Tekang Kbuten 8
8
Keteflok yóm dunuk
1Bè yóm tey kdunuken yó, là kô klifót Dwata kul le Nuwa ne yó kem ógóf tehe nwiten elem yóm kafal. Ne wen lenos hbel Dwata anì nbuten mtón yóm él. 2Tódô teflok yóm tey él semfut gu lem tonok ne bud teflok snéen yóm tey kulón bong. 3Botong lematu limu folò kdawen kegenen minut mtón yóm él. 4Song htengen yóm kafal yó, deng kól bè yóm gesfoloen hitu kdaw bè yóm ghituhen bulón. Tódô htengen ta yóm sotu bulul bè yó boluyen Bulul Ararat. 5Sónmoen minut mtón elaan se yóm él yó ne bè yóm tanay kdaw bè yóm gesfoloen bulón, tódô gfan tfusù yó kem dumu bulul.
6Tikóng deng bud fat folò butengen bè yó, omin Nuwa yó he hemnas sotu tembó beng yóm kafal. 7Ne hóyóngen yóm wak ne là kóen bud mulék elem yóm kafal. Ngangen mò du tendo gel bliwel móyóng efet bè kekti yóm él. 8Bè yóm tolo lelen móyóng, bud hóyóng Nuwa obun mò gónón temngón du ke deng milef elem tonok yóm él. 9Okóm laen kô dù gónón mdef yóm obun yó abay se tolo wen él bè klamangen. Yó gónón tódô bud mulék ebè yóm kafal. Tódô hefet Nuwa bè sigelen, ne bud suen elem kafal. 10Na Nuwa bud mangat hitu kdaw, ominen bud hóyóng yóm obun yó. 11Ne song bud kól yóm obun deng móyón kifu. Wen nangaen tubed koyu ulib. Ne tódô tngón Nuwa deng milef ne yóm él. 12Na Nuwa bud mangat hitu kdaw bè yó, ominen bud hóyóng yóm obun. Bede bè yóm kdaw yó, là kóen bud mulék ebélê le yóm obun.
13Timbow deng nem latu bud sotu halay Nuwa,#8:13 Bè kesfalahem du nim bérs ni gónóm temngón du botong sfalay le Nuwa nô lem yóm kafal. deng gotu milef ne yóm él bè yóm tanay kdaw bè yóm tanay bulón bè yóm halay yó. Kó Nuwa limun yóm kafal ne temngel gu hmilol ne tonen nbuten mékéng ne yóm tonok. 14Tikóng kól bè yóm gewuhen folò hitu kdaw bè yóm gewuhen bulón, yó he tahu hol kékéng gu ta yóm tonok. 15Ne bud mudél Dwata ebè Nuwa, monen, 16“Hewà ye ne, nitem yehenem ne kem ngaem logi ne yó kem towuhem. 17Gotu nitem lu hewà yóm kentihen kay onuk koyu ne kay ógóf deng tehe nwitem anì hol le mngà ne mból talak tonok.” 18Ne tahu se, hewà Nuwa mung du yehenen ne yó kem ngaen logi ne yó kem towuhen. 19Mung kul yóm kentihen kay ógóf ne kentihen kay onuk koyu deng tehe nwiten elem kafal, bede sal mlan bè ket kayen yóm kmò kehewà le.
Kedsù Nuwa ebè Dwata
20Tikóng le deng gotu hewà, wen botu sensodò Nuwa mò gónón demsù ebè Dwata. Ne wen nwahen bè ket kay yó kem ógóf ne onuk koyu gel henmóyô Dwata mò dsù le ebéléen ne hkekeben ta yóm gónó demsù yó. 21Yóm boo yóm dsuen yó, tey hyu nawa Dwata du ne yó hendemen, “Là kô bud genlau du ne yóm tonok ne yóm kentihen nô tahen lemwót bè sidek gel nmò tau. Tódô tngónu yóm tau, lemwót bè hanà kudien yóm kwen sidek nô lem hendemen. Là kô naw e bud genlà kul ne yóm kentihen mowil talak tonok lómón yóm deng nmou bélê le ni. 22Yóm igoen tolo wen benwu, sal gel wen bulón mulu ne wen bulón muta. Wen bulónen tnaw ne wen se bulónen kinì. Wen bulónen mnóng kdaw ne wen se bulónen kmulón. Senflósen wen kdaw ne senflósen wen se kifu.”
നിലവിൽ തിരഞ്ഞെടുത്തിരിക്കുന്നു:
Tekang Kbuten 8: tbl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2007, Wycliffe Bible Translators, Inc. All rights reserved.
