Matius 11
11
Monuu i Yaya Mamamatis#11:1 Mamamatis: Momomonsu Mongoduat di Yisus
(Luk. 7:18-35)
1Koopod nopo dii i Yisus monuduk dagai di opulu om duvo tulunJo, om ongoi nogi dii Isido siri tongobandar di osomok do monuduk om mangaabar diri Abar do Aandai di tongotulun siri.
2Ontok diri poinjiil i Yaya, nokorongou isido diri kurion di Koristus, om ponuuno dii isido di tongotulunjo do mongoi mongoduat do, 3“Oinomod do Ikano i rumikot mantad si di Kinoringan iri sinoritaku, ko kivaropo andadon tokou do sondiang?” kadi Yaya.
4Nga jawapno i Yisus di tulun sinuu di Yaya do, “Ulino om abaraino i Yaya do onuu nopo iri norongou muju om naantangan muju do, 5‘ “Iri tulun bolou nga koontong, om iri tulun mimpo-kimpo mampanau nga alais mampanau, om iri tulun di rumanai i kojuvanjo nga olingasan, om iri tulun bongolon nga korongou, om iri tulun napatai nga ovijau kavagu, om iri tulun miskin nogi nga aabaran diri Abar do Aandai. 6Ososogitno i tulun diri au opiduvo ginavo do aparsaya do Iokuno sinuu di Kinoringan rumikot siti,” kadi Tuhan,’ kanto nono di Yaya,” kadi Yisus.
7Nga koidupo dii i tongotulun di Yaya, om timpuunno dii i Yisus monuturan di tongotulun toguu iri koongongoio di Yaya si padang do kovotuvan do ka, “Onu i naantangan muju di ongoi kou mongontong di Yaya soi padang do kovotuvan? Mongontong kou naku di barau miajub-ajub do osorupan? Okoni, kon! 8Onu naku kinaangaian muju silo? Mongontong kou naku di tulun kipakaian do aandai? Nga tulun nopo manampakaian do aandai nga mijon siri valai do raja. 9Nga poiloo Okuno dikovu nong onu kinaangaian muju silo? Minongontong kou di nabi, i popolombus di tinangaran do Kinoringan? Oinomod ino, do poiloonKu ikovu do i Yaya nopo om okoniko nabi noopo, nga kipangkat isido mantad di tongonabi vokon. 10Do i Yayano iri komoion di nokotulis siri Kitab di tinangaran do Kinoringan do ka,
‘Antangaino, monuu Oku di susuuonKu
do poguluvononKu mantad Dika.
Om isidono i monginavau laaid di ralan do vajaanNu,’
kadi tangar do Kinoringan siri Kitab.#Antangai Malaki 3:1.
11PatangaronKu marong dikovu iti do i Yaya Mamamatis#11:11 Mamamatis: Momomonsu nopo nga i tulun do agajo pangkat mantad di kasangkat di tongotulun di nosusu siti saralom vonuvo. Nga insan irad dino, ii nogi tulun di aparsaya Dogo di osuribak pangkat si Kopomorintaan di Kinoringan, ii nogi agajo pangkat mantad di Yaya. 12Mantad di timpuunon di Yaya papaabar diri ponudukanjo gosob maino, aupo nokotingkod i tongotulun moisosogulu do masu siri Kopomorintaan di Kinoringan#11:12 moisosogulu do masu siri Kopomorintaan di Kinoringan: siri solinan vokon pinotulis do: lumavan di tulun songonuvon do Kinoringan; om siri solinan vokon nogi pinotulis do: rumikot i Kopomorintaan di Kinoringan mivaja di kuasa, om monginontob daa i tulun di ongororongit do mangala diri. do uvang marong iolo mokiporinta di Kinoringan. 13Do kasangkat diri nabi, i popolombus di tinangaran di Kinoringan pogulu, nga popoilo laaid di tongotulun do monguasa i Kinoringan di tongotulunjo do insan tadau. Om irad nogi dino i Undang-undang Ugama do Joudi monuduk do monguasa i Kinoringan di tongotulunJo do insan tadau gosob do nokorikot i Yaya. 14Nong uvang kou mongkinongou do tinangaran di nabi nga i Yayano komoion diolo do iIlia do rumikot siti do insan tadau. 15Isaai nopo iri kitolingo, rumongouno marong diti tinangaranKu,” kadi Yisus.
16Om kadii di Yisus kavagu, “Onu naku poiradanKu diti tongotulun do maino? Mad irad dilo tongotangaanak do songingogom moikukuyaug siri tomu do mongoloou di tongosongkoruanganjo, 17do kadiolo kama,
‘Mitogunggu#11:17 mitogunggu: monuntung ko mituntung ikoi nga aui magalai kou,
om moginupus ikoi nga au kovi mogiad,’ ka.
18Do korikot nopo i Yaya siti dikovu nga au mangakan om mongiup do mogpuasa. Nga tangaron muju nogi do, ‘Rinosukan isido do rogon,’ kamuju. 19Nga korikot Oku nopo dii, i Sinumiliu do Tulun, om Ioku nopo diti nga mangakani om mongiupi, om mitangar kou dino Dogo do, ‘Antangaipo dii Isido anakan,#11:19 anakan: alagak ko osisil ko orusuk om moginovukan nopo om kumoruang nogi dilo tongotulun momumumpung do sukai om tulun di kiduso!’ kamuju. Nga insan pun irad dino tangar muju, nga mantad diri gaagayaJo do aandai nga oilaani do oinomod i kopintaro do Kinoringan,” kadi Yisus.
Araat Nasip di Tulun do Au Aparsaya
(Luk. 10:13-15)
20Om oguuno kosunduvan vinaal di Yisus siri tongobandar diri, nga aui rumorogo i tongotulun di duso diolo. Om timpuunno dii Isido do papasala di tulun siri bandar diri. 21KaDisido, “Ooi dikovu tulun silo Bandar Kurasin om Bandar Boitsida! Atukpo dii karaat nasip muju, do oguu kosunduvan vinaalKu si bandar muju nga au kou aparsaya Dogo, do nong iradno dino kosunduvan vinaalKu do poontong di tongotulun silo Bandar Tirus om Bandar Sidun di pogulu, alaidno daa iolo manampakai do karut om misingavu do tavu tanda do rumorogo iolo diri dusojo. 22Nga patangaronKu marong dikovu iti, do agaanpo i kosusaan di tulun soi Tirus om soi Sidun ko i kosusaan muju tulun silo Kurasin om silo Boitsida ontok do Tadau Kopongukuman. 23Ooi tulun silo Bandar Kaparnaum! Ikovu nogi, panantaman muju nopo daa om poinsavaton kou soi suruga? Aui! Porotuon kou nono siri poijanan do tongotulun di nongapatai nong aui rumorogo kou. Do nong irad dino kosunduvan vinaalKu do ipoontongKu daa diolo soi Bandar Sudom di pogulu, potingkaapo maino i bandar diri. 24Nga patangaronKu marong dikovu iti, do agaanpo i kosusaan di tulun soi Bandar do Sudom ko i kosusaan muju tulun silo Kaparnaum ontok do Tadau Kopongukuman,” kadi Yisus.
Popoingkojod i Yisus di Tulun di Nababasan Maja di Adat Laid
(Luk. 10:21-22)
25Om ontok dirino, sinumambayang i Yisus irad diti, “Ou Amo!#11:25 Amo: Apa Tuhan do tavan#11:25 tavan: langit om tana! Monorimakasi Oku Dika do onuu nopo iri ponudukan di linosokNu siri tulun do ongopipintar om kitoilaan nga pinointalangNu siri tongotulun diri auso toilalaan irad di tangaanak, 26do irino kouvanganNu, Amo,” kadi Yisus.
27Om kadii di Yisus kavagu dagai di tongotulunJo, “Kasangkat do onuu nopo nga nipokuasa Dogo diAmoKu.#11:27 diAmo: diApa Om auso kotutun marong nong isai Oku, i Tanak di Kinoringan, nga irino iAmoKu. Om auso kotutun nong isai iAmoKu, nga irino Ioku i TanakJo, om iri nogi tulun di kouvanganKu di pointutunanKu.
28Oi dikovu kasangkat tulun diri nobobos maja di adat laid, ongoi kouno siti Dogo, do poingkojodonKu ikovu. 29Vojoono iri nisuuKu dikovu om omitno Dogo, do Ioku nopo nga otuud om osuribak ginavo, om ampa nogi do kobojou i ginavo muju. 30Do iri nopo ipakarajaKu dikovu nga agaan om iri nopo isuuKu nga aui apagon,” kadi Yisus.
Селектирано:
Matius 11: LabukPKV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 1995, Wycliffe Bible Translators, Inc. All rights reserved.