เกาตีนา 7
7
ครอบครัว โนอา เคิบ ซัด กุด เฮือ
1อุ อิง เจ็นนัน โนอา ก็ แอง เฮือ เซ็ด แลว เยโฮวา ก็ จ็อก เคิบ นำ วัล ฮุนเน “ตัก ซะไม เน เอิญ เม็จ มัห เป็น ครำ เลาะ ครำ ซือ มี ล็อง เดียว เจ็นนัน เอิญ ก็ ไล ครอบครัว มัห กุด อุ ใน เฮือ มด จู ล็อง ดาย 2-3มัห ต็อง เอิด ซัด มด จู มบลึ ระ อน ใน เฮือ ดาย ระ แปร เริล บัดนะ วัล ซัด เลาะๆ#ค 2 ซัด เลาะ เน เป็น ซัด ตัก เอาซาง ระ อัห ป็อง กุญ แลว ก็ ทวาย อน เอาซาง กุญ ตัก ทวาย อน เอิญ กุญ ก็ เอิด มี มบลึ นเดย เจ็ด กู ต็อง เอิด นัง เอา เคิบ นัง เม็ย เซ็ม ก็ เอิด มี มบลึ นเดย เจ็ด กู เมือนนอย ซัด เจอะ ตี ทวาย อน เอิญ ไอ มี กุญ มัห ก็ เอิด มี มบลึ นเดย มี กู เอิด นัง เอา เคิบ นัง เม็ย ดาย 4ควะ เจ็ด งิ เจ็นเน นโดน เอิญ ก็ แอง ระ เล็ห เมียะ ซีซิบ งิ ซีซิบ แจ็ล ซัด จู มบลึ ตัก เอิญ แอง โตะ แลว นัน เอิญ ก็ มเบิล แอ็ม มด ทัว แพนซิก เน” นำ อัง
5แลว โนอา เม็จ แญง เยโฮวา ไล ออ คือนะ แลว นำ ก็ แอง จู มบลึ ฮุน เยโฮวา ไล อน นัน 6ญาม โนอา อาญุ 600 ปี นอก จ็อง ก็ ทวม แอ็ม โลก มด 7แต ครอบครัว โนอา รีด อุ ใน เฮือ โนอา เคิบ ยัห เคิบ ควัน แพะ ล็อง นัน เคิบ ซีมัน แพะ ล็อง นัน ก็ กุด อุ ควังใน เฮือ มด ระ ปน แอ็ม เจ็น นอก จ็อง นัน 8-9ซัด จู มบลึ นัน ก็ โตะ และ โนอา ฮัก นำ ก็ ซับรวง เย็ห กุด เฮือ เป็น กู เป็น กู เริล นัง เอา นัง เม็ย ก็ โตะ มด ซัด เลาะๆ ตี ทวาย อน เอาซาง กุญ เคิบ ซัด ตี ทวาย อน ตัก เอาซาง ไอ มี กุญ ตึง เซ็ม ตึง ซัด ตี งวาล เริล ตัก ซิก นเซ็บ ก็ เลอะ โตะ มด จู มบลึ เย็ห เลอะ โตะ กุด เฮือ เลิม เคิบ โนอา มอก เอาซาง เพีย ไล อน โนอา วาล นัน 10ครบ เจ็ด งิ แลว ก็ พด เล็ห นอก จ็อง ทวม แอ็ม โลก แพนซิก เน ซีเละ
เล็ห นอก จ็อง ทวม แพนซิก
11ญาม เล็ห เมียะ จ็อง นัน โนอา อาญุ 600 ปี เป็น วัน ที ซิบเจ็ด เดือน ซอง พอดี พด โตะ นอก จ็อง เจ็น ซิก นเซ็บ มบุลๆ เมียะ จ็อง ก็ นทัง เล็ห เจ็น วาง ทึห 12แร็ง เล็ห เมียะ ซีเละ เล็ห ซีซิบ งิ ซีซิบ แจ็ล ไอ มี งเกิด เตาะ 13โนอา กุด อุ ใน เฮือ ตัก วัน ที ซิบเจ็ด นัน นำ กุด เลิม เคิบ ยัห เคิบ ควัน แพะ ล็อง เคิบ ซีมัน แพะ ล็อง นัน 14ซัด จู มบลึ ก็ กุด เฮือ เลิม มด ปึง ซัด นโจ ซัด เลียง ซัด จ็อง ซัด แย็ด ซัด จู มบลึ ตี งวาล เริล ตัก ซิก นเซ็บ เย็ห ก็ โตะ มด ปึง เซ็ม จู มบลึ ก็ เลอะ กุด ใน เฮือ มด
15-16ปึง ซัด นัน ก็ โตะ เป็น กู เป็น กู ฮัก นัง เอา นัง เม็ย ก็ โตะ มด จู มบลึ เย็ห โตะ กุด เฮือ นัน เลิม เคิบ โนอา ฮุน เอาซาง ไล อน นัน แลว ปึง ครำ ปึง ซัด กุด เฮือ มด แลว เยโฮวา ก็ เติล ปะตู ระ อัห อุ ควังใน เฮือ นัน เจ็นนัน ก็ เล็ห เมียะ จ็อง เล็ห อุ ซีซิบ งิ ซีซิบ แจ็ล 17ตลอด ซีซิบ งิ นัน นอก ก็ เฮง เคริบ ก็อห นทึห ติกๆ นอก ก็ ปึห เอิด เฮือ เริล นทึห เฮือ ก็ เกลิง อุ คอม นอก ลัห ทึห 18นอก ก็ เฮง เคริบ ดก เล็ห ตัก แพนซิก เฮง เคริบ ก็อห นทึห ติกๆ เฮือ ก็ เกลิง อุ ตัก นอก ลัห ทึห นัน 19นอก ก็ เฮง เคริบ ดก เล็ห ติกๆ อี ทวม แอ็ม แพนซิก เน มด ตึง ญวัง ตึง วะ ก็ ทวม แอ็ม มด 20นอก ทวม ลำ แอ็ม ญวัง นทึห วัล ซิบฮา ซอก 21-23ครำ เคิบ ซัด ก็ ซุด เปิล แอ็ม มด จู มบลึ ตัก เริล ตาม ซิก ตัก คือ งกวย ออ นัน เย็ห ก็ เปิล แอ็ม มด เป็น ซัด เลียง ซัด นโจ ซัด จ็อง ซัด แย็ด เคิบ ซัด จู มบลึ ตี งวาล เริล ตัก ซิก นเซ็บ เป็น เซ็ม เป็น วะ ก็ ซุด เปิล แอ็ม มด ไอ มี ควะ รีด ซีวะ ซัก มี ยาง เอาซาง มเบิล แอ็ม มด ตัก นอก จ็อง นัน ควะ รีด แต โนอา เคิบ ครอบครัว เคิบ ปึง ซัด ตัก อุ เลิม ใน เฮือ นัน 24นอก จ็อง ก็ ทวม แอ็ม โลก แพนซิก เน มด ทวม อุ 150 งิ
നിലവിൽ തിരഞ്ഞെടുത്തിരിക്കുന്നു:
เกาตีนา 7: Prai
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Global Partners
