Seemthawhnak 30
30
1Rachel ni Jakob ca-ih nau a hrin lo a hmuh tikah a unu cu a nahsuah; culeh Jakob hemah, “Tianau ma pia, culocu ka thi thok!” tiah a ti. 2Jakob cu Rachel parah a heh a har vuai ih, “Nau ngei lo dingin a tan vuatu Pathian diinhmun ah ka om hraat ah maw?” tiah a ti. 3Cutikah Rachel ni, “Ka hemomnu Bilhah a omkau hi; metpi la ka khuk parah nau ngei lei khawh kei khaw amah thawngin tianau a ngei hngai ve taw’ng,” tiah a ti. 4Curuangah a hemomnu Bilhah cu nupi dingah a pia; culeh Jakob ni a metpi. 5Culeh Bilhah cu nau a pai ih Jakob caah tiapa a hrin. 6Cutikah Rachel ni, “Pathian ni thu a ma ṭhen rom, cun ka aw a za rom ih tiapa a ma pia rom,” tiah a ti; curuangah a min ah Dan a vawh. 7Rachel hemomnu Bilhah cu nau a pai sei ih Jakob cu a pahnihnak tiapa a hrin. 8Cutikah Rachel ni, “Ka unu rum rauhngaiin kan thawi tia rom ih ka neh rom,” tiah a ti; curuangah a min ah Naftali a vawh.
9Leah ni nau a ngeih ti lo a hmuh tiak tikah a hemomnu Zilpah cu Jakob hemah nupi dingin a pia. 10Cuhnukah Leah ih hemomnu Zilpah ni Jakob cu tiapa a hrin. 11Culeh Leah ni “Vanṭhat!” tiah a ti, curuangah a min ah Gad a vawh. 12Leah ih hemomnu Zilpah ni Jakob cu tiapa pahnihnak a hrin. 13Culeh Leah ni, “Milungawi ii ing ee. Icatile numipawl ni milungawi a ma ti hngai thok,” tiah a ti; curuangah a min ah Asher a vawh.
14Sangvut lat khuk ah Reuben cu a tat ih lo sungahcun leng ai vuang a hmu, culeh a nu Leah hemah a tlunpi. Cutikah Rachel ni Leah cu, “Na tiapa ih leng ai a hrekkhat naktiahte’n ma pia tu hmen,” tiah a ti. 15Ihmansela Leah ni, “Ka pumah na lat mianmi cu thil tenau a i hmen maw? Ka tiapa ih leng aipawl khaw na lat hngai khaai hetuhmen?” tiah a ti. Culeh Rachel ni, “Na tiapa ih leng ai ma pia taw ci ah nihin zan na hemah a me lei,” tiah a ti. 16Siimla ah Jakob cu lo in a tlun tikah Leah ni suakin a tuakla ih, “Ma metpi na ṭul thok; icatile ka tiapa ih leng ai in Rachel hemin ka tan sawng rom,” tiah a ti. Curuangah acui zan cu a metpi. 17Culeh Pathian ni Leah ih thu a ngai ih nau a pai, cun Jakob cu a panganak tiapa a hrin. 18Leah ni, “Pathian ni ka sawnmi a ma pia rom; icatile ka hemomnu cu ka pumah ka pia rom,” tiah a ti; curuangah a min ah Issakhar a vawh. 19Cun Leah cu nau a pai sei ih Jakob cu a paruknak tiapa a hrin. 20Cutikah Leah ni, “Pathian ni nitar ṭhen ding mo thil ken ṭha a ma pia rom; tiapa paruk ka hrin rom ruangah atu cu ka pumah ni a ma upat vel lei a ii,” tiah a ti; curuangah a min ah Zebulun a vawh. 21Acuhnukah tianu a hring ih a min ah Dinah a vawh.
22Cuhnuk cu Pathian ni Rachel a mang, cun a thu a ngai ih a sul a hong. 23Nau a pai ih tiapa a hring, culeh “Pathian ni ka mualphonak a ma latpiak rom,” tiah a ti; 24culeh a min ah Josef a vawh ih, “Bawipa ni tiapa pace ma beeng rih hram seh,” tiah a ti.
Jakob Len cu Laban ih Zawtlak
25Rachel ni Josef a hrin tikah Jakob ni Laban cu, “Ma thlah mianmi la ka inn leh ka ram ah a tlung taw’ng. 26Ka tan renhlawh mi ka nupipawl leh ka tianaupawl ma pia hngai la tat lang; icatile na ca-ih ka ṭuan zia cu na tiah tuk kau,” tiah a ti. 27Ihmansela Laban ni, “Aan a ma sen a’cun, Bawipa ni namah ruangah a ma thluasuah rom ti cu litinnak in ka tiah rom kau; 28na hlawhmipawl cu an min saal hngai hnik la ka tan pia lei,” tiah a ti. 29Jakob ni, “Ka tan ren zia leh, na sumhnamle ka zokhen hngai sungih an punzai zia namah rori ni na tiah. 30Icatile ka phat hlan ahcun tlawmte ceu na ngei hngai ih hleihluanngaiin an pungzai; cun ka mertiaknak hmunpohah Bawipa ni a tan thluasuah rom. Ka innsang hmawh khawcangah ka cawm hngai ve thok hmen?” tiah a ti. 31Laban ni, “Itu i lei hmen maw ka tan piak?” tiah a ti. Jakob ni, “Itukhaw a ma pia thok lo; hile hi a ma ti piak zong a’cun na turun ka khaal sei thok: 32nihinni hi na turun leh merun lakah vak lang khawh a ṭialmi tuu leh a nakmi tuu poh, a ṭialmi mee poh ka thia hngai thok; acu cu ka hlawhman an i thok. 33Cuticun neta, na hemih ka hlawhmi zoh dingih na phat leh tikah ka felnak ni ma aan piak leh lei. Meepawl lakih a ṭiallomi poh leh tuupawl lakih a naklomi poh ka hemih na hmuh a’cun rukmi ah siar thok an ii,” tiah a ti. 34Laban ni, “A ṭha! Na ti rom mangcun i kau seh,” tiah a ti. 35Ihmansela acui ni ah Laban ni mee pami ṭialcik leh ṭialkaw in a ṭialmi leh mee numi ṭialcik leh ṭialkaw in a ṭialmi, a parih a raang a ommi poh, cun tuu a nakmi poh a thawn hngai ih a tiapale ih khalh dingin a sia hngai. 36Culeh Jakob cu Laban ih tuu leh merun a taangmi a khalh hngai lioah Laban ni amah leh Jakob lakkar cu ni thum lamtah hlet hla dingin a vua.
37Cutikah Jakob ni ṭhil, ṭhuang leh hriang kung ih tleengpawl la hngai in an hong hrekkhat a khok hngai ih teileng ṭial ah a suah hngai. 38Acui a hawng a khawhmi teilengpawl cu tuupawl ih tidinnak kuangpawl sungah tuupawl sanla ah a sia hngai. Ti ding dingin an phat tikah an nu zulhtiak keel mangin 39tuu leh merunpawl cu teilengpawl hmala ahcun an zultia ih pheiṭial, ṭialcik leh ṭialkaw ti in a suanpawl an hring hngai. 40Jakob ni tusuanpawl a thia hngai ih, Laban ih turun leh merun lakin a ṭialmi leh a nakpunmi sanla ah a hoisak hngai; culeh amah ih turun leh merun cu Laban ih tuu leh merun lakah a bualtlonsak hngai lo. 41Tuu leh merun ih a dikdeuhmi an pawltiak ih cii an thlah tiak tikah a suan ṭial a ngei taw uh ti in Jakob ni an hmai sanla hoiin a teilengpawl a siah hngai. 42Ihmansela a ṭawnṭai deuhmi tuu leh meepawl hmala ahcun a teilengpawl cu a siah hngai lo; icatile a ṭawnṭai deuhmi cu Laban ih ta an ii ih a dikdeuhmi cu Jakob ih ta an ii. 43Cuticun Jakob cu a hang lian hleihluan ih turun, merun pipi, cun salnumi leh sal pami tlungpi, kalaukpawl leh laakpawl tlungpi a ngei hngai.
നിലവിൽ തിരഞ്ഞെടുത്തിരിക്കുന്നു:
Seemthawhnak 30: KHBF
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khualsim Holy Bible © Bible Society of Myanmar, 2021.
