iMbombo izya Vhatumwa 5
5
Ilenga ilya Ananiya nu Saafila
1Ileelo páamile umuntu wumo, we izina lyakwe vhahatinji uAnaniya, pooka nu mushi waakwe uSaafila. Vhoope vhahakazya umugunda waavho. 2Impiiya zye vháposheleeye ku mugunda uwo, uAnaniya ahazyiha zimo kukwilu, umushi waakwe woope ámanyile. Impiiya zye zyásyaye, uAnaniya ahazitwala ku vhatumwa avha Yeesu uku akuti zye ziniizyo vhweleele.
3Ileelo uPeeteli ahamuvhuuzya ahati, “Ananiya! Shooni she waaleha uSeetano ayinjila mu mwoyo waaho? Wafishila kumulumila ilenga uMupepo uMufinjile, wazyiha impiiya zimo zye uposheleeye mu mugunda waaho. 4Lwe ushiili kukazya, waamile mugunda waaho! Poosye lwe waakazya, waamile nu vhwamuzi kuvhombela impiiya izyo zye uposheleeye vwe ukwanza weneewe! Shooni she uhasiivha nu kuvhomba ilyo mu mwoyo waaho? Utamulumiiye ilenga muntu, umulumiiye wu Mulungu!”
5UAnaniya lwe ayiivwa amazwi igo, ahagwa pansi, ahafwa. Avhantu vhonti vhe vhívuuye inongwa izyo, vhahoogopa nkaani. 6Pe avhajaaha vhahimiilila, vhahawugwinkanizya umuvhili waakwe nu mwenda, vhahawufumwa panzi, vhahasogola kuwusyila.
7Lwe amasaala gatatu ishi gatuuha, umushi uwa Ananiya woope ahinjila mu nyumba yiila, ishisita kumanya zye zivhombesile. 8UPeeteli ahamuvhuziilizya ahati, “Mbuuzya, impiiya zye mwaakaziizye umugunda wiinyu, vhuli zye ziniizi?” Ahamwamula ahati, “Nalyoli zye ziniizyo.” 9UPeeteli ahamuvhuuzya ahati, “Shooni she mwitinkiine nu mulume waaho kulinga kumulumila ilenga uMupepo uMufinjile uwa MWENE uMulungu? Tejeelezya! Vhe vhamusyila umulume waaho, ivho vhali panzi pa mulyango, niiwe vhakuwutwala umuvhili waaho panzi nu kusogola kuwusyila.”
10Panaapo, uSaafila woope ahagwa pa vinama vwa Peeteli, ahafwa. Avhajaaha vhaala lwe vhinjila, vhahaaga uSaafila woope afuuye. Vhahawufumwa umuvhili waakwe panzi, vhahawusyila pa luvhazu pa mulume waakwe. 11Ilyoga ipiti lihavhalema avhantu vhonti avha shivhanza, pooka na vhanji vhonti vhe vhívuuye izyo.
Avhatumwa avha Yeesu vhakuvhomba amafindango
12Ku maha aga Mulungu, avhatumwa avha Yeesu vhahavhombaga ivilolesyo ni zya kusukumizya ku vhwinji mu vhantu. Avhantu vhe vhámwitisile uYeesu vhonti, vhahavhungaanaga pa Nyumba iMfinjile, mwi Idala iLyilishe ilya Solomooni.#5:12 iMbombo izya Vhatumwa 3:11 13Avhantu vhe vhatámwitisile uYeesu vhahavhatiimaga nkaani. Poosye shiniisho, naawumo we álinzile kuvhalandata ku nongwa iya kwogopa. 14Ileelo vhe vhahamwitihaga uMwene uYeesu vhahonjelaga nkaani, avhanaavuli na vhantanda.
15Pe kufumililana niizyo, avhantu vhahavhavhiihaga avhavhinu mu madala mu mazagala, na mu vilili, kuuti uPeeteli lwe akutuuha, poosye nga shinzyunguuli shaakwe shivhafishile vhamo vhapone. 16Avhantu avhinji vhahafumaga mu nkaaya izya mu luvhazu mu Yelusaleemu, vhahavhaleetaga avhavhinu, na vhaala vhe vhálemwilwe ni mpepo inkandamanu, vhonti ivho vhahaponaga.
Avhatumwa avha Yeesu vhakuyimba
17Pe umupuuti umupiti, pooka na vhamwavho vhonti avha mu mpuga iya Vhasadukaayi, umwone wuhavhalema nkaani kuzya vhatumwa avha Yeesu. 18Pe vhahavhalema, vhahavhakunga mu jeela. 19Ileelo uvhusiku vhuula uhavhizya uwa MWENE uMulungu ahinza, ahiigula amalyango aga mu jeela, ahavhafumwa panzi, ahavhavhuuzya ahati, 20“Sogooli mwimiilile ku Nyumba iMfinjile, muvhavhuuzye avhantu amazwi gonti aga vhulanzi uvhwa shiima.” 21Pe avhatumwa ivho lwe vhiivwa amazwi igo, vhahasogola ku Nyumba iMfinjile inzanshi nkaani, vhahataliha kuvhasambiilizya avhantu.
Ahavhaliilizyo hanaaho umupuuti umupiti, pooka na vhamwavho, vhahavhiiha ulukuvhato ulwa vhalongozi, pooka na vhasongo vhonti avha Vhayuuda. Vhahavhasonteelezya avhaguulizi ku jeela, kuuti vhavhaleete avhatumwa vhaala. 22Ileelo lwe vhinjila mu jeela, vhahaaga avhatumwa ivho naavhamo mwenemwo. Vhahagaluha ku vhapiti, vhahavhavhuuzya vhahati, 23“Lwe twafiha mu jeela muula, twazile inyiiji nyigalile vhweleele, avhaguulizi vhimiliiye mu malyango vhakuguulila. Ileelo lwe twigula inyiiji, tutamwazile umuntu nuumo muumwo!” 24Umupiti uwa vhaguulizi avha Nyumba iMfinjile pooka na vhapiti avha vhapuuti ivho, lwe vhiivwa izyo, vhahasaaga nkaani, vhahavhuzilizanya vhahati, “Inongwa izi kuuti zivhe vhuli?”
25Pe ahinza umuntu wumo, ahavhavhuuzya ahati, “Yeenyi, avhantu vhaala vhe mwaavhakunzile mu jeela, vhali ku Nyumba iMfinjile vhakusambiilizya avhantu.” 26Pe umupiti uwa vhaguulizi na vhaguulizi avhamwavho, vhahasogola kuvhaleeta avhatumwa vhaala. Ileelo vhatávhalemile ku maha, mwe pe vhógofile kuuti avhantu vhangavhahoma na mavhwe.
27Lwe vhavhaleeta vhahavhimiilisya pilongolela pa lukuvhato ulwa vhalongozi, umupuuti umupiti ahataliha kuvhavhuziilizya ahati, 28“Twaavhahaanile ku maha kuuti, mutasambilizyaje avhantu izya Yeesu! Ileelo mukujendeelela kukumusya insambiilizyo zyinyu mu nkaaya yonti iya mu Yelusaleemu, mukwanza yiloleshe kuuti niiswe tuli nu mulandu uwa kumugoga!”
29UPeeteli na vhatumwa avhamwavho vhahamwamula vhahati, “Tukwanzilwa kumushindiha uMulungu, kuluusya kuvhashindiha avhantu! 30Imwe mwámugozile uYeesu kwi idala ilya kumuhomeela pa shihovhenkanyo, ileelo uMulungu uwa vhataata vhiitu ahamuzyusya. 31Ahamuzuvwa nu kumuvhiiha ku luvhazu lwakwe ulwa kundiilo, kuvha wu Songo, havhili kuvha Muposhi, inga uMulungu atwavwe swe Vhaisilayeeli tuvhe ni idala ilya kupinduha nu kuswilwa uvhutalamalandu vhwitu. 32Niiswe swe vhahoome avha zyonti izyo, pooka nu Mupepo uMufinjile, we uMulungu avhapiiye vhonti vhe vhakumushindiha.”
33Avhapiti vhaala lwe vhiivwa izyo, zihaavhasya amooyo gaavho, vhahanzaga kuvhagoga. 34Ileelo áliipo uMufalisaayi#5:34 UMufalisaayi: Vhaazya aVhafalisaayi mu Ntantiho izya Mazwi aMajeni. wumo, izina lyakwe vhahatinji uGamaliyeeli. Uyo áamile musambiilizi uwa ndajizyo izya Moose, we avhantu vhonti vhahamushindihaga. Pe uweene ahimiilila pa lukuvhato luula ulwa vhalongozi, ahalajizya kuuti, vhavhafumwe panzi avhatumwa vhaala ku havhaliilizyo hansi. 35Pe ahavhavhuuzya avhapiti avhamwavho ahati, “Imwe mwe vhanaavuli vha Isilayeeli, ili lye mukwanza kuvhomba ku vhantu ivha, muvhe minso nalyo. 36Mukumbushe amanda aga pisinda, áfumiiye umuntu wumo izina lyakwe vhahatinji uTewuda, ahayibaadaga kuuti muntu mupiti, áamile na vhalandati vhaakwe 400 ishi. Ileelo kumpeleela, vhahamugoga, na vhaala vhonti vhe vhahamulandataga vhahasataana. Imbombo yaakwe yonti yihasilila pepaala. 37Havhili pisinda, ahavhaliilizyo he uvhulongozi uvhwa nsi vhuhavhavhazyaga avhantu, áfumiiye uYuuda uMugalilaaya, uno woope ahavhalongozya avhantu kuuti avhe ni mpuga yaakwe nu kupindula insi. Ileelo woope vhahamugoga, vhaala vhonti vhe vhahamulandataga vhoope vhahasataana. 38Ishi nkuvhavhuuzya kuuti, muyeefwe mu vhantu ivha. Vhaleshe vhasogolaje, mwe pe inga insiivho zyavho, na zyonti zye vhakuvhomba zikufuma ku vhantu, zikusila zyeka. 39Ileelo inga zikufuma kwa Mulungu, te muhole kuvhadinda, mukuvha mukumudinda wu Mulungu wuuyo.”
40Pe vhahiitiha amazwi aga Gamaliyeeli, vhahavhiita avhatumwa vhaala, vhahalajizya kuuti vhahomwe. Vhahavhahaana kuuti vhatasambilizyaje havhili ku maha aga izina ilya Yeesu, vhahavhitishila kuuti vhasogolaje ku mwavho.
41Avhatumwa vhoope vhahafuma pa lukuvhato ulwa vhalongozi, uku vhakuseshela, mwe pe uMulungu ávhwenyi kuuti vhahondeeye kusaamulwa kuzya izina ilya Yeesu. 42Vhatahaleha kusambiilizya avhantu nu kuvhalumbiilila Izwi iLyinza kuuti uYeesu wu Chilisiti, vhahajendeelela kusambiilizya nu kulumbiilila insiku zyonti pa Nyumba iMfinjile, na mu nyumba izya vhantu.
Селектирано:
iMbombo izya Vhatumwa 5: nih
Нагласи
Сподели
Копирај

Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.