Luka 24
24
Jesu mbwaakabuka kuzwa kubafu
(Mateyo 28.1-10; Maako 16.1-8; Joni 20.1-10)
1Cifumo-fumo kapati mubuzuba butaanzi bwamvwiki bakaintu bakainka kucuumbwe kabayumwide mafuta atununkilizyo ntobakabambidwe. 2Bakaakujana kuti bbwe lyakasinkide acuumbwe lili kunkulisidwe. 3Aboobo bakanjila mukati kacuumbwe, pele bakajana kuti mutumba wa Jesu tuumo pe. 4Kabacikatazigwa aceeci cakacitika, mpoonya baalumi bobilo bakaima. Baalumi aabo bakasamide zisani zimweka. 5Bakaintu aaba, kabayoowede kapati, bakakotama akulanga ansi, ciindi baalumi aabo niibakababuzya kuti, “Nkaambo nzi ncomuyandaula muntu muumi akati kabafu? 6Tamo muno pe, wabuka! Amuyeeye ncaakamwaambila naakacili mucisi ca Galilii naakati, 7‘Mwanaa Muntu uleelede kwaabwa mumaanza aabantu babi, akuti akankaminwe aciingano akubusigwa kuzwa kubafu mubuzuba bwatatu?’”
8Mpoonya bakaintu bakayeeya majwi aa Jesu, 9eelyo bakapiluka kuzwa kucuumbwe, akuyooambila basikwiiya bali kkumi aumwi makani aaya, akuli bamwi baccilili bakwe. 10Aabo bakaintu bakali Maliya waku Magadala, Jowana, a Maliya banyina Jemusi. Aaba abakaintunyina bamwi, mbabakaambila batumwa ba Jesu makani aaya. 11Pele batumwa bakayeeya kuti cakaamba bakaintu cakali cabufuba-fuba buyo, taakwe nibakabazuminina. 12Pele Pita wakanyamuka akuzuzaanina kucuumbwe. Naakaakusondela wakabona buyo zisani mwakavungailidwe mufu. Mpoonya wakabweeda kumunzi kakatazidwe mumoyo akaambo kacintu cakacitika.
Jesu mbwaakeenda lweendo lwakumunzi wa Emeyusi
(Maako 16.12-13)
13Mubuzuba oobo mbubonya basikwiiya bobilo, bakali kuya bweenda kuya kumunzi wa Emeyusi. Kuzwa ku Emeyusi kusikila ku Jelusalemu kakali kasinzo, 14nibakali kuya bweenda bakali kuya bwaambaula makani aazintu zyakacitikide. 15Kabacaambaula akukazyanya makani aaya, Jesu lwakwe mwini wakasika akutalika kweenda ambabo. 16Bakamubona, pele tiibakamuziba pe. 17Mpoonya Jesu wakababuzya wati, “Ino makani nzi ngomuya bwaambaula?”
Balo bakaima, kabalangika kuti baluuside. 18Eelyo umwi wabo wakali kutegwa Kiliyopasi wakabuzya kuti, “Sena yebo uli mweenzu mu Jelusalemu, ootazi zyakacitika mazuba aaya ngoonya?”
19Walo wakabuzya kuti, “Ino nzintu nzi?”
Bakaingula kuti, “Zintu zyakacitika kuli Jesu waku Nazaleta. Ooyu muntu wakali musinsimi mupati, wakali kugambya mumilimo amukwiisya kwakwe, alimwi wakali kulemekwa a Leza abantu boonse. 20Pele bapaizi basilutwe abapati bamwi bakamwaaba kuti apegwe mulandu walufu, eelyo wakankaminwa aciingano. 21Pele swebo twakali kuyeeya kuti ngonguwe uuti kanunune Isilayeli! Ono sunu kwiindide mazuba otatwe eeci kacicitikide. 22Lino bakaintu bamwi bankamu yesu batugambya. Balifumide kucuumbwe kakucisiya-siya ansi 23pele tiibuujana mutumba wakwe mucuumbwe pe. Nibaboola baamba kuti babona buyo bangelo baamba kuti muumi. 24Alimwi bamwi beenzuma bainkide kucuumbwe, bajana mbubonya mbuli bwaambide bakaintu pele walo tabamubwene pe.”
25Mpoonya Jesu wakati kulimbabo, “Muli bafuba-fuba, ha! Tamufwambaani kuzumina zintu zyoonse nzobakaamba basinsimi! 26Sena tiicakeelede kuti zicitwe zintu eezi ku Munanike wa Leza kutegwa anjile mubulemu bwakwe?” 27Mpoonya Jesu wakabapandulwida zyoonse zilembedwe mu Malembe zyaamba nguwe, kutalikila kumabbuku ngaakalemba Mozesi mane do kuli zeezyo nzyobakalemba basinsimi.
28Nibakasika aafwiifwi amunzi nkubakali kuya, Jesu wakatiindilile, 29pele balo bakamukasya bati, “Kkala aswebo, nkaambo bona, kwasiya kale, zuba lyabbila.” Mpoonya wakanjila abalo muŋanda. 30Naakasengela ambabo, wakabweza cinkwa, wakomba, mpoonya wacikomona wacipa kulimbabo. 31Eelyo meso aabo akajaluka, bakamuziba, mpoonya aawo wakazimaana tiibakacimubwene limbi. 32Mpawo bakatalika kulyaambauzya bati, “Sena majwi aakwe taali kutuyasa ciindi naali kukanana andiswe munzila katupandulwida Malembe?”
33Mpoonya bakanyamuka akubweeda ku Jelusalemu ooko nkubakaakujana basikwiiya bali kkumi aumwi balibungene antoomwe abantu bamwi, 34baambaula makani aakuti, “Mwami wabuka ncobeni! Mane Saimoni wamubona!”
35Lino abalo basikwiiya bobilo baya bakatalika kubalungulwida cakacitika munzila, ambobakamuziba naakakomona cinkwa.
Jesu mbwaakalibonya kuli basikwiiya bakwe
(Mateyo 28.16-20; Maako 16.14-18; Joni 20.19-23; Milimo 1.6-8)
36Nibakacili kubaambila makani aaya, Jesu lwakwe wakalibonya cakuyusuka akati kabo akubaambila kuti, “Amube aaluumuno.”
37Pele bakayoowa kapati akuntuntuma, nkaambo bakayeeya kuti babona musangu. 38Walo wakati kulimbabo, “Ino mukatazigwa nzi? Nkaambo nzi ncomuzumbauzya? 39Amulange maanza amaulu aangu, muzibe kuti ndime ncobeni. Amundijataate mumvwe, nkaambo musangu tajisi mubili, azifuwa mbuli mbwendijisi mebo.”
40Naakali kwaamba boobo, wakabatondezya maanza amaulu aakwe. 41Nikubaboobo taakwe nibakazumina nkaambo bakazwide kutangala akugambwa, aboobo wakababuzya kuti, “Sena kuli cakulya ncomujisi aano?” 42Eelyo bakamupa cibeela canswi yakayokedwe. 43Wakacibweza, wacilya kabalangilide.
44Mpoonya wakati kulimbabo, “Eezi nzenzizyo nzindakali kumwaambila eliya nindakacili aandinywe, nkaambo zyoonse zilembedwe zyaamba ndime mu Mulawo wa Mozesi, amumalembe aabasinsimi, amu Ntembauzyo, zileelede kuti zicitike ncobeni.”
45Aboobo wakabagwasya kuti baamvwisye Malembe ncaamba. 46Wakati kulimbabo, “Eeci ncecilembedwe, kuti Munanike wa Leza uleelede kupenga akubuka kuzwa kubafu mubuzuba bwatatu, 47akuti muzina lyakwe makani aakambaukwe kubantu bamisyobo yoonse kutalikila ku Jelusalemu, kuti beempe, eelyo Leza nati balekelele. 48Nkaako nywebo ndinywe bakamboni bazintu eezi. 49Nkabela mebo ndiyoomutumina cipego Taata ncaakasyomezya, pele muleelede kuti kamukkede mumunzi muno mane kusikila mukatambule nguzu zizwa kujulu.”
Jesu mbwaakatolwa kujulu
(Maako 16.19-20; Milimo 1.9-11)
50Eelyo wakabasolweda kuya kumunzi wa Betani, nibakaakusika ooko, Jesu wakanyamuna maanza aakwe, wabaleleka. 51Kacibaleleka boobo, wakaandaana ambabo wabasiya, watolwa kujulu. 52Balo bakamukomba, bakabweeda ku Jelusalemu kabatangede kapati mumyoyo. 53Ciindi coonse bakali muŋanda ya Leza kabalumbaizya Leza.
Селектирано:
Luka 24: Tonga96
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Tonga Bible © United Bible Societies, 1994.