Mbete Marki 8
8
1Ɓil namuri-aw daɓa nzukri ɓa ŋgi̧-u mbu̧h hani ké ta̧w Zezu ɓáy. Ku su̧ fe ya, mí ke ɗi nzuk-dih fal yeri gi, ke ɓahri : 2« Law bi sa̧h mi ɓay tul daɓa nzukri-ay ɓay fe le, laɓ nam say wara kú-u ƴo ziŋ mi dan sú̧ fe. 3Mi poŋ nzukri-ay el si puh dan sú̧ fe le, ku ɓay lih ɗaka ké mahful. Nzuk a haniri ké sakra woyri ur ɓa ɗih-u. »
4Nzuk-dih fal yeri ba, ɓahri : « Gelay ɓa ɓil suy. Ké fál suŋ mí nzuk ɓay ziŋ ri fe su̧na ɓay hi̧ daɓa nzukri-ay ɓá su̧ mah gel ɗaka woyri le ? »
5Ke vbi niri ɓahri : « I ƴo ke peŋ ka̧h ani le ? »
Bale ku ɓahri : « Peŋ ɓa toŋndɔk say. »
6Zezu hi̧ nzukri kaɓ siɓa. Ke ya̧ peŋ ké toŋndɔk say. Ke el ke tumbɔl hi̧ Ŋgerzah, ke haw, mí ke hi̧ nzuk-dih fal yeri ɓay kú wal daɓa nzukri-aw. Mí ku wal hi̧ nzukri ra ba. 7Nzuy ndi̧ na ri pi. Mí Zezu lu mgbɔkɔ ku̧ tulu. Mí ke ɓahri, kú wal hi̧ nzukri ɓá su̧ pi. 8Ku su̧ mbah ɓil woyri el poŋ tɔru. Ku mbu̧h tɔr fe su̧na ké toŋ ra mbah tɔlɔ a baw baw ɓa toŋndɔk say. 9Nzukri ké su̧ peŋ ra tul woyri ɓa sɔɗ sɔɗ boh gel niŋ (4.000). Kandɔkaw mí ke poŋ niri tɔr si puh.
10-11Sa gelaw mí Zezu ke nzuk-dih fal yeri rih kaɓ ɓil kumbon tɔr si ka̧h tusiɓa Dalmanuta#8.10-11 Dalmanuta ɓa puh sa̧w ziɓri. Ta-a le, fariziri ta rih ri ya.. Fariziri gi ta̧w ye. Wara mí ku nzah nzak ye ke ɓay, ku fah ni ɓay ké laɓ fe saŋ hi̧ niri kú ko, sa̧wu ɓa nunmbam le ? 12Zezu ɗer haŋ fo̧h mí ke ɓahri : « Ani mí gun tukala-ayri nzah ɓay ko fe saŋ le ? Ɓa ketina, mí-i ƴo ɓah ɓayay hi̧ niri : hul bi dara ku kó fe saŋ ɓáy. »
13Mí Zezu poŋ niri el si rih ɓil kumbon tɔr si ma kala mbih ra ɓáy. 14Nzuk-dih fal yeri yȩkre peŋ. Peŋ mbew yaŋ mí na ɓil kumbon. 15Zezu ɓah hi̧ niri ɓa teh-u ɓahri : « Í ru̧ ke mun woiri. Í ko-ko ɓay is fariziri ke ɓay is nzuk Eroɗri. »
16Mí nzuk-dih fal yeri fah ɓay ké haŋsekle woyri ɓahri, ɓay tul peŋ kú-u fa̧h ya, mí ke ɓah ɓayaw. 17Zezu tu kerɓay woyri, mí ke ɓahri : « Ani mí i ƴo fah ɓay tul peŋ ké ta-a le ? I tu ya ɓáy lo ? Law woiri guh ya ɓáy le ? Kandɔk ké i lah ya ra, law woiri kpuh. 18Nun woiri ko fe mí i ko ya. Suk woiri lah ɓay, mí i lah ya. Law woiri ker ɓay ya le wo ? 19Peŋ ndiɓi ké mi haw hi̧ nzukri sɔɗ sɔɗ boh gel ndiɓi (5.000) su̧ ra wa, i fa̧h tɔru mbah tɔlɔ ka̧h ani le ? »
Ku ɓahri : « Nah mbu̧h tɔlɔ boh falu seɗe. »
20Ke el ɓahri : « Peŋ toŋndɔk say ké mi hi̧ nzukri sɔɗ sɔɗ boh gel niŋ (4.000) su̧ ra wa, i fa̧h tɔru mbah tɔlɔ ka̧h ani le ? »
Mí ku ɓahri : « Tɔlɔ a bawuri ɓa toŋndɔk say. »
21Mí Zezu ɓahri : « Ɓayu guh law woiri ya ɓáy ley ? »
22Zezu ke nzuk-dih fal yeri ka̧h Beɗsayda. Mí nzukri maŋ ra̧w a hani gi keni hi̧ Zezu. Ku goŋ ni ɓay ké za ra̧w ra ɓo ké gah ni. 23Zezu mgba ndɔk ra̧w ra ten ni ke ɓil puh si ƴo nzak gakra. Mí ke sa sam ku̧ nun ye. Ke ɓaŋ ndɔk kan tul ye ƴo vbi ni ɓahri : « Mu ko fe le ? »
24Ra̧w ra mgbur nun. Ke ko gel, ke ɓahri : « Mi ko nzukri eŋ kpuh ké ti̧h bɔk ƴo si sina. »
25Zezu el za nun ra̧w ra ɓáy ba, nun ye mgbur, ke ko gel ɓa teh-u kaɗ kaɗ. Ke ko feri riw teh gberere. 26Zezu pih ni el si puh ye ɓahri : « Ko-ko ɓay mú si ɓil puh. » Kandɔkaw mí ke poŋ ni el si puh.
27Zezu ke nzuk-dih fal yeri ur tɔr ke Beɗsayda. Ku kal puhri ké na fál kɔr Sezareh-Filiɓ. Ku ƴo tul ful kɔɓ ɓáy bale, Zezu vbi niri ɓayay : « Nzukri ɗi mi ɓa sam nzuk a suŋ le ? »
28Bale ku ɓahri : « Nzukri ɗi mu ɓa Za̧h batisi. Nzuk a haniri ɗi mu ɓa Eli gun nzak pihna Ŋgerzah a lewsa̧. Nzuk a ɓoruri ba, ɗi mu ɓa gun nzak pihna Ŋgerzah a hani ké ti̧h ke záh. »
29Mí ke el vbi niri ɓahri : « A woiri ba, i ɗi mi ɓa sam nzuk a suŋ le ? »
Piyer yih nzak ye ɓahri : « A wo mú-u ɓa Ŋgermbay#8.29 Ziɓri ɓahri, Ŋgermbay ɓay haw ŋgermu lak mbay ɔh gelri riw ké tusiɓa. Kerɓay Piyer ké-e ker ɓay tul Ŋgermbay mah hani pi. Kerɓay Zezu si tul gina ye ɓoɗ ba. Í ki̧ gunu 31 ke 32 ɓay lah kerɓay Zezu.. »
30Mí Zezu hah niri ɓáh ɓay riŋ ɗina Ŋgermbay ye ra hi̧ nzuk.
31Wara mí Zezu ti firma niri ɓay ɓahri se : « Na ani ani gaŋ kara a ye gun nzuk pirmatul ɓay ko seh kal ŋgɔŋ. Ŋgernzuk puh wah gun Izarayelri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri, ku ɓay ko ni ye ɓa kɔk fe, ke hú hul. Nam say falu le, ke tí̧h ke puh záh ke pa̧ymun a foyu. »
32Zezu ɓah ɓay ye ɓa teh-u hi̧ niri. Mí Piyer ten Zezu bale, ke hah Zezu ɓáh ɓayaw. 33Zezu sɔɓ fal hi̧ Piyer, ke ko kona ma tul nzuk-dih fal yeri, mí ke ɓah hi̧ Piyer ɓa teh-u ɓahri : « Satan a wo nzukbaa, mú el ké ta̧w bi ma fal ɓay fe le, law wo mbi kerɓay Ŋgerzah ya wara le, ɓa kerɓay nzukri. »
34Zezu ɗi nzukri ɓa ŋgi̧-u ke nzuk-dih fal yeri. Ke ɓah hi̧ niri ɓahri se : « Nzuk yih dih fal bi le, ké poŋ kerɓay tul ye ma fal. Ké mbi kpuh vbatay hul ye, ké suk, ké dih keni fal bi, 35ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi ke ɓay tul ɓaysuki bi#8.35 Zezu ɓahri, ɓaysuki bi mí ke ɓah si tul ɓaysuki hul ye ké-e ɓay ya̧ keni nzukri. le, ke ɓay ti̧h ke ndɔk hul. 36Fe ziŋna fe mí ɓay ti̧h suk hi̧ nzuk a a̧y ké su̧ tukala hu̧m hu̧m mí ɔ́h ɓay ye ɓa kɔk fe le ? 37Uwa. Fe ziŋna fe mí nzuku ɓay mbi soh keni tul ye le wo ? 38Nzuk a a̧y ké ko riŋ bi ɓa fe su̧hru ye ké pol gun tukala-ayri nzukri ké pihna woyri ɓa láɓ suya, ɓa póŋ Ŋgerzah el ti̧h kala si mbi záh a ɓoru le, gun nzuk pirmatul ɓay tu nzuku-aw ɓa fe-se su̧hru ké nun ye ke seh ké tem nzak pihna Ŋgerzahri ɓay ɓaŋ ni gi ɓil riŋ ɗina bah ye. »
നിലവിൽ തിരഞ്ഞെടുത്തിരിക്കുന്നു:
Mbete Marki 8: SIAFNK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
