མ་ཏི། 18
18
ཞིང་ཁམས་ག་རྒྱལ་སྲིད་ག་ ཆི་ལུ་རང་ ཨི་བི་གི་ལ་ཡ།
1ཨུ་ཉུ་གང་ཀ་ སློ་མ་བ་ ཡི་ཤུ་ག་སྐུན་མདུན་ག་བཅག་ཐཱན་ ཞིང་ཁམས་ག་རྒྱལ་སྲིད་ག་ ཆི་ལུ་རང་ ཨི་བི་གི་ལ་ཡ་དག་ཉི་ ཞུ་ཝ༌ལ།
2ཡི་ཤུ་གི་ ཝག་ཙ་ཐུར་རཱན་ཐཱན་ རོག་ཏེ་བ་ཀ་པོང་ཀ་ ཐིང་ཉི་ཐ་ཝ༌ལ། 3ཉི་རོ་ཀི་གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ ན་ཧ་བ་ སོར་ཐཱན་ ཨོ་ཐ་ཝག་ཙ་ད་བུ་ མ་རི་ཝ་སག་པུ་ ཞིང་ཁམས་ག་རྒྱལ་སྲིད་ག་ ཧ་ལ་རང་ མ་ནུ་ཕ་དག༌ཉི། 4ཨོ་ཐ་ཝག་ཙ་ད་བུ་ ཨི་བི་ཉམ་ཆུང་རི་ཝ་ཐུར་ ཨོ་ཉ་སོ་ངོ་ཁེ་པ་ ཞིང་ཁམས་ག་ རྒྱལ་སྲིད་ག་ ཐམས་ཅན་གེ་ཆི་ལུ་གི༌ལ།
5ཨུ་ཐུ་ད་བུ་ཝག་ཙ་ ཨི་བི་གི་ ཇ་ག་མིང་ག་ ལ་ཝ་ཐུར་ ཇང་ཞུན་ཅ་གི༌ལ། 6དག་པ་ཀབ་ཉི་ ཨི་བི་གི་ ཇ་ག་ཨོ་ཐ་དད་པ་ཨ་ཁཱན་ ཟེ་མུ་ཐུར་ག་བུ་ སྡིག་པ་ཨ་ལེ་བི་ཝ་ཐུར་ ཨོ་ཉ་སོ་ངོ་གི་ རང་ཐང་ལུང་ཆི་ལུ་ཐུར་ རོ་ཀ་ངང་གེ་ཇཱན་ཐཱན་ མཚོ་ནང་ཀ་ ཐི་མ་དྲག༌པེ།
7བཱརའ་སོ་ངོ་བ་ སྡིག་པ་ཨ་ལེ་རིག་ཁཱན་ སོ་ངོ་བ་ ཧབ་ཏུར་ཀ་ལུ་ཨོ་ཕེ་ཡ། བར་ཆད་ཏ་ ཇུང་མེ་རང་གི༌ལ། དག་པ་ཀབ་ཉི་ བར་ཆད་ཕ་ཁཱན་ སོ་ངོ་ཁེ་པ་ ཧབ་ཏུར་ཀ་ལུ་ཨོ་ཕེ་ཡ། 8ན་ཧ་ག་དང་གི་ ཡང་ན་ལ་ བི་གི་སྡིག་པ་ཨ་ལེ་རིག་ནེ་ལ་ ཅཱད་ཐཱན་གེམ་ཀུན་ཏི། བི་དང་ག་དང་ ཉིག་ཙིང་རང་ཆོ་ནེ་བུ་ ཧ་ལ་རང་མ་ཤི་ཁཱན་ མི་ནང་ཀ་ ཐུབ་གེ་མ་གེ་ཏ་ བི་དང་ག་དང་མ་ཝ་ཨ་ཉི་ ཚེ་མ་འགྱུར་བརྟན་པ་ནང་ཀ་ ནུ་ཕ་དྲག༌པེ། 9ཉི་ན་ཧ་མིང་གི་ སྡིག་པ་ཨ་ལེ་རིག་ནེ་ལ་ ཇེག་ཉི་གེམ་ཀུན་ཏི། མིང་ཉིག་ཙིང་རང་ཆོ་ནེ་བུ་ དམྱལ་བ་ག་མི་ནང་ཀ་ ཐུབ་གེ་མ་གེ་ཏ་ མིང་ལོག་ཐུར་ཨ་ཉི་ ཚེ་མ་འགྱུར་བརྟན་པ་ནང་ཀ་ ནུ་ཕ་དྲག༌པེ༎
གེམ་ཁཱན་ཤི་ཤ་ག་ དཔེ་གཏམ།
10-11ན་ཤི་ཨོ་ཐ་ཟེ་མུ་བ་ཀ་པོང་ཀེ་ ཐུར་ག་བུ་ ངལ་མ་རངས་པ་ མ་ཨ་ལེ་དེན་གེ་ རིག་པ་སྒྲིམ་ཅོ། ཧང་ཡ་དག་ནེ་ལ་ ཞིང་ཁམས་ག་ཆོ་ཁཱན་ རོག་ཏེ་བ་ཀ་ ཞིང་ཁམས་ག་འཐེན་པ་བ་ཀི་ ཧ་ལ་ཨ་ནེ་བུ་ ཇ་ག་ཡབ་ག་ཞལ་ག་ གོད་པུ་གོད་ས་རང༌ཅ།
12ཤི་ཤ་དི་པ་ཐུར་ག་ ཤི་ཤ་ 100 ཆོ་ཝ་གེ་ ཐུར་གེམ་ནེ་ལ་ རོ་ཀི་ཧང་ཨ་ལེ་ཡ། ཧང་རོ་ཀི་ཤི་ཤ་ 99 ཁེ་པ་ ཐུབ་ཐཱན་ཐཱན་ ཨོ་ཉ་གེམ་ཁཱན་ཤི་ཤ་ཁེ་པ་ ལ་མེ་དེན་གེ་ ཕུ་ཐུང་ཀ་ཏཱན་མ་དི་ལ་སྨོ། 13ཇི་གི་ ན་ཧ་ཐྲང་ཉི་ཡེག་པེ་ རོ་ཀི་ཨོ་ཉ་ཤི་ཤ་ ལམ་ཉི་ཐོང་ནེ་ལ་ མ་གེམ་ཁཱན་ཤི་ཤ་ 99 གེ་ལག་ཉི་ ཨོ་ཉ་ཤི་ཤ་གེམ་ཁཱན་ཁེ་པ་ ཐོང་མ་ཨ་དེན་གེ་ ཤོ་ནང་ཕེ༌ལེ། 14ཨུ་ཉུ་པུརུས་ཀིན་ཨ་ཉི་རང་ ཨོ་ཐ་ཟེ་མུ་བ་ཀ་པོང་ཀེ་ ཐུར་བུ་མ་གེམ་ཆེན་དག་ཉི་ ན་ཧ་ཞིང་ཁམས་ག་བཞུགས་ཁཱན་ ཡབ་གི་ ཐུགས་བཞེད་གནང༌ཅ༎
བཱརའ་གི་སྡིག་པ་ཨ་ནེ༌ལ།
15ན་ཧ་ཡུང་ཟི་ཐུར་གི་ སྡིག་པ་ཨ་ནེ་ལ་ ནཱན་གི་ རོག་ཆོ་ས་ག་ཏཱན་དིན་ཐཱན་ རོ་ཀི་ངཱད་ཁཱན་ལའི་གེན༌ཤོ། ཨོ་ཐ་ཆཱས་ཁེ་པ་ ནཱན་དང་རོ་ཀ་བར་ཀ་ཤ་ ཨོ་ཕེ་ཁེ༌ལེ། ནཱན་གི་ཡེག་པ་ཀབ་ཉི་ རོ་ཀི་ཉཱན་ནེ་ལ་ ནཱན་གི་ ན་ག་ཡུང་ཟི་ ལོག་ཉི་རང་ཟག་ཅ་གི༌ལ། 16ནཱན་གི་ཡེག་པ་ཀབ་ཉི་ རོ་ཀི་མ་ན་ནེ་ལ་ བཱརའ་སོ་ངོ་ཐུར་གི་ནེ་བུ་ ཉིག་ཙིང་གི་ནེ་བུ་ རིག་བུན་ཐཱན་ ཡེག་ཅོ། ཧང་ཡ་དག་ནེ་ལ་ ནཱན་གི་ཡེག་ཁཱན་ཆཱས་ ཐམས་ཅན་རང་ འཛོམས་དཔང་ཉིག་ཙིང་སམ་ཕང་གི་ འཛོམས་དཔང་ཨ་ལེ་རེན་ཆེན། 17ཉི་རོག་ཏེ་བ་ཀི་ ཡེག་པ་ཀབ་ཉི་བུ་ རོ་ཀི་མ་ན་ནེ་ལ་ ཆོས་ཚོགས་ག་ཡེག་ཅོ། ཉི་ཆོས་ཚོགས་གི་ ཡེག་པ་ཀབ་ཉི་བུ་མ་ན་ནེ་ལ་ རོག་ཁེ་པ་ ན་ཧ་དེན་གེ་ དད་པ་མ་ཨ་ཁཱན་ ཡང་ན་ལ་ ཁྲལ་ཐེབ་དུས་ཁཱན་ད་བུ་ཨ་ཉི་ཙི།
18ཇི་གི་ ན་ཧ་ཐྲང་ཉི་ཡེག་ཅ་ ན་ཤི་འཛམ་གླིང་ག་ ཧང་ཐིག་པ་ཐུར་ ཞིང་ཁམས་ག་བུ་ ཐིག༌པེ། ཉི་འཛམ་གླིང་ག་ ཧང་ཕེག་པ་ཐུར་ ཞིང་ཁམས་ག་བུ་ ཕེག༌པེ།
19ཉི་ཨོམ་ཆང་རང་ ཇི་གི་ ན་ཧ་ཡེག་པེ་ ཐ་འཛམ་གླིང་ག་ ནའི་སོ་ངོ་ཉིག་ཙིང་གི་ ཁ་ཆམ་ཐཱན་ ཧང་ཞུ་ཝ་ཐུར་ ཇ་ག་ཞིང་ཁམས་ག་བཞུགས་ཁཱན་ ཡབ་གི་ ན་ཧ་དེན་གེ་ མཛད་ཉི་གནང༌མེ། 20ཧང་ཡ་དག་ནེ་ལ་ ཇ་ག་མིང་ག་ སོ་ངོ་ཉིག་ཙིང་དང་སམ་ ཨོ་ག་ཛོ་མ་ཐུར་ ཇང་ཨོ་ཉ་ག་ རོག་ཏེ་བ་ཀ་པོང་ཀ་ཨོ་ཕེ་དག༌ཉི༎
སྙིང་རྗེ་མ་ཁཱན་ གཡོག་པ་ག་དཔེ་གཏམ།
21པ་ཏྲུས་ ཡི་ཤུ་ག་སྐུན་མདུན་ག་བཅག་ཐཱན་ ཞུ་ཝ་ལ་ གཙོ་བོ་ སོ་ངོ་ཐུར་གི་ ཇ་ག་ཏཱན་ མ་ལེག་པ་ཨ་ཉི་ སྡིག་པ་ཨ་ནེ་ལ་ ཇི་གི་ཤེབ་ཧབ་ཏུར་ བཀའ་དྲིན་བསྐྱང་མེ་ཁེ་ལེ་ཡ། ཤེབ་ཟུམ་སག་པུ་སྨོ་དག༌ཉི།
22ཡི་ཤུ་གི་ རོ་ཀ་ལན་གནང་ཉི་ གསུངས་མ་ལ་ ཇི་གི་ ན་ཧ་ཤེབ་ཟུམ་ བཀའ་དྲིན་བསྐྱང་ཤོ་དག་ཉི་ མ་ཡེག་པ། དག་པ་ཀབ་ཉི་ 70 ཨ་ཝ་ཟུམ་སག་པུ་ བཀའ་དྲིན་བསྐྱང་མེ་ཁེ༌ལེ།#18:22 70 ཨ་ཝ་ཟུམ་སག་པུ་ བཀའ་དྲིན་བསྐྱང་མེ་ཁེ་ལེ་ ཡེག་པེ་དེན་ཐ་ཤོ་ ཁ་གྱངས་མ་ཝ་ཨ་ཉི་ བཀའ་དྲིན་བསྐྱང་མེ་ཁེ་ལེ་དག་པ་ག་རྩིས་གི༌ལ།
23ཨོ་ཉི་ཨ་དེན་གེ་ ཞིང་ཁམས་ག་རྒྱལ་སྲིད་ཤོ་ གཡོག་པ་བ་ཀབ་ཉི་ རྩིས་ལ་ལེ་གོད་ཁཱན་ དཔོན་ད་བུ་ཐུར་གི༌ལ། 24རྩིས་ལ་ལེ་གང་ཀ་ དཔོན་གེ་ གསེར་ག་ཏི་རུ་ 10000 ཆི་ཁཱན་ གཡོག་པ་ཁེ་པ་ དཔོན་ག་སྐུན་མདུན་ག་ ཕ་ཝ༌ལ། 25རོ་ཀི་ རམ་ཏ་པེ་མར་བ་ཨ་དེན་གེ་ རོག་དང་རོ་ཀ་མེ་ཝག་ཙ་ ཉི་ཝག་ཙ་དང་ནོ་ཙང་བ་ ཐམས་ཅན་རང་ ཟ་པ་ཨ་ཉི་ཙོང་ཐཱན་ རམ་ཏ་པེ་ཁེ་ལེ་དག་ཉི་ དཔོན་གི་བཀའ་གནང་མ༌ལ།
26ཨོ་ཉི་ཨ་དེན་གེ་ གཡོག་པ་གི་ དཔོན་ག་ཕྱག་ཕུལ་ཐཱན་ ད་སུར་ནོང༌ཤོ། ཇི་གི་རམ་ཐམས་ཅན་ ཚང་པ་ཨ་ཉི་ཏ་པེ་དག་ཉི་ ཞུ་ཝ༌ལ། 27དཔོན་གི་ རོག་ཕང་པེ་ ཨོ་ཕ་ཨ་དེན་གེ་ རོ་ཀི་ རོ་ཀ་རམ་ ཐམས་ཅན་རང་ བཀའ་དྲིན་བསྐྱང་ཐཱན་ ཀུན་ཏི་ཝ༌ལ།
28དག་པ་ཀབ་ཉི་ ཨོ་ཐ་གཡོག་པ་གི་དིན་ཐཱན་ རོ་ཀེ་ཏི་རུ་ 100 ཆི་ཁཱན་ རོ་ཀ་གཡོག་པ་ ཇ་རོ་ཁེ་པ་རཱན་ཐཱན་ ངང་གེ་ཙུང་ཉི་ཡེག་པ་ལ་ ནཱན་གི་ ཇ་ག་ག་ལེ་ཆོ་ཁཱན་ རམ་ཏབ་ཅོ་དག༌ཉི།
29ཉི་རོ་ཀ་གཡོག་པ་ཇ་རོ་གི་ རོ་ཀ་ཏཱན་ཕྱག་འཚལ་ཐཱན་ ཞུ་ཝ་ལ་ ད་སུར་ནོང་ཤོ་ ཇི་གི་ ན་ག་རམ་ཏ་པེ་དག༌ཉི། 30དག་པ་ཀབ་ཉི་ རོ་ཀི་ཞུ་ཁཱན་ཁེ་པ་ མ་ཉཱན་པཱན་ ཨོ་ཉ་སོ་ངོ་ལ་ རམ་མ་ཏ་པ་སག་པུ་ག་དེན་གེ་ བཙོན་ག་ཙུག་ཉི་ཐ་ཝ༌ལ།
31ཧང་ད་བུ་ཇུང་མ་གི་ལ་སྨོ་ བཱརའ་གཡོག་པ་བ་ཀི་ ཐོང་མ་ཀབ་ཉི་ རོག་ཏེ་བ་ གནམ་མེད་ས་མེད་ ཤོ་ནང་མ་ཕེ་ཝ་ཨ་ཝ༌ལ། ཉི་རོག་ཏེ་བ་ དིན་ཐཱན་ ཧང་ཇུང་མ་གི་ལ་སྨོ་ ཐམས་ཅན་རང་ དཔོན་ག་ཞུ་ཝ༌ལ། 32ཨོ་ཉི་ཨ་དེན་གེ་ དཔོན་གི་ ཨོ་ཉ་གཡོག་པ་རཱན་ཐཱན་ གསུངས་མ་ལ་ ནཱན་ཤོ་ ཏེ་ངན་གཡོག་པ་གི་ཝ༌ལ། ནཱན་གི་ ལ་སོག་སྐུ་ཆེན་ ཨ་ཝ་ཨ་དེན་གེ་ ཇི་གི་ ན་ག་རམ་ ཐམས་ཅན་རང་ བཀའ་དྲིན་བསྐྱང་མ། 33ཇི་གི་ ན་ག་སྙིང་རྗེ་ ཨ་ཝ་པུརུས་ཀིན་ཨ་ཉི་ ནཱན་གི་ ན་ག་གཡོག་པ་ཇ་རོ་ག་ སྙིང་རྗེ་ཨ་ལེ་ཁེ་ཝ་ཆོ་ཝ་དག༌ཉི། 34དཔོན་དགོངསམ་ཁྲེལ་པ་ཨ་དེན་གེ་ ཨོ་ཉ་གཡོག་པ་ལ་ རོ་ཀ་རམ་ ཐམས་ཅན་རང་ ཚང་པ་ཨ་ཉི་ མ་ཇོར་པ་སག་པུ་ ཀོང་མེ་དེན་གེ་ བཙོན་ག་ཙུག་པ༌ལ།
35ན་ཤི་བུ་ ན་ཧ་ཡུང་ཟི་ཁེ་པ་ ན་ཧ་སེམས་ཀེ་ཨ་ཉི་རང་ བཀའ་དྲིན་མ་བསྐྱང་ནེ་ལ་ ཞིང་ཁམས་ག་བཞུགས་ཁཱན་ ཇ་ག་ཡབ་གི་བུ་ ན་ཧ་བ་ ཨུ་ཉུ་པུརུས་ཀིན་ཨ་ཉི་རང་ བཀའ་དྲིན་མ་བསྐྱང་མ་དག༌ཉི༎
നിലവിൽ തിരഞ്ഞെടുത്തിരിക്കുന്നു:
མ་ཏི། 18: TNTB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Tshangla New Testament
© 2023, The Bible Society of India
all rights reserved
