Nte 9

Utyoeka kunë Sauli

1Ëgweeso itungo rasëë Sauli, agaongeeya choghofi gwa uvauragha ahongi va Müküü. Mweeso agaenda kunë mukumbëki në müküü 2na umuromba mweeso keeti ya umumanyisya umasinagogi a kuuko uDamesiki, gusoko nësa mweeso uguhanga muntu woong'e nëughokee u Njëa, aghosya mba akhema, mweeso adahe uvakwata na uvaeta veeso uYerusalemu. 3Na mwino mweeso arë ugwenenda na mweeso arë wahumbea uDamesiki, na agasamwa na weru ufuma girunde ugamufëëmëëya Sauli ng'andë yoong'e. 4Na mweeso agagwa fang'ë na agategheeya ruri ugumukhanëa, “Sauli, Sauli, asikë në ugunkhasya nene?” 5Na mweeso agawëya, “Veve wë anyu Müküü?” Na agasucha, “Nene në Yesu në veve ugunkhasya, 6ëgweeso uka na wingëe umujini, na winjë ukhanëwa intu nërëgunoneye urëtende.” 7Antu vasaa naarë vëmuhënjo itambëëmwe inao vinaëghëëtya gëntu vëgategheeya ruri wasuu ëgweeso vinaona muntu. 8Sauli naarë mweeso wakunukua nkhofyo yakwe ainaonaa gëntu. Uvii veeso vëgamutungata vamukwatëëre mukhono faka u muji wa uDamasiki. 9Na gwa matiku atatu mweeso ainaonaa, na ainalaa na ainanywaa.

10Na arë urëfo musëywi hafo uDamesiki rina rakwe Anania. Na Müküü agamukhanëa mweeso u ndoti, “Anania,” na mweeso agahanya, “Nëhafai Müküü.” 11Na Müküü agamukhanëa, “Uka na wende u mutaa nëuguëtanwa Nëughokie, uwëye u nyumba amwa Yuda muntu nëuguëtanwaa Sauli muntu wa uTariso. Gusoko rarava, mweeso uguromba, 12na mweeso wadaha umwona muntu rina rakwe Anania uingëa mung'ë na ugumwëkëa mëkhono akwe gusoko adahe uona kangë.” 13Ëgweeso Anania agasucha, “Müküü, nategheeye ufuma gwa antu vaingë sayu ya muntu uyui, mantu oong'e në mavë nëwatendee antu vako uYerusalemu. 14Na mweeso wë hafai u muji uruinoo ukwete udaho ufuma gwa akumbëki në aküü uvatunga voong'e nëvëurëhanyaa rina rako.” 15Ëgweeso Müküü agamukhanëa, “Enda, gusoko mweeso në gëfe në nene nagëhwaniye arëtanantye rina rane usonge a Anyagëlungu nanë atemi na gwa vana va Isiraeli. 16Gusoko nene ninjë umuraghëëra mwino mweeso imunoneye ukhasiwa gusoko a rina rane.” 17Uvii Anania agaenda againgëa u nyumba asëë. Na gwa umwëkëa mëkhono akwe gitwe rakwe agahanya, “Muunane Sauli, Müküü Yesu unë wagudwëëre veve nëna arë wë munjëa ujie, wantuma nene kunë veve gusoko veve uone kangë na wijuywe Mwahu Mweru.” 18Na gënyahafo mantu ëgagwa gënya njëligha ufuma u miho akwe na mweeso agaona kangë. Uvii mweeso agauka na agabadiswa, 19na agala malëwa na agahanga nguu. Gwa matiku ëgëtunga mweeso agagikhaa itambëëmwe na asëywi kuuko uDamesiki. 20Na gënyahafo mung'ë a masigogi mweeso agamutanantya Yesu, uguhanya, “Mweeso në Mwana wa Muungu.” 21Na voong'e naarë vamutegheeya mweeso vëgataka, vëuhanya “Uyui ti muntu në arë uguvakhasya avoo naarë vëurëhanyaa rina ërëi kuuko uYerusalemuna? Na mweeso wajie hafai gusoko a ndolyo ëyëë, uvatoa ëse vatungie usonge a akumbëki në aküü.” 22Ëgweeso Sauli agafwaghëëra uhanga nguu nanguu, na agavahuma Ayahudi në arë vëgikhaa uDamesiki gwa uragheera mwino Yesu arë Kiristo.

23Matiku maingë naarë akëa, Ayahudi vëgatenda lakuno a umuragha mweeso, 24ëgweeso lakuno ao ëgamanyëka kunë Sauli. Veeso vëgaëmëa inyamwango ya unji utiku nanë mumwë, gusoko vëdahe umuragha mweeso. 25Ëgweeso asëywi vakwe vëgamuhoa mweeso utiku vëgamusimya fang'ë ufuma gunto a nkhando a nyumba gwa ikaafu.

Sauli Wasuka uYerusalemu

26Na Sauli naarë wenda uYerusalemu na agaëghëëya ukhuëra na asëywi, na voong'e arë vamwoghofete mweeso, gusoko veeso areë vënahuvëa mpa mwino mweeso arë musëywi. 27Ëgweeso Barinaba agamuhoa na umutoa gwa atumami. Mweeso agavadonea mwino chu mweeso unjëa agamwona Müküü, na varëghëëtiye inakwe, na mwino kuuko uDamesiki mweeso watanantiye gwa nguu gwa rina ramwa Yesu. 28Na uvii mweeso (Sauli) arë wëitambëëmwe inao uingëa na ufuma kuuko uYerusalemu, 29ugutanantya gwa nguu gwa rina ra Müküü. Na mweeso agarighëëtya na gikunguma hiya na Ayahudi nëvëurighëëtya Gëyunani. Veeso vëgafenja umuuragha. 30Naarë ahuvëi vamanya uyi, vëgamuhoa Sauli faka uKaisaria, na vëgamureka ende uTariso.

31Uvii Kanisa matumbë oong'e a uYudea nanë uGalilaya nanë uSamaria rëgahanga majëghana na rëgakua. Na rëgamukurya Müküü na gwa ufefeheyi wa Mwahu Mweru rëgagiongeeya.

Ainea Uguforiwa

32Na mwino Fetero arë ugwenda hafai na kuuko mukhatëkhatë a veeso voong'e, mweeso agatununta gwa antu va Muungu naarë vëgikhaa uLuda. 33Kuuko mweeso agamuhanga muntu rina rakwe Ainea, na gwa mëakha munana arë uguraa guurëë gusoko arë ukure ighandi. 34Na Fetero agamukhanëa, “Ainea, Yesu Kiristo uguguforya veve. Uka uare urëë wako.” Na gënyahafo mweeso agauka. 35Na antu voong'e va uLuda nanë Saroni naarë vamwona mweeso, na vëgamufetukëa Müküü.

Dorikasi Uguforiwa

36Kuuko uYafa arë urëfo musëywi wa gëkhema nëuguëtaanwa Tabita. Rina rakwe gwa Gëyanani në Dorikasi (ryanayo mpaa). Mweeso arë ugutumëa mayuva akwe oong'e utenda ntendo në njija uvaarëya atuki. 37Mung'ë a matiku asaa mweeso agawaa na agakuya. Na nënaa vamwoya vëgamwëka unto a nyumba a gunto. 38Gusoko Yafa arë ëtikue na uLuda, uvii asëywi, gwa utegheeya mwino Fetero wë kuuko uLuda, vëgatuma antu vavëë kunë mweeso umufefeheya, “Nju kunë sese utatinye.” 39Uvii Fetero agauka agaenda itambëëmwe inao. Naarë mweeso wafika, veeso vëgamutoa unto a nyumba a gunto. Ahimbë voong'e arë vaëmëkie fifë inao vëurëa, na vëgamuraghëëa nkhanju nanë masaa angëja në Dorikasi wayatumie naarë këë wëitambëëmwe inao. 40Ëgweeso Fetero agavajuncha voong'e unji na agatunama fang'ë na agaromba. Uvii agaufetukëa mwëërë agahanya, “Tabita, uka.” Na mweeso agakunukua miho akwe, na nënaa wamwona Fetero agagikhaa. 41Na mweeso agamufa mukhono wakwe na agamwaarëya uëmëka sëëse. Uvii agavaëtaana antu va Muungu nanë ahimbë agamwëëka usonge awe mufanga. 42Na antu voong'e va uYafa vëgamanya, na antu vaingë vëgamuhuvëa Müküü. 43Na Fetero agagikhaa uYafa gwa matiku maingë itambëëmwe na muntu umwedu Simioni, munya ufara mëkunja.

നിലവിൽ തിരഞ്ഞെടുത്തിരിക്കുന്നു:

Nte 9: RNT

ഹൈലൈറ്റ് ചെയ്യുക

പങ്ക് വെക്കു

പകർത്തുക