iMbombo izya Vhatumwa 9
9
USaavhuli akupinduha
(iMbombo izya Vhatumwa 22:6-16; 26:12-18)
1Ahavhaliilizyo iho, uSaavhuli ahajendelelaga kuvhoogofwa avhalandati avha Mwene uYeesu, kuuti kwe avhagoje. Isiku limo, ahasogola kwa mupuuti umupiti, 2ahamulaavha kuuti aamupe avhakalaata avha kumumanyisya ku vhasongo avha masinagoogi mu nkaaya iya Damaasiki. Avhakalaata ivho vhahamwitishilaga kuuti, inga avhaaga avhalandati avha Idala ilya Mwene uYeesu, avhanaavuli poosye avhantanda, avhakunje nu kuvhaleeta ku Yelusaleemu.
3Pe uSaavhuli ahalongola idala ilya kusogola ku Damaasiki. Lwe apalamila, naluvhiilo uvhuzelu uvhuhali kufuma ku mwanya vhuhamuhozya imbazu zyonti. 4Ahagwa pansi, ahiivwa izwi likumuvhuziilizya kuuti, “Saavhuli! Saavhuli! Shooni she ukunjimvwa?” 5USaavhuli ahavhuziilizya ahati, “We naanu iwe Mwene?” Lyope lihamwamula lihati, “Ine ne Yeesu, ne iwe ukunjimvwa. 6Ishi yimiliila! Usogole mu nkaaya, umwo muli umuntu we kuuti akuvhuuzye zye ukwanzilwa kuvhomba.”
7Avhantu vhe vháshuuye pooka nu Saavhuli vhahimiilila. Vhahapuuma mwaa, mwe pe vhoope vhahivwaga izwi liila, ileelo vhatahamulolaga umuntu nuumo. 8Pe uSaavhuli ahimiilila, ahadaamula, ileelo atahalola. Avhamwavho vhahamulema inyoovhe nu kumuteteesya, kumutwala mu Damaasiki. 9Ahamala insiku zitatu she atakulola poosye kulya, poosye kumwela.
10Mu Damaasiki mwámile umulandati wumo uwa Mwene uYeesu, izina lyakwe vhahatinji uAnaniya. UMwene uYeesu ahamwita mu njozi iya pa minso amazelu#9:10 Injozi iya pa minso amazelu kwe kuuti uMulungu akuvhalolesezya avhantu izya mu njozi, lwe vhashiili kusupiila. Injozi izyo zikulegana na ziila zye umuntu akuloota, lwe asupiliiye. ahati, “We Ananiya!” Woope ahati, “Ine indi ipa Mwene.” 11UMwene ahamuvhuuzya ahati, “Sogoola mu nyumba iya Yuuda, inyumba iyo yili mwi idala lye vhakuti Igolosu, uvhuziilizye umwo umuntu uwa mu nkaaya iya Taaso, we izina lyakwe wu Saavhuli. Ishi akumulaavha uMulungu. 12Aavhwenyi injozi, mu njozi iyo aamuvhwenyi umuntu we vhakuti uAnaniya, akwinjila mu nyumba ye ali kumuvhiishila inyoovhe inga atalishe kulola havhili.”
13UAnaniya ahamwamula ahati, “We Mwene, nivuuye ku vhantu avhinji vwe uSaavhuli uyo avhavhombeeye imbiivhi avhafinjile vhaaho mu Yelusaleemu! 14Ishi ali ipa, avhapiti avha vhapuuti vhamupiiye amaha aga kuvhakunga vhonti vhe vhakulyitiha izina lyaho.” 15Ileelo uMwene ahamuvhuuzya uAnaniya ahati, “Sogoola vhweleele! Umuntu uyo, musavhuuye kuuti avhe muvhomvi waane, akumusye izina lyane ku vhe te Vhayuuda na ku vhamwene, havhili na ku Vhayuuda vhweleele. 16Ine kuuti mulanje vwe yikwanzilwa kuuti ayimbe nkaani kuzya izina lyane.”
17Pe uAnaniya ahasogola, ahinjila mu nyumba ye uSaavhuli áamile. Ahamuvhiishila inyoovhe, ahamuvhuuzya ahati, “Wamwitu Saavhuli, uMwene uYeesu ansonteleziizye kuli iwe, kuuti utalishe kulola havhili, umuposheele uMupepo uMufinjile. UYeesu uyo we akulolesheeye mwi idala ahavhaliilizyo he winzaga ipa.” 18Naluvhiilo utuntu twe tuli ngati tubabazula tuhagwa kufuma mu minso aga Saavhuli, ahataliha kulola havhili. Pe ahimiilila, ahoozelwa. 19Ahalya ishaakulya, pe ahavha na maha havhili.
USaavhuli akulumbiilila mu Damaasiki
USaavhuli ahatendama insiku nyinsi mu nkaaya iyo iya Damaasiki, áamile pooka na vhalandati avha Mwene uYeesu. 20Pe ahanda kusogola mu masinagoogi, ahakumusyaga izya Yeesu, ahatinji, “Uyo we Mwana wa Mulungu.” 21Avhantu vhonti vhe vhahatejelezyaga insambiilizyo zyakwe izyo, vhahasukumilaga nkaani. Vhahavhuzilizanyaaga vhahatinji, “Vhuli, umuntu uno, te we wula we avhayimvwaga avhantu vhe vhamwitisile uYeesu ku Yelusaleemu? Vhuli, wunuuno atinzile kuuti avhakunje avhantu inza ivho mu Damaasiki umu nu kuvhatwala ku vhapiti avha vhapuuti?” 22Ileelo uSaavhuli ahonjezya kuvha na maha aga kuyanga, ahahomeshezyaga kuuti uYeesu wu Chilisiti. Pe aVhayuuda avha ku Damaasiki vhahatetemaga nkaani.
23Lwe padiila, aVhayuuda ivho vhahitinkana kuuti vhamugoje. 24Vhahamwuvhililaga mu malyango aga nkaaya yiila uvhusiku nu musanya, inga vhamugoje. Ileelo insiivho izyo izya kumugoga, zihavumbuha ku kwakwe. 25Uvhusiku avhalandati vhaakwe vhahamuvhiiha mu shitundu, vhahamutuusya mu lupitu ulwa nkaaya, vhahamwisya pansi.
USaavhuli akusogola ku Yelusaleemu
26Pe uSaavhuli ahasogola ku Yelusaleemu. Lwe aafiha ukwo, ahalinga kusangaana na vhalandati avha Yeesu. Ileelo vhonti vhahamwogopaga, mwe pe vhatítisile kuuti woope mulandati wa Yeesu. 27Ileelo uBalinaaba ahamutwala uSaavhuli ku vhatumwa avha Yeesu, ahavhavhuuzya vwe uSaavhuli ámuvhwenyi uMwene uYeesu mwi idala ilya ku Damaasiki, na vwe uMwene ámuvhuziizye uSaavhuli. Havhili ahavhavhuuzya vwe uSaavhuli ávhalumbiliiye avhantu avha ukwo intumi izya Yeesu ku vhudandamazu.
28Pe uSaavhuli ahasyala pooka na vhatumwa avha Yeesu. Ahazyunguulaga mu Yelusaleemu, kulumbiilila avhantu izya Mwene uYeesu ku vhudandamazu. 29Ahayangaga nu kudalinkana na Vhayuuda vhamo vhe vhahayangaga injango iya Shiyunaani, ileelo avheene vhahalinga kuuti vhamugoje. 30Avhantu vhe vhámwitisile uYeesu lwe vhaamanya izyo, vhahamunyatula vhahamutwala mu nkaaya iya Kayisaaliya nu kumuleha asogole ku mwavho ku nkaaya iya Taaso.
31Mu manda igo, ivivhanza ivwa mu Yudeeya vwonti na mu Galilaaya na mu Samaliya, vihasankaanaga ahavhaliilizyo aha vhutehamu. Vihagomaga nu kumunyila uMwene. UMupepo uMufinjile ahavhagomwaga umwoyo, nu vhwinji vhwavho vhuhonjelaga.
UPeeteli akumuponia uYeneeya
32Ahavhaliilizyo iho, uPeeteli ahazyunguulaga uku nuukwo. Isiku limo, ahafiha mu nkaaya iya Liida, inga avhalamushe avhafinjile vhe vhahatendamaga muumwo. 33Mu nkaaya iyo, ahamwaga umuntu we áhataliiye, izina lyakwe vhahatinji uYeneeya. Umuntu uyo ákaasite pa shilili ku havhaliilizyo aha maaha 8. 34Pe uPeeteli ahamuvhuuzya ahati, “Iwe Yeneeya, uYeesu Chilisiti akukuponia. Ishi yimiliila! Zinga ishilili shaaho.” Naluvhiilo uYeneeya ahimiilila. 35Pisinda, avhantu vhe vhahatendamaga mu Liida, na mwi ihombe ilya Shalooni, vhahamulola uYeneeya akujenda. Lwe vhaalola izyo, vhonti vhahamwitiha uMwene uYeesu.
UPeeteli akumuzyusya uDolikaasi
36Mu nkaaya iyamwavho ye vhahatinji iYaafa áliipo umwantanda wumo, umulandati uwa Yeesu, izina lyakwe vhahatinji uTaabita. (Mu njango iya Shiyunaani, wu Dolikaasi.#9:36 UDolikaasi kwe kuuti undondooli.) UDolikaasi ahavhavwaga avhapiina nu kuvhomba imbombo izinji inyinza. 37Mu manda igo, uDolikaasi ahavhina nu kufwa. Avhantu vhahamwozya, vhahamuvhiiha mu shumba isha pamwanya mu nyumba injelenkanu. 38Mu havhaliilizyo iho avhalandati avha Yeesu vhahiivwa kuuti uPeeteli ali mu nkaaya iya Liida. Pe vhahavhasonteelezya ku kwakwe avhantu vhavhili, mwe pe inkaaya iyo yáamile papiipi ni nkaaya yaavho iya Yaafa. Avhantu ivho vhe vhávhasonteleziizye vhahamulambiilizya uPeeteli vhahati, “Twalamba uyinze ku kwitu ishisita kuhaavha!”
39Pe uPeeteli ahasogola pooka navho. Lwe vhaafiha mu Yaafa, vhahamutwala mu shumba sheshiila she vhámuvhiisile uDolikaasi. Avhaziishe vhonti vhahamuvhungatila uku vhakukuuta amansozi. Vhahamusontela inkanzu, na menda aganji ge uDolikaasi ávhasoneeye lwe mupuuma. 40UPeeteli ahavhafumwa vhonti panzi, ahasugamila, ahamulaavha uMulungu. Pe aheenya ku shaala shiila, ahati, “We Taabita, damuula!” UTaabita ahadaamula. Lwe amulola uPeeteli, ahatendama. 41UPeeteli ahamulema inyoovhe, ahamwimiilisya. Ahavhiita avhaziishe vhaala, na vhafinjile avhanji, ahavhalolesya kuuti uTaabita mupuuma. 42Inongwa izyo zihakumuha mu nkaaya yonti iya Yaafa, avhantu avhinji vhahamwitiha uMwene uYeesu. 43UPeeteli ahasyala mu Yaafa ku manda aminji, ahatendamaga mu nyumba iya muntu we ahagombaga amakwembe, izina lyakwe vhahatinji uSiimoni.
Селектирано:
iMbombo izya Vhatumwa 9: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.