Génesis 3
3
So shiỹaxaua saỹalaxaguet Ñim Lo'onatac 'Enauacna
1Qalaxaye so na'araxanaq ỹataqta sa nqalat, napacalec 'enauac na laỹepi shiguiỹacpi maye lo'onatacpi Ñim Nataxala', qaq somaye inato' aso 'alo, 'eeta':
«¿'Eesa peta'a da Ñim Lo'onatac 'Enauacna da saishet da qami' ỹashenema da qolliqui ana ala ana qo'oipaqpi maye huaigui ne'ena nanqa' ana nañiguishe?»
2Nache aso 'alo 'enapeco':
«Seshetaq da sacheguenaq ana ala camachaqca ana qo'oipaqpi maye huaigui ne'ena nanqa' ana nañiguishe, 3qalaxaye chaqarata ara qo'oipaq maye nangui na laiñi ne'ena nanaxanaqa', Ñim Lo'onatac 'Enauacna qomi' 'enapegalo da saishet da sacheguenaq, qataq saishet da sepotaqpegueua'a ana ala aramaye. Cha'aye da shenaqtec de'era, nache seleuaq.»
4Qalaxaye so na'araxanaq 'enapego' aso 'alo, 'eeta':
«Saishet da 'en. Saishet qome da qaullivi. 5Ñim Lo'onatac 'Enauacna ỹaỹateeta da qom qolliqui ana ala ara'ara qo'oipaq, nache huo'o da qarauattonaxanaxaqui, da qauauattoñi ca no'on qataq ca qauem, qaq huaña nache qoñiita'am Ñimaye.»
6Nache aso 'alo ila'a co'ollaxa da ana ala asa'aso qo'oipaq ỹataqta 'onaxai, nache huo'o da lyaxa da chec, qataq da lyaxa da huo'o da lauattonaxanaxac. Nache nqat aso 'oonole ala asomaye nache chec, qaq ime nache ỹanem so lhua, nache somaye nataqa'en chec. 7Qaq huaña, nache soomaye ne'ettrec naua la'ai'te, qataq ntoue'n, nache ilora'a da huetrauec. Qaq huaña nache ỹo'o't aso higo laue da ỹauo'o lo'ola't.
8Qaq so ỹale qataq aso 'alo, co'ollaq hua'axaira'aguet Ñim Lo'onatac 'Enauacna da coleetapeguelec so nanqa' ana nañiguishepi, quetaigui so la'at atomteguet so avit, nache soomaye nqañoxooyiñi co'ollaxa, taroigui so qo'oipaqsat se'eso nanaxanaqa'. 9Qalaxaye Ñim Lo'onatac 'Enauacna maye Nataxala', iỹaxanaique co'ollaxa se'eso ỹale, 'eeta':
«¿Hua'ague ca qoueta'ague?»
10Nache so ỹale ỹasat, 'eeta':
«'Am sa'aqta'aguet da 'aucoleetapeguelec na nanqa' ana nañiguishe, nache huo'o da icolanaxa, cha'aye sootauec. Ỹoqo'oye ñeqañoxooñi.»
11Nache Ñim Lo'onatac 'Enauacna inat 'eeta':
«¿Negue't ca 'am da'aqtaxanem da qouetauec? ¿Qollec peta'a ana ala ara qo'oipaq maye 'am shenapega co'ollaxa da sa qollec?»
12Nache so ỹale ỹasat, 'eeta':
«Ara 'alo maye aỹem 'aỹa'anem da ñauegaxaua, aramaye aỹem ỹanem aso ala ara'ara qo'oipaq, nache aỹem sachec.»
13Nache Ñim Lo'onatac 'Enauacna maye Nataxala', inat aso 'alo, 'eeta':
«¿Ta'ainco' da 'auo'ot de'era?»
Nache asomaye ỹasat, 'eeta':
«So na'araxanaq aỹem ỹatenachet, ỹoqo'oye sachec aso ala ara'ara qo'oipaq.»
14Nache Ñim Lo'onatac 'Enauacna 'enapega so na'araxanaq, 'eeta':
«Qaq souaxat de'era 'auo'ot, nache qauem qome da 'icỹaxac da 'aualectaigui 'enauac na laỹepi shiguiỹacpi. Qaq nache chegoqchiguiña nagui da 'am 'auaualectapigui', qataq qollectac na lsoche na 'alhua, 'enauaque naua na'axa'te da 'arca'alaxa. 15Qaq Aỹem, so'ot da 'am, qataq ara 'alo qami' npa'aguenaxau', nache 'ena'am qome ca 'aỹa'alaqpi, qataq ca llalaqpi aramaye. Ca llalaqpi aramaye pigui qome na 'arqaic, qaq 'am 'anaigui qome ana lla'axa.»
16Qataq 'enapega aso 'alo, 'eeta':
«Ñequigaxatec qome da 'anque'eenaxac qom ivita da huo'o ca 'aỹa'alec, qataq ỹataqta huo'o da 'anqui'ic qom 'auco'o. Qalaxaye imalec qome da 'arauoche da 'arhua, qaq damaye 'am ilo'ogue qome.»
17Qataq 'enapega so ỹale, 'eeta':
«Qaq souaxat da 'aualaxaguet ara 'arhua, da qollec aso ala ara qo'oipaq maye sheetega co'ollaxa da saishet da qollec, nache nagui ana 'alhua talec qome da qauem, souaxat 'am. Qataq ỹataqta huo'o qome da 'anque'eenaxac da 'auo'onataxan, da yaqto' 'auachiguiñi ca qollec, 'enauaque naua na'axa'te da 'anachaalataxac. 18Ana 'alhua ñaxaalec qome ana ỹotta'a't ỹaxat, nache qollectac qome ana huoue no'onaxa lashe. 19Qataq ỹataqta 'anchelchaqchiguiñi qome da 'auo'onataxaatac, da yaqto' 'auachiguiñi ca qollec, choche ivitta'a da 'avi'eguelaxaigui ana 'alhua, maye 'auachegaqaigui co'ollaq 'am qaỹo'ot, cha'aye 'am 'alhua lsoche, qaq nam 'alhua lsoche 'apactoigui qome.»
20Nache so ỹale ỹanagui da le'enaxat Eva aso lhua, cha'aye asomaye nache late'e qome 'enauac na shiỹaxauapi. 21Nache Ñim Lo'onatac 'Enauacna, ỹo'o't soua alogo soomaye, ỹachegoxotaigui na lo'oc na shiguiỹacpi, da yaqto' so ỹale qataq aso lhua ỹaayeñi. 22Qataq 'enapeco':
«Nagui dam shiỹaxaua, damaye 'eeta'ama qomi', da ỹaỹaten da no'on qataq da qauem. Qaq saiueno'o' da nataqa'en nqat ana ala ara qo'oipaq maye chegaqaigui da nca'alaxa, cha'aye da chec nache chochaq tatec da lca'alaxa.»
23Qaq ỹoqo'oye Ñim Lo'onatac 'Enauacna maye Nataxala', ỹo'orauec so shiỹaxaua, ca'ai naqa'en so nanaxanaqa' maye huaigui ye 'alhua Edén, nache ỹamaxalec da ỹo'ot na 'alhua, maye maiche chegaqaigui co'ollaxa. 24Qaq co'ollaq ime da ỹo'orauec so shiỹaxaua, nache da pa'aigui da nala' lliguisheguem yem nanaxanaqa' maye huaigui ye Edén, ỹanaleguete soua huo'o da lca'alaqa' maye huo'oi naua laua't, qataq som ỹeelonec 'ettaigui maye coleetagui, da yaqto' saishet da huo'o ca ivireua'a aso qo'oipaq, maye chegaqaigui da nca'alaxa.
Селектирано:
Génesis 3: LÑLE13
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.