Создавање 29:11-35

Сподели

Создавање 29:11-35 Свето Писмо: Стандардна Библија 2006 (66 книги) (MK2006)

И ја бакна Јаков Рахила, па извика и заплака. Потоа ѝ кажа на Рахила дека тој му е род на таткото нејзин и дека е син на Ревека. А таа отрча, па го извести таткото свој. А кога чу Лаван за Јаков, синот на неговата сестра, му излезе во пресрет, го прегрна и бакна, и го воведе во својот дом. А тој му раскажа на Лаван сѐ. Лаван, пак, му рече: „Ти си на­вистина моја коска и моја плот!“ И тој остана кај него цел месец. Тогаш му рече Лаван на Јаков: „Зарем бесплатно ќе ми служиш зашто си ми род? Кажи ми, која да ти биде платата?“ А Лаван имаше две ќерки: на постарата ѝ беше името Лија, а на по­младата Рахила. На Лија очите и беа болникави, а Рахила имаше убава става и убаво лице. Јаков ја засака Рахила, па рече: „Ќе ти служам седум години за Рахила, твојата помала ќерка.“ Тогаш Лаван рече: „Подобро тебе да ти ја дадам, отколку на друг; остани кај мене!“ И отслужи Јаков за Рахила седум години, и тие му се причинија како неколку дена, зашто ја сакаше. И му рече Јаков на Лаван: „Дај ми ја жената, зашто дојде времето да влезам кај неа!“ И ги повика Лаван сите луѓе од тоа место и направи свадбена гозба. А вечерта ја зеде Лија, ќерката своја, и ја воведе кај Јаков, и тој влезе кај неа. И Лаван ѝ ја даде Зелфа, слугинката своја, на Лија, ќерката своја, за да ѝ биде слугинка. А кога настана утрото, се виде дека тоа била Лија, па му рече Јаков на Лаван: „Што ми направи? Нели за Ра­хила ти слугував? Зошто ме измами?“ А Лаван му рече: „Не бива во на­шето место да се омажи помалата пред постарата. Помини оваа седмица со неа, па ќе ти ја дадам и другата, за која ќе ми слу­гуваш други седум години.“ И Јаков направи така, и помина со неа една седмица. Потоа му ја даде Ла­ван за жена Рахила, ќерката своја. И ѝ ја даде Лаван слугинката своја Билха на Рахила, ќерката своја, за да ѝ биде слугинка. Тогаш Јаков влезе кај Рахила. И Рахила повеќе ја засака отколку Лија. И така му служеше на Лаван уште други седум години. Кога виде Господ дека Лија не е сакана, ѝ ја отвори утробата нејзина, а Рахила остана неплодна. Лија зачна и роди син и го нарече Рувим, велејќи: „Господ милостивно погледна на мојата несреќа; сега ќе ме засака мажот мој.“ И пак зачна, и роди син, па рече: „Господ чу дека не сум сакана, па ми го даде и овој.“ И го нарече Симеон. И одново зачна, пак роди син и рече: „Сега веќе ќе ми се наклони мажот мој, оти му родив три сина!“ Затоа му стави име Левиј. А кога пак зачна, и роди син, рече: „Сега ќе Го славам Господа!“ Затоа го нарече Јуда. И престана да раѓа.

Создавање 29:11-35 Библија: Стариот и Новиот Завет, Константинов (MKB)

Потоа ја пољуби Рахила, а тогаш заплака. И Јаков ѝ кажа на Рахила дека тој е внук од сестра на татка ѝ, син Ревекин. Таа се растрча и му соопшти на татка си. Кога Лаван ја чу веста за Јакова, за синот на својата сестра, му истрча во пресрет. Го прегрна и го пољуби, па го доведе во својот дом. Му раскажа на Лавана сѐ што му се случи. А тогаш Лаван рече: „Навистина, ти си моја коска и мое месо!“ И Јаков живееше кај него цел месец. Лаван му рече: „Зар ќе ми служиш бесплатно, зашто си ми внук од сестра! Кажи ми колку ќе бараш за наем?“ А Лаван имаше две ќерки. На повозрасната името ѝ беше Лија, а на помладата Рахила. Лија имаше слаби очи, а Рахила беше складна и убава на лице. Бидејќи Јаков се вљуби во Рахила, рече: „Ќе ти служам седум години за твојата помлада ќерка Рахила.“ Лаван одговори: „Подобро да ти ја дадам тебе, отколку на некој туѓинец. Остани со мене!“ Така Јаков служеше, за Рахила, седум години, ама му се видоа, заради љубовта кон неа, како неколку дни. Потоа Јаков му рече на Лавана: „Дај ми ја мојата жена, зашто моето време се исполни, па сакам да влезам при неа.“ Лаван ги собра сите луѓе од местото и им даде гозба. Но вечерта ја зеде својата ќерка Лија и неа ја воведе кај Јакова, и тој ѝ пријде. Лаван ѝ ја даде својата слугинка Зелфа на ќерка си Лија за слугинка. Кога бидна утро, а тоа, ете, Лија! Тогаш Јаков му рече на Лавана: „Зошто ми стори така! Зар не ти служев јас за Рахила? Зошто ме измами?“ Лаван одговори: „Во нашето место не е обичај помладата да се омажи пред повозрасната. Заврши ја со неа свадбенава седмица, а тогаш ќе ти ја дадам и втората, за уште седум години служба при мене.“ Јаков се согласи: ја сврши свадбената седмица. Тогаш Лаван му ја даде и ќерка си Рахила за жена. Лаван ѝ ја даде својата слугинка Вала на ќерка си Рахила за слугинка. Тогаш Јаков ѝ пристапи на Рахила. Ја љубеше Рахила повеќе отколку Лија. И така му служеше на Лавана уште седум години. Господ виде дека Лија не е љубена, па ја направи плодна, додека Рахила остана неротка. Лија зачна и роди син; му го даде името Рувим, а тоа значи, како што протолкува таа: „Господ ја виде мојата неволја и затоа сега мојот маж ќе ме љуби.“ Пак зачна и роди син, па изјави: „Господ чу дека не сум љубена, затоа ми го даде и овој, и го нарече Симеон.“ Пак зачна и роди син, па изјави: „Сега мојот маж ќе се приврзе кон мене: му родив три сина.“ Затоа го нарекоа со името Левиј. А кога зачна уште еднаш и роди син, изјави: „Ќе го фалам Господа овој пат.“ Затоа на синот му даде име Јуда. И прекрати да раѓа.