Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Mbenɔ nde Yéso ɗáɔni usɛsɛ á ɓakpa, áoɗapha gǔ á mamba, áoika kó. Ɓagoigi nɛkɛ ɓáɔsɛkeɗa bíbí akɛ, mpɔ áokpanga goisaga aɓɔ ɓe:


«Maseye ka ɓundɔ ɓá na ɓuyɛnɛ á ka měma ka nyɔngɔ nde koɓoamɛ á na koba ande aɓɔ! Maseye ka ɓunde ɓáogáma, ka nyɔngɔ nde Mokonga aɛkɔmbɛande iɓo á ngamɔ! Maseye ka ɓato-aphɔngɔ, ka nyɔngɔ nde ɓátɔande mokonda nde Mokonga ɗɛ́ɓɔku. Maseye ka ɓunde ɓá na nja n'ɛnyɔta á koɗoni, ka nyɔngɔ nde ɓákutande. Maseye ka ɓunde ɓáǒkuia ɓadaɓɔ ngomi, ka nyɔngɔ nde Mokonga aékuiande phɔtɔ ngomi. Maseye ka ɓato á měma ánjá, ka nyɔngɔ nde ɓámɔnande Mokonga. Maseye ka ɓunde ɓáobikisa ɓujɛjɛ, ka nyɔngɔ nde Mokonga aɛɓɔphanande ɓɔ, ɓ'anakɛ. Maseye ka ɓunde ɓakpa ɓáǒtambisaga ka nyɔngɔ á koɗoni nga, koɓoamɛ á na koba ande aɓɔ. Maseye ka ɓenu, mbenɔ nde ɓáonóbóma, ɓáonótambisaga, ɓáonógeea ájeɗe na ɓátekea anu na nyɔngɔ á mbɛa ka nyɔngɔ ani. Gúani jaí na maseye, ka nyɔngɔ nde ɛkɔmi nɛnu ángbó ana koba. Nga, ɓondɔ unge ɗáɓáetambisigi ɓaɔtu-nyɔngɔ ndea Mokonga á mosá anu.


Ɓonde mɔnɛi á ka mokonda. Cɔ, aoɓá mɔnɛi na nna ɔɛkɛmisa, ɓábisande kema sina kau ka gea áɛkɛmisɛ? Nna ye na kantíti. Akeni maka í ka nsɛngɛ, ɓakpa ɓáɗɛtɛɛgɛ.
Ɓonde owanga á ka mokonda. Ntanga-nji nde ɓáphɛ̌ki gǔ á mamba, nnaɔtɔka nɛ̌sɔmɛani. Ɓákáotoɓoa ɔbɛa ka bisa kusi á mbungu, ɓá ndiu obisa ka ngeɔ ka gea te, ábɛnyɛ ka phɔa ɓakpa ɓunde ɓá suɓi éndu. Kaɓondɔ, ambe owanga nenu ábɛnyɛ mosá á ɓakpa, ɓáɔnɛ ekuma nɛnu na ánjá. Mpɔ ɓámbebɛ Abanu mmbɔ á na koba.

Ɓókokanisiɛmbɛ gea nebiki ɔngbɔa ɛɔphi ndea Mósa na ɓɔphɛi ndea ɓaɔtu-nyɔngɔ ndea Mokonga. Kébiki k'aphe á ngbɔa í. Nebiki ndiu k'aphe á kpeengeanisa í. Nenóngoɗi ɗoni gea te, mosá á sungiaga á koba na mokonda, nna tanda na miki á nyɔngɔ moci kaɓɛ phaeka í, nnde aimikande k'ɛɔphi na ka ɓî nyɔngɔ bui atɔtɔkɛanande. Cɔ, nkpa nde aotingiaga ka ɓaniki ɛ́ɔphi nde, na phɛá á ɓadakɛ gea ɓágeɛ phɔtɔ ɓó, aɓande miki á nkpa ka koɓoamɛ ndea Mokonga. Nkpa nde a gǎkɛ oamba ú, na phɛá ɓadakɛ gea ɓágeɛ phɔtɔ ɓó, aɓande mokongo á nkpa ka koɓoamɛ á na koba. Nenógie, akoɓá koɗoni anu na kányɛ́nyi nnde á ɓaɗundu-ɛɔphi na Ɓaphaisáyɔ, ɓókóngiɛku ka koɓoamɛ á na koba.

Ɗóɓoɔ́ki gea, ɗáɓáengoɗi ɓatatasu te: Kommowɛmbɛ nkpa nga, mmbé aommowa nkpa, ɓánjúsande ka ntua á tena á nyɔngɔ. Cɔ, eme nenóngoɗi ɓe: Nkpa buakɛ mmbé aɔmɓɛɛa dakɛ, akeni ɓánjusɛ ka ntua á tena á nyɔngɔ. Mmbé aombóma dakɛ te: ‹Kóúbapha!›, akeni júsa akɛ ka ntua ángbó á tena á nyɔngɔ ndea Ɓayúda. Mmbé aongea dakɛ te: ‹Ona ganja!›, akeni ɓámmakeɛ k'ɛɛmbɛ á nsa nnde nnaoimika. Aoɓá n'obiki na ɛkɔmi nɛkɔ k'ɛtɛ-ɔ́phɛ́ɔ, n'okanisi te dakɔ ana nyɔngɔ n'oɓɛ, akeni óɗeketɛ phɔ́ ɛkɔmi nɛkɔ mosá á ɛtɛ-ɔ́phɛ́ɔ, ógɛ ɔ́ɓɔngisiɛgɛ nyɔngɔ nɛkɔ na dakɔ. Mpɔ ósikianɛgɛ goto ka gǎ opha á Mokonga ɛkɔmi kau.
Aoɓá n'ona nyɔngɔ na nkpa, kamisaga ɔ́kana na yɛ na ɓo phɔ́tɔ k'aphe. Ka gea te, kakojúsɛmbɛ mɔtɛ á nteni-nyɔngɔ na nteni-nyɔngɔ kákobisɛku ka njaga á nto-émani ka gea kakomakeɛmbɛ suɓi á mekakɔ. Nekongoɗi ɗoni, kótókɛku kó na kógɔɓɛi phenda imɔna bui nde ajigi.

Ɗóɓoɔ́ki ɓî ɗáɓáyɔngi gea te: ‹Kotunganɛmbɛ mɔnɔ.› Eme nenóngoɗi te: Nkpa buakɛ mmbé aɔmɔnjia nke n'íso ótungɔ, agɔɓi ye n'anɛɓɛi nke ndɔ ka měma.
Aoɓá iso akɔ á nci á mǔku aunge aokongisa ka ɓojeɗe, ambe óphongotɛ ú, ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika. Aoɓá njaga akɔ á mǔku aunge aokoɓoteaga ka ɓojeɗe, tena ú cé! Ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika.
Ɗáɓági te: ‹Nkpa nde aon'yá nkakɛ, akeni ámophɛ nke ndɔ ɓaoɓa á keyé.› Cɔ, eme nenóngoɗi gǎkɛ te, aoɓá nkpa n'an'yé nkakɛ na kátungani, antunganisi ye tɔ, aoɓá n'aɔmani goto. Aoɓá nkpa n'amɓu nke nde ɓán'yé, atungani phɔtɔ.

Ɗóɓoɔ́ki ɓî ɗáɓáengoɗi ɓatatasu te: ‹Kɔɔphɛ mɔnɔ ka mbɛa. Tɔtɔkisa ndiu ɔphá nɛkɔ mosá á Mɔkɔta.› Eme nenóngoɗi gea, ɓókokengisiɛmbɛ ɔphá: Ɓɔ́kɔɔphɛ mɔnɔ k'ína á koba nga, ande kankaanga á koɓoamɛ ndea Mokonga, tanda ka mokonda nga, ande ɔma á bisa ecinji akɛ, tanda ka Yɛusalɛ́ma nga, ande ntanga-nji ndea Moamɛ angbóngbó. Kɔ̌yɔphisanɛgɛ mɔnɔ sasakɔ. Nga, kɔ́ɔtɔka n'okěti ka sɛkamɔ̌ akɔ ka ɓá ábusǔ kaɓɛ índa. Aoɓá n'oɓeeki, ɓeekea ka ɗoni. A gǎkɛ oɓá n'ongani, ngana ka ɗoni nga, nyɔngɔ nde aobika gǔ índɔ aotóka ka Nketi.


Ɗóɓoɔ́ki ɓî ɗáɓáyɔngi gea: ‹Dakɔ aoboma iso akɔ ôboma nɛkɛ, aotena minyɔ akɔ, ôtena nɛkɛ.› Eme nenóngoɗi gǎkɛ te nkpa aokogeeya ájeɗe, kogisiɛ mɔnɔ. Aoɓá n'akɔɓɛti ka ngaga á nci á mǔku, óphaia goto áɔɓɛtɛ k'índe á nci á nkei. Aoɓá nkpa n'aɔtɔngi ka uta akɔ ngɔ́mbɛ á k'egogo, nɗeketea phɔtɔ ngɔ́mbɛ nɛkɔ á phiɔ. Aoɓá nkpa n'aogi ónkumbiɛ nkumba nɛkɛ ónɗeketeɛ ka kilɔmɛ́tɛɛ moci, gǎ ónɗeketeɛ ka kilɔmɛ́tɛɛ iɓɛ. Aoɓá nkpa n'akɔmɛmi kema, mopha ú. Aoɓá n'akondi ɔ́nɛkisɛ, kɔnkpɛmɛɛmbɛ.


Ɗóɓoɔ́ki ɓî ɗáɓági te: ‹Nkonda dakɔ, ónkangeɛ ndiu mɓiɓia nɛkɔ.› Eme nenóngoɗi gǎkɛ te: ókondani ɓaɓibia nɛnu, ɓɔ́mɛmɛ ndiu Mokonga ka phɔa ɓundɔ ɓáonótambisaga. Ɓoogea ɓó, ɓóoɓá ɓana-Abanu mmbɔ á na koba. Nga, yɛ aɔɓɛtisa maní ka ɓakpa ɓánjá na ɓakpa ɓájeɗe na ɔkisa mbua ka ɓato á koɗoni na ɓunde ɓáká ɓato á koɗoni. Aoɓá na ɓǒkondi tɔ ɓundɔ ɓáonókonda, ɓooɓondea ophendɔ ka Mokonga ka ɓo? Ɓaphendisigi-manjanja ɓá phɔtɔ ogea ɓó. Aoɓá ɓana-amanu tɔ ɓáunge ɓǒsesea, kema ángbó sina nde ɓoogea? Ɓundɔ ɓánáomúba Mokonga, ɓá phɔtɔ ogea ɓó. Cɔ, ɓáni ɓato á kanga kisɛki ɓea Abanu mmbé á na koba kángá kisɛki.

г сонсох Matáyɔ 5