Mat 5

'Kikea 'wlu 'la plicie

(Mak 3.13; Luk 6.12-13,20-26)

1Daa Zozii 'lɩ 'lɛ ‑alawleea na, ɔ ya 'kikea 'wlu ‑gblaa, ɔ ya sakʋ 'nyɩ ɔla gɩlɩnyaa* yɔɔ cɩ mɛ. 2Ɔ ya wɔɔnyɩtʋ 'ma, ɔ caa maa, 'nyɩ ɔ claa maa lebhe:

3«Ma ‑kʋ 'nanɩ, maa ‑ɔ cibhlili 'lɛ mala ŋaazɩa Laagɔ ‑deliin na,

sa ‑laagɔɔn 'la Nyɩbhɛlɩdua* ‑kʋ ʋ ‑nyɩɔ maa.

4Ma ‑kʋ 'nanɩ, maa ‑ɔ ‑ka 'lɛ pɔɔwɔtɛ na,

sa ma cɩ 'ka ‑dʋdʋa ‑aja 'kʋ lili.

5Ma ‑kʋ 'nanɩ, maa ‑ɔ tu 'lɛ na,

sa Laagɔ cɩ 'ka maa pɔlɛɛn zʋ.

6Ma ‑kʋ 'nanɩ, maa 'kʋnylugolulɩɛ 'la ŋɔmʋ ɩya ɩla 'tʋ bhla 'lɛ na,

sa ma cɩ 'ka lo.

7Ma ‑kʋ 'nanɩ, maa ‑ɔ ‑glɩ 'lɛ ŋaazɩɩnlɩnya na,

sa Laagɔ cɩ 'ka maa ŋaazɩɩn 'lɩ.

8Ma ‑kʋ 'nanɩ, maa ‑ɔ ‑ka 'lɛ ‑kplɔkplɔpɔlɛ na,

sa ma cɩ 'ka Laagɔ 'ciinlɩ.

9Ma ‑kʋ 'nanɩ, maa ‑ɔ lamʋ 'lɛ pupue na,

sa ma cɩ ka maa Laagɔ 'la 'cuo la.

10Ma ‑kʋ 'nanɩ, maa ma sa 'lɛ gbaylɩ 'kʋnylugolulɩɛ 'la gbʋ na,

sa ‑laagɔɔn 'la Nyɩbhɛlɩdua ‑kʋ ʋ ‑nyɩɔ maa.

11A ‑kʋ 'nanɩ,

daa ma vla 'lɛ anyɩ,

ma sa 'lɛ anyɩ gbaylɩ

'nyɩ ma nyumo 'lɛ anyɩ 'ŋlɩ ‑amʋ 'wluku na.

12A kʋ pɔlɛkʋmɛnɔɔn ɩya a nʋ ‑jaka sa ala dluuplʋlɩɛa 'ghli 'yɛpɩ ‑laagɔɔn. 'Sɛtɛɛ bhlogbɩɩ ma ‑saa 'lɛ Laagɔnekʋnyɩtɛnyaa* ‑ma pʋ 'lɛ anyɩ 'kʋklʋʋn na gbaylɩ.

A ‑glɩ ‑dʋdʋa 'kʋ 'la ‑glii ɩya ɩla zezezeli

(Mak 9.50; Luk 14.34-35)

13A ‑glɩ ‑dʋdʋa 'kʋ 'la ‑glii. Gbazɩ ‑glii ‑ka 'dʋʋn 'wlʋ na, 'nsasa ɩ cɩ 'kanɩ ‑awlɛ 'lɛ ‑glii 'plɩplɩlɩ bha? Maa nʋnʋ 'tanɩɩ lʋʋ ‑ylɛylɛ, ‑jlukuun ma pɩɩ 'lɛ 'nyɩ ncɛlɩ namʋnʋɩ 'lɛ 'kʋ.

14A ‑glɩ ‑laagɔzɔan 'la zezezeli. Gbazɩ 'du ‑ka 'kike 'kʋ ‑kʋ na, ʋ 'tanɩ ‑zizieo. 15Maa ŋama 'ta ‑kanie ɩya ma 'kɛɛ ‑tokuo 'wlu ‑gblii, ‑ma 'ka ma gbeziee 'lɛ 'nyɩ ɛla 'jɩa kla 'lɛ ncɛlɩa 'fɩan ‑ma ‑kʋ 'lɛ ‑palʋa ‑zɔn na. 16Sɛɛ bhlogbɩɩ, 'naa ala ‑zelia leli ncɛlɩa 'fɩan 'ci 'kʋ ɩya ma ‑ka ala nʋnʋgbɩ 'nanɩa 'lɩ na, ma 'ka a Toa ‑ɔ ‑kʋ 'lɛ ‑laagɔɔn na 'klʋgba.

Zozii nyɩtɛ ‑jlɩmaa 'la wɔlɩ

17A 'la gugua lebhe ka n ci 'lɛ le n 'ka Moyizi 'la ‑jlɩmaa ‑aana Laagɔnekʋnyɩtɛnyaa 'la nɩwɔlɩa 'dɛ ‑sa. N 'tɩɩ 'dɛ ‑sakan ci, ‑ma ka n ‑ci 'lɛ le n 'kɩɩ 'kʋglalɩ. 18Na, n solu anyɩ, ‑ɩ ‑glɩ ‑nʋawlɛ, le daa ‑laagɔɔn ɩya ‑dʋdʋa cɩ 'ka ka 'lɛ kʋ na, ‑jlɩmaa 'la 'ylɩcie lɛɛ ‑ylɛylɛ cɩ 'ta 'dɛ 'wlʋ ‑aan 'nyɩ ‑tɛtɛa 'fɩan cɩ 'kʋglalɩ. 19Ɩla gbʋ na, ɔmɔa ‑ɔ ‑cɩ ka 'lɛ ‑jlɩmaa ‑naa nɩkplaan 'la wɔɔklɩpɛ bhlogbɩɩ tʋ ɩya ‑ɔ ka 'lɛ ncɛlɩ ca lebhe ma nʋmʋ sɛɛ na, ‑laagɔɔn 'la Nyɩbhɛlɩdua* nɩkplaan, ‑ɔ cɩ leen 'plɩ, ‑ma ɔmɔa ‑ɔ ‑cɩ ‑kaa 'lɛ 'kʋplɩlɩ ɩya ‑ɔ ‑kaa 'lɛ ncɛlɩ ca na, ‑laagɔɔn 'la Nyɩbhɛlɩdua nɩkplaan, ɔ cɩ 'kʋklʋʋn 'plɩ. 20Na, n solu anyɩ, ala 'kʋnylugolulɩɛa 'ta ‑jlɩmaazienyaa* ɩya Falizɩɛnnyaa* 'nɩa 'kʋzi na, 'a cɩ 'ta ‑laagɔɔn 'la Nyɩbhɛlɩdua nɩkplaan ble.

Dɔgbɛ ɩya cɩzʋlʋlɩɛ 'la cɩa wɔlɩ

(Mak 11.25; Luk 12.57-59)

21Zozii ya ‑awlɛ 'cla lebhe: A ya 'nu le ma ya a tokadɔcɩa 'cla lebhe: ‑Naa 'bhlaa nclɔɔ. Ɔmɔa ‑ɔ cɩ ka 'lɛ nclɔɔ 'bhla na, ma cɩ 'kɔɔ 'tɩtɩ zʋ. 22‑Ma ‑amʋ, n solu anyɩ lebhe: Ncaatʋtʋʋntʋa ‑ɔ ‑cɩ ka 'lɛ ɔ 'yʋ, dɔgbɛ 'kʋ 'manɩ na, ma cɩ 'kɔɔ 'tɩtɩ zʋ. Ɔmɔa ‑ɔ ‑cɩ ka 'lɛ ɔ 'yʋ 'cla lebhe: ‑Badaaglunyɔ na, ma cɩ 'kɔɔ tɩtɩplakandikadiea ‑deliin fa. Ɔmɔa, ‑ɔ ‑cɩ ka 'lɛ ɔ 'yʋ 'cla lebhe: Pɔɔbhlanyɔ na, ɔya ‑kosua ‑ʋ ŋomu 'ta 'lɛ na ‑fata.

23Na, gbazɩ ‑n ‑ka ‑naa vavalʋʋ gʋgwlagbatɩa 'kʋ fada ‑kʋ 'nyɩ ‑n ka 'dɛ luolili lebhe ‑naa dɔgbɛ ‑kʋ ‑n 'yʋ nɩkplaan na, 24te ‑naa vavalʋʋa gʋgwlagbatɩa ‑deliin, mʋ ɩya ‑n ya ‑n 'yʋa zʋlʋ cɩ ɩya ‑n cinɩ ɩya ‑n ‑tlanɩ ‑naa vavalʋʋa Laagɔ.

25Gbazɩ -n ‑ya nclɔɔ ‑ka wɔlɩ 'kʋcɩlɩ na, ‑n ‑yɔɔsɔ 'nunu neen 'faanfan, daa a ‑kʋ ‑ka 'lɛ ‑gugwie 'kʋ na, ɔ 'la ka sɛɔ 'tɩtɩplanyɔa ‑deliin fa, 'tɩtɩplanyɔa 'la kɔɔ 'sojanyɔa wlɩɩn zʋ ɩya 'sojanyɔa 'la kɔɔ ‑palʋʋn 'pa. 26N soluo, ɩ ‑glɩ ‑nʋawlɛ: ‑N 'ta ka ‑naa dlua ‑tɛtɛa ‑plʋlɩɛ bhɩalɩ na, ‑n cɩ 'ta ‑palʋa ‑zɔn 'wlʋ.

Ŋlʋmatɩɛ 'la cɩa wɔlɩ

(Mat 18.8-9; Mak 9.43,47-48)

27A ya 'nu le ma ya 'cla lebhe: ‑Naa 'matɩa ‑n 'yʋ 'la 'ŋlɔ. 28‑Ma ‑amʋ, n cla anyɩ lebhe: Ncaatʋtʋʋntʋa ‑ɔ kope 'lɛ 'ŋlɔ 'ciin 'nyɩ ɔla pɔlɛa mʋɔ 'lɛ cɩ na, ɔ yɔɔ tooto 'matɩ.

29‑Naa 'lipasɔcia ‑kɔɔ nyinyiin fa na, kpɛɛ ɩya ‑n 'pɛɛ 'kwlaan. Sa ‑n ka 'bhlɛ cɩ ‑ka na, ɩ nanɩ ɩ zi saa ‑naa 'nyɛkɛa cɩ 'ka 'lɛ 'kʋglalɩ ɩya ɛ 'ka 'lɛ ‑kosua ‑ʋ ŋomu 'ta 'lɛ na nɩkplaan ‑pɔɔ na 'kʋ. 30'Nyɩ ‑naa 'lipasɔ sɔa ‑kɔɔ nyinyiin fa na, 'dɩʋ 'kʋ ɩya ‑n 'pʋʋ 'kwlaan. Sa, ‑naa 'nyɛkɛa 'la dabhlo ‑ka ‑gbɩɔ na, ɩ nanɩ ‑naa da 'nyɩ ɩ zi saa ‑naa 'nyɛkɛa cɩ kaa 'lɛ 'kʋglalɩ ɩya ɛ 'ka 'lɛ ‑kosua ‑ʋ ŋomu 'ta 'lɛ na nɩkplaan ‑pɔɔ na 'kʋ.

'Cɩcɩɛgbɔlʋlɩɛ 'la cɩa wɔlɩ

(Mat 19.7-9; Mak 10.4-5,10-12; Luk 16.18)

31Ma ya ‑awlɛ 'cla lebhe: Gbazɩ nclɔɔ ‑ka ɔ nʋŋlɔ 'cɩcɩɛgbɔlʋ na, 'naa ɔ 'nyɩɔ 'cɩcɩɛgbɔlʋfluwa. 32‑Ma ‑amʋ, n cla anyɩ lebhe: ‑N 'ta le ŋodimatɩɛ 'la gbʋ ‑tɛɛ na, ncaatʋtʋʋntʋa ‑ɔ gbɔlʋ 'lɛ ɔ nʋŋlɔ 'cɩcɩɛ na, ka ɔ zʋɔ 'lɛ ŋodimatɩɛ neen. 'Nyɩ gbazɩ nclɔɔ ‑ka 'ŋlɔa ma ya 'lɛ 'cɩcɩɛ gbɔlʋ na, 'cɩ na, ɔ ya ɔ 'yʋ nʋŋlɔ 'matɩ.

‑Ndanyɩtalɩɛ 'la cɩa wɔlɩ

33A ya ‑awlɛ 'nu le ma ya a tokadɔcɩa 'cla lebhe: ‑N ‑ka ‑ndanyɩ ta na, n cɩ 'tanɩ nekwlacala, ‑ma ‑n cɩ ka ‑naa ‑ndanyɩa 'fɩan ‑n talɩ 'lɛ ‑Kwlenyɔ ‑deliin na, 'kʋglalɩ. 34‑Amʋ, n cla anyɩ lebhe, a 'la taa ‑ylɛylɛ: A 'la slaa ‑laagɔɔn 'ŋlɩ ɩya a 'la taa, sa ɩ ‑glɩ Laagɔ 'la nyɩbhɛlɩkpo, 35a 'la slaa ‑dʋdʋ 'ŋlɩ ɩya a 'la taa, sa ʋ ‑glɩ Laagɔ 'la kplikʋgbɛlʋʋ, a 'la slaa Zolizalɛmʋdua 'ŋlɩ ɩya a 'la taa, sa ʋ ‑glɩ Nyɩbhɛlʋ 'kadiea 'la 'du. 36‑Naa talɩa ‑naa 'wlua 'kʋ, sa ‑n cɩ 'ta mino ɩya ‑n ka ‑naa 'wlu 'la nyacie bhlogbɩɩ pubha ‑aana ‑n kɛɛ kpobho. 37'Naa ala ‑ghɛɛ 'plɩ ‑ghɛɛ ɩya ala ‑wɔɔ 'plɩ ‑wɔɔ. Ɩmɩa ‑tɛtɛa ‑ɩ 'wlʋlʋnɩ 'lɛ leen na, ɩ 'wlʋlʋ Gɔzɛ wlɩɩn.

Kpasalɩɛ 'la cɩa wɔlɩ

(Luk 6.29-30)

38A ya 'nu le ma yaa 'cla lebhe: ‑N 'yʋ ‑ka ‑na 'ci wla na, wlamʋɔ 'ci, 'nyɩ ‑n 'yʋ ‑kɔɔ ‑gle neen ‑sa na, ma cɩɔ ‑gle neen ‑samʋ. 39‑Amʋ, n cla anyɩ lebhe: A 'la ‑saa acɩa kpa. ‑Ma gbazɩ nclɔɔ ‑kɔɔ 'lipasɔkpacɔa 'sɛpɛ na, ‑tlamʋɔ 'daba ‑naanʋa. 40Gbazɩ nclɔɔ ‑ka ‑wa le ɔ 'kɔɔ tʋ kulu ɩya ɔ 'ka sɛ ‑naa 'janpaa 'ma na, teo ne ɩya ɔ 'mamʋ ‑naa bibielʋʋa. 41'Nyɩ gbazɩ nclɔɔ ‑kɔɔ 'saantiin kla le a namʋ ‑kilo bhlo na, ‑n ‑yɔɔsɔ namʋ ‑kilo ‑mɔsɔ. 42Nclɔɔ ‑kɔɔ 'clalɩ na, 'nyɩɔ. Nclɔɔ ‑ka ‑wa le ‑n ‑gblɔɔ na, ‑naa ‑tlɔɔ kɔkʋʋn.

A wabha ala ‑zɔbhɛlɩgbanya

(Luk 6.27-28,32-36)

43A ya 'nu le ma ya 'cla lebhe: Wabha ‑n 'yʋ ɩya ‑n zɔbhɛlɩ ‑naa ‑zɔbhɛlɩgbanyɔ. 44‑Ma ‑amʋ, n cla anyɩ lebhe: A wabha ala ‑zɔbhɛlɩgbanya ɩya a bhibhie a 'nyɩ maa ‑ɔ sa 'lɛ anyɩ gbaylɩ na. 45Ɩya a 'ka ‑zaagbʋsa a Toa ‑ɔ ‑kʋ 'lɛ ‑laagɔɔn na 'la 'cuo 'plɩ. Sa ɔ gba ‑zeli zeli nyinyinʋnya ɩya 'nanɩnʋya, 'nyɩ ɔla bhlabhlanyua ŋeni 'kʋnylugolunya ɩya maa ‑ɔ 'ta 'lɛ 'kʋnyluglolunya ‑glɩ na 'kʋ. 46A ‑ka maa ‑ɔ ‑wa 'lɛ anyɩ na ‑tɛɛ ‑wa na, ‑nvʋsʋɛ saa a cɩ 'kɩɩ 'lɛ nɩkplaan 'lɩlɩ bha? ‑Lapooclanyaa 'titi ‑ma, ma nʋmʋ 'ta sɛɛ bha? 47'Nyɩ a ‑ka a bholiecɩ ‑tɛɛ ‑ayopa na, nikpooslaslawɔlɩ saa 'titi a ya 'lɛ nʋ bha? Maa ‑ɔ 'ta 'lɛ Laagɔ ‑ci 'titio na, ma nʋmʋ 'ta sɛɛ bha? 48Na anyɩ, a 'plɩ ‑kplɔkplɔnya le saa a Toa ‑ɔ ‑kʋ 'lɛ ‑laagɔɔn na, ɔ ‑glɩ 'lɛ ‑kplɔkplɔnyɔ na.»

നിലവിൽ തിരഞ്ഞെടുത്തിരിക്കുന്നു:

Mat 5: NTLD13

ഹൈലൈറ്റ് ചെയ്യുക

പങ്ക് വെക്കു

പകർത്തുക