Matayi 8
8
Ukumupozyʼuzvamambombo
1-4: Mal. 1,40-44. Luk. 5,12-14.
1Uwene lelo lwʼakwiha pigamba, pe vahamulandatʼavantʼimpugʼimpiti. 2Pe vahaga uwamambombo, ahapalamila kukwakwe ahamusugamilila ahati: Mwene ingʼukasime, pʼumanyilʼiwe ukumpozya. 3PʼuYesu ahagolosyʼumuhono, ahamupalamansyʼumuvili ahati: Nkasime, polaga. Pʼahapola pupʼamambombo. 4PʼuYesu ahamuvuzya ahati: Yenya lelo, utamuvuzyaje numʼumuntu, nkandʼuvalʼuyilolesye kuvashiputo, ufinjile huho hʼahomelezizyʼuMose, he havanje ha kumanyila mumwʼavene.
Ukupola kwa muvomyi wa mupiti wa vasikali
5-13: Luk. 7,1-10.
5Ilelo lwʼakwinjila mu-Kapelinahumu, pʼumupiti woka wa vasikali ahapalamila kukwakwe ahalambilizya, 6ahati: Mwene, umuntu wane ali muvulili kuhaya, avinilʼishulu, shikumuyimṿwa nkani. 7Ahamuvuzya ahati: Nkwinza nkumuzuzuvushizya. 8Uwenʼumupiti wa vasikali ahamula ahati: Mwene, ntahondeyʼine ukutʼiwe uyinjilaje munyumba yane. Yangagʼizwi lyoka vwelele, pʼakuzuzuvuhʼumuntu wane. 9She ne muntu nane mbisilwe kuṿinama kuvapiti, nane ndi navasikali kuṿinama kumwane. Ilelo inga nkuyanga kuli woka nkuti: Valaga, pʼakuvala, kuwamwavo inga nkuti: Nzagaga, pʼakwinza, uwenʼumunyamata wane inga nkumuvuzya nkuti: Vombagʼahalivʼiha, pʼakuvomba. 10UwenʼuYesu lwʼayiṿuye zinizi, pʼahasukumila ahavavuzya ve vahamulandata ahati: Nalyoli ulwitiho inzʼulu, lwe ntalwazile mwa Yisilayili umu. 11Nkuvavuzyʼine lelo nkuti: Valifuma nakuvutukulo vwʼizuva nakuvuswelo ve vinji ve vakwinzʼukutendama navaAbulahamu nuYisikaka nuYakobu ukulyʼiṿintu mushinamwene sha kumwanya. 12Nkandʼavenʼavanashinamwene ve valibunchilwa mushisi sha kuluvazu, mwe ziliva mumwo nkuta ntupu, mwe luliva mumwo nululumanyo lutupu lwa mino. 13UYesu ahayanga kwa mupiti wa vasikali ahati: Iwe valaga ukwaga azuzuvusile inza she zizyo uyitisile wenewe. Pʼumuntu wakwe ahazuzuvuha pahavalilizyo huho.
Ukuzuzuvuha kwa nyinaṿwala wa Simoni navanji vamʼavinji
14-17: Mal. 1,29-34. Luk. 4,38-41.
14PʼuYesu ahafiha munyumba ya Peteli, mwʼahagʼunyina-ṿwala wa Peteli muvulili ninzegema. 15Ahamulemʼumuhono, pʼinzegema yihamuleha. Pʼahavuha nukuvatelamishilʼiṿintu. 16Ilelo lwe vwiliye shamazuva, pe vahamuletelʼavinji ve vali nimpepʼimbivi. Uwenʼimpepo zinizi ahazishimbizya nalye lizwi lyeka. Vonti nava ve vavinile ahavazuzuvushizya, 17ukuti zilunjihaje zizyo zyʼayanzilʼuYesaya umukuvwi wʼatili: Uwene nuvupotwe vwitu ayivegazizye, nuvuyeyevazu vwitu anyatuye.
Ukulingwa kwa ve vali vavanje vasundikwa
19-22: Luk. 9,57-60.
18Ayazile lelʼuYesu avantʼimpuga vamwimiliye vamuvisile pahati, pʼahahomelezyʼukulamba mwisyila lila. 19Pe wokʼumumanyakalata ahapalamila kukwakwe ahati: We musambilizi, nkukulandata mwonti mwʼukujenda. 20UwenʼuYesu ahamuvuzya ahati: Izyenʼinyimba zili namashembo, Zyope ninyunyi zili niṿisanzo. UwenʼuMwanamuntu nyene wʼate napamo apa kusagamihʼitwe. 21Uwamwavʼumusundikwa ahayanga nawo ahati: Mwene, undeshe suti imbale ukusyilʼutata. 22UwenʼuYesu ahamuvuzya ahati: Ndandatagʼiwe, uvaleshʼavafwe vavasyilajʼavafwe vavo.
UYesu akupililʼusumbi ninkungu ukuti vitehame
23-27: Mal. 4,35-41. Luk. 8,22-25.
23Pʼahazuva mwivoti, avasundikwa vakwe vahamulandata. 24Yenyi, usumbi ahalambana nkani namavilingwa gahadomoshela mwivoti. Uwene shʼakasitʼutulo. 25Pe vahinzʼukumuyinzya vahati: Mwene utupohaje tukulova. 26Uwenʼahati: Mukwogopa shonu mwe valwitihʼulupupusʼimwe? Pʼahavuha ahapililʼinkungu nusumbi, ilelo pe kuhategama vwelele. 27Avenʼavantu vahasukumila vahati: We muntu vulʼuno? Shʼinkungu nusumbi vikumusajila.
Avampepʼinkandamanu va mu-Gadaleni
28-34: Mal. 5,1-20. Luk. 8,26-39.
28Ilelo lwʼavazilʼukufiha isyila lila, munsi ya vaGadaleni, pʼahahomana navantu vavili ve vali nimpepʼimbivi, ve vahafuma mumbipa. She valʼavahali nkani, navantu vapositwʼukutuha mwidala lilyo. 29Avene vahavilishila vahati: Tuli vuli naswe nawe we Mwana wa Mulungu? Uyinzilʼukutwizizya lwe pashili? 30Lyalipo lelo apatali pupo pilisyo idimilʼipiti lya nguluve. 31Pʼimpepʼimbivi zihalambilizya kukwakwe zihati: Fwane ingʼukutufumwa pʼututumaje mwidimilo lya nguluve lila lelo. 32Uwenʼahamula ahati: E, mwinjilaje. Izyene zihafuma, zihinjila munguluve. Pʼidimilo lyonti lihagalagatila kuluvambala, vahayitaga mwa sumbi.
33Avene ve vahadimagʼinguluve vahashimbila vahavala munkaya, vahazitangazya zyonti nazye zya vantu va mpepʼimbivʼiva. 34Pʼavantu inkaya yonti vahafuma, vahavalʼukumwenyʼuYesu. Ilelo lwe vamuwenyi pe vahalambilizya kukwakwe vahati: Uyepaje munsi yitʼumu.
Селектирано:
Matayi 8: NYi1965
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Nyiha New Testament © British and Foreign Bible Society, 1965.