If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

जेतार येसु एने तेरा चेला यरुशलेम धोळे पुग्या एने जयतुनोन बोयळा पोर बेथफगे गाव साते आव्या, ती येसु दुय चेला काजे यो कोयीन मूकल्यु, “सामने वावा गावमा जावू चा पुगतेच एक गोदळी बांधली एने तेरे साते पिलो देखायसे तीनाक छुळीन मारेंचा लीन आवू. ओगर तुमुक कुदु काहीन कोयसे, ती कोयजू कि प्रभू काजे एरी गोरोज छे, ती चू तिने टेमे तीनाक मुकली देसे.” यो इनान कोरता होयो कि यो वचन भविष्य कोरतान लारे कोयलो होतो, चो पुरो होये
“सियोनोन माणसो काजे कोयू,
देख, तारू राजा तारेनचा आव रोयू;
चू नम्र छे, एने गोदळा पोर बोस रोयू;
मतलब गोदळीन पिलापोर.”
दुय चेला जायीन, जोसो येसु तीनु काजे कोयलु होतु, तोसोत कोऱ्या. एने गोदळीन पिला काजे लावीन, तीनु पोर तिंदरा कापळा मेक्या, एने चू हिंदरे पोर बोस गोयू. तेत्यार घोणा सोवटा माणसे तिंदरा कापळा वाटी पोर आथऱ्या, एने दिसरा माणसे झाडोन डाव्या काटी काटीन चौक्या पोर आथऱ्या. जी भीळ ओगोव-ओगोव जाती होती, एने पोछोव-पोछोव आवती होती, आयळीन-आयळीन कोयती होती, “राजा दाऊदन पुऱ्यान होसान्ना, सोयावा छे जे चे प्रभून नावोसी आवतेला छे, सोरगोमा होसान्ना.” जेतार येसु यरुशलेममा भोराया, ती आखा देसोमा हलचल होय गोयी, एने माणसे कोयने बाज गोया, “यु कून छे?” माणसे जवाब आप्या, “यु गलीलोन नासरेथोन भविष्य कोरता येसु छे.”


येसु परमेश्वरोन मंदीरोन आंगनामा जायीन तीनु आखा काजे, जे मंदीरमा लेन-देन कोरता होता नीकाव देदु एने, धंदू कोरने वावान बागळा एने, पेरवा वेचनेवावान चौकि उलटाव देदु. एने तीनु काजे कोयू लिखलो छे, “मारो घोर प्रार्थनान घोर कोवायसे, बाकीन तुमु इना काजे चुटान घोर बोनाव देदला छे.”
तेत्यार आंदवा एने लेंगळा, मंदीरमा येसुनचा आव्या, एने येसु तीनु काजे वारू कोऱ्यु. बाकीन जेतार डायलु पुजारू एने शास्त्री इना चमत्कारोन कामोक जो चू कोऱ्यु एने पुऱ्या काजे मंदीरमा दाऊदन पुऱ्यान होसान्ना, कोयतेला देखीन रीसवाय गोया. एने तीना काजे कोयने बाज गोया, “काय तू सोमवी रोयू कि ये काय कोयने बाज रोया?” येसु तीनु जवाब आप्यू, “हाव, काय तुमु यो कोबी नी भोन्या नानला पुऱ्या एने दुध पिता पुऱ्यान मुयोमा गोथू जादा स्तुती कोराव्यू?” तेत्यार येसु तीनुक छुळीन सोहोरोन बारथे बैतनिय्याह गोयू एने चात रात निकाव्यू.


सोंदारे वेगोत जेतार चू देसोमा पोछु जातु होतु ती तीना काजे भूक लागी. सोड्कोन धोळे गुलोरोन एक झाड देखीन चू तेरेनचा गोयू, एने पाला विगुर तीनामा ओवी काहीन नी जोळ्यो ती तीना काजे कोयू, “हिमी गोथो तारेमा कोबी फोव नी लागे” एने गुलोरोन झाड तेत्यारुत सुख गोयो. यो देखीन चेला काजे नोवलाय लागी एने चे कोया, “यो गुलोरोन झाड तेत्यारुत कोसो सुक गोयो”? येसु तीनु काजे जोवाब आप्यू, “मे तुमु काजे छाचलीन कोयो कि अगर तुमु भुरसू राखे एने शंका नी कोरे, ती नी नीसतो ये कोरसू, जू इना गुलरोन झाड साते होयलो छे, बाकीन ओगर इना बोयळा काजे बी कोयसे, ‘उखवीन जा एने दोरीयामा जायीन पोळ ती यो होय जासे, एने जो काहीन तुमु प्रार्थनामा विस्वाससी मांगे चो आखो तुमु काजे जोळसे.’”


येसु मंदीरमा जायीन प्रचार कोर रोयू होतु ती प्रधान पुजारू एने माणसोन पुढारी तिना साते आवीन पुछ्या “तू यो काम कुनीन होकोसी कोरतेलू? एने तुसेक यु होक कून आपलु छे.” येसु तीनु काजे जोवाब आप्यू, “मे बी तुमु काजे एक वात पुछो, ओगर चो मेसेक देखाळसे, ती मे बी तुमुक देखाळीस कि यो काम कुनीन होकोसी सी कोरतेलू”, योहानोन बाप्तिस्मा का गोथू होतु? सोरगो से कि माणसोमा गोथू से? ती चे आपोसमा विचार कोरणे बाज गोया, “अगर आपु कोयसू, सोरगो गोथू ती चू कोयसे, ती तुमु तीना पोर भुरसू काहा नी कोऱ्या?” एने ओगर कोयसू माणसोनचा गोथो; ती आपनुक गोरदीन बिक छे काहाकि चे योहान काजे भविष्य कोरता जानता होता. आखरी चे येसुक जोवाब आप्यू “आमु नी जानतला” चू तीनु काजे कोयू “ती मी बी तुमु काजे नी देखाळतू कि यो काम कुनीन होकसी कोरतेलू.”

तुमु काय विचार कोरणे बाज रोया? काहना माणसोन दुय पुऱ्या होता चू पेहेलान चा जायीन कोयू, “हे पुऱ्या आज आंगुरोन मोवामा काम कोर.” चू जोवाब आप्यू “मे नी जाम,” ओवतेन चू मोन बोदलाव लेदू एने जात रोयू. एने बास दिसरानचा जायीन ओसोच कोयू चू कोयू होव मे जाम, बाकीन नी गोयू. इना दुयोमा गोथू कून बासोन मोर्जी पुरी कोऱ्यु? चे कोया पेहेलू, येसु तीनु काजे कोयू मे तुमु काजे छाचलीन कोय कि फावू लेणे वावा एने वेश्या तुमरे गोथा पेहेले परमेश्वरोन राजमा जातला छे. काहाकि योहान धारमिकतान वाट देखाळतू जायीन तुमरेनचा आवलु छे, एने तुमु तेरु भुरसू नी कोऱ्या बाकीन फावू लेणे वावा, वेश्या तेरे पोर भुरसू कोऱ्या एने तुमु यो देखीन ओवतेन बी नी पसतावू कोऱ्या कि तेरु भुरसू कोर लेता.

एक ओवी दाखलू सोमवू एक घोर मालिक होतु जू आंगुरोन वाळी लागाळ्यु, तेरे चारू धोळे वाळ बांध्यू, तीनामा रोसोन कुंड खोंद्यू एने मवू बोनाव्यू, एने खेत कोरणे वावाक ठेकु आपीन पोरदेश जात रोयू. जेतार फोव आवनेन टेम आवी ती चू तेरा पावोर काजे तेरो फोव लेनेन कोरीन खेत कोरणे वावानचा मूकल्यु. बाकीन खेत कोरणे वावा तेरा पावोर काजे धोरीन काहनास काजे ठुक्या एने काहनास काजे मार नाख्या, एने काहनास काजे दोवळाव्या. ओवतेन चू ओवी दिसरा पावोर काजे मूकल्यु, एने चे तेरे साते बी तोसोत कोऱ्या. आखरीमा चू तेरा पुऱ्या काजे तिंदरेनचा यो विचार कोरीन मूकल्यु कि मारा पुऱ्यान मान कोरसे. बाकीन खेत कोरणे वावा पुऱ्या काजे देखीन आपोसमा कोया यु ते वारीस छे, आवू इना काजे मार देजे एने तेरी मेर काजे ली लेजे; एने चे तीनाक धोऱ्या एने आंगुरोन वाळीमा बारथे निकवीन मार देदा. “इनान कोरता जेतार आंगुरोन वाळीन मालिक आवसे ती तीनु खेत कोरणे वावा साते काय कोरसे?” चे तीना काजे कोया “चू तीनु दोगावा माणसो काजे वेला पाळावीन मार नाखसे; एने आंगुरोन वाळीन ठेकु दिसरा खेत कोरणे वावा काजे आप देसे, जू टेम पोर तीना काजे फोव आप्या कोरे.” येसु तीनुक कोयू, “काय तुमु पवित्र शास्त्ररमा यो नी भोन्या जीना डोगला काजे बांदनेवावा रीकामू ठेरावलु होता, चू कुपरान कुपरेवावू दोगळू बोन गोयू?” यो प्रभू तोरोफसी होयो एने आमरी नोजोरमा नोवलाय छे. इनान कोरता मे तुमु काजे कोय कि परमेश्वरोन राज तुमरेनचा गोथो लेवाय जासे एने ओसला जाती काजे जो तेरो फोव लावे आपाय जासे. जू इना दोगळा पोर पोळसे तेरु चुरू होय जासे एने जीना पोर चू पोळसे तीना काजे चुराचुरा कोर देसे. प्रधान पुजारू एने फरुशी येसुन दाखला काजे सोमवीन सोमजी गोया कि चू आमरे बारामा कोयू. एने चे तीनाक धोरणेन कोऱ्या, बाकीन माणसो काजे बिह गोया काहाकि चे तीना काजे भविष्य कोरता मानता होता.

г сонсох मत्ती 21