Luk 9
9
Jisɔs otigɛ atɔramɔ asaŋɛsaŋɛ juu rafaa
(Mat 10:5-15; Mak 6:7-13)
1Reyi dinɛ, Jisɔs oyinɔ atɔramɔ juu rafaa (12) nkum kanɛ, ɔnyɛ bɛ nsɨm wa yimɔ obia roifɛ fɛb, mɨnɛ wa gbanɔ rifɛn. 2Kadi otigɛ bɛ wa ka kani oniranwunɛ abaŋa Rɛkɨm ra Ɛbɨrɔkpabi, mɨnɛ wa gbanɔ rifɛn. 3Ɔkani bɛ na, “Rika timɔ mbum tumbunɛ ridulɔ kɔchɛŋɛ nku, rika timɔ ɛfɔmtɛ#9:3 ɛfɔmtɛ Etiti kɔchɛŋɛ (ɛsaŋ) nyi anintɨmini wa yɨba arigɛ akɨm, rɛkpa, kɔjɛ, agbuga, tum ibɔwɛ ifaa rika timɔ. 4Ɛtɔ ranyinɛ nyi rinɔlɔ, ri tumɛ afɛ tata rigbɛ kɛfɨrɔ achifɛ. 5Abɔ ani wabi tama wun, rigbɛ kɛfɨrɔ kɛbɛ, mɨnɛ rikpunɔ ifug ra ɔkpagikad owun#9:5 Abo si ɛduayi ra kɛmaka ania Ju, ɛjagɔ na asaŋ ɛkpaju eyi ra efumɛlɛ ɛbɛ wa tama Kɛlam ka Ɛbɨrɔkpabi kɛmaka otumɔchɛ anyɛ bɛ.” 6Wa gbɛ wa dulɔ ɔfɨrɔ nkɨmkɨm, waka kani Bɨrika Kɛlam, mɨnɛ wanyɛ ani ɛgbanɛlɛ nkum rankanɛ.
Iijuga Ɛrɔd
(Mat 14:1-12; Mak 6:14-29)
7Faŋandi, Ɔkɨm Ɛrɔd odimɔ ɔbaŋa birɛ mbi Jisɔs ra atɔramɔ wara wasia. Obi gbɛra bumbu onɨŋosi, kum ani wara wa lama na Jɔn ɔwaani Mani, ofilɛ ra rɔbɔ. 8Ani adudu na Ɛlaija mɔbɔ mulɛnɛ alɛ, adudu na ɔlamaremu ra Ɛbɨrɔkpabi nwu reyadi mɔ obo mulɛnɛ alɛ rokpin. 9Gbɔ Ɛrɔd na, “Nkani wa kɨbi Jɔn retu, moni kadi mɔ ndima nla birɛ mbi mbaŋa?” Mɨnɛ obumɔ ɔchɛ mɔ.
Jisɔs ɔnyɛ ani igot itan kɔjɛ
(Mat 14:13-21; Mak 6:30-44; Jɔn 6:1-4)
10Ndi atɔra Jisɔs wa kɨlɛ, wawa kani Jisɔs mburambunɛ mbu wa sii. Otimɔ bɛ wa dɨbɛlɛ ababɛ, wa dulɔ kɛfɨrɔ nchi wa yinɔ Bɛdsaida. 11Gbɔ rɛkau rani rɛwa gbɛra kumka Jisɔs ra atɔramɔ wa dulɔ, wa tɔrɛ mɔ. Ɔtama bɛ, ɔkani ɔbaŋa Rɛkɨm ra Ɛbɨrɔkpabi ɔnyɛ bɛ, ɔgbanɔ ani mba wa dulɔ ra rifɛn.
12Ndi kɔdidɛ kɔnɨŋɔ tɔ, atɔramɔ juu rafaa mbɛn wa ka kɔga mɔ, wa kani mɔ na, “Yimɔ rɛkau rani ndifa redulɔ. Fɛsiafɛ wa dulɔ ɔfɨrɔ mbu wo kula kumkafa, wa ka dug kɔjɛ arigɛ kumka ka wa kpɛma itɔ, kum awul rɛranla ra kumka ani wa da mɨnɛ itɔ ida.”
13Gbɔ ɔkani bɛ na, “Awun rinyɛ bɛ mbum wa jɛ.”
Wa kani mɔ na, “Rebifɔnɔ kɔjɛ, ebisiŋɛ rataa kɔjɛ ratan (5) akɨla itin mani ifaa (2), abɔ ɛduayi kikɛ, afɛ ɛlɔmɛnyɛ na rɛka dɛu kɔjɛ rɛwa nyi ani mba fɛb.” 14Rɛfɔ na mbag adumini mbɛn fɛb ɔjagɔ igot kɛtɨn asɛ igot itan (5,000).
Gbɔ ɔkani atɔramɔ na, “Ri sii bɛ wa tumetumɛ ra ɔkpɛna ɛtɨn ɛfaa asɛ juu (50).” 15Mɨnɛ wasi ɛduayi, abɛ fɛb wa tumetumɛ. 16Kadi otimɔ rataa kɔjɛ ndɛn ratan (5) arigɛ itin mani nyɛn ifaa (2), ɔyɛrɔ mbira kayu mɨnɛ ɔmɔlɛ Ɛbɨrɔkpabi. Ɔgbaga dɛ, ɔnyɛ atɔramɔ wa nemi wanyɛ rɛkau. 17Abɛ fɛb wa jɛ, wa yɨlɛ, kadi atɔramɔ wa kpɛ akɨmkɨm ɔkar idug juu ra ɛfaa (12) lɛgɛlɛgɛ mbu wɔ gbɔ.
Pita ɔlamɔ na Jisɔs mɔ ɔra Kɨraist
18Reyi dinɛ, ndi Jisɔs ɔra ra kumka idɨbɔ orua nyɔm, atɔramɔ ramɔ kɛdɔŋ, ɔbɨbɛ na, “Ani wa kani na ami nra mɛdoni?” 19Wa fini mɔ na, “Ani adudu wa lamɔ na Jɔn Ɔwaani mani, gbɔ adudu na Ɛlaija, mɨnɛ adudu na ɔtɨma ɔlamaremu ra Ɛbɨrɔkpabi wunɛ mɔ obo filɛ alɛ ra rɔbɔ.” 20Ɔbɨbɛ bɛ na, “Gbɔ awun-ɛ?” “Rikani na ami nra moni?” Pita ofini na, “Awu mɔ ara Kɨraist a Ɛbɨrɔkpabi.”
21Fɛkadi ɔŋaŋɛ bɛ ebiebi na wa ni kani oni tum wunɛ. 22Ɔkani bɛ na, “Wɔna Oni kɨn ɔtama esinisini ra birɛ esii. Anintɨmini ania Ju, ɔkɨm asia kɔya ka Ɛbɨrɔkpabi akɨla Akɔga Ibina kɨn wa fumɔ mɔ. Mɨnɛ kɨn wa wulɔ mɔ, gbɔ ra rayi ratal, kɨn ofilɛ ra rɔbɔ.”
Jisɔs ɔlamɔ ɔbaŋa esinisini akɨla rɔbɔ rɔdɛn
(Mat 16:20-28; Mak 8:30-38; 9:1)
23Kadi ɔkani bɛ fɛb na, “Oniranwunɛ nwu odugɔ otumɛ ɔtɔramɛ, ɛlɔmɛnyɛ na ofumɔ ɛkpaju ɛyɛn, otimɔ keti-rɔbɔ kɛchɛn reyi randinɛ ɔtɔrɛmɛ. 24Kum oniranwunɛ nwu ɔnani rokpin rɔdɛn, kɨn rɔlɨmɔ mɔ. Gbɔ oniranwunɛ nwu ɔlɨmɛ rokpin rɔdɛn rɛfɔ rɛdɨm kɨn ɔnani dɛ. 25Mambum bɛ wɔ ra nsɔl oni nwu ɔfɔnɔ kekul ndɨm, gbɔ ɔlɨmɛ mɨnɛ obinɛ rokpin rɔdɛn? 26Kum oniranwunɛ nwu gbɔu wosimɔ wɔ baŋa mɛ arɨgɛ kɛlam kɛchɨm, Wɔna Oni mɨnɛ, gbɔu kɨn wosi mɔ ramɔ ɔbɔwɔ ra eluŋɛlɛ ɛyɛn, nyia Mitɛ Ɔwɛn akɨla awanɛwanɛ ayilarotumɔ abɛn. 27Gbɔ nkani wun raikpɛ, ani adudu wara nfa kɛbar mba wara baa tata wa chɛ Rɛkɨm ra Ɛbɨrɔkpabi.”
Atɔra Jisɔs atal wa chɛ eluŋɛlɛ ɛyɛn
28Faŋandi, rayi ranaranaa (8) rakɨlɔ siŋ ndi ɔlamɔ birɛ mbi, otimɔ Pita arigɛ Jɔn, arigɛ Jems, wa dulɔ wa ka rɔ nyɔm mbira kekul. 29Ndi ɔra orua nyɔm, roisɔ rɔdɛn rɔfɔranɛ, ibɔwɛ iyɛn italuŋa amɔm ɛtalɛtalɛ-a gbaŋgbaŋ. 30Rantuni awu, adumini afaa, Mosis ra Ɛlaija. 31Wa mɨlɛnɛ ra ɔkɨmkɨm eluŋɛlɛ, wa lama ra Jisɔs wa baŋa birɛ mbi wɛ nɨŋɔ jag, kɛmanchi ɔnɨŋɔ sii nkatir Ɛbɨrɔkpabi otuni ra ɛbaɛlɛ akɨla efilefilɛ akɛ Jɛrusɛlɛm. 32Pita ra achɛmɔ abɛn kɛdɔŋ wara wa dala dala, gbɔ wa kɨlɔ filɛ, wa chɛ olili eluŋɛlɛ a Jisɔs arigɛ adumini mbɛn afaa kɛbar ramɔ. 33Ndi adumini mbɛn wa nɨŋɔ du wa gbɛ Jisɔs, Pita ɔkani Jisɔs na, “ƆKƆKƆ, eliwoliu na awul rɛra nfa. Ri lɔɔ reri nkun atal, wunɛ owu, wunɛ nwua Mosis, wunɛ nwu Ɛlaija.” (Gbɔ Pita obi gbɛra chɛrɛrɛ bumbu ɔra ɔlama). 34Ndi ɔra ɔlama birɛ mbi, ɛkpakayu ɛrɛ, ɛwa kɨbɛ bɛ, mɨnɛ ɛrau esibɛ ndi wa nɔlɔ ɛkpakayu nyɛn. 35Remu resi ra ɛkpakayu nyɛn rɛlamɔ na, “Wonowum nwu ami nraŋɔ mɔnla; ridimɔ mɔ.” 36Ndi remu ndɛn rɛkɨlɔ lam fɛb, wata wa chia Jisɔs amɔamɔ. Atɔramɔ wa lɔ birɛ mbi ra itimɔ ibɛ, wabi kani oni tum wunɛ bumbu wachɛ.
Jisɔs oyimɔ kebia roifɛ ɔsaŋɔ ra ɛkpajua wɔn odumini
(Mat 17:14-18; Mak 9:14-29)
37Ɔnyɛgɛ reyi, wa kɨlɔ rɛ kekul wawɔ, ani esii wawɔ wa yimɔ Jisɔs. 38Rantuni awu, odumini wunɛ ra kɛdɔŋ kɛbɛ ɔsɔ oyinɔ na, “Ɔkɔgakɔga, otutu nani wonowum, amɔmɔ ɔra kele ka wonowum. 39Kebia roifɛ kɛyɔ bua mɔ, mɨnɛ ɔmɔmɛɔmɔmɛ kɨn okugɔ. Kesia mɔ otua etin, ɔta kua ɛfɨlɔ ra kama. Kɛnyaŋa mɔ roiraa, kɛra gbia mogbia. 40Ndɛ atɔrawu wa saŋɔ mɔ kebia roifɛ nchifa, gbɔ wabi yɛ.”
41Jisɔs ofini na, “Awun kɛsɛ nchi kebiwobiu mɨnɛ raikpɛ kɛralua! Jɛɛ rimɛɛ dɛ nnɨŋo tumɛ rawun, nnan dɛ nnɨŋo dimini ntau kɛsɨmɛkpa kewun? Jisɔs ɔkani odumini nwɛn na, timɔ wonowu wɔ.”
42Ndi oririn nwɛn ɔchɛŋa ɔya ɛkpa Jisɔs, kebia roifɛ nchɛn kɛtɨlɛ wɔn awufɛ ketu rɔchɛ kɛta gbɨra mɔ. Gbɔ Jisɔs ɔŋaŋɛ chɛ, ɔgbanɔ wɔnwɛn otimɔ mɔ ɔnyɛ mitɛ ɔwɛn. 43Atɔramɔ fɛb ɛkpa ɛwɛbɛ ra ndi wa chɛ nsɨm Ɛbɨrɔkpabi.
Jisɔs ɔlamɔ ɔbaŋa rɔbɔ rɔdɛn
(Mat 17:22,23; Mak 9:30-32)
44Gbɔ ndi ɛkpa ewiabɛ fɛb abaŋa birɛ mbi osii, Jisɔs ɔkani atɔramɔ na, “Ri lɔɔ kɛlam nchi nnɨŋɔ kani wun nla kɛnɔlo wun ratuŋ: kɨn wa timɔ Wɔna Oni wa komi mɔ wa rɔ ribɔ anianjɨŋ.” 45Gbɔ ebitalɛ bɛ bumbu ɔra ɔlama. Wa dɨb bɛ bumbu kɛlam nchɛn kɛjagɔ, mɨnɛ ɛrau ɛra esiabɛ wa dɛ Jisɔs ɔkani bɛ.
Moni mɔ ɔra ɔkɨmkɨm
(Mat 18:1-5; Mak 9:33-37)
46Ifid ijagɔ atɔra Jisɔs abaŋa oni nwu ɔnɨŋo tumɛ oniretu ra kɛdɔŋ kɛbɛ. 47Gbɔ kum Jisɔs ɔgbɛra itimɔ ibɛ, otimɔ nwiwɔn ɔbarɛ rɔkpankpa rɔdɛn. 48Kadi ɔlamɔ na, “Oniranwunɛ nwu ɔtama nwiwɔn nwufa ra ridɨnɔ ridɨm, ɔtama mɛalɛ. Mɨnɛ oniranwunɛ nwu ɔtama mɛ, ɔtamalɛ oni nwu otigɛ mɛ. Oniranwunɛ nwu ɔtɔlɛnɛ ɛkpa osiŋɔ ra Wa timɔ oririn nwɛn wawɔ ɛkpa Jisɔs, kebia roifɛ nchɛn kɛtɨlɛ wɔn awufɛ ketu rɔchɛ kɛta gbɨra mɔ, ɔtɔ ra rɔchɛ odiŋananɛ, ɔkua ibɔŋɔ kewun, amɔmɔ ɔra ɔkɨmkɨm.”
Jisɔs ɔlamɔ ɔbaŋa oni nwu ɔra ramɔ arigɛ nwu abɔ ramɔ ɔda
(Mak 9:38-40)
49Jɔn kadi ɔlamɔ na, “ƆKƆKƆ, rɛchɛ oni ɔyɨba ridɨnɔ ridi oyima obia roifɛ, rebumɔ resimɔ ɔfuɛnɛ kum ɔda ra kɛdɔŋ kɛchɨl.” 50Gbɔ Jisɔs ɔkani bɛ na, “Rika simɔ ɔfuɛnɛ, kum oni nwu abɔ obi barɔ kɛrɨŋ rawul, ɔra rawul.”
Ania Sameria wa fumɔ Jisɔs ɛtamatama
51Kɛgbɔ kekɨlo kula nchi Jisɔs onɨŋo du kɛfɨrɔ ka Ɛbɨrɔkpabi, osi etimɔ ɛyɛn ɔbɨnɛ Jɛrusɛlɛm ɛyɛlɛ. 52Otigɛ atɔramɔ wa rɨŋɔ mɔ ɛtɨma, wa dulɔ rikalɔ kɛfɨrɔ ka ania Sameria wa ka mɔlɛ nkum wa lɔɔ mɔ. 53Gbɔ akɔ kɛfɨrɔ wa bi tama mɔ, kum ɔra ɔya Jɛrusɛlɛm. 54Ndi Jems ra Jɔn atɔramɔ wa dimɔ birɛ mbi, wa bɨbɔ na, “ƆKƆKƆ, kɨn ɛdawu na rɛkani Ɛbɨrɔkpabi etigɛ rokun ra kayu rɔwa wuu ani mba-ɛ?” 55Gbɔ Jisɔs ɔfagɛlɛ ɔtɛmakɛsɨb ɔnyɛ bɛ rɛfɔ kebia ka bumbu wa lamɔ alɛ. 56Mɨnɛ wa dulɔ kɛfɨrɔ kedudu.
Ɛjanajana atɔrɛ Jisɔs
57Ndi wa chɛŋa waya rɛtɨma, odumini wunɛ ɔkani Jisɔs na, “Ami kɨn tɔrewu nkum rankanɛ nka aya.” 58Jisɔs ofini mɔ na, “Ɔrɔwɔ wɔ fɔnɔ rama, oninɔɔn kayu wɔ fɔnɔ ralug, gbɔ Wɔna Oni obifɔnɔ kum kɛlɔɔ.” 59Jisɔs ɔkani odumini odudu na, “Tɔrɛ mɛ.” Gbɔ odumini nwɛn ɔlamɔ na, “ƆKƆKƆ, lɔɔ mɛ nrɨŋɛtɨma nka fɨlɛ mitɛ owum.”
60Gbɔ Jisɔs ɔkani mɔ na, “Lɔɔ ani mba wa bɔ ba ra roifɛ wa fɨlɛ abuburɛ abɛ, awu dɔŋ ka kani rɛkɨm ra Ɛbɨrɔkpabi.” 61Oni odudu mɨnɛ ɔwa kani mɔ na, “ƆKƆKƆ, ami kɨn tɔrewu. Gbɔ lɔɔ mɛ nrɨŋɛtɨma nka kani kɛtɨb kɛchɨm rɔda-e.” 62Jisɔs ofini mɔ na, “Oni ɔda nwu ɔyɨba kedu ɔyɛra ekpirɨmɔ, nwu ɔnɨŋɔ yɛ osi rotumɔ rɛkɨm ra Ɛbɨrɔkpabi.”
Селектирано:
Luk 9: Olulumo-Ikom
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©️2024 Luke Initiative for Scripture Translation