MATEO 12
12
Gu jaꞌtkam tugiꞌñ gu Jesuus nam tu kaipgaidhat tu koꞌiidhaꞌ gu tiriik sia ku janoꞌ tɨi aagix na cham tum juandaꞌ
(Mr. 2:23‑28; Lk. 6:1‑5)
1Baꞌ maaꞌnnim na paiꞌ dhuuk aagix kaꞌ na cham tum juandaꞌ ja bui gu dai Israel kam jaꞌtkam, ma jii gu Jesuus, moo miꞌ buusnichuꞌ na paiꞌ tɨ ɨx kaꞌ gu tiriik. Baꞌ gu jaꞌtkam tugiꞌñ na ja bɨɨm mu jim, tu kaipgaidhat tu koꞌiim am gu tiriik, nam guꞌ bax bhioꞌ. 2Guꞌ baꞌ nam guꞌ jaiꞌ muiꞌp jiim jia guiꞌ nam pariseos jum tɨɨtɨꞌndaꞌ, baꞌ am jix bhaaktuꞌ am nam ja nɨiꞌñ nam puiꞌ jɨꞌ tu buim gu jaꞌtkam tugiꞌñ gu Jesuus, baꞌp tɨtda am:
―¿Jax kum baꞌ tu kaipgaidhat tu koꞌiim gu tiriik dhim jaꞌtkam tuk? ¿Kux cham maat am aa na xib aagix na cham tum juandaꞌ?
3Baꞌp ja tɨtda gu Jesuus:
―¿Kux aapiꞌm cham jɨꞌxkat tu jiñkuiꞌñ aa miꞌ na paiꞌ tu uaꞌñix gu ñioꞌkiꞌñ gu Dios nat jax tu duu gu Dabii gio gu jaꞌtkam tugiꞌñ janoꞌ nam paiꞌ dhuuk ba uaꞌmaim? 4Na mɨt tu juu bo gu paan gux xidhuu kam guiꞌ na miꞌ tɨkiix kat gɇꞌ chiop na saak dai guiꞌx bhaaiꞌ nam kuaꞌdaꞌ guiꞌ nam miꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, cham tuꞌ gu tuꞌ jaꞌppɨx jaꞌtkam. 5Gio baꞌ miꞌ nat paiꞌp tu uaꞌnak ɨp gu Moisees nap jum kaiꞌch ɨp na saak guiꞌ nam bhaiꞌ gɇꞌ chiop ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, saak cham tuꞌm uaꞌtulhiꞌñdhaꞌ am sia kum pu tu juan janoꞌ na paiꞌ dhuuk aagix na cham tum juandaꞌ gɨt. 6Baꞌ aañ yaꞌ pu jam tɨtda na maadɨt ya oirɨ nax ioꞌm jum aaꞌ na pim tuꞌ kaꞌm nɨiꞌñdhaꞌ, cham tuꞌ puiꞌ na pim jax tuꞌ kaꞌm tɨ nɨiꞌñ bhaiꞌ gɇꞌ chiop. 7Cham dho bak maatɨt kɇɇ pim jia gu puiꞌ na jax jaꞌk tu uaꞌñix gu ñioꞌkiꞌñ gu Dios na jaꞌpnim kaiꞌch: “Guꞌ aañ nañ jix aaꞌ ji na pim jix chu joiꞌgɨꞌndaꞌ, cham tuꞌ na pim jax jum aaꞌndaꞌ nañ aañ jix aaꞌ na pim dai na pim tuñ makgɨrxiꞌñdhaꞌ pɨx gu tuꞌ sasoiꞌ, dhiꞌ kɨꞌn miꞌ puiꞌ ba jiim japim nañ jax jix aaꞌ.” Na guꞌ noꞌ pim jix maatɨt kɇɇkɇꞌ gɨt gu dhiꞌ puiꞌ jɨꞌ na jax jaꞌk jum kaiꞌch, cham tuꞌ puiꞌ kaiꞌchdhaꞌ pim gɨt nam jum uaꞌtulhiꞌñ dhiñ jaꞌtkam tuk, sia kum guꞌ tɨi cham tuꞌm uaꞌtulhiꞌñ. 8Baꞌ aañ nat bhañ joot guñ Gɨꞌkoraꞌ yaꞌ pu jam tɨtda na cham jax bua gu tuꞌ noꞌñ jax jix dhuñiim janoꞌ na paiꞌ dhuuk aagix na tɨi cham tum juandaꞌ gɨt.
Gu Jesuus na ba duaꞌñdhaꞌ maaꞌn gu maaꞌnkam nax muuk kaꞌ maap dɨr gu nobiiꞌñ
(Mr. 3:1‑6; Lk. 6:6‑11)
9Baꞌ na miꞌ jɨꞌ puiꞌ xi chu ja aꞌgidhimɨk gu Jesuus gu jaꞌtkam, ma jii maaꞌn kap mu jaꞌp nam paiꞌ tu daandaꞌ gu Israel kam jaꞌtkam. 10Baꞌ moo maaꞌn miꞌp jaiꞌch kaꞌ gu maaꞌnkam na maap dɨr jix muuk kaꞌ gu nobiiꞌñ. Baꞌ guiꞌ nam sap jix mat kaꞌ gu ñioꞌkiꞌñ gu Dios gio baꞌ guiꞌ nam pariseos jum tɨɨtɨꞌndaꞌ, ba tɨkkaꞌ am gu Jesuus noꞌ sap jix bhaaiꞌ na duaꞌñdhaꞌ gu maaꞌnkam guiꞌ na maap dɨr jix muuk gu nobiiꞌñ janoꞌ na paiꞌ dhuuk aagix na cham tum juandaꞌ, sap baꞌ noꞌ jax kaiꞌch nax bhaaiꞌ na duaꞌñdhaꞌ, dhiꞌ bhaan jix bhaiꞌ bhɨɨyaꞌ am nam iattulhdhai tu chiñiaꞌ nam muꞌaaꞌ.
11Guꞌ ji na guꞌp ja tɨtda gu Jesuus:
―¿Kux aapiꞌm jaroo maadɨt moo daas na miꞌ pɨx xi nɨiꞌñdhaꞌ gu soigaꞌn noꞌt miꞌ paiꞌ ba gɨi jax chuꞌm tɨ dɨꞌn kɨr, noꞌ guꞌ janoꞌ pɨk na paiꞌ dhuuk aagix na cham tum juandaꞌ? ¿Cham aa guꞌ moo janoꞌ mu jimɨi xi bhiaji ap, cham tuꞌ nap guꞌ miꞌ pɨx xi nɨiꞌñdhaꞌ? 12Guꞌ gi baꞌ dhiꞌ nar maaꞌnkam, ¿cham aa guꞌx ioꞌm jum aaꞌ nañ jix bhaiꞌ dhuñiaꞌ, cham tuꞌ puiꞌ na jax gu tuꞌ soiꞌ? Jaꞌpji na moo pu cham jax bua ji noꞌñ jax jix dhuñiim gux bhaiꞌm duukam, sia ku cham tum juan.
13Baꞌ puiꞌ xi chɨꞌɨɨk jup tɨtda guiꞌ nax muuk kaꞌ gu nobiiꞌñ:
―Ea nap xi sɨlhñaꞌ dhim nob jiñ jaduuñ.
Baꞌ guiꞌ jaꞌp jup xi sɨlh, jix kɨɨꞌp jum duu miꞌ jotmodaꞌ jaꞌp na jax gu jaꞌp dɨr kam nobiiꞌñ, panaas ku moo pu cham paiꞌ muuk kat. 14Baꞌ gu pariseos bhaakuk miꞌ dhɨr pu jii mɨt, baꞌ ba tu aꞌga mɨt nam jax jaꞌk duñiaꞌ nam baꞌ tu chiñiaꞌ nam muꞌaaꞌ gu Jesuus.
Na jax jaꞌk jix maatɨꞌ na gu Jesuus jir diꞌ guch Xoiꞌkam
15Guꞌ ji nat guꞌ pu jii gu Jesuus nat jax puiꞌ tɨ kai nam bax muꞌaam, baꞌ muiꞌ jaꞌtkam pɨx chuꞌp jum duu mɨt na mɨt ba oi. Baꞌ gammɨjɨ kikcham na jax aꞌjim, xi ja duduaꞌñdhidhat bɨɨx gux kakoꞌk kam nam jɨꞌk mi jaꞌp jix jaiꞌch kaꞌ. 16Baꞌ xi ja sooꞌmchulhdhidhat nam sap cham jaroiꞌ aagiꞌñdhaꞌ nat jaroiꞌ ja duduaꞌñ. 17Baꞌ dhiꞌ puꞌñi jaꞌk tum kuugalh gu puiꞌ nat jax jaꞌk tu uaꞌnak gu Isaiiyas guiꞌ na bɨjɨk bhaankam tu aꞌgimɨk gu Dios, na jaꞌpnim kaiꞌch:
18Dhiꞌñi jir diꞌ guñ mar na ñich bhaan tɨ tɨɨ,
baꞌx ioꞌm jix dhaꞌ iñ gio nañ jix bhaiꞌñ chaat buiñor.
Baꞌ tajaañxidhaꞌ iñ gux Dhuuduꞌ kam jix Uañ jiñ Iiꞌmdaꞌ,
miꞌ dhɨr baꞌ dai na ba tu ja aagiꞌñdhaꞌ gu jaꞌtkam nam jax jaꞌk duñiaꞌ na baꞌx bhaiꞌ tu ja jimiaꞌ.
19Baꞌ cham paiꞌ dhuuk jaroiꞌ kokdaꞌ,
ni na cham paiꞌ dhuuk am gɇꞌ kɨꞌn jiñkuiꞌñdhaꞌ gu jaroiꞌ,
ni mu jaꞌp dho moo na paiꞌ jax gɇꞌ daaꞌñxim jir kiicham kaꞌ ku cham paiꞌ pɨx am jaroiꞌ kɇɇkɇꞌ na am bhaamdaꞌ kɨꞌn tu aꞌgadaꞌ.
20Gio baꞌ na bɨɨx pɨx jix ja kɨɨgalhiꞌñdhaꞌ gu jaꞌtkam,
cham tuꞌ jaroiꞌ maadɨt gampaiꞌ biaꞌkaꞌ.
Gio na gammɨjɨ pu tu ja aagiꞌñdhaꞌ gu jaꞌtkam nam jax jaꞌk duñiaꞌ na baꞌx bhaiꞌ tu ja jimiaꞌ.
21Baꞌ bɨɨx na jɨꞌx jir oiꞌñgaꞌn bax mat kaꞌ am nax bhaaiꞌ nam dai guiꞌ buiñor pɨx jix biiñak kaꞌ nam baꞌ jimiaꞌ jix dhaam jaꞌk buiñor gu Dios.
Gu Jesuus nam puiꞌ ba aiꞌchuxdhaꞌ gu jaꞌtkam na jaꞌook bhaan tɨ nɨidhim
(Mr. 3:19‑30; Lk. 11:14‑23; 12:10)
22Baꞌ jaꞌxpɨx miꞌ ba aiꞌchulh jamɨt gu Jesuus maaꞌn gu maaꞌnkam na bhaan jup tuiꞌñgɨdaꞌ gu cham kɨɨꞌ iiꞌmdaꞌ na puiꞌ jaꞌk duukaꞌ na cham ñia kaꞌ gio na cham tu ñiokdaꞌ. Baꞌ cham jax ji chɨꞌɨɨk jup xi dhuaꞌñ gu Jesuus, jix kɨɨꞌ dho guꞌp jum duu, ba tu ñiok gio na bax ñia. 23Baꞌ gu jaꞌtkam na mɨt puiꞌ jɨꞌ tɨ tɨɨ, miꞌ puiꞌ pup tuꞌiiꞌ am, dai nam jup kaiꞌch:
―¿Dhiꞌ aa chi baꞌ saak bar diꞌ guch Xoiꞌkam guiꞌ na saak bha jimdaꞌ gɨt, nar boxiiꞌñ kaꞌ gu Dabii?
24Baꞌ guiꞌ nam pariseos jum tɨɨtɨꞌndaꞌ na mɨt puiꞌ jɨꞌ ja kai nam kaiꞌch, jup ja tɨtda am:
―Chaam tuꞌ ji nar puiꞌ na pim jax ɨlhiiꞌñ. Jaꞌpji ja gɇꞌkam tuk ji gu cham kɨkɨɨꞌ iꞌiiꞌmdaꞌ na bhaan jup tuiꞌdhiꞌ dhi maaꞌnkam. Puiꞌ kum baꞌx jɨɨgiꞌñdhaꞌ na maiꞌ ja jootosdaꞌ gu bɨpnagaꞌn tuutuꞌm cham kɨkɨɨꞌ iꞌiiꞌmdaꞌ ja aꞌm dɨr gu jaꞌtkam.
25Baꞌp ja tɨtda gu Jesuus, na guꞌx bhaiꞌx maat nam jax jum aagɨt jup kaiꞌch:
―Matgɨm cham tuꞌ ji nar puiꞌ na pim jax ɨlhiiꞌñ jiñ jaaduñ. Jax dhui na guꞌ gu ja gɇꞌkam tuk gu cham kɨkɨɨꞌ iꞌiiꞌmdaꞌ jaꞌp pɨx ji buusan na jax paiꞌ gɇꞌ kiicham noꞌm cham maaꞌn ñiꞌook jup duuk gu tuꞌ noꞌm tɨi jax jix dhuñiik. Piam paiꞌ noꞌ palhɨɨp jir kiicham piam ku guꞌ gu dai maap jum oiꞌdhagɨm, noꞌm cham maaꞌn ñiꞌook jup duuk, dho pu cham tuꞌ dho jax ji dhuñiaꞌ am, nam guꞌ daix bhaak kaꞌ. 26Baꞌ puꞌñi jaꞌk jup ji buusan gu ja gɇꞌkam tuk gu cham kɨkɨɨꞌ iꞌiiꞌmdaꞌ noꞌt tɨi bhaiꞌ ji bhaam ja bui gu bɨpnagaꞌn tuutuꞌm cham kɨkɨɨꞌ iꞌiiꞌmdaꞌ, nam guꞌ cham maaꞌn ñiꞌook kap duukaꞌ nam guꞌ ba bhaakuꞌ buiñor. 27Guꞌ baꞌ aapiꞌm na pim puiꞌ kaiꞌch na puiꞌ aañ jiñ aꞌm jup tuiꞌdhiꞌ gu ja gɇꞌkam tuk gu cham kɨkɨɨꞌ iꞌiiꞌmdaꞌ, ¿aapiꞌm baꞌ moo puꞌñi ɨp aa gu jam jaꞌtkam tuk guiꞌ nam jam kaichuꞌ, puꞌñi aa ja gɇꞌkam tuk gu cham kɨkɨɨꞌ iꞌiiꞌmdaꞌ ja aꞌm jup tuiꞌdhiꞌ, nam baꞌx ja jɨɨgiꞌñdhaꞌ nam puꞌñi maiꞌ ja jootosdaꞌ gu cham kɨkɨɨꞌ iꞌiiꞌmdaꞌ ja aꞌm dɨr gu jaꞌtkam? ¿Piam aa na guꞌ cham? Na guꞌ puꞌñi pɨx jaꞌk ji buusniaꞌ nañ jax ba kaiꞌch. 28Guꞌ aañ matgɨm gux Dhuuduꞌ kam jix Uañ Iiꞌmdagaꞌn ji gu Dios nañ aꞌm jup tuiꞌdhiꞌ, puiꞌ ku baꞌx bhaaiꞌ nañ maiꞌ ja jootos gu cham kɨkɨɨꞌ iꞌiiꞌmdaꞌ ja aꞌm dɨr gu jaꞌtkam, na pim baꞌ ba machiaꞌ na dhiꞌ jaꞌp jir jup duukam nat yaꞌ bam ai na pim paiꞌ dhuuk machiaꞌ na pim jax jaꞌk duñiaꞌ na baꞌ gammɨjɨ jam aꞌm ba tɨ nɨiꞌñdhaꞌ gu Dios.
29’Na guꞌ cham jir am gu jaroiꞌ na mu baakɨi baꞌkiram tɨ ɨɨxdhaꞌ gu bɨxchugaꞌn gu maaꞌnkam jix oogɨm noꞌm guꞌ gook dɨt maaꞌn ñiꞌook jup duuk. Dai noꞌm cham maaꞌn ñiꞌook jup duuk na baꞌx bhaaiꞌ na xi buuprai tɨ ɨxdhaꞌ gu bɨxchugaꞌn.
30’Gio puiꞌ na jax gu jaꞌtkam jɨꞌk gook noꞌm mu paiꞌ tu or noꞌm cham maaꞌn ñiꞌook jup duuk. Baꞌ maaꞌn noꞌ bɨɨx gaamuim guiꞌ na jɨꞌk oraidhaꞌ, dhiꞌ jaꞌp ji buusniaꞌ na tu ja aꞌgidhaꞌ gu jaꞌtkam nañ jax jaꞌk ɨlhiiꞌñdhaꞌ aañ. Guꞌ baꞌ gu jumai noꞌ maiꞌ xi iabuidhat guiꞌ na jɨꞌk tɨip oraidhaꞌ, dhiꞌ jaꞌp jup ji buusniaꞌ na cham jɨꞌxkat puiꞌ tu ja aꞌgidhaꞌ gu jaꞌtkam nañ aañ jax jup ɨlhiiꞌñdhaꞌ, guꞌ jaꞌkbuiꞌ kat maakam xi ja iatgiꞌñdhaꞌ ji na dɨɨlh jax jup ɨlhiiꞌñdhaꞌ. Dhiꞌ baꞌ jaꞌp jup ji buusandaꞌ na cham maaꞌn ñiꞌook jup duuk aañ jiñ bui.
31’Baꞌ aañ yaꞌ pu jam tɨtda na gu Dios jix bhaaiꞌ na tu ja uañdhaꞌ gu jaꞌtkam bɨɨx nam jɨꞌk jax jix uꞌuaꞌtulhdhix kaꞌ noꞌm soiꞌm ɨlhiiꞌñ buiñor. Piam noꞌm guꞌ gampaiꞌ pɨx biaꞌ gux Dhuuduꞌ kam jix Uañ Iiꞌmdagaꞌn gu Dios, noꞌ guꞌ tɨi ja mattuꞌn nam jix uꞌuaꞌtulhdhix, dho guꞌ pu cham dho tu ja uañdhaꞌ gu Dios gu ja uaꞌtulhdharaꞌ, nam guꞌ cham soiꞌm ɨlhiiꞌñdhaꞌ buiñor. 32Baꞌ noꞌm guꞌ gampaiꞌ pɨx jiñ biaꞌ aañ nat bhañ joot guñ Gɨꞌkoraꞌ, siax bhaaiꞌ na tu ja uañdhaꞌ gu Dios gu ja uaꞌtulhdharaꞌ noꞌm soiꞌm ɨlhiiꞌñ buiñor. Guꞌ baꞌ noꞌm guꞌ gux Dhuuduꞌ kam jix Uañ Iiꞌmdagaꞌn gu Dios gampaiꞌ pɨx biaꞌ, dho gi guꞌ pu cham jɨꞌxkat tu ja uañdhaꞌ ji gu Dios gu ja uaꞌtulhdharaꞌ sia pɨk nar jax kaꞌ gɨt, nam guꞌ cham soiꞌm ɨlhiiꞌñdhaꞌ buiñor.
Gu Jesuus na bhaan ji uaꞌrgidhai ba tu aꞌgaꞌ maaꞌn gu ɨꞌɨɨx na cham kɨɨꞌ iꞌbhaiꞌñchaꞌ noꞌ mɨt cham bhaiꞌ moikxi
(Lk. 6:43‑45)
33’Noꞌ pimɨt jix bhaiꞌ moikxi gu jax chuꞌm jam ɨꞌɨɨx, joidham jix kɨɨꞌ iꞌbhaiꞌñchaꞌ dho. Piam ku guꞌ noꞌ pimɨt cham bhaiꞌ moikxi, cham kɨɨꞌ iꞌbhaiꞌñchaꞌ dho. 34Baꞌ aapiꞌm puꞌñi ɨp noꞌ pim guꞌ cham jir kɨkɨɨꞌ jaꞌtkam, cham bhaaiꞌ na pim jax dhuix bhaiꞌ tu ñiokdaꞌ na jax jaꞌk jir am kaꞌ, na guꞌ dai puiꞌ jaꞌk jam chiñ am dɨr buusnidhaꞌ na pim jax jaꞌk jum aaꞌndaꞌ gu jam jujur am bhaan. 35Na guꞌ gu jaroiꞌ noꞌ dɨɨlh pur jix bhaiꞌkam, joidham jix bhaiꞌ tu ñiokdaꞌ, na guꞌ dai puiꞌ jaꞌk jum aaꞌndaꞌ juraꞌran bhaan. Guꞌ baꞌ gu jaroiꞌ noꞌ pu dɨɨlh cham jir kɨɨꞌ maaꞌnkam, giilhim jix buam tu ñiokdaꞌ, na guꞌ dai puiꞌ jaꞌk jup jum aaꞌndaꞌ juraꞌran bhaan. 36Baꞌ aañ yaꞌ pu jam tɨtda na bɨɨx matgilhiaꞌ jix dhaam jaꞌk na pim jɨꞌk jax jix buam tu ñiokdaꞌ, janoꞌ na paiꞌ dhuuk guñ Gɨꞌkoraꞌ ja aagiꞌñdhaꞌ bɨɨx gu jaꞌtkam nam jɨꞌk tuꞌ jax buimɨi yaꞌ dhi oiꞌñgaꞌn bhaan. 37Na guꞌ noꞌ pimɨt cham soiꞌm ɨlh buiñor na baꞌ tu jam uañdhaꞌ gu jam uaꞌtulhdharaꞌ, dai na pim pɨx am tɨꞌñchokaꞌ na jam aaꞌñdhai giilhim jam tulhiiñchudaꞌ, noꞌ pimɨt cham jaꞌp xi dhuuk gu dhiꞌ puiꞌ na pim jax jix buam tu ñiokdaꞌ.
Gu jaꞌtkam guiꞌ nam cham tuꞌ kaꞌm tɨ nɨiꞌñdhaꞌ nam tɨix aaꞌndaꞌ nax bhaiꞌm duukam jup tu duñiaꞌ gu Jesuus ja nɨiꞌñchudat
(Mr. 8:12; Lk. 11:29‑32)
38Baꞌ jaiꞌ dhɨt guiꞌ nam pariseos jum tɨɨtɨꞌndaꞌ gio baꞌ guiꞌ nam sap jix mat kaꞌ gu ñioꞌkiꞌñ gu Dios, ba chian am gu Jesuus na sap maaꞌn jup tu duñiaꞌ jix bhaiꞌm duukam ja nɨiꞌñchudat. Jup tɨtda am:
―Eap jix bhaiꞌm duukam xip duuñ nach tuꞌ cham paiꞌ dhuuk nɨiꞌñ.
39Guꞌ ji na guꞌp kaiꞌch gu Jesuus:
―Tɨix aaꞌ am dhi jaꞌtkam nam cham tuꞌ kaꞌm tɨ nɨiꞌñ nañ jix bhaiꞌm duukam jup tu duñiaꞌ ja nɨiꞌñchudat nam tuꞌ cham paiꞌ dhuuk pu chuꞌm nɨiꞌñ, guꞌ ji nañ guꞌ aañ cham tuꞌ puiꞌ tu duñiaꞌ, nam guꞌ cham tuꞌ miꞌ puiꞌ jimiik kat jup kaiꞌch na jax jix aaꞌ guñ Gɨꞌkoraꞌ. Dai gatuuk nam jiñ chɨgiaꞌ nañ puiꞌ jaꞌk jup jiñ dhuñiaꞌ nat jax jum duu bɨjɨk gu Jonaas. 40Baꞌ puꞌñi nat jax jum duu gu Jonaas nat baik tanoolh jup duu gio baik tukaaꞌ na mɨjɨ pu jim ɨrban dɨr gu gɇꞌ batoop, baꞌ aañ puꞌñi ɨp nat bhañ joot guñ Gɨꞌkoraꞌ, baik tanoolh gio baik tukaaꞌñ miꞌ pu yaasapkaꞌ dɨbɨɨr bɨtaꞌ. 41Baꞌ janoꞌ na paiꞌ dhuuk tum kuugalhdhaꞌ na ja aagiꞌñdhaꞌ guñ Gɨꞌkoraꞌ bɨɨx gu jaꞌtkam nam tuꞌ jax buimɨi yaꞌ dhi oiꞌñgaꞌn bhaan, guiꞌ nam Niinibe oiꞌñkat xi guꞌkɨi pu tɨꞌyaꞌ am na pim maaxik pu cham tuꞌ kaꞌm tɨ nɨiꞌñ. Na guꞌ gu Niinibe oiꞌñkam kat moo janoꞌ cham jax ji chɨꞌɨɨk miꞌ puiꞌ jii mɨt na jax jix aaꞌ guñ Gɨꞌkoraꞌ na paiꞌ dhuuk puiꞌ ba tu ja aꞌgiꞌñ gu Jonaas. Baꞌ aañ nañ xib yaꞌ oirɨ aapiꞌm jam bui, jix ioꞌm jir gɇꞌkam iñ, cham tuꞌ puiꞌ na jax gu Jonaas. 42Gio guiꞌ na bɨjɨk jix ioꞌm jup jir gɇꞌkam kat gu ubii na muni jaꞌk kiokat jurnip, puiꞌp xi kɨkboi puiꞌ xi chɨꞌyaꞌ na pim maaxik pu cham tuꞌ kaꞌm tɨ nɨiꞌñ. Na guꞌ guiꞌ jɨꞌ gu ubii jum dɨkooꞌñ nat mɨk dɨr bha jii nat bha kaim gu Salomoon guiꞌ na yaꞌr gɇꞌkam kat, na puiꞌ tɇ kɇɇkɇꞌ nax ioꞌm jix chu matdaꞌ kaꞌ. Baꞌ aañ nañ xib yaꞌ oirɨ aapiꞌm jam bui, jix ioꞌm jix chu matdaꞌ iñ, cham tuꞌ puiꞌ na jax gu Salomoon.
Gu Jesuus na bhaan ba tu aꞌgaꞌ maaꞌn gu cham kɨɨꞌ iiꞌmdaꞌ
(Lk. 11:24‑26)
43’Gu cham kɨɨꞌ iiꞌmdaꞌ noꞌt ba buus bhaan dɨr gu maaꞌnkam, ba jimiaꞌ mummɨ jaꞌp paiꞌ gampɨx jix chu gak kɨr, tu gaagidhaꞌ na pa jaꞌk jix bhaaiꞌ na kiichaꞌ. Baꞌ noꞌt cham paiꞌ ji chɨɨ nar joidham na kiichaꞌ, jup jum aaꞌndaꞌ: 44“Gi noꞌ ñich moo gio muiꞌp jii mummɨ nañ paiꞌ kiokat.” Baꞌ na gio bhaan jup ba bakiaꞌ gu maaꞌnkam, joidham tɨ tɨgiaꞌ, na guꞌ jaꞌp tɨ ɨlhiiꞌñdhaꞌ na cham ka tu tanaaraꞌ kaꞌ noꞌ bax kɨɨꞌ gu maaꞌnkam. 45Baꞌ xi dhaiꞌññiaꞌ na jaiꞌp ja baiꞌñmɨraꞌ gu bɨpnagaꞌn tuutuꞌm cham kɨkɨɨꞌ iꞌiiꞌmdaꞌ jɨꞌk xijum gook pup aixim guiꞌ nam giilhim xi chu xibua. Baꞌ nam paiꞌ dhuuk gio maap bhaiꞌp ba baapkiaꞌ bhaan gu maaꞌnkam, giilhim bhaiꞌ jim naanbichaꞌ dho gi ji baꞌ, cham tuꞌ puiꞌ kiaꞌ na jax bɨɨpɨꞌ dɨr. Baꞌ puꞌñi jaꞌk jup tu ja jimiaꞌ gu jaꞌtkam guiꞌ nam jɨꞌk cham tuꞌ kaꞌm tɨ nɨiꞌñdhaꞌ.
Gu jajaaꞌnniꞌñ gio gu dɨꞌɨɨꞌn gu Jesuus nam miꞌ ba aayaꞌ na paiꞌ ka oirɨdaꞌ
(Mr. 3:31‑35; Lk. 8:19‑21)
46Baꞌ na pui miꞌ ka tu ja aꞌgiꞌñchuꞌ gu Jesuus gu jaꞌtkam, miꞌ ba ai mɨt gu jajaaꞌnniꞌñ gio gu dɨꞌɨɨꞌn nam jix chu aꞌgidhamtuꞌ, baꞌ mummɨ jaꞌp dɨɨrap dɨr pɨx ji guguu mɨt. 47Baꞌ maadɨt mu ba aaꞌñdhim gu Jesuus, jup tɨtda:
―Muni mɨt ba ai gum jaaduñ gio gum naan. Muiꞌp sap xi jimdaꞌ nam tum aꞌgidhaꞌ.
48Baꞌp tɨtda gu Jesuus guiꞌ na miꞌ puiꞌ jɨꞌ kaiꞌch:
―Jax dhui nañ aañ cham tuꞌ puiꞌ ɨlhiiꞌñ nam dai guiꞌr jiñ jaaduñ gio na dai guiꞌr jiñ ñaan.
49Baꞌ nobiiꞌñ kɨꞌn muiꞌ xi ja aaꞌ guiꞌ nam kaichuꞌ nam mi jaꞌp daraa, jup kaiꞌch baꞌ:
―Guꞌ bɨɨx ji sia dhiꞌñi nam jɨꞌk jiñ kaichuꞌ nañ puiꞌ ja ɨlhiiꞌñ nam jir jiñ jaaduñ gio nam jir jiñ ñaan. 50Na guꞌ gu jaroiꞌ na puꞌñi miꞌ puiꞌ ba jimdaꞌ na jax jix aaꞌ guñ Gɨꞌkoraꞌ guiꞌ nax dhaam jup tuꞌiiꞌ, dhiꞌ puiꞌ ji buusandaꞌ na bar jiñ jaaduñ kaꞌ gio na bar jiñ ñaan kaꞌ.
Селектирано:
MATEO 12: stp
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2007, Wycliffe Bible Translators, Inc. All rights reserved.