JENESIS 13
13
U Abram bad u Lot ki ïakhlad lok noh
1Bad u Abram u la leit kiew noh na ka ri Ijipt; ma u bad ka tnga jong u, bad kiei kiei baroh katba u don, bad u Lot lem bad u, shaphang shathie ka ri Kanaan.
2Bad u Abram u la riewbha eh ha ki jingri, ha ka rupa, bad ha ka ksiar. 3Bad u la nang leit ha la ki jingleit na shathie shaduh Bethel, shaduh ka jaka ha kaba u la lah pynïeng ïa la ka ïingtrep mynnyngkong, hapdeng Bethel bad Ai; 4sha kata ka jaka jong ka duwan, ïa kaba u la thaw hangta mynnyngkong: bad hangta u Abram u la khot ïa ka kyrteng jong U Trai. 5Bad ïa u Lot ruh de, uba la leit ryngkat bad u Abram, la don ki langbrot, bad ki masi, bad ki ïingtrep. 6Te kata ka ri kam lah bsa ïa ki ban shong sah lang: naba kiei kiei ka spah jong ki ka la bun, kumta keiñ kim lah shuh ïashong sah ryngkat. 7Bad ka la don ruh ka jingïakajia hapdeng ki nongap jingri jong u Abram bad ki nongap jingri jong u Lot: bad ki Kanaan ruh bad ki Peris mynkata ki la ïashong sah ha kata ka ri.
8Te u Abram u la ong ha u Lot, “Nga kyrpad ïa me to wat ai ba kan long kaba ïakajia bad nga bad me, lymne bad ki nongap jingri jong nga bad ki nongap jingri jong me; namar ngi long shipara. 9Ka khyndew baroh kam long ha khmat jong me? Te nga kyrpad ïa me, to da khlad noh na nga: lada men phai sha kadiang, nga te ngan leit phai sha kamon; ne lada men phai sha kamon, nga te ngan leit phai sha kadiang.” 10#Jen. 2:10.Te u Lot u la khmied ïa la ki khmat, bad u la ïohi ïa ka ri madan baroh ka wah Jordan, ba ka la long baroh kylleng ïa kaba la don um bha, mynshuwa ba U Trai u la pynjot noh ïa ka Sodom bad ïa ka Gomorra, kum ka kper U Trai ne kum ka ri Ijipt katba me leit shaphang Soar. 11Te u Lot u la jied ïa lade ïa kata ka ri madan baroh ka Jordan; u Lot ruh u la leit noh shaphang mihngi: kumta keiñ, ki la ïakhlad lok noh paralok hi. 12U Abram u la shong sah ha ka ri Kanaan, bad u Lot u la shong sah ha ki nongbah ka ri madan, bad u la pynïeng ïa la ka ïingtrep shaphang Sodom. 13Hynrei, ki Sodom ki la long ki bymman bad kiba leh pop shikatdei eh ha khmat U Trai.
14Te U Trai u la ong ha u Abram, hadien ba u Lot u la khlad noh na u, “To khmied mynta ïa la ki khmat, bad to khmih ruh na kata ka jaka ha kaba me don shaphang shatei, bad shaphang shathie, bad shaphang mihngi, bad shaphang sepngi: 15#Ki Kam. 7:5; Gal. 3:16.naba ïa kata ka ri baroh katba me ïohi, ngan ai ha me bad ha u symbai jong me ha la ka rta. 16Ngan pynlong ruh ïa u symbai jong me kum ka 'dewmet ka khyndew: kumta keiñ, ba lada u briew u lah ban ñiew ïa ka 'dewmet ka khyndew, kumta te ïa u symbai jong me ruh yn lah ban ñiew. 17To khie noh, to ïaid lyngba ïa kata ka ri, ïa ka lynter jong ka, bad ïa ka pyngkiang jong ka; naba ha me keiñ ngan sa ai ïa ka.” 18Te u Abram u la pynkynriah noh ïa la ka ïingtrep, bad u la wan shong sah hajan ki dieng Sning u Mamre, kiba ha Hebron, bad u la tei hangta ïa ka duwan ha U Trai.
നിലവിൽ തിരഞ്ഞെടുത്തിരിക്കുന്നു:
JENESIS 13: KHB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible Society of India
