Mataayo 11
11
1Bhunu Yeesu ꞉aamarire okuragirira abheeyigira bhaaye ekumi na bhabhiri, ˆneemuka, ˆnaagenda mu-misi egindi egya Gariraaya okwiyigisha na okuraasisha abhaanu.
Yowana Omubhatiisha kaatuma abheeyigira bhaaye ku-Yeesu
(Ruuka 7:18-35)
2Mu-kabhaga kayo, Yowana Omubhatiisha ꞉aariga abhoyerwe mu-jeera. Mu-jeera muyo, ˆnoongwa amangʼana ganu Kiriisitu ꞉aariga ˆnaakora. Niwe ˆnaatuma abheeyigira bhaaye abhandi ku-Yeesu, bhamubhuushe ati, 3“Angu ni awe unu ꞉aakaamiiywe ati ariija,#11:3 Ni awe unu ꞉aakaamiiywe ati ariija. Unu ꞉aariga akaamiiywe ati ariija ni Kiriisitu. amwi ati kirindirire owundi?”
4Yeesu ˆnaabhasubhya ati, “Mugende mubhwire Yowana ganu omurora, na ganu omuungwa. 5Abhawofu abharora, abharema abharibhata bhuyambaaye, abhagenge abhawosibhwa, abha amatwi abhoongwa, abhafuuye abhasuurwa, na abhatobhu abharaasibhwa Amangʼana Amajomu.#11:5 Omuragi Isaaya ꞉aasoosiishe obhuragi ati, Kiriisitu arikora emirimu giyo gyone kutyo. Ringira Isaaya 35:5-6, 61:1. 6Nyakara, omuunu unu atakunyiitimaata.”
7Bhunu abheeyigira bha Yowana ꞉bhaariga mbeemuka, Yeesu ˆnaamba okwaikira Yowana ˆnaabhwira abhaanu ati, “꞉Mwariga mugenda okuringiraki mw-ibhara? Sii, ꞉mwariga mugenda kuringira bhunyansi mbuyembwaga na omuyaga? Wuri! 8Mmbe, ꞉mwariga mugenda okuringiraki? Omuunu afwaye ngibho njomu? Wuri! Mwitegeereshe! Abhaanu bhanu abhafwara gingibho ginjomu, bhari mu-nyumba gya ekikama. 9Mmbe woori, ꞉mwariga mugenda okuringiraki? ꞉Mwariga mugenda okuringira omuragi? Yee! Enibhabhwira ati, ni muragi, okukira abharagi. 10Uyo niwe omuunu unu Amakaamo Amataakatiifu agaaikira ati, ‘Iitegeeresha, enituma omureeti wa iingʼana yaani imbere waawo, akutangatire akuroosishe injira.’#11:10 Ringira Maraaki 3:1. 11Kimari enibhabhwira ati, mu-bhaanu bhoone kutyo bhanu bheebhuuywe mu-kyaro anu, atariwo na wumwi unu kaakira Yowana Omubhatiisha. Nawe, omuunu omutooto okukira bhoone kutyo mu-bhukama bhwa mu-rwire, ni mukuru okukira Yowana Omubhatiisha. 12Okwambira mu-nsiku ginu Yowana Omubhatiisha ꞉aaraashaga okuyikira reero, obhukama bhwa mu-rwire obhunyoorerwa managa,#11:12 Obhukama bhwa mu-rwire obhunyoorerwa managa. Insonga eyindi eyitura okubha ati, abhaanu abheekomeesha okwingira mu-bhukama bhwa mu-rwire. na abha amanaga nibho abhabha nabhwo. 13Abharagi bhoone kutyo, na Musa ku-bhiraagiro bhyaye, ꞉bhaasoosiishe obhuragi bhwa obhukama bhuyo, okuyikira mu-kabhaga ka Yowana Omubhatiisha. 14Mmbe, raabhe omwenda okwikirisha, Yowana niwe Eriya unu ꞉aaikirwe ati ariija.#11:14 Ringira Maraaki 4:5. 15Unu ari na amatwi, noongwe!
16“Nisusanye naki abhaanu bha orwibhuro runu? Abhasusana na abhaana bhanu bheekaaye mw-igusisho mbaragirisha abheejaabho ati,
17‘꞉Kyabhabhumiiye ebhironge, nawe mutaabhinire!
Kweki ꞉kyabheembiiye ameembo ga okubhasurumbasha, nawe mutaaririre!’
18“Nikwo kutyo Yowana Omubhatiisha ꞉eejire, atakurya bhyakurya bhinu abhandi ꞉bhaaryaga, atakunywa iidivaayi, abhaanu mbaaika ati, ‘Unu awungirwe ebhiwi!’ 19Woori Omwana wa Adaamu eejire, ˆnaarya bhinu abhandi abharya na ˆnaanywa iidivaayi, abhaanu mbamwaika ati, ni muwubhaaru na ni mukorwa, ati ni musaani wa abhatobhesha bha riigooti na abhakosi bha ebhikayo! Nawe, obhwenge bhwa Nyamuwanga obhumenyekana ati ni bhwenge ku-mangʼana amajomu ganu agasooka ku-bhwenge bhuyo.”
Yeesu kaagonya abhaanu mu-misi ginu ꞉bhaamuremere
(Ruuka 10:13-15)
20Niwe Yeesu ˆnaamba okugonya emisi ginu ꞉aakorere-mo ebhigwa bhyaye ebhyafu, kwa okubha abhaanu bheende-mo ꞉bhataanugire ebhikayo bhyebhwe, ˆnaaika ati, 21“Garibhanyoora emwe, abhaanu bha Korajiini na abhaanu bha Bheetisayida! Kwa okubha, ebhigwa bhinu ꞉naakorere mu-meeso geemwe, nikabhikoreeye Tiiro na Sidooni,#11:21 Tiiro na Sidooni. Abhaanu bha emisi giyo ꞉bhaariga bhatari Abhayawudi, ꞉bhaariga bhari abhapagaani. Na Abhayawudi ꞉bhaariga bhamenyere abhaanu bhayo ati ni bhakosi bha amabhiibhi. abhaanu mu-misi giyo bhatakakoorere okunuga ebhikayo bhyebhwe. Na bhakafwaye gingibho gya amagunira na okwiyaka riifu, okweresha obhunugi bhwebhwe obhwa ebhikayo. 22Nawe, orusuku runu Nyamuwanga ariramura abhaanu mu-kyaro anu, aribharamurira emwe makomeeye kukira kutyo ariramurira abhaanu abhakosi bha amabhiibhi abha Tiiro na Sidooni.#11:22 Ringira Amoosi 1:9-10; Yoweeri 3:4. 23Emwe, abhaanu bha Kaperinawumu emwe, omutoga ati muririinywa muyike mu-rwire? Wuri, mutarikorerwa kutyo! Nawe, muriisibhwa emwaro mw-itoko rya nyombe.#11:23 Nyombe. Ringira riingʼana rinu mu-Mangʼana Amakomeeye. Raabhe ebhigwa bhinu ꞉naakorere kw-imwe nikabhikorere mu-musi gwa Sodoma, omusi guyo gukabheeye-wo na reero. 24Nawe, orusuku runu Nyamuwanga ariramura abhaanu mu-kyaro anu, aribharamurira emwe makomeeye kukira kutyo ariramurira abhaanu abhakosi bha amabhiibhi abha Sodoma.”
Yeesu kaabhirikira bhanu abhanyanka
(Ruuka 10:21-22)
25Niwe Yeesu ˆnaaika ati, “Ee Raata, enikukumya, awe Raatabhugenyi wa mu-rwire na mu-kyaro, kwa okubha amangʼana ganu ꞉waabhisire abheenge na abhasomi, nuutuurira abhweru abhaana abhatooto.#11:25 Abhaana abhatooto. Ni bhaanu bhanu bheekirisiishe Nyamuwanga, raabhé bhakabha bhatasomere. 26Yee Raata, kwa okubha ni kutyo ꞉gaakujomeeye awe.”
27Kimwi Yeesu ˆnaabhwira abhaanu ati, “Raata anaaye ebhiinu bhyone kutyo. Ni esemwene mwana era, niwe amenyere Omwana. Na Omwana era, niwe amenyere esemwene, na Omwana akeenda okweresha esemwene ku-muunu, kaamweresha.
28“Muuje ku-anye mwone kutyo, emwe bhanu omunyanka, bhanu mukubhwirwe na emijigo, anye eniija okubhamuunya. 29Mwibhoye mw-ijooku ryani, mwiyigire ku-anye, kwa okubha anye niri mufura, na mu-mutima gwani anye niituuye emwaro. Mukanyiyigira-ko omuuja okunyoora omurembe mu-mitima gyemwe. 30Riijooku ryani ni nyoowu na omujigo gwani ni muwuwu.”
നിലവിൽ തിരഞ്ഞെടുത്തിരിക്കുന്നു:
Mataayo 11: kya
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023, Wycliffe Bible Translators, Inc. All rights reserved
