Judit 1
1
Jiñi cha'tikil yumälob mi' cha'leñob jisaya
1Mi' tejchel ili ñusak'iñ che'bä añix lajchänp'ejl ja'b che' woli ti yumäñtel jiñi Nabucodonosor ya' ti' lumal ik'aba' Asiria. Jiñi Nabucodonosor tsa' chumle ya' ti kolem tejklum ik'aba' Nínive, iyojlil jiñi iyumäñtel. Ti jimbä k'iñ jiñi Arfaxad woli iyumäñtel ya' ti' lumal ik'aba' Media yik'ot tsa' chumle ya' ti Ecbatana, ti yojlil jiñi iyumäñtel.
2Arfaxad tsi' yäk'ä it'añ cha'añ mi' wa'chokoñtelob ti' joytälel Ecbatana jiñi chañbä ts'ajk melbilbä ti xajlel ambä wäkñajb yik'ot ojlil (1.30 m) ipimlel yik'ot junjäjl yik'ot uxñajb (2.60 m) iñajtlel. Jixku jiñi ts'ajk tsa' bä imeleyob ambä jo'lujunjäjl yik'ot ojlil (31 m) ichañlel yik'ot junlujuñjäjl (22 m) ipimlel. 3Ya' ti' iti' jiñi ts'ajk tsa' kaji ts'ajkiñ letsel yambä ts'ajk ambä ichañlel ti jo'p'ej iyuxk'al (45 m) ichañlel, wa'chokobilbä ti ipam yambä ts'ajk ambä uxlujunjäjl yik'ot ojlil (27 m) ipimlel. 4Awilañ, iti'tak jiñi ts'ajk añ ichañlel ti jo'lujuñjäjl yik'ot jo'ñajb (31 m) jiñi ixujk, cha'añ ma'añik iwokol ilok'ibal jiñi iwiñikob yik'ot jiñi xjisayajob.
5Ti jiñbä k'iñ jiñi yumäl Nabucodonosor tsa' kaji itech jiñi jisaya ti' tojlel jiñi yumäl Arfaxad ya' ti kolem joktäl ik'aba' Ragáu. 6Pejtelel jiñi wiñikob año'bä ya' ti witstak tsa' majliyob yik'ot jiñi yumäl Nabucodonosor temel yik'ot jiñi año'bä ya' ti iti' jiñi ñoj ja' ik'aba' Eufrates, Tigris yik'ot Hidaspes. Tsi' tempayob ibä ti' itojlel ili yumäl ja'el jiñi año'bä ya' ti kolem joktäl ambä ti iyumäñtel Arioc, yumälbä ya' ti Elam. Ka'bäl tejklumtak tsi' tempayob ibä cha'añ mi' cha'leñob jisaya ti' itojlel Arfaxad yik'ot ipi'älob ip'olbalob jiñi Queleúd.
7Jiñi Nabucodonosor, yumälbä ya' ti Asiria, tsi' ichoko majlel it'añ jiñi wiñikob año'bä ti Persia yik'ot jiñi wiñikob año'bä ti bäjlibal k'iñ cha'añ mi' tempañob ibä yik'ot. Jiñi tejklumtak baki tsi' choko majlel t'añ jiñäch: Cilicia, Damasco, Líbano, Antilíbano, yik'ot jiñi año'bä ti' iti' kolem ñajb, 8che' ja'el tsi' choko majlel t'añ ya' ti' tejklum Carmelo, Galaad yik'ot ti chañelaltak Galilea yik'ot ti jiñi kolem joktäl ik'aba' Esdrelón.
9Jiñi Nabucodonosor tsi' päyä tilel ja'el jiñi wiñikob año'bä ti Samaria yik'ot jiñi año'bä ti' joytälel ili tejklum, temel yik'ot jiñi año'bä ti' junwejl ñoj ja' ik'aba' Jordán, k'äläl ti Jerusalén, Batanea, Jelus, Cadés. Che' ja'el tsi' choko t'añ ti' itojlel majki ch'oyolo'bä k'äläl ya' ti ñoj ja' icha'añbä Egipto, Tafnes, Remeses yik'ot ti' pejtelel ilumal jiñi Gosen, 10temel yik'ot jiñi año'bä ti Tanis yik'ot ti Menfis. Che' ja'el tsi' k'ajti koltaya ti' tojlel wiñikob año'bä ti Egipto k'äläl ti ti'tak jiñi tejklum ik'aba' Etiopía.
11Awilañ, ili tejklumtak ma'añik tsi' bäk'ñayob jiñi yumäl Nabucodonosor yik'ot tsi' ña'tayob cha'añ ma'añix majki mi' ikoltañ. Jiñ cha'añ ma'añik tsi' jak'beyob it'añ, yik'ot tsi' chokoyob sujtel jiñi xñusat'añob, yik'ot che' jach tsa' sujtiyob majlel ba'añ jiñi yumäl.
12Che'bä jiñi Nabucodonosor tsi' yu'bi pejtelel iliyi weñ mich'atax tsa' käle yik'ot ili wiñikob año'bä ti ili tejklumtak, yik'ot tsi' yäk'ä it'añ ti' itojlel iñuklel yik'ot iyumäñtel cha'añ che' añto ti' ye'tel, wersa mi kaj ijisañob cha'añ itojol imul yik'ot cha'añ ma'añik tsi' jak'beyob it'añ, temel yik'ot Moab, Amón, Judea yik'ot pejtelel año'bä ya' ti joktältak ambä ti iti' jiñi cha'p'ejl kolem ñajb.
Nabucodonosor tsi' mälbe jiñi Arfaxad
13Añix wuklujump'ejl ja'b che' woli ti yumäñtel Nabucodonosor ya' ti Asiria che'bä tsa' lok'i majlel temel yik'ot iwiñikob cha'añ mi' cha'leñob jisaya ti' tojlel Arfaxad. Che' jiñi Nabucodonosor tsi' laj jisa iwiñikob Arfaxad. 14-15Che' jiñi, tsi' yajñesa majlel jiñi Arfaxad ya' ti wits ik'aba' Ragau, baki tsi' chuku yik'ot tsi' itsäñsa yik'ot jaläptak. Che' jiñi tsi' laj ch'ämbe jiñi tejklumtak k'äläl tsa' k'oti ya' ti Ecbatana. Tsi' ch'ämbe jiñi chañtakbä its'ajkil yik'ot tsi' laj jembe jiñi iyojlil tejklumtak. 16Ti wi'il, jiñi Nabucodonosor tsa' kaji ti sujtel majlel ya' ti Nínive yik'ot iwiñikob temel yik'ot jiñi tsa'bä itsäkleyob majlel, che' jiñi chänp'ej uw tsa' kajiyob ti k'aj oj ya'i yik'ot tsi' meleyob k'iñijel cha'añ tsi' mälbeyob.
നിലവിൽ തിരഞ്ഞെടുത്തിരിക്കുന്നു:
Judit 1: CholDc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Biblia Chol de estudio con DC- Derechos reservados por SBM