ᒉᓂᓯᔅ 1
1
ᑭᔐᒪᓂᑑ ᑮᐅᔑᑑᒡ ᑲᑭᓇ ᑫᑰᓂᓂ
1ᒫᐗᒡ ᑕᔥ ᑭᒋ ᓃᑳᓐ, ᑭᔐᒪᓂᑑ ᐅᑮ ᐅᔑᑑᓐ ᑮᔑᒃ, ᐊᑮᓂ ᑲᔦ᙮ 2ᑮᐱᑾᒐᔭᐄᐗᓐ, ᑮᒪᔕᔥᒀ ᓴ ᑲᔦ ᐅᐅ ᐊᑭ᙮ ᓂᐱ ᑕᔥ ᑮᑮᔥᑳᔭᐙ, ᐐᑫ ᑕᔥ ᒥᓯᐌ ᑮᑲᔥᑮᑎᐱᑲᓐ᙮ ᑭᔐᒪᓂᑑ ᑕᔥ ᐅᑕᒑᑾᓐ ᐊᔑᒋᐲᒃ ᑮᐱᒥ ᐊᔮᐗᓐ᙮ 3#2Co 4.6. ᑭᔐᒪᓂᑑ ᑕᔥ ᑮᐃᑭᑐ, ᑕᑲ ᑕᐙᓭᔮ, ᒦᔥ ᑳᐃᔑ ᐙᓭᔮᓂᒃ᙮ 4ᒦᑕᔥ ᑳᐃᔑ ᒥᓍᐸᑕᕽ ᐃᐃ ᑳᑮ ᐙᓭᔮᓂᒃ᙮ ᐅᑮ ᓀᓈᐎᓈᓐ ᑕᔥ ᐃᐃ ᑳᑮ ᐙᓭᔮᓂᒃ ᐃᐃ ᑲᔦ ᑳᑮ ᑲᔥᑮᑎᐱᑲᓂᓂᒃ᙮ 5ᑳᑮ ᐙᓭᔮᓂᒃ ᑕᔥ ᑮᔑᑲᓐ ᐅᑮ ᐃᔑᓂᑳᑖᓐ ᔑᑾ ᑳᑮ ᑲᔥᑮᑎᐱᑲᓂᓂᒃ ᑕᔥ ᑎᐱᑲᓐ ᐅᑮ ᐃᔑᓂᑳᑖᓐ᙮ ᒦᔥ ᑳᐊᓂᔑ ᑎᐱᑲᓂᓂᒃ, ᑮᐊᓂ ᑭᔐᐹᐗᑲᓂᓂ ᑲᔦ, ᒦ ᐃ ᑮᐯᔑᑯᑮᔑᑲᓂᓂᒃ᙮
6ᑭᔐᒪᓂᑑ ᑕᔥ ᑮᐃᑭᑐ, ᑕᑲ, ᑕᐊᔮᒪᑲᓐ ᐋᓴᒥᑮᔑᒃ ᐊᑾᓇᐃᑲᓂᕽ ᑫᐃᓀᑖᑾᒃ ᑫᔑ ᐲᑕᐙᑭᓐ ᓂᐲᓐ᙮ 7ᒦᑕᔥ ᑳᑮ ᐅᔑᑑᒡ ᐋᓴᒥᑮᔑᒃ, ᐁᑮ ᓀᓈᐎᓇᕽ ᐃᓂ ᓂᐲᓐ ᐊᓈᒥᑮᔑᒃ ᐁᔮᓂᑭᓐ, ᐃᓂ ᑲᔦ ᐗᑭᒋ ᑮᔑᒃ᙮ ᒦ ᓴ ᐃ ᑳᐃᔑᓭᓂᒃ᙮ 8ᑮᔑᒃ ᑕᔥ ᐅᑮ ᐃᔑᓂᑳᑖᓐ ᐃᐃ ᐋᓴᒥᑮᔑᒃ᙮ ᒦᔥ ᑳᐊᓂᔑ ᑎᐱᑲᓂᓂᒃ ᐁᑮ ᐊᓂ ᑭᔐᐹᐗᑲᓂᓂᒃ ᑲᔦ, ᒦ ᐃ ᑮᓃᔓᑮᔑᑲᓂᓂᒃ᙮
9ᑭᔐᒪᓂᑑ ᑕᔥ ᒦᓇᐙ ᑮᐃᑭᑐ, ᑕᑲ ᑕᒫᒪᐎᒋᐗᓅᓐ ᐃᓂ ᐋᓴᒥᑮᔑᒃ ᐁᔮᑭᓐ ᓂᐲᓐ ᐃᐃᒫ ᐯᔑᒃ ᐊᔮᐎᓂᕽ, ᒋᓈᑾᒃ ᒋᐹᑾᑲᒥᑳᒃ᙮ ᒦ ᓴ ᐃ ᑳᐃᔑᓭᓂᒃ᙮ 10ᑳᑮ ᐹᑾᑲᒥᑳᓂᒃ ᑕᔥ ᐊᑭ ᐅᑮ ᐃᔑᓂᑳᑖᓐ, ᑳᑮ ᐃᔑ ᒫᒪᐎᒋᐗᓂᓂᑭᓐ ᑕᔥ ᓂᐲᓐ ᑭᒋᑲᒻ ᐅᑮ ᐃᔑᓂᑳᑖᓐ᙮ ᐐᑫ ᑕᔥ ᐅᑮ ᒥᓍᐸᑖᓐ᙮ 11ᑭᔐᒪᓂᑑ ᑕᔥ ᒦᓇᐙ ᑮᐃᑭᑐ, ᑕᑲ ᐅᐅᒫ ᐊᑮᕽ ᑕᓵᑲᑮᐗᓐ ᑳᑕᓶᐙᓇᑲᑭᓐ ᑭᑎᑳᓂ ᑫᑰᓇᓐ, ᑖᐱᔥᑰ ᐊᔥᑭᐸᑰᓐ ᑳᒦᓂᐗᑭᓐ ᑭᑎᑳᓀᓴᓐ, ᐃᑭ ᑲᔦ ᒦᓈᑎᑰᒃ ᐁᑎᓄᐎᐙᒡ ᑳᓂᑖᐎᑭᑑᐙᒡ ᒦᓇᓐ ᐃᐃᒫ ᑳᐲᑌᑭᓐ ᐗᑲᑖᒥᓇᓐ᙮ ᒦ ᓴ ᐃ ᑳᐃᔑᓭᓂᒃ᙮ 12ᑮᐱ ᓵᑲᑮᓂᐗᓐ ᑕᔥ ᐃᓂ ᑳᑕᓶᐙᓇᑲᑭᓐ ᑭᑎᑳᓂ ᑫᑰᓇᓐ ᑖᐱᔥᑰ ᐊᔥᑭᐸᑰᓐ ᒥᓂᒃ ᐁᑎᓄᐎᐙᒡ ᑳᒦᓂᐗᑭᓐ ᑭᑎᑳᓀᓴᓐ, ᐃᑭ ᑲᔦ ᒦᓈᑎᑰᒃ ᒥᓂᒃ ᐁᑎᓄᐎᐙᒡ ᑳᓂᑖᐎᑭᑑᐙᒡ ᒦᓇᓐ ᐃᐃᒫ ᑳᐲᑌᑭᓐ ᐗᑲᑖᒥᓇᓐ᙮ ᐐᑫ ᑕᔥ ᐅᑮ ᒥᓍᐸᑖᓐ᙮ 13ᒦᓇᐙ ᑕᔥ ᑮᐊᓂ ᑎᐱᑲᓐ, ᑮᐊᓂ ᑭᔐᐹᐗᑲᓐ ᑲᔦ, ᒦ ᐃ ᑮᓂᓱᑮᔑᑲᓂᓂᒃ᙮
14ᑭᔐᒪᓂᑑ ᑕᔥ ᑮᐃᑭᑐ, ᑕᑲ ᑕᐊᔮᒪᑲᓅᓐ ᑫᐅᒋᐙᓭᔮᒃ ᐋᓴᒥᑮᔑᒃ, ᒋᐅᒋ ᓀᓈᐎᓂᑳᑌᑭᓐ ᑳᑮᔑᑲᑭᓐ, ᑳᑎᐱᑲᑭᓐ ᑲᔦ᙮ ᒦ ᓴ ᐃᐌ ᑫᐅᒋ ᑭᑭᓇᐙᒋ ᑭᑫᒋᑳᑌᑭᓐ ᐋᓃᓐ ᐁᔑ ᑮᔑᑲᒃ, ᐋᓃᓐ ᑲᔦ ᐊᐲ ᑫᐱᐴᕽ, ᐊᐲ ᑲᔦ ᑫᐐᑾᑎᓈᓂᐗᕽ᙮ 15ᑕᑲ ᑕᐊᔮᒪᑲᓅᓐ ᑫᐙᓭᔮᑭᓐ ᐋᓴᒥᑮᔑᒃ ᑫᐅᒋᐙᓭᔮᒃ ᐅᐅ ᐊᑭ᙮ ᒦ ᓴ ᐃ ᑳᐃᔑᓭᓂᒃ᙮ 16ᒦᑕᔥ ᑭᔐᒪᓂᑑ ᑳᐃᔑ ᐅᔑᑑᒡ ᓃᔑᓐ ᑫᒋ ᐙᓴᑯᓀᓂᑭᓐ; ᑮᓯᓲᓐ ᑫᑎᐯᑕᒥᓂᒡ ᑮᔑᑲᓐ ᔑᑾ ᑎᐱᑭᑮᓯᓲᓐ ᑫᑎᐯᑕᒥᓂᒡ ᑎᐱᑲᓐ᙮ ᐗᓇᑯᔕᐞ ᑕᔥ ᑲᔦ ᐅᑮ ᐅᔑᐋᐞ᙮ 17ᒦᐗᐞ ᐅᐅ ᑳᐃᔑ ᐸᑭᑎᓈᒡ ᐋᓴᒥᑮᔑᒃ ᒋᐙᓭᔥᑲᒥᓂᒡ ᐊᑮᓂ᙮ 18ᒋᑎᐯᑕᒥᓂᒡ ᑳᑮᔑᑲᓂᓂᒃ, ᑳᑎᐱᑲᓂᓂᒃ ᑲᔦ ᒋᓀᓈᐎᔥᑲᒥᓂᒡ ᑳᐙᓭᔮᓂᒃ, ᐅᒋ ᑳᑲᔥᑮᑎᐱᑲᓂᓂᒃ᙮ ᑭᔐᒪᓂᑑ ᑕᔥ ᐅᑮ ᒥᓍᐸᑖᓐ᙮ 19ᑮᐊᓂ ᑎᐱᑲᓐ ᑕᔥ, ᒦᓇᐙ ᐁᑮ ᐊᓂ ᑭᔐᐹᐗᑲᒃ, ᒦ ᐃ ᑮᓃᐎᑮᔑᑲᓂᓂᒃ᙮
20ᒦᓇᐙ ᑕᔥ ᑭᔐᒪᓂᑑ ᑮᐃᑭᑐ, ᑕᑲ ᑕᐹᑏᓄᐗᒃ ᓂᐲᕽ ᑳᐊᔮᐙᒡ ᑫᒨᔥᑭᓀᐙᒡ ᐃᐃᒫ ᓂᐲᕽ᙮ ᑕᑕᔑ ᐸᐹᒥᓭᐗᒃ ᑲᔦ ᐱᓀᔒᔕᒃ ᓀᐗᒋᑮᔑᒃ᙮ 21ᒦᑕᔥ ᑳᐃᔑ ᐅᔑᐋᒡ ᑭᒋ ᑎᓄᐎᑳᓇᐞ ᐃᐃᒫ ᑭᒋᑲᒦᕽ ᒋᐊᔮᓂᒡ᙮ ᐅᑮ ᐅᔑᐋᐞ ᑲᔦ ᑲᑭᓇ ᓂᐲᕽ ᑳᐊᔮᓂᒡ ᑳᐗᑲᐐᓂᒡ ᐃᐃ ᐌᑸᓄᓂᒡ ᐃᐃᒫ ᓂᐲᕽ, ᐊᓅᒡ ᐁᑕᓶᐙᓇᑭᓯᓂᒡ, ᑲᑭᓇ ᑲᔦ ᑳᐱᒥᓭᓂᒡ ᐱᓀᔒᔕᐞ ᐋᓃᓐ ᐁᑕᓶᐙᓇᑭᓯᓂᒡ᙮ ᐅᑮ ᒥᓍᐸᑖᓐ ᑕᔥ ᐃᐃ ᑳᑮ ᐙᐸᑕᕽ᙮ 22ᑭᔐᒪᓂᑑ ᑕᔥ ᐅᑮᐃᓈᐞ ᒋᒥᓄᓭᓂᒡ ᐁᑮ ᐃᑭᑐᒡ, ᓂᑖᐎᑭᓈᐗᓱᒃ ᒋᓂ ᐹᑏᓄᔦᒃ, ᒥᓯᐌ ᐊᓂ ᐊᔮᒃ ᐅᐅᒫ ᑭᒋᑲᒦᕽ, ᑕᓂ ᐹᑏᓄᐗᒃ ᑲᔦ ᐱᓀᔒᔕᒃ ᐗᑭᑕᑲᒥᒃ᙮ 23ᒦᓇᐙ ᑮᐊᓂ ᑎᐱᑲᓐ, ᑮᐊᓂ ᑭᔐᐹᐗᑲᓐ ᑲᔦ᙮ ᒦ ᓴ ᐃ ᑮᓈᓄᑮᔑᑲᓂᓂᒃ᙮
24ᒦᓇᐙ ᑕᔥ ᑭᔐᒪᓂᑑ ᑮᐃᑭᑐ, ᑕᑲ ᑕᐊᔮᐗᒃ ᐊᔭᐋᐎᔕᒃ ᐗᑭᑕᑲᒥᒃ, ᐊᓅᒡ ᒋᑕᓶᐙᓇᑭᓯᐙᒡ᙮ ᐊᐗᑳᓇᒃ ᑕᐊᔮᐗᒃ, ᐃᑭ ᑲᔦ ᑳᐱᒨᑌᐙᒡ, ᐱᑾᒋ ᐊᔭᐋᐎᔕᒃ ᑲᔦ᙮ ᒦ ᓴ ᐃ ᑳᐃᔑᓭᓂᒃ᙮ 25ᒦᑕᔥ ᐃᐃ ᓇᑫ ᑳᐃᔑ ᐅᔑᐋᒡ ᐱᑾᒋ ᐊᔭᐋᐎᔕᐞ, ᒥᓂᒃ ᐃᑯ ᐁᑕᓶᐙᓇᑭᓯᓂᒡ ᒌᔑᐊᔮᓂᒡ, ᐅᑮ ᐅᔑᐋᐞ ᑲᔦ ᐊᐗᑳᓇᐞ ᐁᑕᓶᐙᓇᑭᓯᓂᒡ ᒌᔑᐊᔮᓂᒡ᙮ ᑲᑭᓇ ᑲᔦ ᒥᑕᑲᒥᒃ ᑳᐱᒨᑌᓂᒡ, ᐁᑕᓶᐙᓇᑭᓯᓂᒡ ᐅᑮ ᐅᔑᐋᐞ᙮ ᑭᔐᒪᓂᑑ ᑕᔥ ᐅᑮ ᒥᓍᐸᑖᓐ᙮
26 # 1Co 11.7. ᑭᔐᒪᓂᑑ ᑕᔥ ᑮᐃᑭᑐ, ᑕᑲ ᐅᔑᐋᑖᓂᒃ ᐊᐎᔭᒃ ᐯᒫᑎᓯᐙᒡ ᑳᐃᔑᓈᑯᓯᔭᕽ ᐃᔑᐋᑖᓂᒃ, ᐁᔑᐊᔮᔭᕽ ᑲᔦ ᒌᔑᐊᔮᐙᒡ᙮ ᐅᑲ ᑎᐯᓂᒫᐙᐞ ᑕᔥ ᑭᓅᔐᐞ ᐃᐃᒫ ᑭᒋᑲᒦᕽ ᐁᔮᓂᒡ, ᐱᓀᔒᔕᐞ ᑲᔦ ᓀᐗᒋᑮᔑᑯᕽ ᐁᔮᓂᒡ, ᐊᐗᑳᓇᐞ ᑲᔦ, ᑳᐸᐹᒨᑌᓂᒡ ᑲᔦ᙮ ᒥᓯᐌ ᑲᔦ ᐊᑮᓂ ᐅᑲ ᑎᐯᑖᓈᐙ᙮ 27#Gen 5.1,2. ᒦᑕᔥ ᑳᐃᔑ ᐅᔑᐋᒡ ᐊᐎᔭᐞ ᐯᒫᑎᓯᓂᒡ ᐁᑮ ᐃᔑᐋᒡ ᑖᐱᔥᑰ ᐁᔑᓈᑯᓯᒡ᙮ ᒪᔮ ᓴ ᐱᑯ ᐁᔑᓈᑯᓯᒡ ᐁᑮ ᐃᔑᐋᒡ᙮ ᐅᑮ ᐃᔑᐋᐞ ᒌᓂᓃᐎᓂᒡ, ᒌᑴᐎᓂᒡ ᑲᔦ᙮ #Mat 19.4; Mrk 10.6. 28ᒦᑕᔥ ᑳᐃᓈᒡ ᒋᒥᓄᓭᓂᒡ᙮ ᐅᐅ ᐅᑮᐃᓈᐞ, ᓂᑖᐎᑭᓈᐗᓱᒃ ᒋᓂ ᐹᑏᓄᔦᒃ, ᒥᓯᐌ ᐊᓂ ᐊᔮᒃ ᐃᐃᒫ ᐊᑮᕽ᙮ ᑎᐯᑕᒫᓱᒃ ᐊᑭ᙮ ᑎᐯᓂᒥᑰᒃ ᑭᓅᔐᒃ ᑭᒋᑲᒦᕽ ᑳᐊᔮᐙᒡ, ᐱᓀᔒᔕᒃ ᑲᔦ ᓀᐗᒋᑮᔑᒃ ᑳᐊᔮᐙᒡ, ᑲᑭᓇ ᑲᔦ ᑫᑰᓐ ᑳᐱᒫᑕᒃ ᑳᐗᐙᑲᐐᒪᑲᒃ ᐗᑭᑕᑲᒥᒃ᙮ 29ᒦᔥ ᑲᔦ ᑳᐃᓈᒡ, ᐃᓇᔥᑫ, ᑲᑭᓇ ᑭᒦᓂᓂᓂᒻ ᑳᒦᓂᐗᑭᓐ ᑭᑎᑳᓀᓴᓐ ᐅᐅᒫ ᒥᓯᐌ ᐗᑭᑕᑲᒥᒃ, ᑲᑭᓇ ᑲᔦ ᑎᓄᐙᑎᑰᒃ ᑳᒦᓂᐎᐙᒡ ᑳᐗᑲᑖᒥᓂᐎᐙᒡ ᒦ ᐃᐌ ᑫᐅᒦᒋᒥᒥᔭᓐ᙮ 30ᑲᑭᓇ ᑲᔦ ᐊᔭᐋᐎᔕᒃ ᒦᓈᐗᒃ ᑲᑭᓇ ᑭᑎᑳᓇᓐ ᑳᓂᑖᐎᑭᓂᓂᑭᓐ ᒋᒦᒋᐙᒡ, ᐃᑭ ᑲᔦ ᑲᑭᓇ ᐱᓀᔒᔕᒃ, ᑳᐱᒨᑌᐙᒡ ᑲᔦ ᒥᑕᑲᒥᒃ᙮ ᒥᓂᒃ ᓴ ᑯ ᐯᒫᑎᓯᐙᒡ ᐊᔭᐋᐎᔕᒃ ᒦ ᐃ ᐁᔑ ᒦᓇᒀ ᒋᔑ ᐅᒦᒋᒥᒥᐙᒡ᙮ ᒦ ᓴ ᐃ ᑳᐃᔑᓭᓂᒃ᙮ 31ᑭᔐᒪᓂᑑ ᑕᔥ ᐅᑮ ᐙᐸᑖᓐ ᑲᑭᓇ ᑫᑰᓐ ᑳᑮ ᐅᔑᑑᒡ, ᐋᐱᒋ ᑕᔥ ᐐᑫ ᑮᐅᓂᔑᔑᓂᓂ᙮ ᒦᓇᐙ ᑕᔥ ᑮᐊᓂ ᑎᐱᑲᓐ, ᐁᑮ ᐊᓂ ᑭᔐᐹᐗᑲᒃ ᑲᔦ᙮ ᒦ ᐃ ᑮᓂᑯᑣᓱᑮᔑᑲᓂᓂᒃ᙮
നിലവിൽ തിരഞ്ഞെടുത്തിരിക്കുന്നു:
ᒉᓂᓯᔅ 1: OJBS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Ojibwe Shorter Bible (Syllabic Script) © 2008 Canadian Bible Society
