GENESIS 34
34
Dinah Sualluihna
1Huan, Leah tanu Dinah, Jakob a neihsak, huai gam nungakte mu ding in a pawtkhia hi. 2Hiv mi Hamor, huai gam kumpipa tapa Sekem in amah a na mu a; a man a, a luppih a, a hihnin hi. 3A lungsim Jakob tanu Dinah tung ah a om bikbek a, huai nungak lah a it a, amah kamsiam tak in a houpih hi.
4Sekem in a pa Hamor a houpih a, “Huai nungak zi ding in hon neisak in” a chi hi.
5Jakob in a tanu Dinah a ninsak khin, chih a za a; a tate gamlak ah a gan lak uah a om uhi. Huchi in, a hongtun mateng uh Jakob a daidide hi.
6Sekem pa Hamor Jakob houpih ding in a kiang ah a hoh hi. 7Jakob tapate’n a zaktak un gamlak a kipan a hong paita ua; Jakob tanu luppih in Israelte lak a thil gilou haihuai tak, thilhih hetlouh ding, a hih ziak in a lungkham ua, a heh mahmah uhi. 8Hamor in amau a houpih a, “Ka tapa Sekem lungsim na tanu uh tung ah a om bikbek a, hehpih in zi ding in neisak ve ua, 9Kila tuah ve ni e; na tanute uh hon lasak unla, ka tanute u leng la sam un.
10Ka kiang uah na teng ding ua; gam leng a kiching gige ding. Hiai ah teng unla, sumsin unla, hiai ah kihih inbul un” a chi hi.
11Sekem in nungak pa leh a sanggampate kiang ah, “Hon hehpih un, ka kiang a na gen peuh uh k’on pe ding. 12Man leh thilpiak zaw bangzah gen le uchin, na chih bangbang uh k’on pe ding. A bang hileh, nungak pen zi ding in hon neisak phot un” a chi hi.
13Jakob tapate’n a sanggamnu uh Dinah a nitsak ziak in Sekem leh a pa Hamor zekhem in a dawng ua, a kiang uah, 14“Hiai thil zeksumlouh mi kiang a ka tanu uh piak pen ka hih theikei ding uh. Huai lah kou ading in minsiatna ahi ngal a. 15Hichibang a kichiam kia in na thu uh pha ka sa ding uh. Na lak ua pasal peuhpeuh kou bang a zeksum in om uhen. 16Huchi in ka tanute uh na nei ding ua, kou leng na tanute uh ka neisam ding uh. Na kiang uah ka teng ding ua, chi khat i hi ding. 17Himahleh, zeksum thu a ka thu uh na zuihkei ding uleh, ka tanu uh ka pi ding ua, ka paimai ding uh” a chi uhi.
18A thugen un Hamor leh Hamor tapa Sekem a kipaksak hi. 19Tangval in Jakob tanu a deih mahmah ziak in huai thil sawt hallou in a hihta hi. Amah a pa inkuan tengteng lak a mite zahtak pen ahi.
20Hamor leh a tapa Sekem in a khaw kulh kongkhak uh a pha ua, a khote uh a houpih uhi. 21“Hiai mite kituahpih tak in a om uh. Huaiziak in hiai gam a teng in, hiai ah sumsin uhen. Ngai un, amau ading in gam lah a za ngal a. A tanute uh zi in nei lehang, i tanute uh leng neisak sam ni. 22Himahleh nam khat i hong hihna ding a i kiang a ten theihna ding un hichibang a i chiam kia in huai mite’n pha a hon sak pih ding uhi. Zeksum a hih bang ua i lak ua pasal peuhpeuh zeksum hong hita lehang. 23A gante uh, a sumte uh, a sa tengteng uh ei a ahi vekkei dia hia? A thu uh phasak pih maive ni, Huchi in i kiang uah a teng ding uhi” a chi uhi. 24Hamor leh a tapa Sekem thu a khaw kulh kongkhak a pawt khe tengteng in a zui ua; a khaw kulh kongkhak a pawtkhe tengteng, pasal peuhpeuh zek a sumsak uhi.
25Hichi ahi a, a ni thum ni a, na a thuaklai un, Jakob tapate lak a nih, Dinah sanggampa Simeon leh Levi in a namsau uh tawi tuak in a guk in khua a va sualta ua, pasal tengteng a thatgam uhi. 26Hamor leh a tapa Sekem namsau hiam in a that ua, Sekem inn a kipan Dinah a pi ua, a pawtta uhi. 27Jakob tapate’n a mi thahte uh a va phanawn ua, a tanu uh a nitsak ziak un huai khua a lokta uhi. 28A belamhonte uh, a bawnghonte uh, a sabiltungte uh, a khua ua thil omte leh a lou ua thil omte a laksak uhi. 29A sum tengteng uleh a ta a nau neu chikchik leh a zite uh tengteng sal in a man ua, inn tengteng a lok uhi.
30Jakob in Simeon leh Levi kiang ah, “Nou hiai gam a tengte lak a, Kanante leh Perizte lak ah, huat n’on pawsak ua, n’on lungzingsak mahmah uh. Kei tawmchik ka hih ziak in hon sual ding in a kikhawm khawm ding ua, a honthat mai ding uhi. Huchi in, hihmang in ka om ding a, kei leh ka inkuanpihte toh” a chi hi. 31Amau, “Ka sanggamnu uh kizuak bang a a bawl ding ahi ahia?” a chi uhi.
നിലവിൽ തിരഞ്ഞെടുത്തിരിക്കുന്നു:
GENESIS 34: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
