If you have would like a copy of this version please contact info@davaraudiobibles.org

Limbu Old Testament

कुहेःक्‍सिङ्‌मो तागे़रा निङ्‌वाॽफुमाङ्‌ङिल्‍ले़ तरःङ्‌गे़न् ताङ्‌साङ् नु इक्‍सादिङ् खाम्‍बेःक्‍मान् नावागे़न् चइःत् चोगु॥ इक्‍सादिङ् खाम्‍बेःक्‍मान् कुनावाइबेक् मेःन्‍ने मुसुन्‍ने खे़सुन्‍ने नु मुहःङ्‌लिङ् खे़हःङ्‌लिङ् ने़स्‍से़॥ वरःङ् सम्‍दाङ् खामाक्‍लुम् ने़स्‍से़॥ हे़क्‍क्‍याङ् निङ्‌वाॽफुमाङ्‌ङिल्‍ले़ कुयाम्‍साम्‍मिन् च्‍वाःत् सम्‍धाङ् ताक्‍कन्‍दे़र वये़॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “से़न्‍दाङ्‌गे़न् ओःत्ति ओःत्‍ल,” खे़ब्‍याङ् खाओःत्ते़रो॥ हे़क्‍क्‍याङ् तागे़रा निङ्‌वाॽफुमाङ्‌ङिल्‍ले़ खागे़ओःप्‍पान् ओमे़त्तु, खे़न् नुबा चोगे़बा निसु॥ खुने़ॽ खागे़ओःप्‍पान् माक्‍चिगे़न् खादाम्‍मोलाम् से़न्‍दु॥ निङ्‌वाॽफुमाङ्‌ङिल्‍ले़ खागे़ओःप्‍पान् “ले़न्‍दिक्” मे़त्तु हे़क्‍क्‍याङ् माक्‍चिगे़न् खादाम्‍मान् “से़न्‍दिक्” मे़त्तु॥ युःन्‍छिक् पोःक्‍से़ हे़क्‍क्‍याङ् तानाम् पोःक्‍से़—थिक्‍सिगेक्‍पा ये़न्॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “च्‍वाःत्तिन् मु नु थाःङ् कुलुम्‍मो के़से़म्‍बादे़न्‍धिक् पोङ्‌ल, हे़क्‍क्‍याङ् खे़ल्‍ले़ च्‍वाःत्तिन् ने़त्‍छि कुलक्‍को से़न्‍दुर॥” हे़क्‍केःल्‍ले़ निङ्‌वाॽफुमाङ्‌ङिल्‍ले़ सिगाङ्‌बा च्‍वाःत्तिन् नु कुजङ्‌धाङ्‌बा च्‍वाःत्तिन् मु नु थाःङ् एॽए चोगु॥ हे़क्‍क्‍याङ् हाबाहे़क्‍के पोःक्‍से़रो॥ निङ्‌वाॽफुमाङ्‌ङिल्‍ले़ कन् के़से़म्‍बादे़न्‍निन् “तरःङ्‌दिङ् ताङ्‌साङ्” मे़त्तु॥ युःन्‍छिक् पोःक्‍से़ हे़क्‍क्‍याङ् तानाम् पोःक्‍से़—निसिगेक्‍पा ये़न्॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “ताङ्‌साङ्‌बाल्‍ले़ कुभोसाङ्‌बा च्‍वाःत्तिन् थिक् ते़न्‍नो सुम्‍सिङ्‌ल हे़क्‍क्‍याङ् से़ङ्‌से़ङ्‌बा खाम् निधाःप्‍ल॥” खे़ब्‍याङ् हाबाहे़क्‍के पोःक्‍से़रो॥ निङ्‌वाॽफुमाङ्‌ङिल्‍ले़ से़ङ्‌से़ङ्‌बा खाम्‍मिन् “इक्‍सादिङ् खाम्‍बेःक्‍मा” मे़त्तु, हे़क्‍क्‍याङ् के़सुम्‍सिङ्‌बा च्‍वाःत्तिन् “वरःङ्” मे़त्तु॥ हे़क्‍क्‍याङ् निङ्‌वाॽफुमाङ्‌ङिल्‍ले़ ओमे़त्तुल्‍ले़ खे़न् नुबा निसु॥
खे़ब्‍याङ् निङ्‌वाॽफुमाङ्‌ङिल्‍ले़ पाःत्तु, “इक्‍सादिङ् खाम्‍बेःक्‍माल्‍ले़ थाबुसिङ्‌सेॽहाॽ कुलिःन्‍नो कुसेॽ के़धोःक्‍पाहाॽ लिङ्‌ल याःन्‍दुर, हे़क्‍क्‍याङ् कुबुङ् कुलिःन्‍नो कुसेॽ के़धोःक्‍पा आबाङे परिक्‍परिक्‍पा लिन् के़गप्‍पा कुजाॽ के़धोःक्‍पा सिङ्‌बुङ्‌हाॽ खाम्‍बेःक्‍माल्‍ले़ लिङ्‌ल याःन्‍दुर॥” खे़ब्‍याङ् हाबाहे़क्‍के पोःक्‍से़रो॥ खाम्‍बेःक्‍माल्‍ले़ थाबुसिङ्‌सेॽहाॽ कुबुङ् कुलिःन्‍नो कुसेॽ के़धोःक्‍पा हे़क्‍क्‍याङ् आबाङे आबाङे परिक् परिक्‍पा लिन् के़गप्‍पा कुजाॽ के़धोःक्‍पा सिङ्‌बुङ्‌हाॽ लिङे़र याःन्‍दु॥ हे़क्‍क्‍याङ् निङ्‌वाॽफुमाङ्‌ङिल्‍ले़ ओमे़त्तुल्‍ले़ खे़न् नुबा निसु॥ युःन्‍छिक् पोःक्‍से़ हे़क्‍क्‍याङ् तानाम् पोःक्‍से़—सुम्‍सिगेक्‍पा ये़न्॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “ले़न्‍दिक् नु से़न्‍दिक् से़म्‍मारे़ लागि ताङ्‌साङ्‌बो ओःत्तिहाॽ मे़बत्‍ल॥ वाये़म्‍हाॽ, ये़न्‍हाॽ हे़क्‍क्‍याङ् तङ्‌बेहाॽ से़म्‍मारे़ लागि खे़ङ्‌हाॽ मिक्‍सेन् मे़बोङ्‌ल॥ हे़क्‍क्‍याङ् इक्‍सादिङ् खाम्‍बेःक्‍मान् थोॽमारे़ लागि खे़ङ्‌हाॽ ताङ्‌साङ्‌बो ओःत्ति मे़बोङ्‌ल॥” खे़ब्‍याङ् हाबाहे़क्‍के पोःक्‍से़॥ हे़क्‍क्‍याङ् निङ्‌वाॽफुमाङ्‌ङिल्‍ले़ पयम् यम्‍बा ने़त्‍छि ओःत्तिहाॽ चोगुसि॥ यम्‍बा ओःत्तिःल्‍ले़ ले़न्‍दिक् थोॽरुर हे़क्‍क्‍याङ् चुक्‍पा ओःत्तिःल्‍ले़ से़न्‍दिक् थोॽरुर फाॽआङ् चोगुसि॥ खुने़ॽ खेसेमिक्‍पाहाॽआङ् चोगुसि॥ निङ्‌वाॽफुमाङ्‌ङिल्‍ले़ इक्‍सादिङ् खाम्‍बेःक्‍मान् थोॽमारे़ लागि खे़न्‍हाॽ ताङ्‌साक्‍पो फत्‍छुसि, ले़न्‍दिक् नु से़न्‍दिक् युक् चोःक्‍मारे़ लागि हे़क्‍क्‍याङ् खागे़ओःप्‍पा नु खागे़धाम्‍बा से़म्‍मारे़ लागि खे़न्‍हाॽ ताङ्‌साक्‍पो फत्‍छुसि॥ हे़क्‍क्‍याङ् निङ्‌वाॽफुमाङ्‌ङिल्‍ले़ ओमे़त्तुल्‍ले़ खे़न् नुबा निसु॥ युःन्‍छिक् पोःक्‍से़ हे़क्‍क्‍याङ् तानाम् पोःक्‍से़—लिसिगेक्‍पा ये़न्॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “वरःङ्‌ङिन् कुहिङ्‌वे़त् पाधुङ् ले़ःक्‍ङाहाॽरे़ मे़धिम्‍सुर॥ हे़क्‍क्‍याङ् पुसाहाॽ इक्‍सादिङ् खाम्‍बेःक्‍माल्‍ले़ कुजङ्‌धाङ् ताङ्‌साङ्‌ङो मे़बे़र॥” खे़ल्‍ले़चोगुल्‍ले़ वरःङ्‌ङोबा यम्बयम्‍बा पाधुङ् ले़ःक्‍ङाहाॽ, च्‍वाःत्तो कुले़ःम् परिक्‍परिक्‍पा मुन्‍जिङ् वयाक् के़लॽबा थक्‍साहाॽ हे़क्‍क्‍याङ् वेॽ वेॽ परिक्‍पा पुहाॽ निङ्‌वाॽफुमाङ्‌ङिल्‍ले़ नावागे़न् चइःत् चोगुसि॥ हे़क्‍क्‍याङ् निङ्‌वाॽफुमाङ्‌ङिल्‍ले़ खे़न् ओमे़त्तु, खे़न् नुबा चोगे़॥ हे़क्‍क्‍याङ् निङ्‌वाॽफुमाङ्‌ङिल्‍ले़ खे़ङ्‌हाॽ अक्‍खे मे़त्तुसिर हाङ्‌वामुॽइ पिरुसि, “पोःन्‍दे़म्‍मे़ॽ थे़ॽरे़म्‍मे़ॽ हे़क्‍क्‍याङ् वरःङ्‌ङिन् थिम्‍से़म्‍मे़ॽर पेगे़म्‍मे़ॽ॥ हे़क्‍क्‍याङ् पुसाहाॽआङ् इक्‍सादिङ् खाम्‍बेःक्‍मो मे़बोःन्‍ल मे़बेःक्‍ल॥” हे़क्‍क्‍याङ् युःन्‍छिक् पोःक्‍से़आङ् तानाम् पोःक्‍से़—ङासिगेक्‍पा ये़न्॥
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “इक्‍सादिङ् खाम्‍बेःक्‍माल्‍ले़ परिक्‍परिक्‍पा कुहिङ्‌वे़त् थक्‍साहाॽ, परिक्‍परिक्‍पा हिम्‍थक्‍साहाॽ, के़सःन्‍छिङ्‌बा थक्‍साहाॽ हे़क्‍क्‍याङ् परिक्‍परिक्‍पा ताम्‍भुङ् थक्‍साहाॽ लःत्तुसिर॥” खे़ब्‍याङ् हाबाहे़क्‍के पोःक्‍से़॥ निङ्‌वाॽफुमाङ्‌ङिल्‍ले़ इक्‍सादिङ् खाम्‍बेःक्‍मोबा परिक्‍परिक्‍पा ताम्‍भुङ् थक्‍साहाॽ, परिक्‍परिक्‍पा हिम्‍थक्‍साहाॽ, हे़क्‍क्‍याङ् खाम्‍बेःक्‍मो के़सःन्‍छिङ्‌बा थक्‍साहाॽ चोगुसि॥ हे़क्‍क्‍याङ् निङ्‌वाॽफुमाङ्‌ङिल्‍ले़ ओमे़त्तु, खे़न् नुबा चोगे़॥
खे़ब्‍याङ् निङ्‌वाॽफुमाङ्‌ङिल्‍ले़ पाःत्तु, “मे़न्‍छाम् याप्‍मिन् आनिॽ चइःत्तो, हाबा आनिॽ चइःत् हे़क्‍तङ्‌बा चोगुम्॥ खे़ङ्‌हाॽरे़ वरःङ्‌ङोबा ङाहाॽ, ताङ्‌साङ्‌बो के़बे़बा पुहाॽ, हिङ्‌मनासिबा थक्‍साहाॽ हे़क्‍क्‍याङ् खाम्‍बेःक्‍मो मुन्‍जिङ् वयाक् के़लॽबा के़रे़क् थक्‍साहाॽ सम्‍धाङ् युक् चोःक्‍सुर॥”
खे़ल्‍ले़चोगुल्‍ले़ निङ्‌वाॽफुमाङ्‌ङिल्‍ले़ आबाङे कुजइःत्तो मे़न्‍छाम् याप्‍मिन् चोगु॥
निङ्‌वाॽफुमाङ्‌ङिल्‍ले़ आबाङे खुने़ॽ हे़क्‍तङ्‌बा चोगुसि,
खुने़ॽ खे़ङ्‌हाॽ ये़म्‍बित्‍छा नु मे़न्‍छुमाए नावागे़न् चइःत् चोगुसिरो॥
निङ्‌वाॽफुमाङ्‌ङिल्‍ले़ खे़ङ्‌हाॽ हाङ्‌वामुॽइ थासु पिरुसि, हे़क्‍क्‍याङ् खे़ङ्‌हाॽ मे़त्तुसि, “मिक्‍किभुङ् फे़क्‍ते़छे़ॽर पेगे़त्‍छे़ॽ, पोःन्‍दे़त्‍छे़र पेगे़त्‍छे़ॽ, इक्‍सादिङ् खाम्‍बेःक्‍मान् थिम्‍से़त्‍छे़ॽ हे़क्‍क्‍याङ् खे़न् आबाङे युक्‍को युक्‍ते़छे़ॽर पेगे़त्‍छे़ॽ॥ वरःङ्‌ङोबा ङाहाॽ, के़बे़बा पुहाॽ, हे़क्‍क्‍याङ् खाम्‍बेःक्‍मोबा के़रे़क् थक्‍साहाॽ सम्‍धाङ् युक् चोगे़त्‍छे़ॽ॥”
खे़ब्‍याङ् निङ्‌वाॽफुमाङ्‌ले़ पाःत्तु, “इक्‍सा खाम्‍बेःक्‍मोबा याॽरिःम्‍बा के़लिङ्‌बा के़रे़क् कुबुङ्‌हाॽ हे़क्‍क्‍याङ् कुजाॽओए याॽरिःम्‍बा के़याक्‍पा के़रे़क् सिङ्‌सेॽहाॽ पिने़छिङ्‌ङाङ् वाॽ॥ खे़न्‍हाॽ खिन्‍छिॽ चामारे़ लागि कुजा पोङ्‌लो॥ हे़क्‍क्‍याङ् इक्‍सादिङ् खाम्‍बेःक्‍कोबा के़रे़क् थक्‍सा, ताङ्‌साक्‍कोबा के़रे़क् पुसा, खाम्‍बेःक्‍मो मुन्‍जिङ् वयाक् के़लॽबा कुसक्‍मा के़याक्‍पा के़रे़क् थक्‍साहाॽरे़ खुन्‍छिॽ चामारे़ लागिआङ् सरेःक्‍क्‍याःप्‍पा थाबु सिङ्‌लिङ्‌हाॽ पिरुङ्‌सिङ्‌ॽ॥” खे़ब्‍याङ् हाबाहे़क्‍के पोःक्‍से़॥
निङ्‌वाॽफुमाङ्‌ङिल्‍ले़ खुने़ॽ चोगुबान् के़रे़क् ओमे़त्तु, खे़न् साॽरिक् नुबा चोगे़॥ युःन्‍छिक् पोःक्‍से़ हे़क्‍क्‍याङ् तानाम् पोःक्‍से़—तुक्‍सिगेक्‍पा ये़न्॥

Сонсох तोलिङ्‌सोमु 1