Kodaku

हेना तोलोग बतिस्मा ए-मय एहुन्‍ना, अहूदिया जिला राः सुनहर ओत रे मेजकेनते, नआँ घयतेय परचार तेडा, “मन पे मिड़ाऊ, कहेकि सरग राज बँदे रे मेजियाना।” नेय हें-नी एहुन्‍ना हवे, नेय राः बारे ते एसायाह भविस्यवक्‍ता कहनी तडा,
“सुनहर ओत रे मियाँहोड़ होड़ गोहार यडा,
कि परभु लगड होर पे तयारू, हेंय राः राह पे सोझ साझू।”
एहुन्‍ना राः कपड़ा ऊँट रोंवा राः दोहो एना, अवुर मयंग तुरे खाल राः बेलाटिय तोल दोहो एनु। अवुर हेंय फंफा फीरियाकू अवुर मधरासिय जोम दोहो एनु। तहाँ एरुसलेम अवुर अहूदिया, अवुर जरदन जोड़ राः आस पास रेनकू सगोर जघा तेनकू होड़कू, हेंय थरे कू मेजेना। हेंकू अपन अपन पाप कू मनो केते, हेंय वरी जरदन जोड़ रे बतिस्मा कू तिला तेडा। हेंय अनेज हनते अखीर फरीसिकू अवुर सदूकिकू बतिस्मा तिला लगाडिय ञेंल अगतेड कू तहाँ, हेंकू थरेय कहनी तेडा, “ए बींञ होपोनकू, अपे मेजुः तना भोग वरी पे बंचोआ मेनते ईया चेतवन केडपेआ? अपे अपन अपन पाप वरी पस्तो केनते भगवान हनते मन पे मिड़ाः केडा मेनाआँ, होड़कू पपाड़ी लगड बढ़ियाँः काम पे करो। अले अबराहम खुटी खनदान रेनकू हवे, अवुर अले धरमी होड़कू हवे, हेनाते भगवान अले सजा एरोय ओवड लेआ मेनते कभी अलोपे पसींदे। कहेकि भगवान अबराहम थरे, इंञ अखीर चोंडिज कुंञ ओवा मिआँ मेनतेय जबान तेडा, हेनाय पूरा लगड अनापे भर दो कोवाआ। इंञ अपे थरेंञ कहनी यडा, भगवान नआँ दिरी वरी हो अबराहम लगड चोंडिज कुय पयदा सकोआ।” टँगा काठ दुबी रेय दोहो केडा, अवुर जे जे काठ बढ़ियाँ ते मेने जोः हेना, गेरकेते सेंगेल रेय तुयाँगेआ।
“इंञ दो अपे मन पे मिड़ाः केडा मेनाआँ, लाय लगड दाः ते बतिस्मांञ ओवा पेताना, लेकिन इंञ वरी तयोम ते मियाँहोड़ मेजुः तना, हेंय इंञ वरी होय सक्‍तिसाली गिआ, इंञ दो हेंय राः जुता रसी लड़ा लायिक हो कोवाञाँ। हेंय अपे पवितर आत्मा अवुर सेंगेल ते बतिस्माय ओवा पेआ। हेंय राः हटाः हें-नी ती रेआ, अवुर हेंय खरियन तय बढ़ियाँ तेय अमीञेंआ, अवुर गोहोम तुदो, अनेज राः कोठी रेय जवारेआ, लेकिन कुस्टत दो मेने इड़ीजुआ सेंगेल रेय तुयाँगेआ।”


हेना तोलोग ईसु गलील वरी जरदन जोड़ धरी रे एहुन्‍ना थरे बतिस्मा तिलाय मेजेना। लेकिन एहुन्‍ना नआँ घयते कहनी केतेय मँदा सोताडिया, “इंञ दो अम ती वरी बतिस्मा तिला राः जरूरत इदाना, अवुर अम दो इंञ थरेम मेजकेना?” हेना वरी ईसु हेंय थरेय कहनी तेडा, “देगे, निहों दो नेन घयतेम इकावा, कहेकि अलंग नेनेन घयते भगवान राः इक्छा लंग पूरा यडा, नआँ सही गिआ।” तहाँ एहुन्‍ना हेंय राः टेबोईय तिला तेडा, अवुर बतिस्माय ओवाडिया। अवुर ईसु बतिस्मा तिला केते, दाः वरिय उडूंग एना, अवुर ञेंल पे, हेंय लगड अगस जीजयानू, अवुर हेंय अनेज थरे भगवान राः आत्मा परेवाँ घयतेय ञेंल अगड़ू तेडा। अवुर अगस वरी न घयते आवाज मेजेना, “नेय ईञाअय दुलारय कोड़ा होपोन हवे, अवुर नेय थरे इंञ अखीर खुस इदानिञाँ।”

Сонсох मत्ती 3