BOTHUBO 20
20
Abraham ngo Abimelek
1Tilauno Abraham ye Negeb ghakhu küdau itsüsü wuve eno Kadesh ngo Shur dolo ngove; pa ye Gerar lo inami shi ado hami ngove. 2Abraham no pa nipu Sarah pesü, “Li ye I chepu” ipive. Ikehu Gerar kükau Abimelek no timi hami puwu no Sarah sawuve. 3Ikemu Alhou no putho lo asamou no Abimelek lau ighi no pi, “Julo, nono totimi khuu luve akeno li ghenguno no ye kithimi shivae, kughengu li ye kütami nipu ke.” 4Abimelek ye li lau wumono ae. Ikehu pa no pi, “Ampeu, No ye pimihami pithiveni keshea? 5Pa ye I vilo, ‘Li ye I chepu’ ipike kumo? Eno li ghi, ‘Pa ye I mu’ ipi li ampi no pie. I mlo lo akikhi eno I u lo akipimi kühakeu lono ni ye hipau shivae.” 6Tileno Alhou no asamou no pa vilo pi, “Iyei, no ye o mlo lo akikhi akeu lono shivae pi I no ithi ani, eno I shou axine shipe moniye I no o küghütshüve ke. Tighenguno I no o pelo li bupe move. 7Ikehu itehi, timi nipu hu tsüchileve lo, kughengu pa ye tungkupu ke pa no o ghenguno inikhu tsü nani, eno no ye xülu nanie. Ikemu tsala nono li tsüchile moaye, no eno o gholo akeqo kümtsü mtsüqheino thive nanie pi ithilo.”
8Tighenguno Abimelek no inaqhe itheno ithuve no pa qemi kümtsü kuno panoqo vilo hipa vehu kümtsü pive. Eno timiqo ye ighono msave. 9Tileno Abimelek no Abraham kuno pa vilo pi, “No ye ningu lau kiu shive akea? Eno ni ye o lau kiu xine shivepi no ye ni eno I kükaqha shou axine kije süghi ani kea? No ye I lau shimo kepu kümla shivae.” 10Eno Abimelek no Abraham vilo pi, “No ye kiu ithulu keno hitoi shi kea?” 11Abraham no pi, “I no tishive keu ye ishi kümsülu kehue, ‘Hipa-a lo ye Alhou sükümsa küha mithe, eno panongu ye I nipu ghenguno I heqhive nanie.’ 12Tinguno alau, li ye kuchou no I chepue, I za vecheo kumo kemu I pu nonga, eno li ye I nipu shive. 13Kughou Alhou no I pu ki lono I pelo itsü wuvepe keno, I no li vilo pi, ‘Kimiyekini hipau no ye I lau shi masae: khile khilemu ningu no ighi keu-a lo, “Pa ye I mu” ipilo.’”
14Tithiu Abimelek no ambe ngo amshitsü, aqemi kiptimi ngo totimi pesü Abraham tsü, eno pa nipu Sarah pesü pa tsüchileve. 15Abimelek no pi, “Julo, I yeghi ye o zülo ani; khile khilemu nono pulo keu lo ngolo.” 16Sarah vilo pa no pi, “Julo, I no o mu lau ghükayi 1,000 tsüvae. Tipau ye o gholo chekemi kümtsü nhethe lo no ye akipimi kühae pikeu michipu ke, eno kümtsü nhethe lo no ye achipie pikeu kiqike.” 17Tishino Abraham no Alhou lau inikhu, eno Alhou no Abimelek eno pa nipu ngo totimi aqemi ghi shipivi tsüe, tishikeu lono panongu ghi atianuli punulue. 18Kughengu Abraham nipu Sarah ghenguno Ampeu no Abimelek kilo atita kümtsü lakhave tsüke.
നിലവിൽ തിരഞ്ഞെടുത്തിരിക്കുന്നു:
BOTHUBO 20: SUMRVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible Society of India
© 2023, Used by permission. All rights reserved. More
