CAKACAKA 7
7
Sa vosa ko Sitiveni vei ira era sa kaya ni sa vosavakacacataka na Kalou ko koya. Sa tukuna na kedrai tukutuku na nodra qase, 1—50. Sa qai vunauci ira ni ra sa talaidredre vua na Kalou, ka vakacacani ira na nona parofita, ka vakamatei Jisu Karisito, 51—53. Era sa qai cudru vakalevu, ka virilaki koya mate e na vatu, 54—60.
1Sa qai kaya na bete levu, Sa vaka ko ya na veika oqo, se segai? 2Sa qai kaya ko koya, Oi kemudou na mataveiwekani, kei na qase, dou vakarorogo mada: A Kalou vakaiukuuku sa rairai eliu vua na noda qase ko Eparaama, ni sa tiko mai Mesopotemia, sa tiko emuri mai Karana, 3a sa kaya vua, Lako tani e na nomu vanua, ka maivei ira na wekamu, ka lako ki na vanua ka’u na vakatakila vei iko. 4Sa qai lako tani ko koya mai na vanua ko Kalitia, a sa laki tiko ki Arana: ka ni sa mate ko tamana sa tuberi koya tani maikina na Kalou, ka sa vakatikora e na vanua oqo, dou sa qai tiko kina. 5A sa sega ni solia kina vua ko koya e dua na tikina me taukena, e segai me butuka e na yavana: a sa yalayala ga vua me solia vei koya me taukena, vei ira talega na nona kawa, ka ni sa sega e dua na luvena. 6A sa kaya vakaoqo na Kalou: Ni ra na tiko na vulagi na nona kawa e na vanua sa sega ni nodra; ka ra na vakabobulataki ira, ka vakararawataki ira, ka va na drau na yabaki. 7A sa kaya na Kalou, Na matanitu era na bobula kina, au na lewa; ka oti, era na qai lako tani mai, ka qaravi au e na vanua oqo. 8A sa solia vei koya na veiyalayalati ni veicili; a sa tama i Aisake ko koya, a sa bogi walu sa qai ciliva ko koya; a sa tama i Jekope ko Aisake; a sa tamadra na qase e le tinikarua ko Jekope.
9Ia ni ra sa vuvutaki Josefa ko ira na qase oqori, era sa volitaka ki Ijipita: ia sa tiko vata kaya na Kalou, 10a sa vakabulai koya mai na nona rarawa kecega, ka solia vua me vinaka ka vuku e na mata i Fero na tui Ijipita; a sa lesia ko koya me kovana me lewai Ijipita kei ira kecega na nona lewe ni vale.
11Sa qai yaco na dausiga kei na rarawa levu ki na vanua taucoko ko Ijipita kei Kenani, a ra sa sega ni kune kakana ko ira na noda qase. 12Ia ni sa rogoca ko Jekope sa tu mai Ijipita na sila, sa qai talai ira vakadua kina na noda qase. 13Ia e na kena lako vakarua sa vakatakilai koya ko Josefa vei ira na tuakana; a sa vakatakilai na mataqali i Josefa kivei Fero. 14Sa qai talaki ko Josefa me lakovi ko Jekope na tamana, kei ira kece talega na nona mataqali, era sa lewe vitusagavulu ka lima. 15A sa lako sobu ki Ijipita ko Jekope, a sa mate, ko koya kei ira na noda qase, 16a ra sa kau ki Sikemi, a ra sa buluti e nai bulubulu ka volia ko Eparaama e na tiki ni siliva eso vei ira na luve i Emori mai Sikemi.
17Ia ni sa voleka na gauna me vakayacori kina na vosa ni yalayala, ka bubului kina na Kalou vei Eparaama, era sa qai tubu ko ira na tamata me ra lewe levu mai Ijipita, 18ka yacova na gauna sa buli kina e dua tani na tui, sa sega ni kilai Josefa. 19Sa lawakitaki ira na wekada ko koya oqo, ka sa vakacacani ira na noda qase, me ra sa biuti ira kina na nodra gone ki tautuba, me ra kakua ni bula.
20A sa sucu ko Mosese e na gauna ko ya, a sa mata vinaka sara, ka sa susugi vula tolu e na vale nei tamana: 21ia ni sa biu ki tautuba ko koya, sa keveta mai na luve i Fero ka yalewa, a sa susuga me luvena. 22A sa vakavulici ko Mosese e na nodra vuku kecega na kai Ijipita, a sa kaukauwa e na nona vosa kei na cakacaka. 23Ia ni sa vasagavulu na nona yabaki, sa qai tubu e na lomana me via laki raici ira na wekana na luve i Isireli. 24Ia ni sa raica e dua vei ira sa vakacacani, sa totaka, a sa cudruvaki koya sa vakararawataki, ka sa yavita na kai Ijipita: 25ka sa nanuma ko koya era na kila na wekana ni sa ligana ena vakabulai ira kina na Kalou: ka ra sa sega ga ni kila. 26Ia e na mataka sa rairai ko koya ki na lewe rua erau sa veivala, a sa via vakaveivinakatitaki rau tale, a sa kaya, Oi kemudrau na turaga, drau sa veiwekani ga; a cava drau sa veivakacacani kemudrau kina? 27Ia sa biligi koya tani ko koya sa vakacacana na wekana, ka kaya, Ko cei sa lesi iko mo turaga mo mai lewai keimami? 28ko sa via vakamatei au beka, me vaka ko a vakamatea na kai Ijipita e na noa? 29Sa qai dro ko Mosese e na vuku ni vosa ko ya, a sa laki vulagi tiko e na vanua ko Mitiani, a sa mani sucu kina e le rua na luvena-tagane.
30Ia ni sa oti e vasagavulu na yabaki, sa qai rairai vei koya mai veikau e dua na agilose ni Turaga, e na ulu-ni-vanua ko Saineai, e na yameyame ni buka e na dua na kau. 31Ia ni sa raica ko Mosese, sa kidacalataka na ka sa raica: ia ni sa torova me vakaraica, sa yaco mai vua na vosa ni Turaga, 32Oi au na nodra Kalou na nomu qase, na Kalou i Eparaama, kei na Kalou i Aisake, kei na Kalou i Jekope. A sa sautaninini ko Mosese, ka sa rere ni vakaraica. 33Sa qai kaya vei koya na Turaga, Luvata tani na nomui vava mai na yavamu: ni sa qele tabu na tikina ko sa tu kina. 34Au a raica dina sara na nodra rarawa na noqu tamata era sa tiko mai Ijipita, ia ka’u a rogoca na nodra vutugu; ia ka’u sa lako sobu mai me’u vakabulai ira; ia oqo, mo ia, au na talai iko ki Ijipita.
35Ko Mosese oqo ko koya era sa cata, ka kaya, Ko cei sa lesi iko mo turaga ka mo lewa? ko koya ga oqo ka tala na Kalou me turaga kai vakabula e na ligana na agilose sa rairai mai vua e na kau. 36Sa kauti ira yani ko koya, ni sa kitaka oti eso na ka e veivakidacalataki kei nai vakatakilakila e na vanua ko Ijipita, kei na waitui damudamu, kei na veikau, ka yabaki vasagavulu. 37Ko Mosese oqo sai koya ka kaya vei ira na luve i Isireli, Ena vakatubura kivei kemudou ko Jiova na nomudou Kalou, maivei ira na wekamudou, e dua na parofita me vakataki au. 38Ko koya oqo, sa tiko kei ira nai soqosoqo lewe ni soro e na veikau, kei na agilose sa vosa vua e na ulu-ni-vanua ko Saineai, kei ira na noda qase: a sa rawata ko koya na vunau bula me solia vei keda: 39era sa bese ni talairawarawa vua ko ira na noda qase, a ra sa biligi koya tani vei ira, a sa suka tale na yalodra ki Ijipita, 40a ra sa kaya vei Eroni, Cakava eso na noda kalou me ra liutaki keda: ko Mosese oqo, ko koya ka kauti keda mai na vanua ko Ijipita, eda sa sega ni kila se cava beka sa yaco vua. 41A ra cakava e dua na luve ni pulumokau e na gauna ko ya, a ra sa vakacabora nai soro ki na matakau, a ra sa rekitaka na cakacaka ni ligadra. 42Sa qai vuki tani na Kalou, ka sa biuti ira tu me ra qarava na veikalokalo ni lomalagi; me vaka na ka sa volai e na nodrai vola na parofita, Oi kemudou na mataqali nei Isireli, dou a vakacabora vei au na manumanu sa vakamatei, kei nai madrali, E na veikau ka yabaki vasagavulu, se segai? 43Io, dou a colata na vale nei Moloke, Kei na kalokalo ni nomudou kalou ko Remifani, A matakau dou a cakava mo dou soro kina: Ia ka’u na kauti kemudou yani me sivi ko Papiloni.
44Sa tu ga vei ira na noda qase e na veikau na vale ni Kalou sa tu kina na vunau, me vaka sa vosa kina ko koya, ni sa kaya vei Mosese, me cakava me vaka na kenai vakatakarakara sa raica: 45o koya talega era sa taura emuri na noda qase, era sa qai kauta mai ko ira kei Josua ki na nodra vanua na veimatanitu, ko ira sa vakaseva tani na Kalou e na matadra na noda qase, ka yacova na gauna i Tevita; 46ko koya sa kune loloma mai vua na Kalou, a sa kerea me nonai tavi e dua na vale me nei koya na Kalou i Jekope. 47Ia ko Solomoni ga sa tara na vale me nona. 48Ia sa sega ni tiko ko Koya sa cecere sara e na vale sa caka e na liga; me vaka na vosa ni parofita, 49A noqui tikotiko-vakaturaga ko lomalagi, Kei nai tutu-ni-yavaqu ko vuravura: A vale cava dou na tara me noqu? sa taroga ko Jiova: Se na tikina cava me na noqui vakavakacegu? 50Sa sega li ni cakava na ka kecega oqori na ligaqu?
51Oi kemudou na yalokaukauwa, ka sega ni cili na yalomudou, kei na daligamudou, dou sa dauvorata tikoga na Yalo Tabu; ia koi kemudou dou sa kitaka me vakataki ira na nomudou qase. 52Ko cei vei ira na parofita sa ra sega ni vakacacana ko ira na nomudou qase? a ra sa vakamatei ira era a tukuna eliu ni na lako mai ko koya na Yalododonu; ko koya dou sa qai solia yani ka vakamatea: 53ia sa soli vei kemudou na vunau ni sa tukuna eso na agilose, ia dou a sega ga ni vakabauta.
54Ia ni ra sa rogoca na veika oqo, sa laucoka na yalodra, a ra sa vakasequruquru bati vua. 55Ia ko koya ni sa sinai e na Yalo Tabu, sa rai matua ki lomalagi, a sa raica nai ukuuku ni Kalou, kei Jisu ni sa tu e na liga i matau ni Kalou, 56a sa kaya, Raica, au sa qai kunea sa wase rua na lomalagi, ka sa wavu tu na Luve ni tamata e na liga i matau ni Kalou. 57Era sa qai qoqolou e na domo levu, ka tabonaka na qara ni daligadra, ka cici vakaukauwa vua ni ra sa lomavata, 58a ra sa biuta ki nai bili ni koro, ka vakavirika e na vatu, ia ko ira era sa beitaka, era sa kotora sobu na nodrai sulu ki na yavana e dua na cauravou, a yacana ko Saula. 59A ra sa vakaviriki Sitiveni e na vatu, ni sa masu tiko, ka kaya, Kemuni na Turaga Jisu, taura na yaloqu. 60A sa tekiduru sobu ko koya, a sa kaci e na domo levu, Kemuni na Turaga, kakua ni cudruvi ira e nai valavala ca oqo. Ia ni sa vosa oti vakaoqo, sa qai moce.
Селектирано:
CAKACAKA 7: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific