मत्ती 13

सेन ताप्केन पेदाम

(मर्कुस ४:१-१२,२५; लुका ८:४-१०; १०:२३-२४)

1ओः ङीःमुरा येशु खीमलाःम्‍ले थेङ्दी गालील छोइ सुःर्ला काःल्सी ओःले मीःक्याला लोप्चेला साला तेःसी। 2ओःले छ्‍योम्बो मीःइ पोर्चोम खुङगीइ छुरफारला जोम्सी। ओः सोङ्‍गारा, खुङ टुःला जादी तेःसी, ओःले थाम्जेर मीःक्या छोइ सुःर्ला लाःङ्सी। 3येशुइ ओः मीःक्याला माःङ्बुरा तामक्या पेदामक्यालाःम्‍ले लाःसी। खुङगीइ लाःसी, “मेराङ चीग मीः सीःङला सेन ताप्काला काःल्सी। 4सेन ताप्कासुनारा चीङ सेनक्या लाःमला लेप्सी, ओःले च्याःज्युङ्माक्या ओःङ्दी ओःक्या साःतेर्सी। 5काःजे सेनदी सेबी माःङ्बु म्याःक्योक तोःरोक सीःङक्याला लेप्सी। ओःले नाःङ्थुप म्याःक्योक सोङ्‍गारा सेन गेबुरा केसी, 6इःनाङ नाःङथुप चार्ङे लुमाःखुगारा ङीःमा स्यार्लुङम्याःपा पुःङ्मा काम्सी। 7काःजे सेनक्यादी छेर्माङक्याइ पुःङ नाःङ्ला लेप्सी, ओःले ओः छेर्माङक्या छार्मीःजीक केक्योक सेनक्याला उप्‍ती सेतेर्सी। 8ओःले काःजे सेन लाःना याःबु सेबीला लेप्सी ओःले लाःलेइ पुःङगीइ क्याः चीग ब्रुम्दो, लाःलेइला खाल सुम ब्रुम्दो ओःले लाःलेइला खाल चीग रा च्यु ब्रुम्दो कोःङ्च्युसी। 9कोःगेन नाम्ज्यो एः लाःना कोःदो।”

10ओःले योबाक्या येशुसाःला ओःङ्दी टीःसी, “ख्याइ चीले मीःक्याला लोप्कासुना पेदामक्यालाःम्‍ले लोप्कुबा?” 11येशुइ खुङक्याला लाःसी, “ख्योक्यालादी नाःम्खालीङगीइ क्याःल्खाप नाःङगीइ तामक्या सेगेन नावा तेर्ती एः, इःनाङ खुङक्याला तेर्ती म्याः। 12चीलेलाःना काःखो ङीमु एःपा, ओःखोला ताःरुङ तेर्केन एः ओःले खुङ ङीमु कोःकेन भन्दाङ माःङ्बु ओःङेन एः। इःनाङ काःखो ङीमु म्याःपा, ओःखो ङीमु तीबी चीग एःक्योकक्याङ फ्रोगेन एः। 13ओः सोङ्‍गारा, ङाःइ खुङक्याला लोप्कासुना पेदामक्यालाःम्‍लेरा लोप्क्योक इःङे, चीलेलाःना खुङक्याइ तजे नी तउए, इःनाङ खुङक्याइ मेःथोङ एः, ओःले कोःजे नी कोःउए, इःनाङ खुङक्याइ मेसेए। 14कोन्ज्योइ लेःङ्‍गो तेर्केन यशैयाइ लाःक्योक ताम दीखुङक्या ङीमु डीक्‍कुए,

‘दी मीःक्याइ कोःजे नी कोःगेन एः, इःनाङ मेसेगेन एः,

खुङक्याइ तजे नी तउए, इःनाङ मेःथोङेन एः।

15चीलेलाःना दी मीःक्याइ सेम थुक्पु काःल्दी एः,

खुङक्याइ नाम्ज्योक्या मेःकोःगेन्दी काःल्दी एः,

ओःले खुङक्याइ मी चुम्दी एः।

मीःङे लाःना नी खुङक्याइ थोङ्जे एःके ओःले कोःजे एःके ओःले नावाइ सेजेके,

ओःले खुङक्याइ राःङगीइ सेम ङाःछ्‍योले लोजे एःके,

ओःले ङाः खुङक्याला टाःच्युजे एःके।’#यशैया ६:९-१०

16इःनाङ ख्योक्याइदी मोलाम ज्योर्ती एः, चीलेलाःना ख्योक्याइ मीइ थोङ्‍गुए, ओःले ख्योक्याइ नाम्ज्योइ कोःउए। 17तेःन्दामरा ङाः ख्योक्याला लाःके, ख्योक्याइ थोङ्क्योक ओःले कोःक्योक दी तामक्या कोन्ज्योइ लेःङ्‍गो तेर्केन माःङ्बुरा मीःक्याइ ओःले खुङगीइ ताःक्पा मीःक्याइ थोङ्जेला ओःले कोःजेला माःङ्बुरा सेम पेःदी एःके, इःनाङ खुङक्याइ थोङ्जेङ माःज्योर, ओःले कोःजेङ माःज्योर।

सेन ताप्केन पेदामगीइ लेःन

(मर्कुस ४:१३-२०; लुका ८:११-१५)

18ताः सेन ताप्केन पेदामगीइ लेःन कोःदो ओःले सेदो। 19काःन्दी मीःक्याइ नाःम्खालीङगीइ क्याःल्खापकीइ बारेला लेःङ्‍गो कोःदी मेसेबा ओः मीःक्यादी लाःमला लेप्क्योक सेनक्या च्योःङ्‍रा इःङे। शैतान ओःङ्‍गुए ओःले ओःक्याइ सेमला एःक्योक लेःङ्‍गो तेङ्दी खेर्कुए। 20तोःरोक सीःङला लेप्क्योक सेनक्या लाःक्योकदी लेःङ्‍गो कोःलुङ्म्याःपा केःदाङ पेःदी सेमला लुगेन मीःक्या इःङे। 21इःनाङ ओः लेःङ्‍गो खुङक्याइ सेमला याःबु पेःदी नाःङ्थुप मालेप्क्योक सोङ्‍गारा ओःखो याःम्बा चीगथुप चीग्रा तेःकुए। ओः लेःङ्‍गोइ पेःगासुना खुङक्याइ काःबु ओःले तुःक्पु ज्योर्लुङम्याःपा खुङक्याइ सेमल्हुक लुजे पोःर्कुए। 22छेर्माङगीइ पुःङला लेप्क्योक सेन लाःक्योकदी ओः मीःक्या इःङे, काःखोइ लेःङ्‍गो कोःजे नी कोःउए, इःनाङ दी मीःलीइ कोःकेन क्युःक्याइ तुःङालगीइ पेःगासुना ओःले नोःर क्युःक्या काःन्डुले जोजे लाःकेन तुःङालगीइ पेःगासुना लेःङ्‍गोला उप्‍तेर्कुए, ओःले खुङक्यालाःम्‍ले चीङ ब्रुम्दो कोःङ्मीच्युए। 23ओःले याःबु सेबीला लेप्क्योक सेन लाःक्योकदी लेःङ्‍गोला कोःदी सेगेन मीःक्या च्योःङ्‍रा इःङे। खुङक्याइ लाःलेइला क्याः चीग गुणा, लाःलेइला खाल सुम गुणा ओःले लाःलेइला खाल चीग रा च्यु गुणा ब्रुम्दो कोःङ्च्युउए।”

सामाइ पेदाम

24येशुइ खुङक्याला फीर्च्या राःङ्सा पेदाम लाःसी, “तादो, नाःम्खालीङगीइ क्याःल्खाप राःङगीइ सीःङला याःबु सेन ताप्केन मेःराङ चीग मीः च्योःङ्‍रा इःङे। 25कुःङ्मु चीग थाम्जेर ङ्‍याःल्क्योक तीःजीला टाःलाङ चीग ओःङ्सी ओःले ओः न्याः ताप्क्योक सीःङला सामाइ सेन ताप्‍तेर्ती काःल्सी। 26न्याः छार्ती नीमाल लुगासुना सामाङ छार्तेरा ओःङ्क्योक थोङ्सी।

27ओःले लाःबुक्या ओःङ्दी सीःङगीइ ताःक्पुला लाःसी, ‘हजुर, ख्याइ सीःङला याःबु सेन ताप्क्योक मीःङे ले? दी सामा काःलाःम्‍ले ओःङ्बा?’ 28खुङगीइ लाःसी, ‘काःन्दीङ टाःलाङगीइ एःन्डु पेःतेर्क्योक इःङे।’ ओःले ओः लाबुक्याइ टीःसी, ‘ङीः काःल्दी ओः सामाक्या पोतेर्का ले?’

29इःनाङ सीःङगीइ ताःक्पुइ लाःसी, ‘मीःङे, ताःसे मापो, चीलेलाःना सामा पोगासुना गोल्दी न्याःङ पोःगेन एः। 30डु तुःगेन तीःजी माःकालथुप ङीक्‍कारला छार्चे तेर, ओःले डु तुःगेन तीःजीला ङाः लेःमीक्याला तोःङ्ला सामा रुःप जोदी मेःला साजेला पेःन ताःम्च्युगे, ओः तीङ्ला न्याःदी तुःदी योःङला ज्याच्युगे।’”

पाल्गाइ सेन ओःले खमीरकीइ पेदाम

(मर्कुस ४:३०-३४; लुका १३:१८-२१)

31येशुइ फीर्च्या राःङ्सा पेदामलाःम्‍ले लोप्काला स्युःसी, “नाःम्खालीङगीइ क्याःल्खाप पाल्गाइ सेन च्योःङ्‍रा इःङे। मेःराङ चीग मीःइ ओः पाल्गाइ सेन खेर्ती राःङगीइ सीःङला ताप्कुए। 32थाम्जेर सेनक्या भन्दा छीमी एःनाङ केमीःजीक ओःखो सीःङला एःक्योक पुःङ्मा भन्दा छ्‍योम्बो ओःङ्‍गुए, ओःले च्याःज्युङ्माक्या ओःङ्दी याःल्गाला छाङ जोदी तेःकुए।”

33येशुइ खुङक्याला राःङ्सा पेदाम लाःसी, “नाःम्खालीङगीइ क्याःल्खाप खुरा फोर्च्युगेन खमीर च्योःङ्‍रा इःङे। मेःराङ चीग पेःन्पीःजाइ ओः तीबी चीग खमीर खेर्ती पाइ सुम चाम्बाला सेउए ओःले थाम्जेर चाम्बा फोर्ती ओःङ्‍गुए।”

34येशुइ मीःक्याला थाम्जेर ताम पेदामलाःम्‍लेरा लाःसी। येशुइ खुङक्याला पेदाम माःलाःप्‍पा चीयाङ मेलोप्कुके। 35कोन्ज्योइ खुङगीइ लेःङ्‍गो तेर्केन्दीलाःम्‍ले लाःक्योक ताम एःन्डुले छाङ्सी,

“ङाः खुङक्याला पेदामक्यालाःम्‍ले ताम लाःके,

ओःले ङाः खुङक्याला जाम्बुलीङ जोमीःजीक इप्‍ती ज्याक्योक तामक्या लाःके।”#भजन ७८:२

सामाइ पेदामगीइ लेःन

36ओःले येशु ओः मीःक्याला पोःर्ती खीमला काःल्सी, ओःले खुङगीइ योबाक्या खुङसाःला ओःङ्दी लाःसी, “सीःङगीइ सामाइ पेदामगीइ लेःन ङीःला लोप्ना ना।” 37येशुइ खुङक्याला लाःसी, “याःबु सेन ताप्केन मीःदी ङाः मीःइ पुः इःङे। 38सीःङ जाम्बुलीङ इःङे, ओःले याःबु सेनक्यादी नाःम्खालीङगीइ क्याःल्खापखीइ मीःक्या इःङे, ओःले सामाक्यादी शैतानगीइ मीःक्या इःङे। 39ओःले सामा ताप्केन टाःलाङदी शैतान इःङे। ओःले डु तुःगेन तीःजी लाःक्योकदी जाम्बुलीङगीइ अन्त्य इःङे। लेःमीक्या लाःक्योकदी स्वर्गदुतक्या इःङे। 40सामा मेःला साजेला पोदी रुःप जोक्योक च्योःङ्‍रारा दी जाम्बुलीङगीइ अन्त्यङ ओःन्डुबारा ओःङेन एः। 41ओः ङीःमु ङाः मीःइ पुःइ ङाःइ स्वर्गदुतक्याला ताङेन एः ओःले खुङक्याइ ङाःइ क्याःल्खापला लाःयो पेःगेनक्या ओःले पेःच्युगेनक्या थाम्जेर मीःक्याला रुःप चीःगेन एः, 42ओःले खुङक्याइ ओः मीःक्याला मेः नाःङ्ला लुतेर्केन एः। ओःला खुङक्याइ सो मुःर्तेरा ङुःगेन एः। 43इःनाङ कोन्ज्योइ तोःङ्ला ताःक्पा एःकेनक्यादी राःङगीइ आबा कोन्ज्योइ क्याःल्खापला ङीःमा च्योःङ्‍रारा स्यार्केन एः। कोःगेन नाम्ज्यो एः लाःना कोःदो।

इप्‍ती ज्याक्योक नोःर क्युः ओःले मोतीइ पेदाम

44नाःम्खालीङगीइ क्याःल्खापदी साला इप्‍ती ज्याक्योक छेन्दी रीःनगीइ नोःर क्युः च्योःङ्‍रा इःङे। मेःन्दा चीग मीःइ ओःखोला ज्योर्कुए ओःले फीर्च्या उप्‍ती ज्याउए, ओःले खुङ केःदाङ पेःदेरा काःल्दी राःङ ङीमु एःक्योक थाम्जेर नोःर क्युःक्या चोङ्दी ओः सीःङ ङ्‍योःउए।

45नाःम्खालीङगीइ क्याःल्खापदी याःबु मोतीक्या छोल्देरा डोगेन मेःराङ चीग छोङ्बा च्योःङ्‍राङ इःङे। 46ओःले खुङगीइ माःङ्बुरा छेन्दी रीःन पेःगेन मोती चीग फ्रेमीःजीक राःङ ङीमु एःक्योक थाम्जेर नोःर स्याःक्या चोङ्‍गुए ओःले ओः मोती ङ्‍योःउए।

ङ्‍याः जुम्ङेन जालगीइ पेदाम

47फीर्च्याङ नाःम्खालीङगीइ क्याःल्खाप नी छोला क्याःप्क्योक जाल च्योःङ्‍रा इःङे। दीखोला थाम्जेर खालगीइ ङ्‍याःक्या पार्तीउए। 48ङ्‍याःइ काःङ्मीःजीक जाल क्याःप्केनक्याइ ओःखोला सुःर्ला ख्योङ्‍गुए ओःले याःबु रा माःइबा ङ्‍याः#१३:४८ माःइबा ङ्‍याः यहुदीक्याइ लागी माःइबा ङ्‍याः लाःक्योकदी खुङक्याइ छ्‍येइ ठीमगीइ साःजे मेःयोङे लाःक्योक ङ्‍याःक्या इःङे। दाम्गुए। याःबु याःबु ङ्‍याःलादी खुङक्याइ राःङगीइ नेकीला ज्याउए ओःले माःइबा ङ्‍याःक्यालादी क्युर्तेर्कुए। 49दी जाम्बुलीङगीइ अन्त्यइ ङीःमाङ ओःन्डुबारा ओःङेन एः। स्वर्गदुतक्या ओःङ्दी ताःक्पा मीःक्यालाःम्‍ले माःताक्पा मीःक्याला दाम्ङेन एः, 50ओःले मेः नाःङ्ला क्युर्तेर्केन एः। ओःला खुङक्याइ सो मुःर्तेरा ङुःगेन एः।”

51येशुइ योबाक्याला टीःसी, “ची ख्याक्याइ दी थाम्जेर तामक्या सेबाले?” खुङक्याइ लाःसी, “सेसी प्रभु।” 52ओःले येशुइ खुङक्याला लाःसी, “ओः सोङ्‍गारा, नाःम्खालीङगीइ क्याःल्खापकीइ शीक्षा ज्योर्क्योक छ्‍येइ ठीमगीइ लोबेनदी मेःराङ चीग खीमगीइ ताःक्पु च्योःङ्‍रा इःङे, ओःखोइ राःङगीइ योःङलाःम्‍ले सेम्बा रा नीङ्बा छेन्दी रीःनगीइ स्याःक्या फीला तेङ्‍गुए।”

नासरतला येशुला इन्कार पेःक्योक

(मर्कुस ६:१-६; लुका ४:१६-३०)

53दी पेदामक्या लाःसीःङ्मीजीक येशु ओःलाःम्‍ले काःल्सी, 54ओःले राःङ छार्क्योक युःल नासरतला काःल्सी। खुङगीइ जोम्साखीमला लोप्सी, ओःले खुङगीइ लोप्क्योक कोःगेनक्या याःमाछाक नेती लाःसी, “एःन्डुबा नावा दीखोइ काःलाःम्‍ले ज्योर्तुबा? एःन्डुबा याःमाछाककीइ लेःगाक्या काःन्डुले पेःउबा? 55दीखो नी सीङगीइ लेःगा पेःगेन्दीइ पुः मीःङे रा? ची खुङगीइ आमा मरीयम ओःले खुङगीइ नोःक्या याकुब, योसेफ, यहुदा ओःले सीमोन मीःङे रा? 56खुङगीइ नोःमोक्याङ उःक्या ङीमु दीलारा एः। दीखोइ दी थाम्जेर नावा ओःले ल्हे काःलाःम्‍ले ज्योर्पा?” 57ओःले खुङक्याइ येशुइ ताम कोःजे पोःर्सी। इःनाङ येशुइ खुङक्याला लाःसी, “कोन्ज्योइ लेःङ्‍गो तेर्केन मीःला राःङगीइ युःलगीइ मीःक्याइ ओःले राःङगीइ फेबेक्याइ बाहेक राःङ्सा थाम्जेर ठाउँगीइ मीःक्याइ खुङला सेःसा पेःउए।” 58ओःले खुङक्याइ सेमल्हुक मालुक्योक सोङ्‍गारा, येशुइ ओः ठाउँला माःङ्बुरा याःमाछाककीइ लेःगाक्या माःबे।

നിലവിൽ തിരഞ്ഞെടുത്തിരിക്കുന്നു:

मत्ती 13: SYW

ഹൈലൈറ്റ് ചെയ്യുക

പങ്ക് വെക്കു

പകർത്തുക