍ना, इजाङ्‌बाङ्‌निङ् न्‍नाङा आराम चोक्‍माना लेनबे काम चोग्‍वाहा॥”
ङ्‌खाॽनिङ्‌गो हेकोहाचिङा ङ्‌गाया, “पापि याॽमिङा चा खाॽलाहा आच्‍चाम्‍माहा काम चोक्‍मा यास्‍वाहायि?” खाॽला उङ्‌चि उङ्‌चिगा निङ्‌वा न्‍दोङान॥
ङ्‌खाचिङा फेरि इमा न्‍ना याॽमि न्‍छिम्‍दु, “न्‍ना याॽमिङा म्‍मिकचि नुमेताब्‍यामागा, हाकु न्‍दा उका उतुम्‍बे इ कामेकाना?”
उङा लुचि, “उङ् निङ्‌वाफुमाभाङ् चेक्‍खुबा ओम॥”
ङ्‌खाॽनिङ्‌गो याहुदि हाङ्‌गुम्‍बाचिङा उङ् मिक्‍सुरुम्‍बा साया, न्‍हाङ् हाकु निमा याखुबा लेक्‍सामाना बाङ्‌ना चेॽया पात्‍ते न्‍जोगुनिन॥ न्‍हाङामाङ् ङ्‌खाचिङा न्‍ना याॽमिगा उप्‍पा-उमा ङ्‌गाचिहोङ् न्‍छिम्‍दुचि, “इना ना न्‍जिङ्‌च्‍या ओम? ना वायानिङ् नाहाङ्‌तो मिक्‍सुरुम्‍बा सायाना? ङ्‌खाॽलाभोङ् इमिन निखुबा लेक्‍साना?”
उप्‍पा-उमाङा लुयाचुचि, “ओम्‍बा, ना आन्‍चिङ्‌गा च्‍या ओम, ना वायानिङ् माङ् मिक्‍सुरुम्‍बा सायाना॥ ङ्‌खाॽनिङ्‌गो हाकु ना इमिन निखुबा लेक्‍साना, इसाङा उमिक निखुबा चोगुना? ङ्‌खा गो कान्‍चिङ् था मान्‍ना॥ ना पिछा मेन, उङ् आफाइ कामा यामे, न्‍निङ्‌दामाङ् छिम्‍दानुम॥” याहुदिचिनुङ् किसिताचिहोङ् न्‍ना याॽमिगा उप्‍पा-उमाङा ङ्‌खाॽला लुयाचुचि॥ इजाङ्‌बाङ्‌निङ् इसाङा उङ् खिरिस्‍ट ओमभोङ् सुइकार चोग्‍वा, न्‍ना याॽमि छुम्‍पाङ्‌भाङ् लोन्‍नाहाङ्‌माना भोङ् ओन्‍दाङ्‌माङ् याहुदिचिङा चेॽया ङ्‌हुप्‍तुक्‍सा॥ ङ्‌खोङ्‌माङ् उप्‍पा-उमाङा खाॽला लुयाचुचि, “ना पिछा मेन, उङ् आफाइ कामा यामे, न्‍निङ्‌दामाङ् छिम्‍दानुम॥”
न्‍हाङा याहुदि हाङ्‌गुम्‍बाचिङा न्‍ना मिक्‍सुरुम्‍बा फेरि ङ्‌गाहोङ् न्‍लु, “न्‍दा जेप्‍पा चेॽया कायाघोङ् निङ्‌वाफुमा माहिमा पि॥ कानिङ् था वान्‍ने, न्‍ना येसु बाङ्‌ना याॽमि जेप्‍पा पापि ओम॥”
न्‍नाङा लुचि, “उङ् पापि ओम्‍येम मेन्‍नायेम न्‍ना गो का था मान, ङ्‌खाॽनिङ्‌गो एको चेॽया च्‍हेन का था वेॽना, का मिक्‍सुरुम्‍बा सायाङ्, हाकु निखुबा लेक्‍सामाङ्॥”
ङ्‌खाचिङा फेरि न्‍छिम्‍दु, “उङा न्‍दा इ चोगागाना? उङा न्‍दा इमिन्‍होङ् म्‍मिक निखुबा चोगागाना?”
न्‍नाङा लुचि, “का खेम्‍माङ् लुॽनिनेनिन्‍हा, ङ्‌खाॽनिङ्‌गो न्‍निङ्‌दा ङ्‌खेप्‍सुम्‍गान॥ फेरि इजाङ् ङ्‌खा चेॽया छिम्‍नुङ्‌मेकाहा? इना न्‍निङ्‌दा चा उका चेला लेङ्‌मा मितिमिघायि?”
उका ओचेॽया ङ्‌खेप्‍सुहोङ् ङ्‌खाचिङा थिन्‍साङ् न्‍लु, “न्‍दा ले न्‍ना याॽमिगा चेलागान, ङ्‌खाॽनिङ्‌गो कानिङ् गो मोसागा चेला सिङान॥ मोसानुङ् निङ्‌वाफुमा चेक्‍ताना चेॽया कानिङ् था वान्‍ने, ङ्‌खाॽनिङ्‌गो ना याॽमि हेॽनाहाङ् तायाना ओम कानिङ् था मान्‍ना॥”
न्‍हाङ् न्‍ना याॽमिङा लुचि, “इखिङ् आच्‍चाम्‍माना चेॽया! उङ् हेॽनाहाङ् तायाना ओम न्‍निङ्‌दा था मान, ङ्‌खोङ्‌चा उङा का निखुबा चोगाङ्‌ना॥ निङ्‌वाफुमाङा पापिचिगा चेॽया ङ्‌खेप्‍स्‍वान्‍हा बाङ्‌ना चेॽया कानिङ् था वान्‍ने, ङ्‌खाॽनिङ्‌गो उङ् आदार चोक्‍खुबा नुङ् उका उनिङ्‌वा लोॽवा चोक्‍खुबाचिगा चेॽया उङा खेप्‍स्‍वाहा॥ कायुङ्‌लेनगा उथुक्‍नाहाङ्‌तो खिङ् सोम्‍मा इसाङा चा वायानिङ् नाहाङ्‌तोना मिक्‍सुरुम्‍बा नुमेतुना भोङ् ङ्‌खेप्‍सामान॥ उङ् जेप्‍पा निङ्‌वाफुमाभाङ् तायाना म्‍मेतासान्‍निङ्‌बि उङा इहाचा चोक्‍मा ङ्‌यासुन्‍बि॥”
ङ्‌खाचिङा न्‍लु, “न्‍दा पापपे वायाघोङ् पापपे पुसागाना याॽमिङा कानिङ् चिम्‍मा योङ्‌मेकाहा?” न्‍हाङा न्‍ना याॽमि छुम्‍पाङ्‌भाङ् पाखा न्‍लोन्‍धाक्‍सु॥

याहुदिचिङा न्‍ना याॽमि न्‍लोन्‍धाक्‍सुना चेॽया येसुङा खेप्‍सु, न्‍हाङा न्‍ना याॽमि तुप्‍सुहोङ् येसुङा लु, “इना न्‍दा याॽमिगा उच्‍या बिस्‍वास चोग्‍वागाना?”
न्‍नाङा लु, “चिन्‍खुबा, उङ् इसा ओम? का लुयाङ्, न्‍हाङा का उङ् बिस्‍वास चोग्‍वाङ्‌ना॥”
येसुङा लु, “न्‍दा उङ् निसुक्‍सुगाना, लोप न्‍दानुङ् साला लेन्‍खुबा उङ्‌माङ् ओम॥”
न्‍नाङा लु, “हाङ्‌बा का बिस्‍वास चोङ्‌मेॽनेन्‍ना” न्‍हाङ् उङ् सेमेतु॥
न्‍हाङा येसुङा लु, “मेनिखुबाचिङा निमा ङ्‌यासुनि, न्‍हाङ् निखुबाचि मेनिखुबा न्‍लेङ्‌निभोङ् का ना कायुङ्‌लेनबे निरिक चोक्‍से तायाङ्‌ना ओम॥”
खा चेॽया ङ्‌खेप्‍सुहोङ् न्‍नाबे ङ्‌वायाहा एकोहिप्‍पाङ् फारिसिचिङा न्‍छिम्‍दु, “इना कानिङ् चा मिक्‍सुरुम्‍बा मितामाघायि?”
येसुङा ङ्‌खाचि लुचि, “न्‍निङ्‌दा मिक्‍सुरुम्‍बा साइगानिङ्‌बि पापका आप्‍दिक न्‍निङ्‌दाबे ङ्‌ङायान्‍बि, ङ्‌खाॽनिङ्‌गो न्‍निङ्‌दा ‘कानिङ् निस्‍वाम्‍ङाहा’ काइवागा, ङ्‌खोङ्‌माङ् न्‍निङ्‌दाबे पाप वान्‍नुङ्‌मेहा॥”

г сонсох युहान्‍ना 9