Nte 8

Sauli Ugurëkhasya Kanisa

1Na Sauli agaona ntendo asëë a umuragha Sitefano në njija. Na itiku rasëë makhasëko makuu ino ëgadwëëra u Kanisa ra uYerusalemu; na veeso vëgafaghata goong'e u mëkoa a uYudea na a uSamaria, vëgasagha atumami gutufu. 2Anya dini vëgamwëka Sitefano, na vëgamurëëra gërëo në gëküü ino ga umuhongeeya mweeso. 3Ëgweeso Sauli agarëruvanga kanisa na againgëa mu nyumba, gwa nyumba, agavauta aghosya nanë akhema na uvaghumëa veeso u jera.

4Na vasaa naarë vafaghata vëgaenda utanantya ukhani. 5Filipo agaenda u muji wa uSamaria agavatanantëya veeso sayu amwa Kiristo. 6Na mwirundo gwa nkhoo ëmwedu vëgategheeya nkhani yasii naarë Filipo agayirighëëtya. Na itungo rasëë naarë veeso vëgamutegheeya mweeso na uona makua në mweeso wayatendie. 7Gusoko inyonyinyonyi në ivë igavafuma vaingë naarë vakwatërwe, na nyeeso yëurëa gwa ruri në üküü. Na vaingë naarë vakureighandi nanë anyavirema vëgaforywa. 8Uvii gugatendeka gwina uyanjo üküü u muji wasuu.

9Gweeso arë urëfo muntu rina rakwe Simioni në khae arë ugutendaa uroghi u muji wasuu na uvatacha antu va uSamaria, na uhanya mwino mweeso mughonjo në muntu müküü. 10Antu voong'e va u muji wasuu vëgamutegheeya mweeso, uandëya në munyui faka në müküü, vëuhanya, “Muntu uyi në udaho uruo wa Muungu nëugwëtaanwa në Üküü.” 11Na veeso vëgamutegheeya mweeso, gusoko matiku maingë mweeso arë waatachiye veeso gwa uroghi wakwe. 12Ëgweeso veeso naarë vamuhuvëa Filipo mwino arë ugutanantya sayu në njija a utemi wa Muungu na rina ramwa Yesu Kiristo, veeso voong'e vëgabadiswa aghosya nanë akhema. 13Na në Simoni mweeso mughonjo noo agahuvëa, naarë mweeso wabadiswa vëgagihonga ina Filifo. Na gwa goona ndolyo nanë makua maküü ëgutendeka, mweeso agataka.

14Na atumami naarë vëkuuko uYerusalemu vëgategheeya mwino Samaria ahuvëa ukhani wa Muungu, veeso vëgavatuma kunë veeso Fetero ina Yohana, 15na vëgaenda na uvarombea gusoko veeso vëdahe ughenyifa Mwahu Mweru. 16Gusoko arë gutie mba umwedu nëwasimëwe na Mwahu Mweru, ëgweeso veeso arë vabadisiwe gutufu gwa rina ra Müküü Yesu. 17Uvii veeso vëgavaëkëa mëkhono ao unto a mëtwe ao na veeso vëgamughenyifa Mwahu Mweru. 18Na Simioni naarë waona mwino chu antu vëufewaa Mwahu Mweru nëvaëkëwa mëkhono na atumami, mweeso agavafa hela, 19uguhanya, “Mpi nanee noo udaho urui, gusoko mu muntu në nene namwëkëa mëkhono ane unto adahe ughenyifa Mwahu Mweru.” 20Ëgweeso Fetero agamukhanëa, “Hela yako nëiyaghae itambëëmwe navee, gusoko ugughema veve ugudaha uhanga gëfewa ga Muungu gwa hela! 21Utina ifunju mbesa gafëgha mung'ë a intu ërëë gusoko nkhoo ako ëtighokie usonge a Muungu. 22Uvii fea uvë urui wa unkhoo ako, na umwombe Müküü gusoko, mbesa yudaheka, woonewe uvai isëgho ërëë nërë unkhoo ako. 23Gusoko kunë nene nkengee mwino wina uvai mwino gësungu në gëlulu na kangë ugugëtungo ga mahutye.” 24Simioni agasucha, “Nombei nene kunë Müküü, taje nëhangwe na intu mpa rëmwedu gwa ayai nëmwayahanyaa.”

25Na veeso naarë vadaha usudangëa na utanantya ukhani wa Müküü, veeso vëgasuka uYerusalemu, vëgatanantya Sayu Njija mu matumbë angëja a uSamaria.

26Ëgweeso malaëka wa Müküü agamwëra Filifo, “Uka na wende ughokee utaghama faka u njëa nëëtununtye ufuma uYerusalemu faka uGaza.” Ëyëë në njëa a umbugha në njeruchwë. 27Na mweeso agauka na ageenda. Na rarava, Muhabeshi, naarë uhooriwe, mutongeeri në müküü mu utemi wamwa Kandake, mutemi wa gëkhema wa uHabeshi, arë müküü wa mpamba akwe oong'e, arë ufamie uYerusalemu gëkuryo, 28na arë usukie Mweeso arë wikhee gunto a tela rakwe nërëgutuutwa na maimwana, mweeso arë ugusoma gëtabu ga munyagëdaghu Isaya. 29Na Mwahu agamukhanëa Filifo, “Uka na utela umësambëëya tela ësëë.” 30Uvii Filifo agaenda udurie kunë mweeso, agamutegheeya ugusoma gëtabu ga munyagëdaghu Isaya, na agamuwëëya, “Wamanya riyanayo ra asaa nëugusomana?” 31Na mweeso agasucha, “Ngudaha urë umanya në muntu ainantongeera?” Na mweeso agamuromba Filifo ende gikhaa itambëëmwe inakwe utela. 32Na gafëmpëa ga maandëko naarë ugugasoma në chaaka:

“Arë umwë mwaankhoo utongeerwe winjë ukikitwa

mba mwankhoo nëukiire twë usonge akwe

wasuu nëugumumusua mauri,

uvii mweeso ainarughua moomo mpa gunyui.

33Urirywa mënyaa kunë mweeso agaimwa tutë akwe.

Anyu nëudahëte usanya ufafo wakwe?

Gusoko uduvi wakwe waheiywe ufuma mu urëmi.”

34Na müküü wasuu agamukhanëa Filifo, “Nkhanëa nene, nguromba, munyagëdaghu uyi ugurighëëtya soko a manyu; soko akwe mughonjo nampa soko a muntu ungëja?” 35Uvii Filifo agarughua moomo wakwe, agaandëya ryandëko ërëro ërëro agamukhanëa Sayu Njija amwa Yesu. 36Naarë këë vëuenenda munjëa vëgafika kunë majë arë, müküü wasuu agahanya, “Raava, majë chaaya! Ntuni nëungiya nene ntabadiswe?” ( 37Na Filifo agamusucha, “Nesa veve wahuvëa gwa nkhoo ako oong'e, veve ugudaha ubadiswa.” Na mweeso agasucha, “Nene nahuvëa mwino Yesu Kiristo në Mwana wa Muungu.)” 38Na mweeso agaraghëëya tela ëmëkë, na voong'e vavëë vëgaenda u majë, Filifo nanë müküü wasuu na mweeso agamubadisa. 39Naarë vafuma unji a majë, Mwahu wa Müküü agamuhuka Filifo haku, na müküü wasuu ainamwona kangë, na agaenda kunë winjë gwa uyanjo. 40Ëgweeso Filifo mughonjo agahangwa wë gu Asoto. Na kuuko kunë arë ukëëre arë ugutanantya Sayu Njija umiji oong'e faka agafika uKaisaria.

നിലവിൽ തിരഞ്ഞെടുത്തിരിക്കുന്നു:

Nte 8: RNT

ഹൈലൈറ്റ് ചെയ്യുക

പങ്ക് വെക്കു

പകർത്തുക