Seemthawhnak 31
31
Laban hemin Jakob a Zuang
1Laban ih tiapale ni, “Ka pa ih a imi a zate Jakob ni a lata hngai remro; ahi lennak zate hi ka pa ih a imi in a ngah hngaimi an ii,” tiah an timi cu Jakob ni a za. 2Culeh Laban ni a hlan mangin mithmaiṭha in a zoh ti lo ti khi Jakob ni a hmu. 3Cutikah Bawipa ni Jakob cu, “Na pupale ih ram leh na hrihraile hemah kirṭhan, cun ka tan ompi thok,” tiah a ti. 4Curuangah Jakob ni a turun omnak lo ah mi thlah in Rachel leh Leah a ko hngai, 5cun an hemah, “Nan pa ni a hlan mangin mithmaiṭha rum a ma zoh ti lo ti ka hmu. Ihmansela ka pa ih Pathian ni tu cu a ma ompi. 6Ka thangeih hmawh in nan pa ka rian rom ti nan pahnih ni nan tiahkau; 7acuhmanah nan pa ni ma deu in ka hlawhman voi hra rori a ṭhiin rom, harnak ma piak zong cu Pathian ni a sen lo. 8“A ṭial a cikmi sumhnam poh na hlawhman an i thok,” a ti tikah sumhnampawl ni a ṭialcik tlongte an hring hngai; “Ṭialkawpawl na hlawhman an i thok,” a ti tikah sumhnamrun hmawhhmawh ni ṭialkaw tlong an hring. 9Cuticun Pathian ni na pa ih sumhnamrun cu a la ih kamah a ma pia rom.
10Sumhnam runpawl an zulhtiak lio ih mang ka manmi sungah a pinu a cuantu metuumle cu ṭialngan, ṭialcik leh ṭialkaw ii in ka hmu hngai. 11Cutikah Bawipai’ vanmi ni ka mangla ah ‘Jakob’ a ma tiih kei ni, ‘Awi law, hinangah ka omkau!’ tiah ka ti. 12Culeh ani ni, ‘Mepinu a cuantu metuumpawl cu ṭialngan, ṭialcik leh ṭialkaw tlongte an ik cu zoh hman; icatile Laban ni na parih a timi hmawhhmawh ka hmu rom. 13Kei hi, thathau hnulhin lung lingih thukhaam na vuak nak Bethel ah na hemih a lang tu Pathian khi ka ii. Atu ahi ram hi mata vohvi la na suahnak ram ah kirṭhan’ a ti,” tiah a ti hngai. 14Cutikah Rachel leh Leah ni, “Kan pa ih inn ah kan rorah leh kan covo itu om nala? 15Keimi hi ramdangmi ah a man ruat a i lo hmen maw? Icatile a man zuar rom ih kan man cu a hmantia rom hekhawh. 16Kan pa hemin Pathian ni a latmi thilri zate cu kanmah leh kan tianaule ta an ii kovawh; Pathian ih tan simmi poh cu vua kau tu,” tiah an sawn.
17Curuangah Jakob cu a tho, cun a tianaupawl leh a nupipawl cu kalaukpawl parah a toh hngai; 18culeh Kanaan ram ih ommi a pa Isaak hem tat dingah, Paddan aram ram sungih a ngahmi a ngeihsiah leh a sumhnam, a thilri zate, a sumhnam hmawhhmawh cu a hmalaah a tahsak hngai.
19Laban cu tuule hmul vo hngai dingin a tat, culeh Rachel ni a pa ih innsang mepale a ruta hngai. 20Culeh Jakob ni Aram mi Laban cu a zuan khaih thu sim duh loin a deu. 21Curuangah a ngeihmi zate rum a zuang; Zufrates Tipi a tan peitleng, culeh Gilead tlang ram la hmai hoiin a tat.
Laban ni Jakob a Man
22A ni thumnak ah Laban cu Jakob a zuang rom tiah an sim. 23Curuangah a sungkhatpawl hruaita hngai in ni sarih sung an dawi ih Gilead tlang ram ah an man. 24Ihmansela Pathian cu Aram mi Laban ih a zan mang ah phain a hemah, “Jakob hemah a sia iseh, a ṭha iseh, kaa khat hman ang lo dingah ralring law,” tiah a ti.
25Laban ni Jakob cu a man. Jakob cu tlang ram ah riahbuuk a sa ih Laban leh a sungkhatle cu Gilead tlang ram ah an caam ve. 26Laban ni Jakob cu, “Itu vua ci maw? A ma deu ih ka tianule cu raldohnak ih ponmile mangin na hruaita hngai. 27Ituruangah a thupte’n na zuang ih ma sim lo’n a ma deu? Lungawinak leh hlapawl rum, cawm leh dar leh tingtang rum ka tan thlah thok hena. 28Cun ituruangah ka tulepawl leh ka tianupawl damte’n tiah hnam hngai ding teh a ma sen lo? Na timi hi cu atthu a ik hi tang. 29Harsat tan piak khawhnak ka ngei hekhawh; ihmansela na pa ih Pathian ni rangan zan ah, ‘Jakob hemah a sia iseh, a ṭha iseh, ang lo dingah ralring law,’ tiah a ma ti. 30Na pa ih inn na ngaih vuai ruangih tat thok na ikkau hman ah ituruangah ka mepale a ma ruta?’ tiah a ti. 31Jakob ni, “Na tianule hi ka hemin thazaang hmangin ma sut thok ah tan ruat ing khaw ka hrul ruangah a ii. 32Ihmansela a hemih na mepale na hmuh nak ahumaw pakhatkhat cu a nung hrimhrim thok lo. Kan sungkhatle hngan ah na ta ka ngeihmi cu zungkhit in lattia,” tiah a ti. Jakob ni Rachel ih ruk hngai cu a tiah lo.
33Curuangah Laban cu Jakob ih riahbuuk, Leah ih riahbuuk, cun hemomle pahnih ih riahbuuk ah a lut hngai, ihmansela a hmu hngai lo. Culeh Leah ih riahbuuk in a suakih Rachel ih riahbuuk ah a lut. 34Rachel ni innsang mepale cu a la hngai ih kalauk ih kung sungah sia hratin a tonon hngai. Riahbuuk sung hmawh cu Laban ni a hrawl remro nain a hmu hngai lo. 35Culeh Rachel ni a pa cu, “Na hmai ih ka diin thiamlo hi ka bawipa na hehhar hlah se law, icatile ka numi daanngeih lio a ii,” tiah a ti. Curuangah a hrawlkau, ihmansela innsang mepale cu a hmu hngai lo.
36Cutikah Jakob cu a heh a har ih Laban cu ngekngeihin, “Ka buarmi itu a ii? Ka sualnak itu a i ih salenglo a ma dawi ciamco? 37Ka thil zate na hrawl hngai rom na’n na innsang mepale itu hmu hngai ci maw? Ka sungkhatpawl leh na sungkhatpawl hmalaah sia hnik, kan pahnih lakkarah a man relcat piak taw uh. 38Ahi kum kul hi na hemah ka om; na tuu numipawl leh na mee numipawl tia an hrulh thah lo, cun na turun sungin a tuum sa hman ka aw thah lo. 39Sahraang ih an thlekbauhmi na tuu hman tan tlun hlei lo’n kamah ni ka tan rul bil; sun ih an ruk ah iseh, zan ih an ruk ah iseh, kamah ih kuan thok in na ngeen. 40Ka ikning cu hitihin a ii: sun khuasa leh zan khuadai ka tuar, me lo’n ka om bil. 41Ahi kum kul sung hi na inn ah ka om; na tianule pahnih ca’h kum hleili ka tan rian, cun na sumhnamrun ca’h kum ruk, culeh ka hlawhman voi hra na ṭhiin lai. 42Ka pa ih Pathian, Abraham ih Pathian leh Isaak ih Ṭihmi hi kamah lasan ah om ta hlah sela ka kut rom in ma thlah mianmi rom hngen tur ci. Pathian ni ka intemnak leh ka kut ih ṭuan khung a hmu ih rangan zan a tan hriingṭon a ik cu,” tiah a ti.
Laban leh Jakob Thukam an Vua
43Cutikah Laban ni Jakob cu a let ih, “Tianule cu ka tianule, tianaule cu ka tianaule, sumhnam runpawl cu kan sumhnam runpawl, cun na hmuhmi hmawhhmawh hi kamah ih an ii. Ihmansela nihinni a’cun hi ka tianule iseh, an hrinmi an tianaule thu ah iseh, itu tikho ing maw? 44Curuangah atu suak la, nang leh kei thukam vua le he; acu cu namah leh kamah lakkarah thutiahpitu i tu hmen seh,” tiah a ti. 45Curuangah Jakob ni lungtleep a la ih palhtiak-lonak lung ah a ling. 46Culeh Jakob ni a sungkhatle hemah, “Lung khawm hnik uh,” tiah a ti hngai, lung cu an la ih an peng; culeh lungpeng hrialahcun caw an aw. 47Laban ni acu cu Jegar-sahadutha#31:47 Jegar-sahadutha ti cu Aram aan in Thutiahpinak lungpeng tican. tiah a ko: Jakob ni zong cu Galeed tiah a ko. 48Laban ni, “Hi lungpeng hi nihinni ah namah leh kamah lakkarih thutiahpitu a ii,” tiah a ti. Curuangah acu cu Galeed tiah a ko, 49cun palhtiak-lonak lung cu Mizpah tiah a ko, icatile, “Bawipa ni namah leh kamah hi pakhat leh pakhat kan om lo cece tikah kan lakkarah man kilkhawi hram seh. 50Ka tianule hi a heloin na ti hngai tikah iseh, ka tianule beeng ah nupi pace na piit hngai tikah iseh, ahuhman a man ompi lo ah khaw Pathian cu namah leh kamah lakkarah thutiahpitu a ii ti hi cingkeng law,” tiah a ti.
51Cuhnukah Laban ni Jakob cu, “Namah leh kamah lakkarih ka siahmi lungpeng leh palhtiak-lonak lunglin hi zoh hngai hnik. 52Hi lungpeng leh lunglin hi, kei ni ahi lungpeng lon in na hem laah harnak tan pia dingin ka vak thok lo, cun nang ni hi lungpeng leh lunglin lon in ka hem laah harnak ma pia dingin na vak thok lo, ti thutiahpitu an ii. 53Abraham ih Pathian leh Nahor ih Pathian—an pa ih Pathian—ni kan lakkarah thuṭhen seh,” tiah a ti. Curuangah Jakob ni a pa Isaak ih Ṭihmi min in thu a khaamtia ih 54Jakob ni tlang parah rai hri in a sungkhatle caw a ko hngai; culeh caw an aw ih a zan cu tlang ahcun an caam.
55A zingla mawpan ah Laban cu a tho ih a tulepawl leh a tianule hnam hngai in thlua a suah hngai; cuhnukah a pok ih inn ah a kir.
നിലവിൽ തിരഞ്ഞെടുത്തിരിക്കുന്നു:
Seemthawhnak 31: KHBF
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khualsim Holy Bible © Bible Society of Myanmar, 2021.
