ମାର୍କ 4
4
ବିୟାନ୍ ୱିତ୍ନାକାନ୍ତି କାତା
(ମାଥି. ୧୩:୧-୯; ଲୁକ. ୮:୪-୮)
1ଆରେରଗ ଯୀଶୁ ଗାଲିଲୀ ଜିଲ୍ଲାନି ହାମ୍ଦୁର୍ କାଣ୍ଡିତ ହିକ୍ଷାହିଦେଙ୍ଗ୍ ଆରମ୍ କିତାନ୍, ଯୀଶୁ ଚାରିବେଣ୍ତ ବେସିହେନି ମାନାୟ୍ ରବେ ଆତାର୍। ଲାଗିଙ୍ଗ୍ ଯୀଶୁ ର ଡଙ୍ଗାତାକେ ହାଲ୍ଜି କୁଚ୍ଚାନ୍, ଡଙ୍ଗା ଏଜୁକାଙ୍ଗ୍ ଅଲପ୍ ଦେହାମାଚାତ୍ ଆରେ ମାନାୟାର୍ କାଣ୍ଡିତ ମାଚାର୍। 2ହେପାଦ୍ନା ଯୀଶୁ କାତା ୱେଚ୍ନିଲେକେ କିଜି ହେୱାରିଙ୍ଗ୍ ହିକ୍ଷାହିଜି ୱେଚ୍ଚାନ୍,
3“ୱେନାଟ୍, ର ଚାଷି ତା ଜମିତ ବିୟାନ୍ ୱିତ୍ଦେଙ୍ଗ୍ ହାଚାନ୍। 4ହେୱାନ୍ ୱିତୁ-ୱିତୁ ଏଚେକ୍ ବିୟାନ୍ ହାଜ୍ଦ ଆର୍ତାତ୍, ଆରେ ପଟିଙ୍ଗ୍ ୱାଜି ହେଦାଙ୍ଗ୍ ଚିଚିକ୍। 5ଆରେ କେତେକ୍ ବିୟାନ୍ ଅଲପ୍ ଚିକ୍ଲା ମାନି ରେଚ୍କି ବାହାତାକେ ଆର୍ତିକ୍। ହେବେ ଜବର୍ ଚିକ୍ଲା ମାନ୍ୱିତିଲେ ବେଗି ଗଜା ଆତାତ୍, ମାତର୍ ଚିରାଙ୍ଗ୍ ବିତ୍ରେ ହାଞ୍ଜେଙ୍ଗ୍ ଆଡ୍ୱିତିକ୍। 6ମାତର୍ ହେ ପାଡ଼ା ଚିରାଙ୍ଗ୍ ଏଚ୍ୱିତିଲେ ଖାରାକିତିଲେ ୱିଜୁ ୱାଚ୍ଚାତ୍। 7ଆରେ କେତେକ୍ ବିୟାନ୍ ୱାଡ଼ି ମାର୍ ମାଦି ଆର୍ତିକ୍, ଆରେ ୱାଡ଼ି ମାର୍କୁ ନିଙ୍ଗ୍ଞ୍ଜି ହେ ପାଡ଼ାଜପି ଡାବାଇ କିତିକ୍, ହେବେତାଙ୍ଗ୍ ଇନାକାପା ପାଡ଼୍ ଆହ୍ୱାତାତ୍। 8ମାତର୍ କେତେକ୍ ବିୟାନ୍ ହାର୍ ମେଦ୍ନିତ ଆର୍ତିକ୍, ହେ ୱିଜୁ ଗଜାଆଜି ଗାଜା ଆତିକ୍ ଆରେ ପାଡ଼୍ ଆସ୍ତିକ୍ କେତେକ୍ ତିରିଶ୍ ଗୁଣ୍, କେତେକ୍ ଶାଟେ ଗୁଣ୍ ଆରେ ଶହେ ଗୁଣ୍ ପାତେକ୍ ପାଡ଼୍ ଆସ୍ତାତ୍।” 9ଯୀଶୁ ଇବେଣ୍ ୱିସ୍ତାନ୍ ଆରେ ୱେଚ୍ଚାନ୍, “ଇମ୍ଣା କାଦେର୍ ଇବେଣ୍ ୱେଚାଦେର୍ ହେବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।”
କାତାନି ଅର୍ତ
(ମାଥି. ୧୩:୧୦-୧୭; ଲୁକ. ୮:୯,୧୦)
10ଯୀଶୁ ରକାନ୍ ମାନିହିଙ୍ଗ୍ ତା ହାଙ୍ଗ୍ଦାକାର୍ ବାରଜାଣ୍ ବାଚିକିତି ଚେଲାର୍ ହୁଦାଙ୍ଗ୍ ତା ଲାଗାୟ୍ ୱାତାର୍, ଆରେ ଯୀଶୁ ୱେଚି କାତାତିଙ୍ଗ୍ ବୁଜଆୱାଦାଙ୍ଗ୍ ଆରେରଗ ବୁଜାଇ କିଦା ଇଞ୍ଜି ୱେଚ୍ଚାର୍।
11ହେବେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ତା ରାଜିନି ପୁନ୍ୱିତି କାତାତିଙ୍ଗ୍ ପୁଞ୍ଜେଙ୍ଗ୍ ଏପେଙ୍ଗ୍ ସୁଯଗ୍ ଗାଟାଆତାଦେର୍ନା। ମାତର୍ ଇମ୍ଣାକାର୍ ଈଶ୍ୱରତିଙ୍ଗ୍ ପୁନୁୱାତାର୍ନା ହେୱାରିଙ୍ଗ୍ ସୁଯଗ୍ ଗଟାଆୱାତାତ୍ନା ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନାଙ୍ଗା। 12ଦରମ୍ ସାସ୍ତର୍ତାକେ ଇନେସ୍ ଲେକେ ଲେକା ମାନାତ୍,
ହେୱାର୍ ହୁଡ଼୍ନାର୍ ମାତର୍ ପୁନୁର୍, ଆରେ ୱେନାର୍ ମାତର୍ ବୁଜା ଆଉର୍।
ଯଦି ହେୱାର୍ ବୁଜାଆତାର୍ମା ଈଶ୍ୱରତାକେ ୱାତାର୍ମା ଆରେ ହେୱାରିଙ୍ଗ୍ ଈଶ୍ୱର ପାପ୍ କେମା କିତାନ୍ମା।”
ଯୀଶୁ ବିୟାନ୍ ୱିତ୍ନାକାନ୍ତି ବୁଜାଇ କିନାକା
(ମାଥି. ୧୩:୧୮-୨୩; ଲୁକ. ୮:୧୧-୧୫)
13ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଯଦି ଇ କାତାତିଙ୍ଗ୍ ବୁଜାଆଉଦେରା? ଏଲେଙ୍ଗ୍ ଆତିସ୍ ଏପେଙ୍ଗ୍ ଜେକନି କାତାତିଙ୍ଗ୍ ପା ବୁଜାଆଉଦେର୍। 14ହେ କାତାନି ଅର୍ତ ଇଲେକେ, କାତା ଶୁଣାୟ୍ କିନାକାନ୍ ର ବିୟାନ୍ ୱିତ୍ନି ମାନାୟ୍ ଲେକେ। 15ମାନାୟାର୍ ଈଶ୍ୱର କାତାତିଙ୍ଗ୍ ୱେନାର୍ ମାତର୍ ଶୟତାନ୍ ୱାଜି ହେୱାର୍ ୱେଚି କାତାତିଙ୍ଗ୍ ବାଣାଇ କିନାତ୍। ହେୱାର୍ ହାଜ୍ଦ ଆର୍ତି ବିୟାନ୍ ଲେକେ। 16କେତେକ୍ ମାନାୟ୍ କାଲ୍କୁ କୁଡ଼ିନି ଜମିତ ଆର୍ତି ବିୟାନ୍ ଲେକେ, ହେୱାନ୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ୱାରିତାଙ୍ଗ୍ ଆହ୍ନାନ୍। 17ମାତର୍ ହେୱାର୍ ଗରବ୍ ବିତ୍ରେ ଈଶ୍ୱର କାତା ହାଲ୍ୱିତିଲେ ହେୱାର୍ ଈଶ୍ୱର କାତାତିଙ୍ଗ୍ ଅଲପ୍ଦିନ୍ ଆସ୍ତି ମାନାର୍, ଆରେ ଈଶ୍ୱର କାତାକାଜିଙ୍ଗ୍ ଦୁଃକ୍ କଷ୍ଟ ୱାତିସ୍ ହେଦାପ୍ରେ ପାର୍ତିତାଙ୍ଗ୍ ଦେହା ହାନାର୍। 18ଆରେ କେତେକ୍ ମାନାୟ୍ ୱାଡ଼ି ମାର୍କୁକାଙ୍ଗ୍ ଆର୍ଜିମାଚି ବିୟାନ୍ ଲେକେ, ହେୱାର୍ ଈଶ୍ୱର କାତାତିଙ୍ଗ୍ ୱେନାର୍, 19ମାତର୍ ଦୁନିଆନି ଚିନ୍ତା, ହାଉକାର୍ ଆନି ଚିନ୍ତା, ଆରେ ବାରବିନି ଚିନ୍ତା ଇୱିଜୁ ଚିନ୍ତା ମାନ୍ତ ୱାତିସ୍ ଈଶ୍ୱର କାତାତିଙ୍ଗ୍ ଡାବାଇ କିନାତ୍। ହେଦାଙ୍ଗ୍ କାଜିଙ୍ଗ୍ ଈଶ୍ୱର କାତାତିଙ୍ଗ୍ ମାନିକିୱିତିସ୍ ହେୱାର୍ ପାଡ଼୍ ପା ଆହୁର୍। 20ଆରେ, କେତେକ୍ ମାନାୟ୍ ହାର୍ ମେଦ୍ନିତ ଆର୍ଜିମାଚି ବିୟାନ୍ ଲେକେ, ଇନେର୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ହାର୍ଦାଙ୍ଗ୍ ମାନ୍ତ ଆହ୍ନାର୍। ଆରେ ହେୱାର୍ ର ପାଡ଼୍ ଆହ୍ନି ଲେକେ ଇନେର୍ ତିରିଶ୍ ଗୁଣ୍, ଇନେର୍ ଶାଟେ ଗୁଣ୍ ଆରେ ଶହେ ଗୁଣ୍ ପାତେକ୍ ପାଡ଼୍ ଆହ୍ନାତ୍।”
ମାଣ୍ ଜପି ବଇଟା
(ଲୁକ. ୮:୧୬-୧୮)
21ଆରେରଗ ଯୀଶୁ ହେୱାରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନ୍, “ଇନେର୍ ପା ବଇଟାତିଙ୍ଗ୍ ମାଣ୍ପାକ୍ଚି କି କାଟେଲ୍ ତାରେନ୍ ଇଟୁର୍। ବଇଟାତିଙ୍ଗ୍ ବଇଟା ଇଟ୍ନି ବାହାତାକେ ଇଟ୍ନାର୍।
22ଆନେଙ୍ଗ୍ ୱେଚ୍ନି ଅର୍ତ ଇଦାଙ୍ଗ୍ କି, ମାନାୟାର୍ ନଙ୍ଗୟ୍ ପାତେକ୍ ଇମ୍ଣି ବିଷୟ ପୁନ୍ୱାତାର୍ନା ଈଶ୍ୱର ୱିଜୁ ବିଷୟ ପୁନିକିଦ୍ନାନ୍। ମାନାୟାର୍ ଇମ୍ଣିକାତାତିଙ୍ଗ୍ ଡ଼ୁକ୍ଚି ମାନାର୍ ହେ କାତାତିଙ୍ଗ୍ ଈଶ୍ୱର ପୁନିକିଦ୍ନାନ୍। 23ଇମ୍ଣାକାର୍ ଇବେଣ୍ ୱେନାଦେର୍, ହେବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।” 24ଯୀଶୁ ଆରେରଗ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇମ୍ଣି କାତା ୱେନାଦେର୍, ହେ ବିଷୟତାଙ୍ଗ୍ ପୁନ୍ଞ୍ଜି ମାନାଟ୍। ଇମ୍ଣି ମାଣ୍ ତାଙ୍ଗ୍ ଲାଜ୍ଜି ହିନାଦେର୍, ହେ ମାଣ୍ ତାଙ୍ଗ୍ ମିଙ୍ଗେଙ୍ଗ୍ ଲାଜ୍ଜି ହିଦ୍ନାର୍ ଆରେ ମିଙ୍ଗେଙ୍ଗ୍ ତାତାଙ୍ଗ୍ ଆଦିକ୍ ହିଦ୍ନାର୍। 25ଇନେସ୍କି ଇମ୍ଣାକାର୍ ନା ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଇଚାକିନାର୍, ଈଶ୍ୱର ହେୱାନିଙ୍ଗ୍ ଆଦିକ୍ ବୁଜା ଆଦେଙ୍ଗ୍ ହିନାନ୍। ମାତର୍ ଇମ୍ଣାକାର୍ ନା ହିକ୍ଷାତିଙ୍ଗ୍ ପୁଞ୍ଜେଙ୍ଗ୍ ମାନ୍କିଉର୍, ହେ ମାନାୟ୍ ପୁଚାକା ପା ଈଶ୍ୱର ଅନାନ୍।”
ବିୟାନ୍ ନେସ୍ଜି କାତା
(ମାଥି. ୧୩:୨୪)
26ଆରେ ଯୀଶୁ ୱେଚ୍ଚାନ୍, “ଈଶ୍ୱର ରାଜି ଇ ବାର୍ତାକା, ଇନେସ୍କି ରକାନ୍ ଚାଷି ଜମିତ ବିୟାନ୍ ୱିତ୍ନାନ୍। 27ମିକାଲିଙ୍ଗ୍ ଚାଷି ହୁଞ୍ଜ୍ନାନ୍ ଆରେ ୱେଡ଼ାଲିଙ୍ଗ୍ କାମାୟ୍ କିନାନ୍, ମାତର୍ ବିୟାନ୍ ଇନେସ୍ ଲେକେ ନେସ୍ଜି ଗାଜା ଆନାତ୍, ହେଦାଙ୍ଗ୍ ହେୱାନ୍ ପୁନୁନ୍। 28ଜମି ପାଡ଼ାତିଙ୍ଗ୍ ଗାଜାଆଦେଙ୍ଗ୍ ସାଇଜ କିନାତ୍। ପାର୍ତୁମ୍ ଆକିଙ୍ଗ୍ ଚଞ୍ଜ୍ନିକ୍, ପାଚେ ଗହମ୍ ହତ୍ନି କେରା ହନାତ୍, ତାପାଚେ କେରାତାକେ ବାର୍ତି ଗହମ୍ ପାଡ଼୍ ଆହ୍ନାତ୍। 29ତାସ୍ ହେନ୍ତିସ୍ ହେୱାନ୍ କୱେସ୍ ଆସ୍ତି ତେଜ୍ନାନ୍।”
ହାର୍ହୁ ମାଞ୍ଜିନି କାତା
(ମାଥି. ୧୩:୩୧,୩୨,୩୪; ଲୁକ. ୧୩:୧୮,୧୯)
30ଯୀଶୁ ଆରେରଗ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଇନେସ୍ ଲେଗ୍ଦାକା ହେ ବିଷୟତାଙ୍ଗ୍ ଆନେଙ୍ଗ୍ ର କାତା ୱେଚ୍ଚାନାଙ୍ଗ୍। 31ଈଶ୍ୱର ସାସନ୍ କିନି ରାଜି ର ହାର୍ହୁ ମାଞ୍ଜି ଲେକେ, ମେଦ୍ନିତ ୱିତ୍ତିସ୍ ୱିଜୁ ମାଞ୍ଜିତାଙ୍ଗ୍ ହିରୁ। 32ମାତର୍ ଜମିତ ୱିତ୍ତିସ୍ ନେସ୍ଜି ୱିଜୁ ଚାଷ୍ତାଙ୍ଗ୍ ଗାଜାମାର୍ ଆନାତ୍, ଆରେ ତା କେନ୍ଦାଙ୍ଗ୍ ଗାଜାଗାଜା ଆନିକ୍, ହେ କେନ୍ଦାକାଙ୍ଗ୍ ବାଦାଡ଼୍ନି ପଟିଙ୍ଗ୍ ଗୁଡା ଗାଚ୍ଚି ବାହାକିନିକ୍।”
33ହେୱାର୍ ବୁଜାଆନିଲେକେ କିଜି ଯୀଶୁ ଇଲେକେ କେତେକ୍ କାତା ୱେଚ୍ନିଲେକେ କିଜି ହିକ୍ଷାହିଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ନେ ୱେଚ୍ଚି ମାଚାନ୍। 34ଯୀଶୁ ଈଶ୍ୱର ବିଷୟତିଙ୍ଗ୍ କାତା ୱେଚ୍ନିଲେକେ କିଜି ହେୱାରିଙ୍ଗ୍ ହିକ୍ଷା ହିତାନ୍। ମାତର୍ ଇନେର୍ ହିଲିହିଙ୍ଗ୍ ତା ଚେଲାହିରିଙ୍ଗ୍ ୱିଜୁ କାତା ବୁଜାଇକିଜି ୱେଚ୍ଚି ମାଚାନ୍।
ଯୀଶୁ ଦୁକା ବାର୍ହାତିଙ୍ଗ୍ ଟେବାଇ କିତାନ୍
(ମାଥି. ୮:୨୩-୨୭; ଲୁକ. ୮:୨୨-୨୫)
35ହେନାଞ୍ଜ୍ ମିକାହାରେସ୍ ଯୀଶୁ ତା ଚେଲାରିଙ୍ଗ୍ ୱେଚ୍ଚାନ୍, ୱାଡ, “ଆସେଙ୍ଗ୍ ହାମ୍ଦୁର୍ ଆରେ ର ପାଡ଼୍କା ହାନାସ୍।” 36ହେବେତାଙ୍ଗ୍ ତା ଚେଲାହିର୍ ମାନାୟାରିଙ୍ଗ୍ ପିସ୍ତି ଯୀଶୁ ଇମ୍ଣି ଡଙ୍ଗାତାକେ ଆଗେ କୁଚ୍ଚି ମାଚାନ୍ ହେ ଡଙ୍ଗାତାକେ ହେୱାନିଙ୍ଗ୍ ଅସାହାଚାର୍। ଆରେ କେତେକ୍ ମାନାୟ୍ ଜେକନି ଡଙ୍ଗାଙ୍ଗ୍ ଆସ୍ତି ତାପାଚେ ହାଚାର୍। 37ହେୱାର୍ ହାମ୍ଦୁର୍ତ ନାନିହିଙ୍ଗ୍, ତିପ୍କୁ ଜବର୍ଡ଼ୁଇ ଆତାତ୍ ଆରେ ଡଙ୍ଗାତିଙ୍ଗ୍ ଲଉଡ଼ି ହାପ୍କା ଇଡ଼୍ତାତ୍। ଡଙ୍ଗାବିତ୍ରେ ଏଜୁଙ୍ଗ୍ ହଟିଲେ ଡଙ୍ଗା ମୁନ୍ଜେଙ୍ଗ୍ ହାଙ୍ଗ୍ତାତ୍।
38ହେପାଦ୍ନା ଯୀଶୁ ଡଙ୍ଗା ପାଚେନି ମୁଣ୍ଡିତ କାପ୍ଡ଼ା ଡ଼ାପ୍ଚି ହୁନ୍ଜି ମାଚାନ୍, ଚେଲାହିର୍ ଯୀଶୁଙ୍ଗ୍ ନିକ୍ଚି ୱେଚ୍ଚାର୍, “ଏ ଗୁରୁ, ଡଙ୍ଗା ମୁଞ୍ଜ୍ନାତ୍ଦେ, ନିଙ୍ଗେଙ୍ଗ୍ ଇନାକା ଅଲପ୍ପା ଚିନ୍ତା ଆକାଇ?”
39ହେବେତାଙ୍ଗ୍ ଯୀଶୁ ନିଙ୍ଗ୍ଞ୍ଜି ଡ଼ୁଇ ଆରେ ଲଉଡ଼ିତିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ତିର୍ ଆ,” ଆରେ ହେଦାପ୍ରେ ଡ଼ୁଇଟେବା ଆତାତ୍, ଆରେ ହାମ୍ଦୁର୍ନି ଲଉଡ଼ି ତିର୍ ଆତାତ୍। 40ତାପାଚେ ଯୀଶୁ ଚେଲାହିରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇନା କିଦେଙ୍ଗ୍ ଏଚେକ୍ ପାଣ୍ଡ୍ରା ଆନାଦେରା? ନଙ୍ଗୟ୍ ପାତେକ୍ ଇନାକା ଏପେଙ୍ଗ୍ ନା ଜପି ପାର୍ତି ହିଲୁତ୍?”
41ହେବେତାଙ୍ଗ୍ ଚେଲାହିର୍ ଚାନିଆ ଆଜି ହେୱାର୍ ବିତ୍ରେ ୱେଚ୍ପା ଆଦେଙ୍ଗ୍ ଲାଗାତାର୍, “ଇୱାନ୍ ଇନେସ୍ ଲେଗ୍ଦି ମାନାୟ୍? ଡ଼ୁଇ ଆରେ ଲଉଡ଼ି ପା କାତା ମାନିକିନିକା!”
നിലവിൽ തിരഞ്ഞെടുത്തിരിക്കുന്നു:
ମାର୍କ 4: PEGNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
