Yohane 8
8
1Kweni Yesu wanguya mu phiri la Olivete. 2Ndi mlenjilenji wanguza so mu kasopi, ndipo khamu lose linguwungana kwaku iyo; ndipo wati waja pasi, waŵasambizganga. 3Ndipo ŵalembi#8.3 ŵalembi: Uku ndiku kuti ŵasambizgi ŵa marangu. ndi ŵaFarisi ŵanguza nayo munthukazi wakusanirika pa ureŵi; 4ndipo ŵati ŵamjarika mukati, ŵatiti kwaku Yesu, “Msambizgi, uyu munthukazi wangusanirika pa ureŵi mu kachitidu imu. 5Ndipo mu langulu lidu Mosese wangutilanguliya kumupong'a mya waviyo kuti wafwe. Kweni imwe, na, mutitinji ndi iyo?” 6Kweni ichi ŵakambiyanga kumwesa, alinga ŵaŵe nako kakumsumuwa. Kweni Yesu wangukotama pasi, wangulemba ndi munwi wake pa dongu. 7Kweni ŵachirutiriya kumfumba, wanguyinuka, ndiwangunena nawo, “Mzira-ulakwi mukati mwinu wadange kumpong'a mya.” 8Ndipo wangukotama so pasi, ndi wangulemba pa dongu. 9Kweni iwo, ŵati ŵavwa yagha, wasotopokangamu yumoza-yumoza, kwanda ku ŵara mpaka ku ŵakumariya: Yesu wangusiyika yija, ndi munthukazi yo wakuma mukati. 10Ndipo Yesu wanguyunuka ndi wangumfumba, “Wamunthukazi, ŵe pani? Kumbi pengavi yumoza wakukususka?” 11Iyo wanguti, “Kwengavi, Ambuya,” ndipo Yesu wanguti, “Chingana ndine kuti ndikususka cha. Rutanga, kweni ungalakwa so cha.”]
Yesu ukweru wa charu
12Viyo Yesu wangurongoro so nawo, wakuti, “Ine ndine Kungweruka kwa charu: wakurondo ine kuti wakendanga mu mdima cha, kweni waŵenge ndi kungweruka kwa umoyo.” 13Viyo ŵangumnene ŵaFarisi, “Ujisimikizgiya wamweni; iku chisimisimi chako kuti nchakuneneska cha.” 14Yesu wangwamuka, wangŵanene, “Chingana ndijisimikizgiya, ndamweni, chisimisimi changu nchakuneneska; pakuti ndiziŵa ko ndikutuwa, ndi ko nditiya; imwe kuti muziŵa ko ndikutuwa, pamwenga ko nditiya cha. 15Imwe muteruzga kwakuyana ndi zeru za unthu kuti nditeruzga yumoza cha. 16Ndikweni asani ndingeruzga ine, cheruzgu changu nchakuneneska; pakuti kuti nde ndija cha, kweni ine ndi Dada wakundituma. 17Inya mu langulu linu kwalembeka, kuti ukaboni waŵanthu ŵaŵi ngwakuneneska. 18Ine nditijiŵiya kaboni wa paku Ndamweni, ndipo Dada wakundituma wasimikizga vyapaku ine.” 19Viyo ŵamuneniyanga, “Ŵe pani Ausu?” Yesu wangwamuka, “Kuti muziŵa cha chingana ndi ine, chingana mba Ada: asani munguziŵa ine, mphanyi mutiŵaziŵa Ada nawo.” 20Mazu yagha wangurongoro nawo muchipinda chakusungiya mu ndrama, wachisambizga mu kasopi; ndipo kuti yumoza wangumko cha; pakuti ora lake lengalindaze.
21Wanguŵanene so, “Ine ndiruta, ndipo mundilembenge, mufwenge mu ulakwi winu: kweniko ndita, kuti muziŵa kuzako imwe cha.” 22Viyo ŵaYuda ŵakambanga, “Kumbi wajibayenge? Pakuti watiti, ‘Ko ine nditiya, imwe kuti muziŵa kuzako cha’?” 23Yesu wanguŵanene, “Imwe mwe ŵakutuwa pasi, ine ndi wakutuwa kuchanya; imwe mwe ŵa charu chino; ine kuti nde wa charu chino cha. 24Ndingukuneniyani kuti mufwenge mu vilakwa vinu: chifukwa asani mureka kuvwana kuti ine ndine iyo, mufwenge mu vilakwa vino.” 25Iwo ŵamneniyanga, “Iwe ndiwe yani?” Yesu wanguŵanene, “Uli ndimo ndarongorole namwe kutuwa ku chiyambo. 26Nde navyo vinandi kurongoro ndi kweruzga paku imwe; kweni Wakundituma yo ngwakuneneska; ndipo ine ndirongoro ku charu vyo ndavwa kwaku iyo.” 27Kuti ŵanguwamo cha kuti waŵaneniyanga ndi Dada. 28Yesu wanguŵanene, “Penipo mukasoskanga, Mwana wa munthu, ndipo muziŵenge kuti ine ndine iyo ndi kuti kutuwa kwaku Ndamweni kuti ndichita kanthu cha, kweni nge ndimo wandisambizgiya Dada, ndirongoro vyenivi. 29Ndipo Wakundituma yo we nane pamoza; kuti wandijowo Ndija cha; pakuti nyengo zose ndichita cho chitumkondweska.” 30Wachirongoro vyenivi, ŵanandi wanguvwana mwaku iyo.
Kuŵa ŵanangwa
31Viyo Yesu wangunena ndi ŵaYuda wo wanguvwana mwaku iyo, “Asani mujaririyenge imwe mu mazu ghagu, nadidi mwe ŵasambizi ŵangu; 32ndipo muziŵenge uneneska, ndipo uneneska wo usanduskenge imwe ŵanangwa.” 33Wangumwamuka, “Te mbeu yaku Abrahamu, ndipo kali kose kuti taŵa ŵaŵanda ku yumoza cha: ukamba uli iwe, ‘Muŵenge ŵanangwa?’ ”
34Yesu wanguŵamuka, “Nadidi ndikuneneskiyani, yose wakuchita chilakwa, ndi muŵanda wachilakwa cho. 35Ndipo muŵanda kuti wajaririya mu nyumba muyaya cha: mwana ndiyo wajaririya muyaya. 36Viyo asani Mwana watimsanduskani ŵanangwa mbwenu muŵengedi ŵanangwa. 37Ndiziŵa kuti mwe mbeu yaku Abrahamu; kweni mulembe kundibaya, pakuti mazu ghangu ghalive kusaniya malo mwaku imwe. 38Vyo ndawona ine ku Ada ndi vyo ndirongoro; namwe so muchita vyenivyo mwawona ku auskemwe.”
39Wangwamuka, wangumnene, “Auskefwe mba Abrahamu.” Yesu waŵanene, “Ne mwenga ŵana ŵaku Abrahamu, mphanyi mwachitanga nchitu zaku Abrahamu. 40Kweni sono mulembe kundibaya, ndamunthu ndamwenini ndarongoro namwe uneneska, wo ndinguvwa kwaku Chiuta: ndipo Abrahamu wengavi kuchichita ichi. 41Imwe muchita nchitu za auskemwe.” Wangumwamuka, “Ifwe kuti tapapika mu ureŵi cha, te nayo uskefwe yumoza, ndiyo Chiuta.” 42Yesu wanguŵanene, “Asani Chiuta wenga uskemwe, mphanyi mwandanja ine: chifukwa ine ndaza kutuwa kwaku Chiuta; chifukwa kuti ndikuza mukhumbo laku ine ndija cha, wakundituma ndiyo. 43Chifukwa chine mureka kuwamu mu kakambidu kangu? Nchifukwa chakuti mulive kuziŵa kughavwa mazu ghangu. 44Imwe mwe ŵa uskemwe diabolo yo, ndipo maulakalaka gha uskemwe ndigho mukhumba kuchita. Iyo wenga mubayaŵanthu kutuwa ku mtendeku, ndipo kuti wendi kanthu ndi uneneska cha, pakuti mulive uneneska mwaku iyo. Po warongoro utesi, warongoro vya umoyo wake: pakuti ndi mtesi ndipo ndi uskeu wa ŵatesi. 45Kweni chifukwa ine ndikamba uneneska, kuti muvwana nane cha. 46Njani wamwaku imwe yo watindipacha ndi ulakwi? Asani ndirongoro uneneska, chifukwa chine mureka kuvwana mwangu? 47Wakwaku Chiuta watuvwa makambidu ghaku Chiuta: chifukwa chenichi imwe kuti mutughavwa cha, chifukwa kuti mwe ŵakwaku Chiuta cha.”
Yesu ndi Abrahamu
48ŴaYuda ŵangwamuka ndi ŵangumnene, “Asi tikamba kwakurunjika kuti we muSamaria iwe, ndipo we ndi demone?” 49Yesu wangwamuka, “Kuti nde ndi demone cha, nditumbika Ada, imwe ndimwe muyuyuwa ine. 50Ine kuti ndipenja unkhankhu wangu cha: walipo wakuwupenja ndi wakweruzga. 51Nadidi ndikuneneskiyani, asani yumoza wangasunga mazu ghangu, kuti wamuwona nyifwa cha.” 52Ŵangumnene ŵaYuda, “Sono tiziŵiska kuti we ndi demone. Abrahamu wakufwa ŵamchimi ŵakufwa, kweni iwe utiti, ‘Asani yumoza wangasunga mazu ghangu, kuti wamkwesa nyifwa cha muyaya!’ 53Kumbi iwe we mraku ku Auskefwe Abrahamu, mweniyo wakufwa? Ndi ŵamchimi wo ŵakufwa utijisanduska kuŵa yani?” 54Wangwamuka Yesu, “Asani ine nditijikankhuska unkhankhu wangu kuti nkhanthu cha; Ada mbakundikankhuska; wo imwe munena, kuti ndi Chiuta winu; 55ndipo kuti mwaŵaziŵa cha; kweni ine ndituŵaziŵa, asani ndinganena kuti ndirive kuŵaziŵa ndiŵenge wakukozgana ndi imwe, mutesi, kweni ndituŵaziŵa, ndipo ndisunga mazu ghawo. 56Abrahamu, auskwemwe, wangukondwere kuliwona zuŵa langu; wanguliwona, ndipo wangusekere.” 57ŴaYuda ŵangumnene, “Ndasono undaŵe ndi virimika machumi ghakhonde ndipo kumbi ukumuwona Abrahamu?” 58Wanguŵanene Yesu, “Nadidi ndikuneneskiyani, wenga wandawe Abrahamu, ine ndiriko.” 59Viyo ŵangusoska mya kuti ŵampong'e: kweni Yesu wangubisama, ndipo wangutuwako ku kasopi.
Селектирано:
Yohane 8: TongaMw
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society of Malawi