ମାର୍କ 8

ଯୀଶୁ ଚାରି ହାଜାର୍ ମାନାୟ୍‌ତିଙ୍ଗ୍ ଚିଚ୍‌ପାତାନ୍

(ମାଥି. ୧୫:୩୨-୩୯)

1କେତେକ୍ ଦିନ୍ ହାଚି ପାଚେ, ଯୀଶୁତାକେ ବେସିହେନି ମାନାୟ୍ ରୁଣ୍ଡାଆତାର୍। ଏଚେକାଡ଼୍‌ଦ ହେୱାର୍‌ତାକେ କାଦି କଣ୍ଡା ହିଲାତାତ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ହିର୍‌ବି ୱେଚ୍‌ଚାନ୍, 2“ଇ ମାନାୟାର୍ ତିନ୍‌ଦିନ୍ ଆତାତେ ନା ଲାହାଙ୍ଗ୍ ମାନାରା। ମାତର୍ ନଙ୍ଗୟ୍ ଇୱାର୍ ତାକେ ଇନାକାପା ଚିଞ୍ଜେଙ୍ଗ୍ ହିଲୁତ୍। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ଦୁଃକ୍ ହତ୍‍ନାତା। 3କେତ୍‌ଜାଣ୍ ତ ବେସି ଦେହାତାଙ୍ଗ୍ ୱାତାର୍‌ନା, ଆନେଙ୍ଗ୍ ଯଦି ହେୱାରିଙ୍ଗ୍ ଚିଚ୍‌ୱାଦାଙ୍ଗ୍ ପକ୍ତିସ୍, ହେୱାର୍ ହାନିହିଙ୍ଗ୍ ୱାହ୍‌ନାର୍।”

4ଚେଲାହିର୍ ଯୀଶୁଙ୍ଗ୍ ୱେଚ୍‌ଚାର୍, “ଇନେସ୍ କିଜି ଏଚେକ୍ ହେନି ମାନାୟ୍‌ତିଙ୍ଗ୍ ଇମେତାଙ୍ଗ୍ ରୁଟିଙ୍ଗ୍ ତାସି ଇ ଚିମ୍ରା ବାହାତାକେ ଚିଚ୍‌ପେଦେଙ୍ଗ୍ ଆଡ୍‌ନାସ୍?”

5ଯୀଶୁ ଚେଲାହିରିଙ୍ଗ୍ ୱେନ୍‌ବାତାନ୍, “ମିତାକେ ଏଚେଗଟା ରୁଟିଙ୍ଗ୍ ମାନିକ୍?” ଚେଲାହିର୍ ୱେଚ୍‌ଚାର୍, “ଆପ୍‌କା ସାତ୍‌ଗଟା ରୁଟିଙ୍ଗ୍ ମାନିକ୍।” 6ହେବେତାଙ୍ଗ୍ ଯୀଶୁ ମାନାୟ୍‌ତିଙ୍ଗ୍ ମେଦ୍‌ନିତ କୁଚ୍‌ଚେଙ୍ଗ୍ ଆଦେସ୍ ହିତାନ୍, ତାପାଚେ ହେ ସାତ୍‌ଗଟା ରୁଟିଙ୍ଗ୍ ଆସ୍ତି ଯୀଶୁ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍। ଆରେ ହେ ରୁଟିଙ୍ଗ୍ ଡ୍ରିପ୍‍କିସ୍ ମାନାୟାରିଙ୍ଗ୍ ବାଟାକିଜି ହିଦେଙ୍ଗ୍ ଚେଲାହିରିଙ୍ଗ୍ ହିତାନ୍, ଚେଲାହିର୍ ହେ ରୁଟିଙ୍ଗ୍ ବୁଲାଇ କିଜି ହିତାର୍। 7ଆରେ, ଚେଲାହିର୍‌ତାକେ କେତେଗଟା ହିରୁ ମିନ୍‌କୁ ପା ମାଚିକ୍, ହେ ୱିଜୁ ପା ଯୀଶୁ ଈଶ୍ୱରତିଙ୍ଗ୍ ଦନ୍ଯବାଦ୍‍କିଜି ହେ ମିନ୍‌କୁ ପା ବୁଲାଇ କିଜି ହିଦେଙ୍ଗ୍ ଚେଲାହିରିଙ୍ଗ୍ ହିତାନ୍।

8ହେବେତାଙ୍ଗ୍ ହେ ମାନାୟାର୍ ପଟ ପାଞ୍ଜୁ-ପାଞ୍ଜୁ ଚିଚାର୍, ଚେଲାହିର୍ ତିନ୍‌ଞ୍ଜି ଉବ୍ରାଆତି ରୁଟିଙ୍ଗ୍ ସାତ୍‌ଗଟା ଟପାକାଙ୍ଗ୍ ପେସ୍‌କାତାର୍। 9ହେୱାର୍ ପାକାପାକି ଚାର୍ ହାଜାର୍ ମାନାୟ୍ ଚିଚାର୍। 10ତାପାଚେ ଯୀଶୁ ହେୱାରିଙ୍ଗ୍ ପକ୍ତାନ୍, ଆରେ ତା ଚେଲାହିର୍ ହୁଦାଙ୍ଗ୍ ଡଙ୍ଗାତାକେ ଦୁମ୍‌ଜି ଦଲ୍‌ମନୁତା ଜିଲ୍ଲାତାକେ ୱାତାର୍।

ପାରୁସିଦଳ୍‍ନି ମାନାୟାର୍ ଯୀଶୁଙ୍ଗ୍ ଚାନିଆଆନି ଚିନା ଏନ୍ତାର୍

(ମାଥି. ୧୬:୧-୪)

11ଦିନେକ୍ ପାରୁସିଦଳ୍‍ନି ମାନାୟାର୍ ଯୀଶୁ ଲାଗାୟ୍ ୱାତାର୍, ତା ହୁଦାଙ୍ଗ୍ ଉଲ୍‌ଟା ପାଲ୍‌ଟା କିଜି ୱେନ୍‌ବେଦେଙ୍ଗ୍ ଲାଗାତାର୍, ଆରେ ହେୱାର୍ ଯୀଶୁଙ୍ଗ୍ ସରଗ୍‌ତାଙ୍ଗ୍ ର ଚାନିଆଆନି ଚିନା ଏନ୍ତେଙ୍ଗ୍ ଦାବି କିତାର୍। ଇନେସ୍‌କି ହେୱାର୍ ଯୀଶୁଙ୍ଗ୍ ଗୁପାଇ କିଦେଙ୍ଗ୍ ଉପାୟ୍ କିତାର୍। 12ହେବେତାଙ୍ଗ୍ ଯୀଶୁ ହେୱାର୍ ପାର୍ତି କିୱାକା ହୁଡ଼୍‌ଜି ହାଇ ଇଡ଼୍‌ଜି ୱେଚ୍‌ଚାନ୍, “ନଙ୍ଗୟ୍‌ନି ମାନାୟ୍ ଇନେକିଦେଙ୍ଗ୍ ଚାନିଆଆନି ଚିନା ଡେକ୍ନାରା? ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ନଙ୍ଗୟ୍‌ନି ମାନାୟାରିଙ୍ଗ୍ ଇନା ଚିନା ହିୟାଆଉତ୍।” 13ଇଦାଙ୍ଗ୍ ୱେଚ୍‌ଚି, ଯୀଶୁ ହେ ପାରୁସିଦଳ୍‍ନି ମାନାୟ୍‌ତିଙ୍ଗ୍ ପିସ୍ତି ଆରେରଗ ଚେଲାହିର୍ ହୁଦାଙ୍ଗ୍ ଡଙ୍ଗାତାକେ ଦୁମ୍‌ଜି, ଗାଲିଲୀ ହାମ୍‌ଦୁର୍ ହେ ପାଡ଼୍‌କା ନିପଣ୍ ହାଚାର୍।

ହେରୋଦ ରାଜା ଆରେ ପାରୁସିଦଳ୍‍ନି ସଡ଼ାକାର୍

(ମାଥି. ୧୬:୫-୧୨)

14ହେପାଦ୍ନା ଯୀଶୁ ଚେଲାହିର୍ ରୁଟି ଅଦେଙ୍ଗ୍ ବାଣାଆତାର୍, ହେୱାର୍ ଡଙ୍ଗାତାକେ ଆପ୍‌କା ରଞ୍ଜାଙ୍ଗ୍ ମାତର୍ ରୁଟି ମାଚାତ୍। 15ପାଚେ ଯୀଶୁ ଚେଲାହିରିଙ୍ଗ୍ ଜାଗ୍ରତ୍ ହିଜି ୱେଚ୍‌ଚାନ୍, “ପାରୁସିଦଳ୍‍ ଆରେ ହେରୋଦ ରାଜା ସଡ଼ାକାର୍ ତାକେଡାଙ୍ଗ୍ ସାବ୍‌ଦାନ୍ ଆଜି ମାନାଟ୍।”

16ହେବେତାଙ୍ଗ୍ ଚେଲାହିର୍ ଜାର୍ ଜାର୍‌ବିତ୍ରେ ପୁସୁର୍ ପାସାର୍ କିଜି ବେଣ୍ କିତାର୍, “ଆସେଙ୍ଗ୍ ରୁଟି ତାହି ୱାୱିତିଲେ ହେୱାନ୍ ଇବେଣ୍ ଇଞ୍ଜ୍‌ନାନା।” 17ହେୱାର୍ ପୁସୁର୍ ପାସାର୍ ଆନାକା ପୁନ୍‌ଞ୍ଜି, ଯୀଶୁ ଚେଲାହିରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ନା ବିଷୟରେ ନଙ୍ଗୟ୍ ପେତେକ୍ ପୁନୁଦେରା କି ବୁଜାଆଉଦେରା। ଏପେଙ୍ଗ୍ ବୁଜା ଆଦେଙ୍ଗ୍ ଏଚେକ୍ ଆବ୍‌ଡ଼ୁ ଆନାଦେରାକି? ହେଦାଙ୍ଗ୍ କାଜିଙ୍ଗ୍ ନେ ଏପେଙ୍ଗ୍ ରୁଟି ହିଲେତ୍ ଇଞ୍ଜି ବିତ୍ରେ-ବିତ୍ରେ ବେଣ୍ କିନାଦେରା। 18ମିଙ୍ଗେଙ୍ଗ୍ କାଣ୍‌କୁ ଆରେ କିତୁଲ୍ ମାନିକ୍, ମାତର୍ ଏପେଙ୍ଗ୍ କାଣ୍‌କୁ ମାନ୍‌ଞ୍ଜି ହୁଡ଼୍‌ଦେଙ୍ଗ୍ ଆଡୁଦେରା, କିତୁଲ୍ ମାନ୍‌ଞ୍ଜି ୱେଞ୍ଜେଙ୍ଗ୍ ଆଡୁଦେରା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଏତ୍‌କିଦେଙ୍ଗ୍ ଆଡୁଦେର୍। 19ପାଞ୍ଚ୍‌ଗଟା ରୁଟିଙ୍ଗ୍ ଡ୍ରିକ୍‌ଚି ଇନେସ୍ ପାଞ୍ଚ୍ ହାଜାର୍ ମାନାୟ୍‌ତିଙ୍ଗ୍ ଚିଚ୍‌ପିତିହିଙ୍ଗ୍, ଏଚେ ଟପା ରୁଣ୍ଡାଇ କିତାଦେର୍ ହେଦାଙ୍ଗ୍ ମିଙ୍ଗେଙ୍ଗ୍ ମାନ୍ତ ହିଲେତ୍?” ତା ଚେଲାହିର୍ ୱେଚ୍‌ଚାର୍, “ବାରଗଟା ଟପାକାଙ୍ଗ୍।”

20ଆରେ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଚାରି ହାଜାର୍ ମାନାୟ୍‌ତିଙ୍ଗ୍ ସାତ୍‌ଗଟା ରୁଟିଙ୍ଗ୍ ଡ୍ରିକ୍‌ଚି ଚିଚ୍‌ପିତିହିଙ୍ଗ୍ ଏପେଙ୍ଗ୍ ଉବ୍ରାଆତି ରୁଟିଙ୍ଗ୍ ଏଚେଗଟା ଟପାକାଙ୍ଗ୍ ବାର୍ତିକିଜି ମାଚାଦେର୍?” ଚେଲାହିର୍ ୱେଚ୍‌ଚାର୍, “ସାତ୍‌ଗଟା ଟପାକାଙ୍ଗ୍।”

21ତାପାଚେ ଯୀଶୁ ଚେଲାହିରିଙ୍ଗ୍ ୱେଚ୍‌ଚାନ୍, “ନଙ୍ଗୟ୍ ପାତେକ୍ ଏପେଙ୍ଗ୍ ନାଙ୍ଗେଙ୍ଗ୍ ପୁଞ୍ଜୁଦେରା କି?”

ଯୀଶୁ ବେଥସାଇଦାତାକେ ର କାଣା ମାନାୟ୍‌ତିଙ୍ଗ୍ ହୁଡ଼ିକିତାନ୍

22ଯୀଶୁ ଆରେ ତା ଚେଲାହିର୍ ବେଥ୍‍ସାଇଦା ସହର୍‌ତାକେ ୱାତାର୍। ହେବେ ମାନାୟାର୍ ର କାଣା ମାନାୟ୍‌ତିଙ୍ଗ୍ ଯୀଶୁ କଚଣ୍‌ତ ତାହିୱାତାର୍, ହେୱାନିଙ୍ଗ୍ ଆସ୍‌ପି ହାର୍‌କିଦେଙ୍ଗ୍ ଯୀଶୁଙ୍ଗ୍ ଗୁୱାରି କିତାର୍। 23ଲାଗିଙ୍ଗ୍ ଯୀଶୁ କାଣା ମାନାୟ୍‌ତିଙ୍ଗ୍ କେଇ ଆସ୍ତି ନାସ୍ ବାର୍ତ କୁକ୍‌ଚି ଅତାନ୍। ଆରେ, ତା କାଣ୍‍କୁକାଙ୍ଗ୍ ଏଉଡ଼ିଙ୍ଗ୍ କାସ୍‍ଜି ଆରେ ତା ଗାଗାଡ଼୍ ଜପି କେଇ ଇଡ଼୍‌ଜି ହେ କାଣା ମାନାୟ୍‌ତିଙ୍ଗ୍ ୱେନ୍‌ବାତାନ୍, “ଏନେଙ୍ଗ୍ ଅଲପ୍‌ପା ହୁଡ଼୍‌ଦେଙ୍ଗ୍ ଆଡ଼୍‌ନାୟା?”

24ହେୱାନ୍ ଜପି ହୁଡ଼୍‌ଜି ୱେଚ୍‌ଚାନ୍, “ଆଁ ଆନେଙ୍ଗ୍ ମାନାୟାରିଙ୍ଗ୍ ହୁଡ଼୍‌ଦେଙ୍ଗ୍ ଆଡ୍‌ନାଙ୍ଗା। ମାତର୍ ଆନେଙ୍ଗ୍ ହାର୍‌ଦାଙ୍ଗ୍ ହୁଡ଼୍‌ଦେଙ୍ଗ୍ ଆଡୁଙ୍ଗା, ହେୱାର୍ ତାଙ୍ଗ୍‌ନି ମାର୍ ଲେକେ ନାଙ୍ଗେଙ୍ଗ୍ ଚଞ୍ଜିଆଦ୍ନାରା।”

25ତାପାଚେ ଯୀଶୁ ତା କେଇ କାଣ୍‍କୁକାଙ୍ଗ୍ ଆସ୍‌ପାତାନ୍। ହେବେତାଙ୍ଗ୍ ହେୱାନ୍ ହାର୍‌ଦାଙ୍ଗ୍ ହୁଡ଼୍‌ତାନ୍, ଆରେ ହେୱାନ୍ ହାର୍ କିଜି ହୁଡ଼୍‌ଦେଙ୍ଗ୍ ଆଡ଼୍‌ତାନ୍। 26ପାଚେ ଯୀଶୁ ହେୱାନିଙ୍ଗ୍ ଆଦେସ୍ ହିଜି ୱେଚ୍‌ଚାନ୍, “ମିଞ୍ଜ ହାଲା, ମାତର୍ ନାସ୍ ବିତ୍ରେ ହାଲ୍‍ମା, ଆରେ ଇନାକା ଆତାତ୍ ଇଞ୍ଜି ଇନେରିଙ୍ଗ୍ ପା ୱେଚ୍‌ମା।”

ଯୀଶୁଙ୍ଗ୍ ରକ୍ଷାକିଦ୍ନାକାନ୍‌ ଇଞ୍ଜି ପିତର ୱେଚ୍‌ଚାନ୍

(ମାଥି. ୧୬:୧୩-୨୦; ଲୁକ. ୯:୧୮-୨୧)

27ବେଥସାଇଦା ସହର୍‌ତାଙ୍ଗ୍ ଯୀଶୁ ଆରେ ଚେଲାହିର୍ କାଇସରିଆ ପିଲିପ ସହର୍‌ନି ନାସ୍‌କୁକାଙ୍ଗ୍ ହାନିହିଙ୍ଗ୍, ହେୱାନ୍ ହାଜ୍‌ଦ ହେୱାରିଙ୍ଗ୍ ୱେନ୍‌ବାତାନ୍, “ଆନେଙ୍ଗ୍ ଇନେର୍ ଇଞ୍ଜି ନା ବିଷୟରେ ମାନାୟାର୍ ଇନାକା ଇଞ୍ଜ୍‌ନାର୍?”

28ହେୱାର୍ ଯୀଶୁଙ୍ଗ୍ ୱେଚ୍‌ଚାର୍, “କେତେକ୍ ମାନାୟାର୍ ଇନାରା ଡୁବନ୍‌ହିନି ଯୋହନ, ଆରେ କେତେକ୍ ହେନି ଇନାରା ଏଲିୟ, ଆରେ କେତେକ୍ ହେନି ଇନାର୍, ଭବିଷ୍ଯତବକ୍ତାର୍ ବିତ୍ରେତାଙ୍ଗ୍ ରକାନ୍।”

29ଯୀଶୁ ହେୱାରିଙ୍ଗ୍ ୱେନ୍‌ବାତାନ୍, “ଏପେଙ୍ଗ୍ ଇନାକା ଇଞ୍ଜି ବାବିକିନାଦେରା?” ପିତର ଯୀଶୁଙ୍ଗ୍ ୱେଚ୍‌ଚାନ୍, “ଏନେଙ୍ଗ୍ ଖ୍ରୀଷ୍ଟ, ଈଶ୍ୱର ପକ୍ତି ମାନାୟ୍।” 30ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ତା ବିଷୟରେ ଇନେରିଙ୍ଗ୍ ପା ୱେଚ୍‌ମାଟ୍ ଇଞ୍ଜି ଆଦେସ୍ ହିତାନ୍।

ଯୀଶୁ ଜାର୍ ହାଃନି ବିଷୟରେ ୱେଚ୍‌ଚାନ୍

(ମାଥି. ୧୬:୨୧-୨୩; ଲୁକ. ୯:୨୨)

31ଯୀଶୁ ତା ଚେଲାହିରିଙ୍ଗ୍ ହିକ୍ଷାହିଦେଙ୍ଗ୍ ଲାଗାତାନ୍, ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣାତିଙ୍ଗ୍ ବେସି ଦୁଃକ୍ ପାୟ୍‌କିଦେଙ୍ଗ୍ ଆନାତ୍। ଆରେ ପ୍ରାଚିନ୍‌, ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ଯିହୁଦି ଦରମ୍‌ନି ପଣ୍ଡିତାର୍ କାଜିଙ୍ଗ୍ ହିନସ୍ତା ପାୟାଆଜି ହାଃଦେଙ୍ଗ୍ ଆନାତ୍। ଆରେ ହେୱାନ୍ ହାଃଜି ତିନ୍‌ଦିନ୍ ପାଚେ ଆରେରଗ ନିଙ୍ଗ୍‌ନାନ୍। 32ଇ ୱିଜୁବେଣ୍ ଯୀଶୁ ହାର୍‌ଦାଙ୍ଗ୍ ଚେଲାହିରିଙ୍ଗ୍ ବୁଜାଇ କିତାନ୍। ଲାଗିଙ୍ଗ୍ ପିତର ଯୀଶୁଙ୍ଗ୍ ଅଲପ୍ ଦେହା କୁକ୍‌ଚି ଏଲେଙ୍ଗ୍ ୱେଚ୍‌ୱାକା ଇଞ୍ଜି ଅଲପ୍ ରିସାଆଜି ୱେଚ୍‌ଚାନ୍।

33ମାତର୍ ଯୀଶୁ ମାସ୍‌ଜି ତା ଚେଲାରିଙ୍ଗ୍ ହୁଡ଼୍‌ତାନ୍, ଆରେ ପିତରତିଙ୍ଗ୍ ଦମ୍‍କାଇକିଜି ୱେଚ୍‌ଚାନ୍, “ଶୟତାନ! ନାବେତାଙ୍ଗ୍ ଦେହା ଆ। ଏନେଙ୍ଗ୍ ଈଶ୍ୱର ବିଷୟରେ ବାବି କିୱାଦାଙ୍ଗ୍ ମାନାୟ୍ ବିଷୟରେ ବାବିକିନାୟା।”

ଯୀଶୁ ପାଚେ ତାଙ୍ଗ୍‍ନାସ୍

(ମାଥି. ୧୬:୨୪-୨୮; ଲୁକ. ୯:୨୩-୨୭)

34ତାପାଚେ ଯୀଶୁ ତା ଚେଲାହିରିଙ୍ଗ୍ ମାନାୟ୍ କଚଣ୍‌ତ ହିର୍‌ବି ୱେଚ୍‌ଚାନ୍, “ଇନେର୍ ପା ନା ପାଚେ ୱାଜି ଚେଲାଆନାଦେର୍, ଲାଗିଙ୍ଗ୍ ହେୱାନ୍ ଜାର୍ ସୁକ୍ ପିସ୍ତି ଆରେ ଜାର୍ କୃଶ ଆସ୍ତି ନା ପାଚେ ୱାଡ। 35ମାତର୍ ଇନେର୍ ପା ଜାର୍ ଜିବୁନ୍ ଉଦାର୍ କିଦେଙ୍ଗ୍ ମାନ୍ କିନାନ୍, ହେୱାନ୍ ହେଦାଙ୍ଗ୍ ଆରାଇ କିନାନ୍। ମାତର୍ ଇନେର୍ ପା ନା କାଜିଙ୍ଗ୍ ଆରେ ହାର୍ଦିକାବୁର୍ କାଜିଙ୍ଗ୍ ଜାର୍ ଜିବୁନ୍ ଆରାଇ କିନାନ୍, ହେୱାନ୍ ତା ଜିବୁନ୍ ରକ୍ଷା କିନାନ୍। 36ଇନେର୍ ପା ୱିଜୁ ଜଗତ୍‍ତିଙ୍ଗ୍ ପାୟାଆଜି ଜାର୍ ଜିବୁନ୍‌ତିଙ୍ଗ୍ ଆରାୟ୍ କିତିସ୍, ହେଦାଙ୍ଗ୍ ତାଦି ଇନା ଲାବ୍? 37ଆରେ, ର ମାନାୟ୍ ଈଶ୍ୱରତିଙ୍ଗ୍ ଇନାକା ହିଦେଙ୍ଗ୍ ଆଡ୍‌ନାନ୍? ଇନେର୍ ତା ୱିଜ୍‌ୱି ଜିବୁନ୍ କଡ଼୍‍ଦେଙ୍ଗ୍ ଆଡ୍‌ନାନ୍, ଇନାକା ଆକାୟ୍! 38ଇ ଜୁଗ୍‍ନି ପାର୍ତିକିୱାକାର୍ ଆରେ ପାପ୍‍କିନି ମାନାୟାର୍ କଷ୍ଟ ହିଦ୍‌ନାର୍ ଇଞ୍ଜି ପାଣ୍ଡ୍ରାଆଜି ଯଦି ଇନେର୍ ନାଙ୍ଗେଙ୍ଗ୍ ମାପୃ ଇଞ୍ଜେଙ୍ଗ୍ ଲାଜ୍ ଆନାର୍, ଆରେ ନା ହିକ୍ଷାତିଙ୍ଗ୍ ମାନିକିଉର୍, ଲାଗିଙ୍ଗ୍ ଆନେଙ୍ଗ୍ ପା ନା ଚେଲା ଆକାୟ୍ ଇଞ୍ଜି ୱେଚ୍‌ନାଙ୍ଗ୍। ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା ପବିତ୍ର ଦୁତ୍‌କୁ ହୁଦାଙ୍ଗ୍ ପୁର୍ତିତାକେ ଆରେରଗ ୱାନାଙ୍ଗ୍, ହେପାଦ୍ନା ମାଞ୍ଜିଆବାଙ୍ଗ୍ ଇନେସ୍ ଗୌରବ ମାନାତ୍ ହେଲେକେ ଆନେଙ୍ଗ୍ ଗୌରବତାଙ୍ଗ୍ ୱାନିହିଙ୍ଗ୍ ୱିଜାକାର୍ ହୁଡ଼୍‌ନାର୍।”

നിലവിൽ തിരഞ്ഞെടുത്തിരിക്കുന്നു:

ମାର୍କ 8: PEGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക