Seemthawhnak 27
27
Isaak ni Jakob a Thluasuah
1Isaak cu a hraam vel ih a mit malin khua a hmuh khawh ti lo tikah a tiapa upa Esau koin, “Ka tiapa,” tiah a tiih Esau ni, “Hina’h ka omkau,” tiah a ti. 2A pa ni, “Ka hraam vel hi; khawcangih ka thih lei ka tiah lo. 3Na hriamhreipawl—na li leh na thalpawl—la hngai la hramlak ah tatin sa ma dawi piak. 4Cuhnukah ka dangduh caw tui te ma zalh piak la ka awk dingah ma pia, cuticun ka thih hlanah a tan thluasuah taw’ng,” tiah a ti.
5Isaak ni Esau thu a simmi cu Rebekah ni a ngai ciahco. Curuangah Esau cu hramlak ah sadawi dingin a tah tikah, 6Rebekah ni a tiapa Jakob cu, “Na pa ni na u Esau hemah, 7‘Sa ma dawi piak la ka awk ding caw tui te ma baar, cuticun ka thih hlanah Bawipa hmaiah a tan thluasuah taw’ng’ tiah a ti ka za. 8Curuangah ka tiapa, ka thu ma cangngai la ka thupiak mangin vua. 9Merun hemah tat la na rilmi a suan lu hnih ka hemah hruaita, na pa a dangduh mangin caw tui a zalh piak taw’ng; 10cun na pa hemah na keng thok ih a aw thok; cuticun a thih hlanah a tan thluasuah taw,’ tiah a ti. 11Ihmansela Jakob ni a nu Rebekah cu, “Ka u cu hmulngei a ii ih kei hmawh ka tiksa a naal hekhawh. 12Ka pa ni a ma zut men thok ih, amah deeu mang ka ti thok, cutikah thluasuah canah camkhaatnak la ka tlun tia hoi thok hekhawh,” tiah a ti. 13A nu ni, “Namah camkhaatnak cu ka parah tla kau seh, ka tiapa; ka thu ceu ma ngai kau, tat lei ci khawh ma lat hngai,” tiah a ti. 14Curuangah tatin a la hngai ih a nu hemah a keng hngai; culeh a nu ni a pa ih dangduh mangin caw tui te cu a zalh. 15Cuhnukah Rebekah ni Esau ih partlai ṭhatleng a latpiak hngai ih a naupa Jakob a sinthlaisak hngai. 16Cun mephaw cu a tiapa ih kut par leh a hngawng phaw nemnak fang a khum. 17Cuhnukah a zalhmi caw tui leh sang cu a tiapa Jakob a pia.
18Curuangah a pa hemah a lut ih, “Ka pa,” tiah a ti. A pa ni, “Awi law, ka tia; ka omkau, hutu ii ci maw?” tiah a ti. 19Jakob ni a pa cu, “Kei hi na tia upa Esau ka ii. A ma sim mangin ka vua rom; hang to la aw hnik law, cuticun a ma thluasuah taw ci,” tiah a ti. 20Ihmansela a pa Isaak ni a tiapa cu, “Khawti’n a ii rang vuai ih na hmuh lohli, ka tiapa?” tiah a ti. Jakob ni “Bawipa na Pathian ni a ma hlawhtlinsak ruangah a ii,” tiah a ti. 21Cutikah Isaak ni Jakob cu, “Ma hnaih hnik la tan tham lang, cuticun ka tiapa Esau na ik taktak leh ik taktak lo a tan tiah taw’ng,” tiah a ti. 22Curuangah Jakob cu a pa a hnaih ih a pa ni tongthamin, “A aw nang cu Jakob ih aw a ii, a kut zong cu Esau ih kut an ii,” tiah a ti. 23A kut cu Esau ih kut mangin an hmul ruangah a pa ni a tiahthiam lo; curuangah thluasuah dingin a tuahsiitia. 24“Nang hi ka tiapa Esau na i taktak hena’m?” tiah a ti. Jakob ni, “Ka i kau,” tiah a ti. 25Cutikah Isaak ni, “Ma bar hnik tu, na sa cu, ka tia; aw lang khawh cun a tan thluasuah taw’ng,” tiah a ti. Curuangah Jakob ni a bar ih a pa ni a aw; cun sabitti a tul ih a pa ni a ding. 26Cutikah a pa Isaak ni, “Ma hnaih la ma hnam, ka tiapa,” tiah a ti. 27Curuangah a hnaih ih a hnam; culeh Isaak ni a partlaipawl hniim hngai in a thluahsuah ih,
“Ka tiapa ih rim cu
Bawipa ih thluasuahmi lo rim a nam.
28Pathian ni vancung ih nai,
cun khur ṭhatnak,
cun lo caw tampi leh
sabitti tampi tan pia hram seh.
29Mipawl ni tan rian u sela,
miphunpawl na hmaikaah kuum u seh.
Na naule cungah uktu ii la,
an hrinsarle cu na hmaikaah kuum u seh.
A tan camkha tu ahupoh camkhaat ii sela,
a tan thluahsuah tu ahupoh
thluasuah ii seh!” tiah a ti.
Esau ih Hmahmi Thluasuah
30Isaak ni Jakob a thluasuah uh caangte, Jakob cu a pa Isaak hmaika in a suah zerhzi a’khin, a u Esau cu a sadawinak in a tlung. 31Caw tui te a tuahtiim ve ih a pa a putta. Culeh a pa hemah, “Ka pa, hang to la na tiapa ih sadawimi hi aw hnik law, cun a ma thluasuah taw ci,” tiah a ti. 32A pa Isaak ni, “Ahu ii ci maw?” tiah a ti. A tiapa ni, “Kei cu na tiapa upa, Esau ka ii,” tiah a ti. 33Cutikah Isaak cu tiakpiin a dok-aw ih, “Ahu a i hmen a kahmi sa a ma putta ih na phat hlante ah ka awk remro leh ka thluasuahmi khi?—amah cu thluasuah in a om thok hekhawh!” tiah a ti. 34Esau ni a pa ih aanka a zak tikah thintiakngai leh tiakpiin a ṭap ih a pa cu, “Ka pa kei khaw ma thluasuah ve hram tu!” tiah a ti. 35Ihmansela, “Na naupa ni mi deuthahin a pha ih na thluasuah a lata mianmi rom kovawh,” tiah a ti. 36Esau ni, “Jakob ti’h min vawh a ik cu a hmaan ngai lo hmen maw? Icatile ahihi voi hnih a ma suhnak a i vel. Ka tia upa iknak a lata; cun zoh hnik, atu ka thluasuah a lata rom,” tiah a ti. Cuhnukah, “Ka ca’h thluasuah na zuah lo hmen maw?” tiah a ti. 37Isaak ni Esau cu, “Amah cu na bawipa ah ka vua rom ih a unau hmawhhmawh cu tungsau ah ka pia hngai rom, cun caw leh sabit in ka cawm rom. Na ca’h itu ka vua kho ti thok he hmen maw, ka tiapa?” tiah a ti. 38Esau ni a pa cu, “Thluasuah pakhat ceu na ngei hmen maw ka pa? Kei khaw ma thluasuah kau, ka pa!” tiah a ti. Culeh Esau cu a aw suakin a ṭap.
39Cutikah a pa Isaak ni a let ih:
“Zoh hman, vulei ṭhatnak in
a hlatnak a’khin,
cun a saannak van ih naitla in
a hlatnak a’khin, na omnak cu i leh lei.
40Na ralreen ringin na nung thok,
cun na naupa na rian thok;
na luat tik zong ahcun a seihnam cu
na hngawng parin sat leh lei ci,” tiah a ti.
Jakob cu Esau hemin a Luat
41A pa ih a thluasuah ruangah Esau ni Jakob parah lungunnak a ngei ih amah leh mah, “Ka pa ca-ih lungzuurnak nipawl an nai vel vaih; cutikah ka naupa Jakob cu that leh lang,” tiah a ti tia. 42Ihmansela a aanmipawl cu Rebekah sim a ii; curuangah a tiapa nauta Jakob ko dingah mi a thlah ih a hemah, “Na upa Esau ni namah tan thah khaihnak in a hneemtia henakhawh. 43Curuangah ka tiapa, ka thu ma cangngai; Haran ih ka ṭapa Laban hemah zuang rang la 44na u ih thinsatnak a daih hlansung a hemah caangkhatte om duau— 45na parih na u hehharnak a daih leh a parih na ti taakmi a palhtiak tikah mi thlah hngai in acunang cun tan tlunsak ṭhan leh lang. Ituruangah nan pahnih cu ni khat sungah ka tan sung hngai thok hmen?” tiah a ti.
46Cuhnukah Rebekah ni Isaak cu, “Hit mi ka vah nule ruangah ka nun hi a ma ning tuk vel. Ahile mang pakhatkhat, ahi ram ih numi pakhatkhat, Jakob ni a piit a’cun, ka nunnak teh ka ca’h itu a ṭhahnem thok he hmen?” tiah a ti.
നിലവിൽ തിരഞ്ഞെടുത്തിരിക്കുന്നു:
Seemthawhnak 27: KHBF
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khualsim Holy Bible © Bible Society of Myanmar, 2021.
