Seemthawhnak 29
29
Jakob ni Rachel a Tuak
1Cuhnukah Jakob cu a khuallam a peh ih vapinla mipawl ram a pha. 2Khua a zoh tikah tikhur leh acu hrialih a kualmi turun pathum a hmu hngai; icatile acui tikhur in turunpawl cu ti an tul bil. Tikhur kharnak lungtleep cu a hnem ngai, 3culeh turun zate acunangih an khawmtiak tikah tukhalle ni tikhur kaa ih lung cu an hnial, cun tuu cu ti an tul, culeh lung cu a omnak tikhur ka ah an sia ṭhan bil.
4Jakob ni an hemah, “Ka naule hngai, khaw’n pha cu maw?” tiah a ti hngai. Anmimi ni, “Haran in kan ii,” tiah an ti. 5Ani ni, “Nahor ih tiapa Laban tiah cu’m?” tiah a ti hngai. Anmimi ni, “Kan tiahkau,” tiah an ti. 6Ani ni, “Dam nala im?” tia a ti hngai. “Damkau ee, hihi a tianu Rachel, a tuule rum a pha hi,” tiah an ti. 7Ani ni, “Zoh hman, sunla pi a i rih; sumhnampawl hoih caan a i rih lo. Tuupawl ti tul u la, cun tatin sumpil ah thlah men tu uh,” tiah a ti hngai. 8Ihmansela anmimi ni, “Turunpawl khawmkhat hlan ahcun ti kan tul kho lo, an phat khat hnukah tikhur kaa ih lungtleep hnial i lei khawh, acuhnukah tuupawl ti kan tul lai thok,” tiah an sawn.
9Jakob ni anmah a biak hngai rih lioahcun Rachel cu a pa ih tuupawl rum a pha; icatile a khaal hngai. 10Jakob ni a nu ih ṭapa Laban ih tianu Rachel a hmuh tikah, a vak ih tikhur kaa ih lung cu thau piak in a nu ih ṭapa Laban ih turun cu ti a tul hngai. 11Cuhnukah Jakob ni Rachel cu a hnam ih tiakpiin a ṭap. 12Cun Jakob ni, amah cu Rachel pa ih sungkhat a ik zia leh Rebekah ih tiapa a ik zia Rachel a sim; cun Rachel cu a zuang ih a pa a sim.
13Laban ni a tarnu ih tiapa ih thu a zak tikah amah tuak dingin a zuang; a bua, a hnam ih a inn ah a pita. Jakob ni a thuhla hmawhhmawh Laban a sim, 14culeh Laban ni, “Nang cu ka thi leh sa taktak na ik tu hi!” tiah a ti. Culeh Jakob cu a hemah thla khat a om.
Jakob ni Laban ih Tianule a Pi hngai
15Cuhnukah Laban ni Jakob cu, “Ka sungkhat na ik ruangah hoitlawi in ma rian rua tur cim? Itu hlawh lei ci maw? Ma sim hnik law,” tiah a ti. 16Laban ni tianule pahnih a ngei hngai ih upanu ih min cu Leah, cun nautanu ih min cu Rachel a ii. 17Leah ih mit cu dawtkop a ii, cun Rachel cu a ruangrai a ṭha ih a hmel a mawi. 18Jakob ni Rachel cu a daw; curuangah, “Na tianu nauta co dingah kum sarih ka tan rian lei cu,” tiah a ti. 19Laban ni, “Ani mi pace ka piak hngai thok van cu namah ka tan piak ding cu a ṭhasawn; ka hemah om kau,” tiah a ti. 20Curuangah Jakob cu Rachel co dingah kum sarih sung rian a ṭuan ih, Rachel a dawt tuk ruangah kum sarih cu ni tlawmte mang an ti.
21Cuhnukah Jakob ni Laban cu, “Ka nupi cu ma pia vel law, a pi taw ing, icatile ka caan a kim rom,” tiah a ti. 22Curuangah Laban ni acui hmun ih mipawl an zate a khawm hngai ih puai a vua. 23Ihmansela zan a phat tikah Laban ni a tianu Leah cu Jakob hemah a suah ih Jakob ni a metpi. 24(Laban ni a hemomnu Zilpah cu a tianu Leah caah hemom ah a pia.) 25Mawla a phat tikahcun Leah a i leeili! Culeh Jakob ni Laban cu, “Ka parih na timi hi itu ii maw? Rachel co dingah a i lo maw ka tan ren? Ituruangah a ma deeu?” tiah a ti. 26Laban ni, “Kan ram a’cun tianu upa hlan ih nauta inn ngeihsak cu kan tidan a i lopi. 27Hi pakhat ca’hhin zarh khat cu kimsak la, cun kum sarih la a ma ren beeng a’cun nautanu khaw kan tan pia kau lei,” tiah a ti. 28Jakob ni acuticun a vua ih zarh khat cu a kimsak; culeh Laban ni a tianu Rachel cu nupi ah a pia. 29(Laban ni a hemomnu Bilhah cu a tianu Rachel ih hemom dingah a pia.) 30Curuangah Jakob ni Rachel cu a metpi, culeh Leah van Rachel cu a daw sawn. Laban cu kum sarih la a ren beeng.
31Leah cu dawt a i lo ti Bawipa ni a hmuh tikah a sul a hong; Rachel zong cu a cing. 32Leah cu nau a pai ih tiapa a hring, culeh a min ah Reuben a vawh; icatile “Bawipa ni ka intemnak a zoh rom; atu cu ka pumah ni a ma daw vel teuti thok,” tiah a ti. 33Nau a pai sei ih tiapa a hring, culeh, “Bawipa ni huat ka ik a zak rom ruangah ahi tiapa hi khaw a ma pia,” tiah a ti; culeh a min ah Simeon a vawh. 34Nau a pai sei ih tiapa a hring, culeh, “Tiapa pathum ka hrin rom ruangah atu cu ka pumah ni a ma kop vel thok a ii,” tiah a ti; curuangah a min ah Levi a vawh. 35Nau a pai sei ih tiapa a hring, culeh, “Tu ṭum cu Bawipa ka thangṭhat thok,” tiah a ti; curuangah a min ah Judah a vawh; cuhnuk cu nau a hring ti lo.
നിലവിൽ തിരഞ്ഞെടുത്തിരിക്കുന്നു:
Seemthawhnak 29: KHBF
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khualsim Holy Bible © Bible Society of Myanmar, 2021.
