เบ๊อะ คูอับราม เมแลเปล๊ หนิแก คูโลท โทเนอ, อา แม๊เถอะลว๊า เต เต๊อเจ่อ เร๊อ จอแปแหร่ ตูจูเพร เฮ๊เบ่ตา ลู เน๊อ,
“เก๋อ คูอับราม, ซิอิเช แต่ เตอเจ๋อ แต่เหม่ นี๋.
แว เก่ ตอกอเตเก เร๊อดื่อ เน ปา,
โท๊โต่ แว เก่ เด๊อะโป่ เน เตเมหนิ คว๊าเก่ เด๊อ อาแร๊ดุเล๊อ เออเนอ ปา.”
หม่าแน๊เรอ คูอับราม เฮ๊ฉื่อ คยาแซ๊ เน๊อ, “เก๋อ แบ่เจ่ จอแปแหร่ ตูจูเพร, เน เกเร เด๊อะแจ่ แว เตเมหนิ คว๊าเก่ เด๊อ อาแร๊ดุเล๊อ หม่าอิเต ปา? แวพู๊ โอ่ เกอ เตเพร๊โต่ อาขว่าอาคยา, เพร เด๊อ อา เก่ พย๊าหนิ แวอู่เจเต๊เหย่ เนอหม่า ตื๊อแพ๊ วีดามัสกัสพู๊ คูเอลีเยเซอร์ เด๊อ อา ทวา แวหลู่ เออเตเพร แพ๊.” เร๊อ คูอับราม เฮ๊โป่ เน๊อ, “เน เด๊อะเกอ แว พู๊เพรคู เตเพร๊โต่ อาขว่าอาคยา, แวหลู่ เด๊อ อา โอ่เป๊เจ่แล เด๊อ แวหี่ด๊อกู อาเกล เตเพร เก่ พย๊าหนิ แวอู่เจต๊าเหย่ ปา.”
ตื๊อดื่อเร๊อ จอแปแหร่ ตูจูเพร อ๊อแล ลู เน๊อ, “เนหลู่ คูเอลีเยเซอร์ เออ อา พย๊าหนิแจ่ เน๊อ เนอู่เจเต๊เหย่ โต่, ตื๊อแพ๊ เนพู๊เร๊อดื่อ เน๊อ เนเหน่ เตเพร เก่ พย๊า เนอู่เจเต๊เหย่ ปา.” จอแปแหร่ เอ๊เถ่ คูอับราม เด๊อ เหล่สื่อกลอ เร๊อ อา เฮ๊ ลู เน๊อ, “แม๊แถ่ เด๊อ ม๊อเลเนอ, เน เก่ แด๊เบ๊ เร๊อ แด๊ แม๊แม๊ ล๋อ เฉ่ เนอเต๊เห่.” โทเร๊อ อา เฮ๊ ลู เน๊อ, “เนพู๊เนเหลอ เนกลุยเนแล เก่ โอ่โหร่โอ่เอ๊ แซ่เจ๊อเน๊อ เฉ่ เด๊อ ม๊อเล เนอเต๊เห่ ปา.”
คูอับราม หยื่อเอ่ จอแปแหร่ ตูจูเพร อาขว่าอาคยา, จอแปแหร่ แด่ เฮ๊อ ลู ฮู๊ แกแยจ๊อแกแยเต เตเพร.
เร๊อ จอแปแหร่ เฮ๊ ลู เน๊อ, “แว หม่า จอแปแหร่ ตูจูเพร เด๊อ อา เอ๊เถ่ เน เด๊อ เน โอ่เกอเร๊อ บ่าบู่โหล่เก่ วีอูรากู เนอเตเพร เฮ๊อ, เร๊อ แว เก่ เด๊อะ เน เห่ขุ เออโต๊โผะ ฮู๊ เนเก่ เน๊อ เนเหน่ เร๊อดื่อ อาเง เนอ เฮ๊อ.”
หม่าแน๊เรอ คูอับราม แด๊เฮอ ลู เน๊อ, “เก๋อ แบ่เจ่ จอแปแหร่ ตูจูเพร, เต เนอเต๊เห่ เร๊อ อา เก่ ทวา แวเต ปาเนอ แว จว๊าซิเงแจ่ ฮู๊เต?”
เร๊อ จอแปแหร่ เฮ๊ฉื่อ ลู เน๊อ, “พย๊าแฮ เป่ แว ปู่โหมะพู๊เส่เนอ โตโด, เป่โหมะ โตโด, ซิหมิเพ โตโด เด๊อ อาหน่า โอ่บา ลอเฮ๊อ โซหน่า เนอ ปว๊า โตโด นี๋. โท๊โต่ พย๊าแฮ หนิโป่ ถู่หลุ่ยคราโหมะ เต๊เบ่ เน๊อ ถู่หลุ่ยดอเพ หน่าเจ่ เต๊เบ่ นี๋.”
คูอับราม พย๊าแฮ เป่ เตมีเตดอ เนอเต๊เห่ เด๊อ จอแปแหร่ อาเป๊เส่เง เร๊อ อา เมเซอ ลอ เร๊อ อา ปาเพ๊ กลาเม เตมีเตดอ เออ เต๊เห่ เนอกยา, เร๊อ อา แด่ ช๊าฉือ ลู เนอหร่า, ตากลาเม เร๊อ อา แด่ เด๊อ จ๊อทว๊า ตากยา, ตากลาเม เร๊อ อา แด่ เด๊อ จ๊อจิ ตากยา. หม่าแน๊เรอ ถู่ เต๊เห่ เร๊อ อา ปาเพ๊ กยา เกอ ลู โต่. โทเร๊อ ลาแต่ เต๊เห่ แฮตา เร๊อ เกเร ตาเอ่ เตหย่า เออเต๊เห่ เร๊อ คูอับราม เหว่ ตาพา แกลอ เหย่ซี.
เบ๊อะ เหมาะตา เฮ๊อ เบ๊อะเนอ, คูอับราม โอ่เมอหนิ ตาปา เจ๊อ เร๊อ เตคี๊ตือรือ โอ่ตาวา ลอ ลู อาขว่าอาคยา, อา ซิอิเชแหน่เจ๊อ. เร๊อ จอแปแหร่ เฮ๊ตา ลู เด๊อ เตโอ่เมอแหม่ อากูเนอ เน๊อ, “ซิเง ตาเต เร๊อดื่อ เน๊อ เนกลุยเนลุ๊ย เต๊เห่เนอ, อา เก่ จว๊าทวา ซิเผระ เด๊อ อูเทออูเก่กู ปา. เหย่ซี เก่ จว๊าทวา อูหลู่ เบ๊อะเนอ ปา, เร๊อ อู เก่ เมจาเมจือ เหย่ซี อาหน่า ลุยเย เจ๊อ ปา. หม่าแน๊เรอ แว เก่ เมจา เทอเก่ เด๊อ อา นอทวา เหย่ซี ฮู๊ หลู่ เนอ เต๊เก่ ปา, เร๊อ เบ๊อะ เหย่ซี เถ่กาเฮ๊อ เด๊อ เทอเก่ เนอเต๊เก่ อาเค ปาเนอ, อา เก่ พย๊ากาหนิ เอ๊ แหน่เจ๊อ เตดุแหย่แถ่เซ ปา. ฮู๊เตเต๋ เบ่เบ่, เน เร๊อ เน เก่ โอ่เซอเพร หน่าดุเลทู เจ๊อ ปา เร๊อ เน เก่ เซอโมเซอแร๊ เร๊อ อู เก่ โล๊โน เต่อ เกอดื่อ เน เน๊อ เนเพอเนโพ ซีเต๊เห่ ปา. โทเร๊อ แว โอ่ป่อ โต่ เด๊อ อาโมไรต์ เมวเจ่อพู๊ เออเต๊เห่ อา เม เตซื๊อเตปล๊า ดุ แหน่เจ๊อเฮ๊อ ปา ตื๊อหม่า แว เก่ เมจา เหว่เถ่แก โหน่ เหย่ซีปา อาขว่าอาคยา, เนกลุยเนแล ตากาแล ลุยทือ ตือทือ ปา ตื๊อหม่า เหย่ซีกา โต่คยา แลแค เบ๊อะ เก่กูเออ ปา แพ๊.”
เบ๊อะ เหมาะตาลา เฮ๊อ เร๊อ เหมาะคี๊แฮ เฮ๊อ เบ๊อะเนอ, คูอับราม แม๊เถอะคย๊า หมิอือโข่ ตูลูแถ่ เด๊อ กู๊เผ่กู เน๊อ หมี่เฉ่ แกแถ่ เนอ เร๊อ อา จว๊า เบ๊อะ อู เหล่ ปาเพ๊ กยา แด่โอ่ เร๊อ เตหย่า เนอเนอหร่า อาเปล่กู เนอ. เบ๊อะเนอ เตอเนอเร๊อ จอแปแหร่ ตูจูเพร อ๊อแล อาโหง่ เน๊อ คูอับราม เร๊อ อา เฮ๊ ลู เน๊อ, “เป๊อแถ่ เด๊อ อียิปต์เก่กือ แลโหมะ เนอเร๊อ อา โต่ เด๊อ ยูเฟรติส เทอแลโหมะดุ เนอ, แว อ๊อแลนอแล เฮ๊อ เน๊อ เก่เออ แว เด๊อะ เน๊อ เนกลุยเนลุ๊ย ตากาแล เต๊เห่ เฮ๊อ. โท๊โต่ อา ป่าโต่ เกอโป่ ดื่อ เน๊อ เก่ เด๊อ เคไนต์ เมวเจ่อพู๊, เคนัสซี เมวเจ่อพู๊, ขัดโมไนต์ เมวเจ่อพู๊, ฮิตไทต์ เมวเจ่อพู๊, เปริสซี เมวเจ่อพู๊, เรฟาอิม เมวเจ่อพู๊, อาโมไรต์ เมวเจ่อพู๊, คานาอัน เมวเจ่อพู๊, เกอร์กาชี เมวเจ่อพู๊, เน๊อ เยบุส เมวเจ่อพู๊ เนอเต๊เห่ โอ่เกอเร๊อ เก่ เนอเต๊เห่ เฮ๊อ.”

г сонсох เห่ขุทวาลู่ 15