CAKACAKA 12
12
Sa vakacacani ira na lewe ni lotu ko Eroti, ka vakamatei Jemesa; a sa biuti Pita ki na vale ni veivesu, a sa vakabulai koya na agilose, ni sa masulaka ko ira na lewe ni lotu, 1—19. Ni sa viaviakalou ko Eroti, sa vakamatei koya e dua na agilose ni Turaga, 20—23. Sa qai tubu vakalevu na vosa ni Kalou, 24,25.
1Ia e na gauna ko ya sa ia ko Eroti na tui me vakararawataka eso vei ira nai soqosoqo lewe ni lotu. 2A sa vakamatei Jemesa na tuaka i Joni e nai seleiwau. 3Ia ni sa raica sa vinakata ko ira na Jiu, sa qai tauri Pita talega. Ia sa gauna ni kana madrai sa sega ni vakaleveni. 4Ka ni sa taura, sa biuta ki na vale ni veivesu, a sa solia ki na mata-sotia e va eratou dui le va, me ratou vakatawai koya; ni sa nanuma me kauta vei ira na tamata, ni sa oti na kana vata ni lako-sivia. 5A sa vakatawai kina ko Pita e na vale ni veivesu; ia era sa daumasulaki koya tiko vua na Kalou ko ira nai soqosoqo lewe ni lotu.
6Ia ni sa vakarau ko Eroti me kauta mai, e na bogi ga ko ya sa moce ko Pita e na kedrau maliwa e lewe rua na sotia, a sa vesu e na sinucodo e rua; a ra sa tu nai vakatawa e na mata ni katuba, me ra vakatawa na vale ni veivesu. 7Ka raica, sa dua na agilose ni Turaga sa lako mai, a sa cila yani na rarama ki na vale ni veivesu; a sa tavia ko koya na sarisari i Pita, a sa vakaduria cake, ka kaya, Kusarawa mo tu cake. A sa lutu tani mai ligana na nona sinucodo. 8A sa kaya vei koya na agilose, Vauca na nomui sulu, ka vauca na nomui vava. A sa kitaka vakakina. A sa kaya vua, Mo vakaitutuvitaki iko mada ka muri au. 9A sa curu yani ko koya, a sa muri koya: a sa sega ni kila ni sa dina na ka sa cakava na agilose; sa nanuma ga sa raica na raivotu. 10Ia ni rau sa sivi iratou nai matai ni vakatawa kei nai karua, erau sa yaco ki nai sogo kaukamea sa basika ki na koro; a sa tadola vakai koya walega vei rau: a rau sa lako sara kituba; ka sivia e dua na gau-ni-sala; a sa qai lako tani vakasauri vua na agilose.
11Ia ni sa qai kila yalona ko Pita, sa kaya, Au sa qai kila dina sara, ni sa tala mai na nona agilose na Turaga, a sa vakabulai au mai na liga i Eroti, mai na nodrai naki kece talega na kai Jutia. 12Ia ni sa vakananuma tiko, sa yaco ko koya ki na vale i Meri na tina i Joni, a yacana talega ko Marika; era sa lewe vuqa sa soqoni vata kina me masu. 13Ia ni sa tukituki ko Pita ki nai sogo ni matamata-ni-koro, sa qai lako e dua na vada me vakarorogo, a yacana ko Rota. 14Ia ni sa kila na domo i Pita, sa sega mada ni dolava nai sogo ni sa reki, a sa cici sara ki loma, ka tukuna ni sa tu ko Pita e na matamata-ni-koro. 15A ra sa kaya vua, Ko sa lialia. Ia sa vakadinadina tiko ko koya ni sa vaka ga kina. A ra sa qai kaya, Sa nona agilose. 16Ia sa tukituki tikoga ko Pita: ka ni ra sa dolava, era sa raica, ka ra kidacala. 17A sa vakatabataba vei ira ko koya me ra tiko lo; ka sa tukuna vei ira ni sa kauti koya mai na vale ni veivesu na Turaga. A sa kaya, Laki tukuna na veika oqo vei Jemesa, vei ira talega na veiwekani. Sa qai lako tani ko koya, a sa lako ki na dua na yasana tani. 18Ia ni sa siga mai, sa sega ni lailai na nodra kidroa na sotia, se sa lako beka kivei ko Pita. 19Ia ni sa vakasaqara ko Eroti, ka sega ni kunea, sa tarogi ira nai vakatawa, a sa kaya me ra vakamatei. A sa lako sobu ko koya mai Jutia ki Sisaria, ka tiko kina.
20A sa cudru vakalevu ko Eroti vei ira na kai Taia kei Saitoni; a ra sa qai lomavata ka ra lako mai vei koya: ia ni ra sa rawai Pilasito, ko koya sa lewa na vale ni moce nei Eroti, me vukei ira, era sa masuta na veivinakati; e na vuku ni sa kau mai na kedra mai na nona vanua na tui. 21Ia ni sa yaco na siga sa lokuci, sa qai vakaisulu ko Eroti e nai sulu vakaturaga, a sa tiko e nai tikotiko vakaturaga, ka sa vunau vei ira. 22Sa qai qolouvaka ko ira na tamata, Sa domo ni kalou, sa sega ni domo ni tamata. 23A sa yaviti koya vakasauri e dua na agilose ni Turaga, ni sa sega ni vakarokorokotaka na Kalou ko koya; ka sa kani koya na baca, ka sa ciba ko koya.
24Ia sa tubu ga na vosa ni Kalou me levu sara mai. 25A rau sa lako tale mai Jerusalemi ko Panapasa kei Saula, ni rau sa vakaotia na cakacaka, a rau sa kauti Joni, a yacana talega ko Marika.
Селектирано:
CAKACAKA 12: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific