1. Mose 34
34
Trubbel met de Nobasch
1Daut neem sikj eenen Dach soo rom, daut Dina, dee Jakob un Lea äare Dochta wia, no de Frues doa em Launt spazieren jinkj. #1Mo 30,21 2Hamor de Hiwita, dee doa Volkjsleida en daut Launt wia, haud eenen Sän, Sichem. Aus Sichem Dina sach, neem hee ar met Jewault un lach met ar, un dreef Schaund met ar. #Rech 9,28 3Am jefoll dee Dina, Jakob siene Dochta, sea, un hee wia ar goot. Hee räd leeftolich to ar. 4Un Sichem räd to sienen Voda Hamor un säd: Vesorj mie dise Mejal aus Fru.
5En tweschen hieed Jakob, daut Sichem met siene Dochta Dina haud Schaund jedräwen. Jakob siene Säns wieren oba noch aula oppe Stap met daut Vee, un soo luad hee bat dee no Hus kjeemen. 6Un Hamor, Sichem sien Voda, jinkj no Jakob un räd met am. 7Aus Jakob siene Säns hieeden waut doa jeworden wia, kjeemen see von de Stap un wieren sea oppjeräacht. Daut wia an sea jäajenaun, daut wäa Jakob siene Dochta met Jewault jedwungen haud. Soont kunnen see bloos nich tochloten.
8Oba Hamor räd to an un säd: Mien Sichem haft een grootet trakjen fa june Sesta. Jäft am dee doch aus siene Fru. 9Well wie ons toopfrieen. Lot ons june Mejales frieen un jie kjennen onse Mejales frieen. 10Jie kjennen hia met ons toop wonen. Jie kjennen hia Launt haben, un kjennen hia wonen un haundlen un uk Launt kjeepen. 11Un Sichem säd to Dina äaren Voda un Breeda: Siet doch jescheit to ons. Ekj jäw junt daut no waut jie froagen. 12Froacht no krakjt daut waut jie wellen un sat dän Brutpries soo huach aus jie wellen, un ekj woa junt daut jäwen. Oba jäft mie bloos de Mejal aus miene Fru. #2Mo 22,15
13Un Jakob siene Säns auntwuaden Sichem un sienen Voda Hamor met Lest, wiels hee met äare Sesta Dina Schaund jedräwen haud. 14See säden an: Wie kjennen onse Dochta nich no eenem jäwen dee nich beschnäden es. Daut wudd mank ons eene Schaund sennen. 15Dän eensjen Wajch opp woonen wie enweljen wudden es, wan jie wudden soo doonen aus wie un junt aula beschnieden leeten. #1Mo 17,10-14 16Bloos dan wudd wie onse Mejales loten sikj met junt befrieen un june Mejales met ons. Dan wudd wie met junt toop en een Launt wonen un een Volkj met junt toop sennen. 17Oba wan jie daut nich doonen wellen un junt nich beschnieden loten, dan näm wie onse Sesta un veloten von hia. 18Un Hamor un sien Sän Sichem jefoll dee Väaschlach. 19De junga Maun luad goanich doamet, wiels hee Jakob siene Dochta soo goot wia. Sichem wia daut hechste aunjeseenen en siene Famielje.
20Dan jinjen Hamor un sien Sän Sichem no äa Stautspuat un säden to äare Mana: 21Dise Mana sent ons toojedonen. Well wie an hia loten em Launt wonen un hia haundlen. De Jäajent es doch groot jenuach fa an. Well wie ons äare Mejales frieen un an loten onse Mejales frieen. 22Oba doa es eene Bedinjunk dee see stalen, daut wie toop en een Launt läwen un een Volkj met an woaren. See velangen daut aule Mana beschnäden woaren, soo aus see aul sent. 23Well wie ons to dise Bedinjunk enweljen. Dan woaren see mank ons wonen un dan wudd aul äa Vee, äa Launt un waut see noch haben ons sennen. 24Un aul de Mana, waut doa nenn un rut jinjen, horchten no Hamor un Sichem un see leeten sikj aula beschnieden. Un aul dee Mana von dee Staut leeten sikj beschnieden.
25Dan aum dredden Dach, aus de Mana aula noch Wund un schlemm wieren, jinjen Dina äare Breeda, Simeon un Levi, met Schwieed aun de Staut naun. See schlikjten sikj doa han un brochten aule Mana om. #1Mo 49,5-7 26See brochten Hamor un sienen Sän Sichem om met daut Schwieet, un neemen Dina von ut Sichem sien Hus un jinjen trigj. 27Un aus Jakob siene Säns enworden waut jeworden wia, jinjen see un bestoolen de Staut, wäajen dee met äare Sesta Schaund jedräwen hauden. 28See neemen doa aul de Schop un daut Vee, de Äsels un waut doa sest noch enne Staut un oppe Stapen wia. 29See neemen aul dee äa Goot, aul äare Kjinja un Frues un neemen waut doa enne Hiesa wia un neemen daut fa sikj. 30Un Jakob säd to Simeon un Levi: Dit waut jie jedonen haben haft mie en Trubbel jebrocht. Dit kunn de Enwona en dit Launt, de Kanaanita un Perisita, jäajen ons brinjen. Wie sent nich väl, un wan dee sikj jäajen ons toopbaunden wudden, wudden see mie un aules waut ekj hab ombrinjen. 31Oba de Junges säden: Sull wie am loten onse Sesta to eene Hua moaken?
നിലവിൽ തിരഞ്ഞെടുത്തിരിക്കുന്നു:
1. Mose 34: PB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Plautdietsch Bible © 2003 Kindred Productions and United Bible Societies Association, Inc.
