iMbombo izya Vhatumwa 11
11
UPeeteli akulondovhola zye zivhombesile ku vhe te Vhayuuda
1Avhatumwa avha Yeesu na vhamwavho avhanji vhe vhahatendamaga mu Yudeeya, vhahiivwa kuuti, vhe te Vhayuuda vhoope vhitisile izwi ilya Mulungu. 2Pe uPeeteli lwe agaluha ku Yelusaleemu, vhamo vhe vhámwitisile uYeesu, vhe vhakulandata indajizyo izya kutahiili, vhahanda kumulonga, 3vhahati, “Shooni she winjilaga mu nyumba iya vhantu vhe vhatatahiliilwe nu kulya ishaakulya pooka navho?”
4Pe uPeeteli ahanda kuvhavhuuzya izwi lyoka lyoka ku zyonti zye zyávhombesile, ahati, 5“Isiku limo, náamile mu nkaaya iya Yaafa. Lwe ndi kumulaavha uMulungu, nkalola injozi iya pa minso amazelu. Mu njozi iyo, nkalola ishintu she sháali ngati ligolole ipiti lye lilemwilwe imbazu zyonti zine. Shihiihaga kufuma ku mwanya, shihiishila pa luvhazu lwane. 6Lwe nenyeelezya muhati yaakwe, nkalola muli ivihanu ivwa vinama vine na vwe vikukwesuha ni nyunyi.
7“Pe nkiivwa izwi, likuti, ‘We Peeteli, vhuuha! Vhoola ulye!’ 8Nkaamula nkati, ‘Ndaali Mwene! Ntahalya naalumo ishintu she shikuhombezya!’ 9Ileelo izwi ilyo kufuma ku mwanya lihambuuzya havhili lihati, ‘Ivintu vwonti vwe uMulungu avizelufwizye, iwe utatinji vikuhombezya.’ 10Izwi ilyo lihavhuyiizya lutatu lwonti, pe ivintu ivwo vwonti vihagaluha ku mwanya.
11“Ahavhaliilizyo hanaaho avhantu vhatatu vhe vhávhasonteleziizye kufuma mu nkaaya iya Kayisaaliya vhahimiilila pilongolela pa nyumba ye nkavhanga. 12UMupepo uMufinjile ahambuuzya kuuti, insogole pooka navho ishisita kusingaana. Pe nkasogola pooka na vhamwitu ivha 6. Lwe twinjila mu nyumba iya Kolineeliyo, 13ahatuvhuuzya vwe uhavhizya ámulolesheeye mu nyumba yaakwe umwo. Uhavhizya uyo ámuvhuziizye átili, ‘Uvhasonteelezye avhantu vhasogole ku Yaafa, vhamwite uSiimoni we vhakuti uPeeteli. 14Uweene we kuuti akuvhuuzye amazwi, kutuushila mu mazwi igo, iwe pooka na vhantu vhonti avha mu nyumba yaaho kuuti mupokwe.’
15“Lwe naakwanda kuyanga na vhantu ivho, naluvhiilo uMupepo uMufinjile ahavhiishila, inza vwe átwishiiye niiswe pa vhwandilo. 16Nkakumbuha izwi liila lye uMwene uYeesu átuvhuziizye átili, ‘Nalyoli uYoohani ahavhozyaga avhantu na minzi, ileelo imwe muliyoozelwa nu Mupepo uMufinjile.’#11:16 iMbombo izya Vhatumwa 1:5 17Ishi inga uMulungu ávhapiiye avhantu ivha ishikunjilwa sheshiila she átupiiye niiswe, swe tumwitisile uMwene uYeesu Chilisiti, ine ne naanu ne ingasivhiilila kuuti ingamuhaana uMulungu?”
18AVhayuuda vhe vhámwitisile uYeesu lwe vhiivwa izyo, vhahaleha kudalisya. Vhahamutiima uMulungu vhahati, “Fwandi uMulungu avhapiiye vhoope avhantu vhe te Vhayuuda idala lye vhangatonta imbiivhi zyavho, inga vhavhwaje uvhulanzi uvhwa shiima!”
Ishivhanza isha ku Antiyookiya
19Avhalandati avha Yeesu vhe vhásaasite kuzya mayimba lwe vhamugoga uSiteefani, vhahasogola mu nsi iya Foyiniikesi ni ya mu Kiipulo na mu nkaaya iya Antiyookiya. Kwonti ukwo, vhahalumbililaga izwi ilya Mwene uYeesu kwe ku Vhayuuda vhweleele. 20Ileelo mu Antiyookiya, mwáli avhalandati vhamo avha Yeesu vhe vháshimbiiye kufuma ku Yelusaleemu. Ivha vhínzile kufuma mu nsi iya Kiipulo na mu nkaaya iya Kileene. Avheene vhahanda kulumbiilila Izwi iLyinza ilya Mwene uYeesu na ku vhe te Vhayuuda. 21Amaha aga MWENE uMulungu gáamile pooka navho, avhantu avhinji nkaani vhahiitiha nu kutaliha kumulandata uMwene uYeesu.
22Avhantu avha shivhanza isha ku Yelusaleemu, lwe vhiivwa izyo zye zivhombesile ku vhantu ivho avha mu Antiyookiya, vhahamusonteelezya uBalinaaba kuukwo. 23Lwe aafiha ukwo, ahalola vwe uMulungu avhaloosite avhantu ivho, ahaseshela nkaani. Ahavhalambiilizya vhonti kuuti, vhajendelelaje kuvha vhatungamu kwa Mwene uYeesu ku mwoyo wonti. 24UBalinaaba áamile muntu umwinza, áyizuuye uMupepo uMufinjile, havhili áamile nu lwitiho nkaani. Pe avhantu avha Mwene vhahonjela kuvha vhinji nkaani.
25Pisinda, uBalinaaba ahasogola mu nkaaya iya Taaso kumulondola uSaavhuli. 26Lwe amwaga, ahamuleeta ku Antiyookiya. Pe vhahatendama kuukwo umwaha wonti, vhahavhungaanaga pooka na vhantu avha mu shivhanza, vhahasambilizyaga avhantu avhinji nkaani izya Yeesu. Pa Antiyookiya ipo pe avhantu vhátalisile kuvhiita avhalandati avha Yeesu kuuti Vhachilisiti.
27Insiku izyo, vhahinza pa Antiyookiya avhakuvhwi vhamo kufuma ku Yelusaleemu. 28Wooka muli ivho, izina lyakwe vhahatinji uAgaabo. Uweene ahimiilila, ahakuvhwa uvhukuvhwi kutuushila kwa Mupepo uMufinjile kuuti, inzala impiti yiliigwa mu nsi nyinji. Inzala iyo ye yáfumiiye, lwe uKayisaali uKilavhudiyo umwene umupiti ahazikonzyaga insi izyo. 29Kufumiilana niizyo, avhalandati avha Yeesu vhahitinkana kuuti, vhonti vhafumwe ivintu, kufumiilana na viila vwe vhali navwo, inga vhavhaavwe avhamwavho avha ku Yudeeya. 30Vhahavivhungaaniha nu kuuvhapa avha Balinaaba nu Saavhuli, vhoope vhahavitwala ku vhasongo avha shivhanza isha ku Yelusaleemu.
Селектирано:
iMbombo izya Vhatumwa 11: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.