CAKACAKA 11
11
Sa vunauci ko Pita ni sa vakavulica eso era sa matanitu tani; a sa tukuna kecega na vuna, 1—18. Sa tubu na lotu mai Finaisi, kei Kipiro, kei Anitioki, 19—21; a sa talai ko Panapasa me vakavulici ira, 22—26. Era sa solia na nodra ka-ni-loloma kivei ira na kai Jutia ko ira mai Anitioki, 27—30.
1A ra sa rogoca ko ira nai apositolo kei ira na veiwekani mai Jutia ni ra sa vakabauta na vosa ni Kalou ko ira talega era sa matanitu tani. 2Ia ni sa lako cake mai ki Jerusalemi ko Pita, era sa veileti kaya ko ira sa cili, 3a ra sa kaya, Ko sa curu vei ira na tamata era sa sega ni cili, ka kana vata kei ira. 4A sa vakatekivu ko Pita, ka veivakadutaitaka na ka vei ira, ka kaya,
5Au a tiko e na koro ko Jopa ka masu: ia ka’u a raica na raivotu, Sa dua na ka sa lako sobu mai, e vaka nai tutuvi levu, sa tukuci sobu mai lomalagi e na tutuna vava: a sa yaco sara kivei au: 6ia ni ka’u sa vakaraica matua, ka vakananuma, au sa kunea kina na manumanu ni vanua e yavai va, kei na manumanu kila, kei na veika sa dauqasi voli, kei na manumanu vuka. 7Au sa qai rogoca e dua na vosa sa kaya vei au, Tu cake, Pita; mo vakamatea, ka kania. 8Au sa qai kaya, Kakua noqu Turaga; ni sa sega na ka tabu se na ka tawa-savasava sa curu ki na gusuqu e na dua na siga. 9A sa rogo tale vei au na vosa mai lomalagi, A ka sa vakasavasavataka na Kalou, mo kakua ni vaka e tabu. 10A sa caka vakatolu na ka oqo: a sa qai yavi kece tale ki lomalagi. 11Ka raica, e le tolu na tamata sa qai tadu ki na vale ka’u sa tiko kina, a ratou sa talai mai Sisaria vei au. 12A sa kaya vei au na Yalo Tabu, me’u lako vata kei iratou, me kakua ni veileti na lomaqu, Ka keitou sa lako vata talega kei na veiwekani oqo e lewe ono, ka keitou sa curu ki nona vale na tamata ko ya: 13a sa tukuna vei keitou ko koya, ni sa raica na agilose e na nona vale, sa wavu tu, ka kaya vua, Mo talatala ki Jopa, me lakovi Saimoni, a yacana talega ko Pita; 14ko koya ena tukuna vei iko na vosa ko na bula kina, kei ira kecega na nomu lewe ni vale. 15Ia ni ka’u sa vakatekivu me’u vosa, sa yaco vei ira na Yalo Tabu, me vaka vei keda e na kenai vakatekivu. 16Au sa qai nanuma na vosa ni Turaga, ni sa kaya ko koya, Sa dina ka veipapitaisotaki ko Joni e na wai; ia dou na papitaisotaki e na Yalo Tabu. 17Ia ni sa qai solia vei ira na Kalou nai solisoli me vaka vei keda, koi keda sa vakabauta na Turaga ko Jisu Karisito; ko cei koi au, me’u tarova rawa na Kalou? 18Ia ni ra sa rogoca na veika oqo, era sa galu ga, a ra sa vakarokorokotaka na Kalou, ka kaya, Sa dina sa qai solia na Kalou vei ira talega na veimatanitu tani na veivutuni me ra bula.
19Ia ko ira sa dui veiseyaki e na veivakacacani sa tubu e na vuku i Sitiveni, era sa lako vaka ki Finaisi, kei Kipiro, kei Anitioki, a ra sa tukuna na vosa vei ira duaduaga na Jiu. 20A sa so vei ira era sa kai Kipiro kei Kirini, ni ra sa yaco ki Anitioki, era sa vosa vei ira era sa vulagi mai na veimatanitu tani, a ra sa vunautaka na Turaga ko Jisu, 21a sa tiko vata kei ira na liga ni Turaga: a ra sa lewe vuqa kina sa vakabauta, a ra sa saumaki mai vua na Turaga. 22Sa qai yaco na kedrai tukutuku kivei ira nai soqosoqo lewe ni lotu mai Jerusalemi: a ra sa talai Panapasa, me lako sara ki Anitioki: 23ia ni sa tadu ko koya, ka raica na cakacaka loloma ni Kalou, sa reki kina, a sa vakarota vei ira kecega, me ra kabita na Turaga e na loma e gumatua. 24Ni sa tamata vinaka ko koya, a sa sinai e na Yalo Tabu kei na vakabauta: a sa lewe vuqa kina na tamata sa vakaikuritaki vua na Turaga.
25Sa qai lako ko Panapasa ki Tarisu me vakasaqarai Saula: 26ia ni sa kunea, sa kauta ki Anitioki. A sa dua na yabaki taucoko erau sa dausoqoni vata kina kei ira nai soqosoqo lewe ni lotu, ka ra sa lewe vuqa erau sa vakavulica. Ia mai Anitioki era sa vakatokai mada eliu ko ira sa lotu mei tokani i Karisito.
27Ia e na gauna ko ya sa lako mai na parofita eso mai Jerusalemi ki Anitioki. 28A sa tu cake e dua vei ira, ko Akapo na yacana, a sa tukuna, ka sa vakavuna na Yalo Tabu, ni na yaco emuri na dausiga levu e na vanua taucoko; a ka oqori sa yaco e na gauna sa tui kina ko Kilotiu. 29Ia era sa lewa ko ira sa lotu me ra solia yadua na nodra ka-ni-loloma, me vaka era sa dui rawata, vei ira na veiwekani era sa tiko mai Jutia: 30a ra sa kitaka vaka talega kina, ka vakatalai Panapasa kei Saula me rau kauta vei ira na qase.
Селектирано:
CAKACAKA 11: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific