Gênesis 8
8
Hahyekachalu Mahalewle Piranapni
1Waneya Hoyakalu hichinkaplu Noé ptowru nikalu hocha hajeru, ptowru nikalu campo hajer-koxa, Noé-yma tsro kanawatlo yatshine ruchinikatka Hoyakalu. Waneya Hoyakalu kamhalu kanniphalu tshij-hoho rachpojyawaka waneya hmahalewatatka.
2Waneya ruchyatlu tenohawaka hichpakhaxikatshri hiyrunu ruchyatlu tenhohne hichpakhaxikatshri koxa hiyáhoni runekhatka.
3Hiyáhoni ruhlepotuko mahalewamtatka tshij-hohoya. Hiyáhoni cento e cinquenta hohne hiknohatka hmahalewpotutatka.
4Waneya seis ksuru hiyrunu dez e sete hohne tsro kanawa Ararate pjitkaka hoho tutukatka.
5Hiyáhoni mitshikananu hohne dez ksuru rixinri hmahlewata honha. Wale ksuru mitshikananu hohne tenowak-potu himlikatka.
6Waneya quarenta hohne hiknohatka waneya honotawakaswa hkamhaleru Noé tsro kanawaya hkohpukatka.
7Waneya Noé hichotlu satu maylu, xyekni ruchpajinixka, hya, hsatkapa hixo kata wane rixa haté riprihatka honha tshij-hohoya.
8Waneya wane pnute ruchotlu satu pomba rimaxyawakaplu ho hmahalewatatkahe ho hike honha tshij-hohoya.
9Seyni hike hmapokkanuklunu pomba hsatkaphonukatka tsro kanawa klu tshinanu honha hichyatawalu tshiji. Waneya Noé yosurukamyotatka hyoptotlo pomba hiyáhoni hkoskanota tsro kanawa rimwalo.
10Waneya riknohatka sete hohne ruchotatnaklo pomba.
11Waneya kayi timapokatkalu; oliveira muna sure hajeyri hiptshekalu jimlakamxikolu, tanika tosowa tanijyalu; wale tshinanu Noé himatatka hmahalewatatka honha.
12Hiyáhoni hiyrunu sete hohne pnute hkahwaka waneya pomba ruchotatnaka seyni pomba hi satkapyatkalu Noé.
Noé Hayineten-koxa Tsro Kanawa Hichpajinri Piranapni
13Hiyáhoni wane rixa, mitshikananu hohne, mitshikananu ksuruya, Noé seiscentos e um mhale rixini honha hiprihatka tshij-hohoya. Waneya Noé kochhalu tsro kanawa pjiru, waneya ronotatka, retlu tshiji hiprihatka.
14Waneya vinte e sete hohne rixinixka hapkatatatshri ksuru hohne, popritshijitkalu.
15Waneya Hoyakalu wan-tshinru Noé:
16— Puchpajinixkalo tsro kanawa, pixa, phanunro, piwhenene, piwhenene hnunron-koxa.
17Hejnun-koxa pixaymalune, ptowru hixatshri nikkaluru, kamejirune koxa, campo hajene yosrolotatshri, ptowru hixatshri tshiji yapatshri, nyi pkochpakanutka tsro kanawatloya rixolewaxyawakapna tshij-hohoya, hmatuwhenetanna tshij-hohoya rixolewatanna.
18Waneya ruchpakatka Noé hiwheneneyma, hhanunro, Noé whenene hnunrone.
19Hiyrun-koxa ruchpakna tsro kanawatloya ptowru nikalu, ptowru tshij-hoho yosrolotatshri, ptowru kamejiru hiyrunu ptowru nikalu tshij-hoho yapatshri satkaka neru hichpakatka.
Noé Altar Kamhiywaka Piranapni
20Waneya Noé kamhalu satu henekachalu renejikowaka Tsru Hixikatshriwa Hoyakalu; waneya raniklu nikalu nikkaluru, kamejirun-koxa nikkaluru waneya reneklu henekachalu yoxikkaluru henekachalu henejikowaka hohoya.
21Waneya Tsru Hixikatshriwa Hoyakalu hamluphatlu kihlephaholu waneya wane htshinnawa:
— Hi nsaletanutnaklu tshiji yine tshinanu klu tshinanu yine hektuwaka tsonu ruchinikna hmatureyakawa hyinuwaka haté xawakni. Hi koxa napnokatanutnaklu ptowru hiwekatshri, hanu nixa hapnokatletanna mitshikawlunni.
22Tshiji hwaka pchinika rawanu hitaklewlu, ramikol-koxa, katshikleru, hamer-koxa, mhaluklu, hinaklu koxa, hohohne, hoyetshno koxa.
Селектирано:
Gênesis 8: mpdBiblia
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil