Smnlean 1
1
Smnlean Utux Baro
1Prdingan bale, Utux Baro we smnalu karac ma dxeral. 2Uka mnmaanu ma mrrudu ka dxeral, mkuung riyung ka bobo ebun toma. Bgihur Utux Baro mlgelu mkkesa bobo qsiya. 3Rmengo ka Utux Baro: “Pniqi ledax.” Kiya de niqan ka ledax. 4Mita ledax ka Utux Baro we malu kesun na. Kiya de psnakun na ka ledax ma mnkuung. 5Diyan kesun na ka ledax, keeman kesun na ka mnkuung. Niqan keeman, niqan mgrebu de kiya ka tgkingal ali.
6Rmengo ka Utux Baro: “Pniqi rangah ka cenga qqsiya, psnaki ka qsiya ma qsiya.” 7Kiya de smalu rangah ka Utux Baro da. Psnakun na ka qsiya ga toma rangah ma qsiya ga bobo rangah. Wada so kiya ka noda di. 8Rangah we “Karac” kesun na tmngayan ka Utux Baro. Niqan keeman, niqan mgrebu de kiya ka tg2 ali.
9Rmengo ka Utux Baro: “Psseli kingal nniqan ka qsiya ga toma karac, so maha mtuura ka dxeral mdengu.” Wada so kiya ka noda di. 10Dxeral mdengu we “Dxeral” kesun na tmngayan ka Utux Baro. Qsiya pnsseli we “Rcilung” kesun na tmngayan. Qmita ka Utux Baro we malu kesun na. 11Rmengo ka Utux Baro: “Phrei hnrean ka dxeral. Hnrean bobo dxeral we pniqi lmlamu klegan, kiya ka uuqun ma sama niqan rehak, qhuni mghei ma heyi na we niqan rehak” Wada so kiya ka noda di. 12Kiya de hmeru hnrean ka dxeral da. Kiya ka lmlamu klegan uuqun ma sama. Lmlamu klegan qhuni mhei, heyi na we niqan rehak. Qmita ka Utux Baro we malu kesun na. 13Niqan keeman, niqan mgrebu de kiya ka tg3 ali.
14Rmengo ka Utux Baro: “Karac baro we pniqi mpkledax maha ptgaanak diyan ma keeman. Kiya we ppskraya, ptgaanak ali mpmisan na misan ma mprbagan na rbagan ali knkawas. 15Dheya we mpkledax karac baro, pledax bobo dxeral.” Wada so kiya ka noda di. 16Kiya de Utux Baro we smmalu daha paru ledax. Paru na we qmlahang diyan, biciq na we qmlahang keeman. Kiya de smnalu ppngerah dungal. 17Utux Baro we psaun na karac baro ka ldledax nii, kiya de ppledax bobo dxeral. 18Mpqlahang diyan ma keeman, ptgaanak ledax ma mnkuung. Qmita ka Utux Baro we malu kesun na. 19Niqan keeman, niqan mgrebu de kiya ka tg4 ali.
20Rmengo ka Utux Baro: “Qsiya we pniqi egu mlgelu muudus. Bobo dxeral ma ckceka karac we pniqi qbheni.” 21Kiya de Utux Baro we smmalu paru qcurux ma, lmlamu klegan mlgelu muudus ckceka qsiya. Kiya duri ma lmlamu klegan qbheni niqan palic. Qmita ka Utux Baro we malu kesun na. 22Utux Baro we sbleqan na ka kana nii, rmengo: “Krana egu, stngai qsiya ga ckceka rcilung. Qbheni duri we krana bobo dxeral duri.” 23Niqan keeman, niqan mgrebu de kiya ka tg5 ali.
24Rmengo ka Utux Baro: “Dxeral we ppniqi lmlamu klegan mlgelu muudus. Kiya ka lmlamu klegan tnbugan, kuyi mkkarang, camac bbuyu.” Wada so kiya ka noda di. 25Kiya de Utux Baro we smmalu lmlamu klegan camac bbuyu, lmlamu klegan tnbugan, lmlamu klegan kuyi mkkarang. Kana mlgelu muudus bobo dxeral. Qmita ka Utux Baro we malu kesun na.
26Rmengo ka Utux Baro: “Ita we pdae ta hnyegan ta, pntnae ta so ita, smlee ta seediq. So maha kmlawa qcurux ga ckceka rcilung, qbheni ga karac baro, tnbugan ma camac kana bobo dxeral ma, kana lmlamu kuyi ga mkkarang.” 27Kiya de Utux Baro we spntena na hnyegan na smmalu seediq. Spntena na hnyegan Utux Baro smmalu dheya. Smnalu dheya ka heya, niqan rseno ma mqedil. 28Sbleqan na ka dheya, rmengo dheya ka Utux Baro: “Krana tmlaqi, so maha stenge dxeral nii, mpqlahang hiya. Qlhangi ka qcurux ga ckceka rcilung, qbheni ga karac baro ma, kana lmlamu mlgelu muudus ga bobo dxeral.” 29Rmengo ka Utux Baro: “Tai, wada mu sbege yamu kana ka uuqun ma sama niqan rehak ma, kana qhuni mghei, ckceka heyi na we niqan rehak. Kana nii we maha namu ngalun uuqun. 30Quri so kana camac ga mkkesa bobo dxeral, qbheni ga skiya karac baro, kiya uri we kana ga mkkarang dxeral, kana mlgelu niqan knuudus we, tbugun mu speriq ma sama.” Wada so kiya ka noda di. 31Qmita kana snmalu na ka Utux Baro, tai, to malu riyung. Niqan keeman, niqan mgrebu de kiya ka tg6 ali.
Селектирано:
Smnlean 1: Stgdaya
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020