ᐅᐸᓓᑭᔅ ᒫᑎᐤ 4

ᒋᓴᔅ ᐁ ᑲᑴᒋᐊᑲᓂᐎᑦ

(ᒫᕐᒃ 1:12–13; ᓘᒃ 4:1–13)

1ᐁᑯ ᒫᑲ ᒋᓴᔅ ᑳ ᐃᑐᑕᐃᑯᑦ ᐊᒑᑾ ᐸᑾᑕᔅᑲᒥᑳᒃ ᑭᒋ ᑲᑴᒋᐃᑯᑦ ᒪᒋᒪᓂᑐᐗ᙮ 2ᐃᔅᐱ ᒫᑲ ᑳ ᑮ ᓂᑲᓱᑦ ᓀᒥᑕᓇᐤ ᑭᔑᑲᐗ ᓀᔥᑕ ᑎᐱᔅᑳᐗ, ᐁᑯ ᐙ ᒥᒋᓱᑦ᙮ 3ᐃᔅᐱ ᒫᑲ ᐅᑲᑴᒋᐃᐌᐗ ᐱᐁᒋ ᓈᑎᑯᑦ, ᑮ ᐃᑎᑯ, ᑮᔥᐱᓐ ᑭᒋᒪᓂᑐ ᐌᑯᓯᓯᒥᔅᑴ, ᐃᑕᔓᐌ ᐅᑯ ᐊᓯᓂᔭᒃ ᑭᒋ ᐊᓚᑯᓇᐎᒋᒃ᙮

4ᒫᑲ ᐁ ᓇᔥᑴᐗᔑᐃᐌᑦ ᑮ ᐃᑗᐤ, ᐃᑕᓯᓇᐃᑳᑌᐤ, ᐃᓕᓕᐤ ᓇᒪᐎᓚ ᑲᑕ ᐱᒫᑎᓯᐤ ᐱᔑᔑᒃ ᐊᓚᑯᓇᐗ ᐅᒋ, ᒫᑲ ᑕᑐ ᐋᔭᒥᐎᓂᓕᐤ ᐅᒋ ᑭᒋᒪᓂᑐ ᐅᑐᓂᒃ ᑳ ᐅᒋᐸᓕᓕᒃ᙮

5ᐁᑯ ᒫᑲ ᒪᒋᒪᓂᑐ ᐁᑐᑕᐋᑦ ᐸᓓᑭ ᐃᑖᐎᓂᒃ, ᑮ ᑌᑕᓓᐤ ᒫᑲ ᑕᑯᒡ ᐃᑕ ᐁ ᐃᔥᐹᓕᒃ ᑭᒋᐋᔭᒥᐁᐎᑲᒥᑯᒃ, 6ᐃᑌᐤ ᒫᑲ, ᑮᔥᐱᓐ ᑭᒋᒪᓂᑐ ᐌᑯᓯᓯᒥᔅᑴ, ᓂᒋᒀᔥᑯᑎ: ᐌᓴ ᐃᑕᓯᓇᐃᑳᑌᐤ, ᑲᑕ ᐃᑕᔓᐙᑌᐤ ᐅᑦ ᐁᓐᒐᓕᒪ ᑭᓚ ᐅᒋ: ᓀᔥᑕ ᐅᒋᒋᐙᒃ ᑭ ᑳ ᐋᓱᓂᑾᒃ ᐁᑳ ᑭᒋ ᐅᑖᒥᑎᑖᔭᓐ ᑭᓯᑦ ᐊᓯᓂᒃ᙮

7ᒋᓴᔅ ᑮ ᐃᑌᐤ, ᒥᓇ ᐃᑕᓯᓇᐃᑳᑌᐤ, ᐁᑳᐎᓚ ᑭ ᑳ ᑲᑴᒋᐊᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒻ᙮

8ᒥᓇ ᒪᒋᒪᓂᑐ ᐃᑐᑕᐁᐤ ᐗᒋᒃ ᓈᔅᐱᒡ ᐁ ᐃᔅᐸᑎᓈᓕᒃ, ᐙᐸᑎᓓᐤ ᒫᑲ ᒥᓯᐌ ᐅᑭᒫᐎᐎᓇ ᐅᑕ ᐊᔅᑮᒃ, ᓀᔥᑕ ᐁᔅᐱᒋ ᒥᓗᓈᑾᓂᓕᑭ; 9ᐃᑌᐤ ᒫᑲ, ᒥᓯᐌ ᐅᐅ ᑭ ᑳ ᒥᓕᑎᒃ, ᑮᔥᐱᓐ ᐅᑎᑕᐱᔅᑕᐎᔭᓀ ᓀᔥᑕ ᓇᐗᑭᔅᑕᐎᔭᓀ᙮

10ᐁᑯ ᒋᓴᔅ ᐁᑖᑦ, ᐊᐗᔅ ᒫᒑ, ᓭᑖᓐ: ᐌᓴ ᐃᑕᓯᓇᐃᑳᑌᐤ, ᑭ ᑳ ᓇᐗᑮᔅᑕᐗᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒻ, ᐎᓚ ᓀᔥᑕ ᐱᑯ ᑭ ᑳ ᐊᑑᔅᑫᔅᑕᐗᐤ᙮

11ᐁᑯ ᒫᑲ ᓀᑲᑎᑯᑦ ᒪᒋᒪᓂᑐᐗ, ᒫᑎᑲ, ᒫᑲ, ᑮ ᐯᒋ ᓈᑎᑯ ᐁᓐᒐᓚ ᐁ ᐅᒋᔅᑕᒫᑯᑦ᙮

ᒋᓴᔅ ᒫᒋᑕᐤ ᐅᑕᐸᑎᓯᐎᓐ ᑳᓕᓖᒃ

(ᒫᕐᒃ 1:14–15; ᓘᒃ 4:14–15)

12ᐃᔅᐱ ᒫᑲ ᒋᓴᔅ ᑳ ᑮ ᐯᑕᒃ ᒑᓇ ᐁ ᑮ ᐌᐱᓈᑲᓂᐎᓕᒋ ᑭᐸᐅᑐᐎᑲᒥᑯᒃ, ᑮ ᐃᑐᑌᐤ ᑳᓕᓖᒃ; 13ᐁ ᓇᑲᑕᒃ ᓈᓴᕆᑦ ᒫᑲ, ᑮ ᐯᒋ ᐃᑐᑌᐤ, ᓀᔥᑕ ᑮ ᑕᔑᑫᐤ ᑲᐸᕐᓀᔭᒥᒃ, ᒋᑭᒡ ᑭᒋᑲᒥᒃ ᑳ ᐃᑕᑾᒃ, ᐯᔓᒡ ᐊᓐᑕ ᓵᐱᐤᓚᓐ ᓀᔥᑕ ᓀᑉᑕᓕᒻ: 14ᑭᒋ ᑎᐸᓕᓕᒃ ᑳ ᑮ ᐃᑗᑦ ᐅᑭᔅᑭᐙᐃᑫᐤ ᐋᐃᓭᔭ, ᐁ ᐃᑗᑦ, 15ᐅᑦ ᐊᔅᑭ ᓵᐱᐤᓚᓐ, ᓀᔥᑕ ᐅᑦ ᐊᔅᑭ ᓀᑉᑕᓕᒻ, ᒋᑭᒡ ᑭᒋᑲᒥᒃ, ᐊᐙᓯᑌ ᐃᑌᑫᑳᒻ ᒐᕐᑕᓂᒃ, ᐅ ᑳᓕᓕᒥᐙᒃ ᒉᓐᑖᐃᓕᒃ: 16ᐊᓂᑭ ᐃᓕᓕᐗᒃ ᑳ ᐊᐱᒋᒃ ᐃᑕ ᐁ ᐗᓂᑎᐱᔅᑳᓕᒃ ᑮ ᐙᐸᑕᒶᒃ ᑭᒋ ᐙᔅᑌᐎᓂᓕᐤ; ᐊᓂᑭ ᓀᔥᑕ ᑳ ᐊᐱᒋᒃ ᐊᔅᑮᒃ ᐃᑕ ᐁ ᑎᑳᔅᑌᔅᑳᑯᒋᒃ ᓂᐱᐎᓂᓕᐤ, ᐙᔅᑌᐎᓂᓕᐤ ᑫᑕᑐᐌ ᐅᑎᑎᑯᐗᒃ᙮

17ᐁᑯᔅᐱ ᐅᒋ ᒋᓴᔅ ᑮ ᒫᒋ ᑲᑫᔅᑭᒥᐌᐤ, ᐁ ᐃᑗᑦ, ᑴᔅᑳᑎᓰᒃ: ᐌᓴ ᑭᒋᑭᔑᑳᐎ ᐅᑭᒫᐎᐎᓐ ᐯᔓᓈᑾᓐ᙮

ᒋᓴᔅ ᑲᑴᒋᒣᐤ ᓀᐤ ᐅᓄᑐᒣᓭᐎᐗᒃ ᑭᒋ ᓄᔅᐱᓇᑕᑯᑦ

(ᒫᕐᒃ 1:16–20; ᓘᒃ 5:1–11)

18ᒋᓴᔅ ᒫᑲ ᐁ ᐱᒧᑌᑦ ᔑᔓᒡ ᑳᓕᓕ ᑭᒋᑭᒦᒃ, ᑮ ᐙᐸᒣᐤ ᓂᔓ ᐁ ᐎᒋᔖᓂᑐᓕᒋ, ᓵᐃᒪᓐ ᑳ ᐃᔑᓂᑳᓱᑉ ᐱᑕᕐ, ᓀᔥᑕ ᐋᓐᑦᕈ ᐎᒋᔖᓇ, ᐁ ᐸᑭᑕᐙᓕᒋ ᑭᒋᑲᒦᒃ: ᐌᓴ ᐅᓄᑐᒣᓭᐎᐗᒃ᙮ 19ᑮ ᐃᑌᐤ ᒫᑲ, ᓄᔅᐱᓇᔒᒃ ᐁᑯ ᑫ ᐃᔑᐃᑕᑾᒃ ᑭᒋ ᐱᑕᐅᓓᑾᒃ ᐃᓕᓕᐗᒃ᙮ 20ᑣᔦᒃ ᒫᑲ ᑮ ᓇᑲᑌᐗᒃ ᐅᑦ ᐊᓕᐱᐙᐗ, ᑮ ᓄᔅᐱᓇᑌᐗᒃ ᒫᑲ᙮

21ᐊᓐᑕ ᒫᑲ ᐁ ᐅᒋ ᑭᑐᑌᑦ, ᑮ ᐙᐸᒣᐤ ᑯᑕᑭᔭ ᓂᔓ ᒋᒫᓂᒃ ᐁ ᒋᒫᓕᒋ ᐅᑖᐎᓕᐗ ᓭᐱᑎᔭ, ᐁ ᐙᔅᐱᑖᓕᒋ ᐅᑦ ᐊᓕᐱᓕᐗ; ᑮ ᓇᑐᒣᐤ ᒫᑲ᙮ 22ᑣᔦᒃ ᒫᑲ ᑮ ᓇᑲᑕᒶᒃ ᒋᒫᓂᓕᐤ ᓀᔥᑕ ᐅᑖᐎᐙᐗ, ᑮ ᓄᔅᐱᓇᑌᐗᒃ ᒫᑲ᙮

ᒋᓴᔅ ᐁ ᑭᔅᑭᓄᐊᒫᑫᑦ, ᐁ ᑲᑫᔅᑭᒥᐌᑦ ᓀᔥᑕ ᐁ ᒥᓇᐙᒋᐃᐌᑦ

(ᓘᒃ 6:17–19)

23ᒋᓴᔅ ᒫᑲ ᑮ ᐸᐹᐃᑐᑌᐤ ᒥᓯᐌ ᑳᓖᓖᒃ, ᐁ ᑭᔅᑭᓄᐊᒫᑫᑦ ᐅᑦ ᐋᔭᒥᐁᐎᑲᒥᑯᓖᒃ, ᐁ ᐙᐎᑕᒫᑫᑦ ᒫᑲ ᑭᒋᑭᔑᑳᐎ ᐅᑭᒫᐎᐎᓂ ᒥᓗᐋᒋᒧᐎᓂᓕᐤ, ᐁ ᒥᓇᐙᒋᑖᑦ ᒥᓯᐌ ᐃᔑ ᐋᑯᓯᐎᓂᓕᐤ ᓀᔥᑕ ᒥᓯᐌ ᓇᓈᑲᐤ ᑳ ᐃᑖᔅᐱᓀᓕᒋ ᐃᓕᓕᐗ᙮ 24ᑮ ᐸᐹᑎᐹᒋᒫᑲᓂᐎᐤ ᒫᑲ ᒥᓯᐌ ᓯᕆᔭᐃᒃ: ᑮ ᐯᑐᐌᐗᒃ ᒫᑲ ᒥᓯᐌ ᑮ ᐋᑯᓯᓕᒋ ᐃᓕᓕᐗ ᓇᓈᑲᐤ ᑳ ᐃᑖᔅᐱᓀᓕᒋ ᓀᔥᑕ ᐃᔑ ᐙᐎᓴᑫᓕᑕᒥᓕᒋ, ᐊᓂᐃ ᓀᔥᑕ ᑳ ᐱᒋᔅᑳᑯᓕᒋ ᒪᒋ ᐊᒑᑾ, ᐊᓂᐃ ᓀᔥᑕ ᑳ ᑮᔥᑴᓕᒋ, ᐊᓂᐃ ᓀᔥᑕ ᑳ ᓇᓇᒫᔅᐱᓀᓕᒋ; ᑮ ᒥᓇᐙᒋᐁᐤ ᒫᑲ᙮ 25ᑮ ᓄᔅᐱᓈᑎᑯ ᒫᑲ ᓈᔅᐱᒡ ᒥᒉᑦ ᐃᓕᓕᐗ ᑳᓕᓕᒃ ᐅᒋ, ᓀᔥᑕ ᑎᑳᐳᓕᓯᒃ ᐅᒋ, ᓀᔥᑕ ᒋᕉᓴᓚᒥᒃ ᐅᒋ, ᓀᔥᑕ ᒎᑎᐊᐃᒃ ᐅᒋ, ᓀᔥᑕ ᐊᐙᓯᑌ ᐃᑌᑫᑳᒻ ᒐᕐᑕᓂᒃ ᐅᒋ᙮

നിലവിൽ തിരഞ്ഞെടുത്തിരിക്കുന്നു:

ᐅᐸᓓᑭᔅ ᒫᑎᐤ 4: MCNT91

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

The text of the Bible in Moose Cree is in the public domain.

ᐅᔅᑭ ᑎᔅᑌᒥᓐᑦ നെക്കുറിച്ച് കൂടുതലറിയുക