1. Mose 35
35
Gott säajent Jakob bie Betel
1Un Gott säd to Jakob: Pak emol opp, un go no Betel. Moak dien Loaga doa un bu doa eenen Aultoa fa däm Gott, dee sikj die wees, aus du von dienen Brooda Esau ranen deetst. #1Mo 28,11-22; 31,13 2Un Jakob säd to siene Famielje un wäa sest met am wia: Stot aule Jetta von aundre Velkja auf, dee jie haben. Reinicht junt un trakjt fresche Kjleeda aun. #1Mo 31,19; 5Mo 27,15; Jos 24,23 3Wan wie reed sent, well wie no Betel gonen, soo daut ekj doa eenen Aultoa opprechten kaun. Dee es fa dän Gott, dee mie en mienen Trubbel auntwuaten deed un emma met mie jegonen es, krakjt eendoont wua ekj sie hanjegonen. 4Dan jeewen see Jakob aul de Jetta von aundre Velkja, waut see hauden, un uk de Rinj, waut see enne Uaren hauden. Jakob begrowd daut aula unja däm Ieekjenboom, dicht bie Sichem. #Jos 24,26; Rech 9,6 5Aus see dan reisden, schekjt Gott eene Forcht opp de Städa en dee Jäajent, un kjeena juach Jakob un siene Säns hinjaraun. #2Mo 23,27; Jos 10,10 6Un Jakob kjeem no Lus, daut es, Betel, en Kanaan met aul de Menschen, dee met am wieren. 7Hee bud doa eenen Aultoa un nand de Städ El Betel, wiels doa haud Gott sikj am jewäsen aus hee emol von sienen Brooda wajch rand. 8Debora, Rebecka äare Kjäakjsche, storf aus see doa wieren, un see begrowden ar bie dän Ieekjenboom nich wiet von Betel. Doawäajen nanden see dee Städ Trua Ieekj. #1Mo 24,59
9Un Gott kjeem noch emol no Jakob aus hee von Mesopotamien trigj wia, un hee säajend am. 10Un Gott säd to am: Dien Nomen es Jakob, oba du saust von nu aun nich mea Jakob heeten. Du saust Israel heeten. Gott jeef am dän Nomen Israel. #1Mo 32,29 11Un Gott säd wieda,
Ekj sie Gott dee aule Macht haft.
Muchst du väl Kjinja haben
un sea toonämen.
Een Volkj un väle Velkja
sellen von die aufstaumen.
Von diene Nokomen woat daut Kjennichs jäwen. #1Mo 17,1.6; 28,3-4
12Daut Launt, woont ekj vesproaken hab
Abraham un Isaak äare Nokomen to jäwen,
woa ekj die jäwen.
Un ekj woa diene Nokomen no die
daut Launt jäwen.
13Dan jinkj Gott wieda von de Städ, wua hee met am jerät haud. 14Un Jakob recht doa eenen steilen Steen opp un weid dee Städ en, doamet daut hee doa een Drinkjopfa von Wien un uk Eelj äwa dän Steen goot. #(14 un 15) 1Mo 28,18-19 15Un Jakob nand de Städ, wua Gott met am jerät haud, Betel.
16Un see reisden wieda von Betel un wieren noch een Enjskje auf von Efrata aus Rahel de Weedoag sea schwoa kjrieech. 17Un de Fru, waut ar doa holp, säd to ar: Enjst die nich. Du woascht noch eenen Sän haben. #1Mo 30,24 18Oba jrod ea äa Läwen von ar jinkj, wiels see storf dän Dach, nand see dän Jung Ben Oni. #35,18 Daut bediet truarich Jakob oba, nand am Benjamin. #35,18 Daut bediet Sän aun miene rajchte Haunt 19Soo storf Rahel. Un see begrowden ar dicht bie Efrata, waut vondoag Betlehem es. #1Mo 48,7; 1Sam 10,2; Jer 31,15; Mat 2,18 20Un Jakob recht doa eenen Steen opp, opp daut Grauf. Dee Steen es, waut wie vondoag noch “De Steen opp Rahel äa Grauf” nanen. 21Israel reisd dan wieda un sad sien Zelt aun jant Sied vom Eder Torm opp.
Jakob sien Famieljen Rejista. Isaak stoaft
22Aus Israel en daut Launt wond, jinkj Ruben eenen Dach un lach met sienen Voda siene Näbenfru, Bilha. Un Israel hieed doavon. #1Mo 49,4; 1Chr 2,1-2
Jakob haud twalw Säns. 23Lea äare Säns wieren Ruben, Jakob sien ieeschtjebuarna, Simeon, Levi, Juda, Isachar, un Sebulon. 24Rahel äare Säns wieren Josef un Benjamin. 25Bilha, Rahel äare Kjäakjsche, äare Säns wieren Dan un Naftali. 26Silpa, Lea äare Kjäakjsche, äare Säns wieren Gad un Asser. Dit sent dan aul Jakob siene Säns, dee en Mesopotamien jebuaren wieren.
27Un Jakob kjeem no Mamre bie Kirjat Arba, waut vondoag Hebron es, no sienen Voda Isaak. Dit wia de Jäajent wua Abraham un Isaak jewont hauden. 28Isaak wort 180 Joa oolt. 29Isaak wia oolt un läwenssaut aus hee storf, un hee wort met de Lied toop begroft dee aul ea jestorwen wieren. Isaak siene Säns, Esau un Jakob, begrowden am.
നിലവിൽ തിരഞ്ഞെടുത്തിരിക്കുന്നു:
1. Mose 35: PB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Plautdietsch Bible © 2003 Kindred Productions and United Bible Societies Association, Inc.
