Mak 5
5
Yeso zwey wa nu Azugə iboŋ mə inyo ma
(Mat 8.28-34; Luk 8.26-39)
1Yeso nə mbə məŋə-anó ma pey anjin zi animini Galeli ungɨŋ aba abey Garasene. 2Aba Amaʼazənə Yeso mə duw ungɨŋ uku ugwi, Yə́ kuw anóm moʼ nu uzugə iboŋ mə ungɨŋ ma nu yə duw ungɨŋ utəw isəg. 3Anom wu mə chomo ungɨŋ utəw isəg nu mə toŋo ungɨŋ ukob. Amə chama wa moʼ ikod uŋwən kaba akə indəŋ, 4mbə si kod ubugə ma foro ughəw ma akə indəŋ ighari nanaʼ, anigə u tən indəŋ wu. Wə mə nə ikay akə inji zənə, amə cha wa moʼ awu ni ikay ighəy kwi u chomo asin feyn. 5Wə mə iyeŋ afəb ni ingom akaʼa utəw isəg wu foro igun ugum. Wə mə iyeŋ yə kyayn akə ikay yə kyeŋ inyo ma akə atəy. 6Wə mə agha sa amaʼazənə yə zən Yeso, yə nod ŋu izum utəw anwi ifigi Yeso. 7Ikyayn akə igəg kaka ighayn kwi, “Yeso Nwiye ŋwə̂ ŋunə ukwey chigə isəg, amə anó ngiya ngwə mə kaba iniŋ? Mə boʼo ubugə inigə akə ukum Nwiye kwi izi yə ingəʼ inyi inyo.” 8Wə mə ghayn ney damugə Yeso ghayn abú uŋwən kwi, “Uzugə iboŋ duw ungɨŋ inyo wa ŋunə.”
9Yeso biri abú uŋwən kwi, “Ungwə ukum amə ngwa?” Wa wu ywiri kwi, “Uŋu ukum amə ‘Unóŋ’ Damugə mba yə naʼa.” 10Uzugə iboŋ wu boʼ ubugə abú Yeso kwi ka ucha ma úŋwən isəg ungɨŋ aba abey wu.
11Ighara wu unóŋ ingwey kyayn moʼ mə jəgə igun ugum iyad asin wu. 12Uzugə iboŋ wu boʼo ubugə abú Yeso ghayn kwi, “Cha ngwa ungɨŋ ingwey ti.” 13Yeso beni anigə uzugə iboŋ wu du ŋu inyi ungɨŋ ingwey wu. Unoŋ ingwey wu yə mə ka tosen ubigə kumə iswiʼi aba ugum zənə tə mə awu iŋu fwayn ungɨŋ animini ikoŋ.
14Ba mbənə mbə mə nəmə ingwey wu, nod iŋu ghayn anó zəŋ abú ba mbənə mbə mə ungɨŋ abey wu foro abú ba mbənə mbə mə́ iyad asin wu. Ba duw ungɨŋ asin wu iŋu zən anó zənə yə duw. 15Amaʼazənə mbə pey aboʼo Yeso, mbə zən anóm ŋunə uzugə iboŋ mə inyo ma. Anom wu chomo zi ndwi ma, atəw si zayn. Mbən zən nigə ni goro. 16Ba mbənə mbə zən ghayn anó zənə yə duw da wa ŋunə yə mə nə uzugə iboŋ nibi ghayn anó da ingwey abú ba mbənə mbə nod izaʼa.
17Amaʼazənə mbə zəw nigə, mbə boʼo ubugə abú Yeso kwi u noʼo sayn aba abey uma.
18Amaʼazənə Yeso mə inyi ungɨŋ uku ugwi, wa ŋunə uzugə iboŋ mə ungɨŋ inyo ma boʼo ubugə abú Yeso iŋu nə uŋwən.
19Asɨmə cha Yeso di num ma uŋwən. Anigə yə ghayn abú uŋwən kwi, “Ŋuw unuʼ iŋu zən ugwə unebey pey yi ghayn anó kyayn zənə Asɨyisəg aghəy inigə nibi ghayn umugə yə diri ayə.”
20Anom wu noʼ iŋu ungɨŋ aba abey zənə umə tiya akə ubey ighum. Wə pey awu ni ghayn anó kyayn zənə Yeso aghəy abú uŋwən. Ba ujum mbənə mbə zəw anó zəŋ mə yere.
Yeso zəmə ŋwə̂ Jairus izwey ayey ŋunə yə bira ndwi ma
(Mat 9.18-26; Luk 8.40-56)
21Amaʼazənə Yeso wene iŋu anjin animini zi, ikwiy ba ŋu kad uŋwən zi ugha iyad animini wu. 22Wa kyayn moʼ akaʼa ba mbənə mbə mə́ faʼa ungɨŋ na ibumi ba Jû nu ukum ma mə Jairus zən Yeso iŋu gow asey iyad ughəw ma. 23Iboʼo ubugə abú uŋwən ni fiŋ ma ujum ighayn kwi, “Uŋu ŋwə̂ yə isɨgə sə baʼa ŋu iku, ayə boʼo ubugə inigə kwi ngwə zaʼa iniŋi umbə ubugə igun ma izwey uŋwən boʼo umi gha chomo ikay.”
24Amaʼazənə Yeso zəw nigə, yə noʼ iŋu aboʼo uŋwən, akama ba kyayn mə ŋu nə uŋwən ni yeŋ yə fere uma iyad ma.
25Ayey moʼ mə aboʼo úŋwən nu yə mə isɨgə imbayn bene, yə si isɨgə imbayn bene wu akə ituʼ ighum cho bigə, 26yə si num ifuʼ abú ba ifuʼ nanaʼ, ichiŋi ukab ujum asɨmə chama inyo ma di imey. Isɨgə wu mə bə ka ŋuw aba imbey. 27Ayey wu si zəw anó da Yeso anigə yə mə iŋuw aboʼo ikwiy ba zənə yə mə yeŋ anjim Yeso, 28yə mə yeŋ yə ghayn ungɨŋ fiŋ ma kwi, “Abə́ ibira kaba ndwi ma inyi inyo iyi mey.” 29Anigə yə bira ndwi Yeso. Amaʼazənə yə bira nigə, aba ighara wu imbayn bene wu sobo, yə zən ungɨŋ inyo ma kwi inyo ma si boro ingəʼ ma si mey. 30Aba ighara wu Yeso kyay kwi ikay du ungɨŋ inyo ma anigə yə gha ma ibiri kwi, “Amə ngwa ubira inyi ndwi?” 31Mbə məŋə-anó ma ghayn abú uŋwən kwi, “Ngwə zən umugə ba mə fere ma injə inyo ngwə si ni biri kwi amə ngwə ubira yə ngiya?”
32Yeso ney usin ighaba da izən wa ŋunə yə bira uŋwən. 33Ayey wu kyayn anó zənə yə duw abú uŋwən anigə yə ŋu imbey ni yeŋ yə goro pey yi zum utəw nwi asey ifigi Yeso ighayn asiʼ ujum abú uŋwən. 34Yeso ghayn abú uŋwən kwi, “Uŋu kwere inji beni yə aghəy inji inyo imey. Ŋuw akə aborobod anigə injə ingəʼ si imey.”
35Amaʼazənə Yeso mə ghayn anó zəŋ, ba faʼa moʼ du ungɨŋ na Jairus i zaʼa ghayn abú Jairus kwi, “ungwə akwere si ku. Aton zənə ngwə mə naʼa ingəʼ abú ataʼa ba ighari chini amə kwi ngiya?” 36Yeso ki zi ma atəw akə unó mbənə mbə ghayn asɨmə yə ghayn abú Jairus kwi, “Imə goro ayə, aba kwi mə ni ibeni fiŋ.” 37Anigə cha Yeso di beni ma kwi wa moʼ ŋuw ni uŋwən aku Jairus, yə ŋu aba Pita Jems nə unya anóm ma Jon. 38Amaʼazənə mbə pey ana Jairus, Yeso zən abuyi zənə yə mə awu anigə izəw umugə ba mə idey. 39Amaʼazənə Yeso inyi ungɨŋ na u ghayn abú úŋwən kwi, “Mbən mə bure ngiya? Mbən mə idey ngiya? Cha ŋwə̂ ŋunə di si ku ma u yə bunə amə bunə.” 40Mbə ti ni baʼara uŋwən anigə yə cha úŋwən isəg uma ujum inum aba mbaʼ nə ingwo mbi ŋwə̂ wu foro mbə məŋə-anó mbənə mbə mə́ nu uŋwən iŋu atəw na zənə mbə niŋe ŋwə̂ wu awu. 41Wə pey yi yimə abugə ŋwə̂ wu ighayn kwi, “Talita kum,” aton amə kwi, “Akwere ayə ghayn inigə kwi noʼ atey.” 42Aba ighara wu, akwere wu noʼ təm atey iti ni iyeŋ. Ba jum mə məŋərə uma. (Akwere wu mə ituʼ ighum cho bigə). 43Asɨmə Yeso chede úŋwən kwi ka u ghayn ma anó zəŋ abú wa moʼ yə nibi ghayn kwi, “U naʼa aghəy moʼ abú uŋwən u jəg.”
നിലവിൽ തിരഞ്ഞെടുത്തിരിക്കുന്നു:
Mak 5: NGI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 CABTAL
